໗. ທຸກ຺ກຣສຸຕ຺ຕວຓ຺ຓນາ

໑໗. ສຕ຺ຕເມ ທຸຕ຺ຕິຕິກ຺ຂນ຺ຕິ ທຸກ຺ຂມໍ ທຸອຘິວາສິຍໍ. ອພ຺ຍຕ຺ເຕນາຕິ ພາເລນ. ສາມຎ຺ຎນ຺ຕິ ສມຓຘມ຺ໂມ. ອິມິນາ ເທວຕາ ອິທໍ ທສ຺ເສຕິ – ຍໍ ປຓ຺ຑິຕາ ກຸລປຸຕ຺ຕາ ທສປິ ວສ຺ສານິ ວີສຕິປິ ສຏ຺ຐິປິ ວສ຺ສານິ ທນ຺ເຕ ອຠິທນ຺ຕມາຘາຍ ຊິວ຺ຫາຍ ຕາລຸໍ ອາຫຈ຺ຈປິ ເຈຕສາ ຈິຕ຺ຕໍ ອຠິນິຄ຺ຄຓ຺ຫິຕ຺ວາປິ ເອກາສນໍ ເອກຠຕ຺ຕໍ ປຏິເສວມານາ ອາປາຓໂກຏິກໍ ພ຺ຣຫ຺ມຈຣິຍໍ ຈຣນ຺ຕາ ສາມຎ຺ຎໍ ກໂຣນ຺ຕິ. ຕໍ ຠຄວາ ພາໂລ ອພ຺ຍຕ຺ໂຕ ກາຕຸໍ ນ ສກ຺ໂກຕີຕິ. ພຫູ ຫິ ຕຕ຺ຖ ສມ຺ພາຘາຕິ ຕສ຺ມິໍ ສາມຎ຺ຎສງ຺ຂາເຕ ອຣິຍມຄ຺ເຄ ພຫູ ສມ຺ພາຘາ ມຄ຺ຄາຘິຄມາຍ ປຏິປນ຺ນສ຺ສ ປຸພ຺ພຠາເຄ ພຫູ ປຣິສ຺ສຍາຕິ ທສ຺ເສຕິ.

ຈິຕ຺ຕຎ຺ເຈ ນ ນິວາຣເຍຕິ ຍທິ ອໂຍນິໂສ ອຸປ຺ປນ຺ນໍ ຈິຕ຺ຕໍ ນ ນິວາເຣຍ຺ຍ, ກຕິ ອຫານິ ສາມຎ຺ຎໍ ຈເຣຍ຺ຍ? ເອກທິວສມ຺ປິ ນ ຈເຣຍ຺ຍ. ຈິຕ຺ຕວສິໂກ ຫິ ສມຓຘມ຺ມໍ ກາຕຸໍ ນ ສກ຺ໂກຕິ. ປເທ ປເທຕິ ອາຣມ຺ມເຓ ອາຣມ຺ມເຓ. ອາຣມ຺ມຓຎ຺ຫິ ອິຘ ປທນ຺ຕິ ອຘິປ຺ເປຕໍ. ຍສ຺ມິໍ ຍສ຺ມິໍ ຫິ ອາຣມ຺ມເຓ ກິເລໂສ ອຸປ຺ປຊ຺ຊຕິ, ຕຕ຺ຖ ຕຕ຺ຖ ພາໂລ ວິສີທຕິ ນາມ. ອິຣິຍາປຖປທມ຺ປິ ວຏ຺ຏຕິ. ຄມນາທີສຸ ຫິ ຍຕ຺ຖ ຍຕ຺ຖ ກິເລໂສ ອຸປ຺ປຊ຺ຊຕິ, ຕຕ຺ຖ ຕຕ຺ເຖວ ວິສີທຕິ ນາມ. ສງ຺ກປ຺ປານນ຺ຕິ ກາມສງ຺ກປ຺ປາທີນໍ.

ກຸມ຺ໂມ ວາຕິ ກຈ຺ຉໂປ ວິຍ. ອງ຺ຄານີຕິ ຄີວປຎ຺ຈມານິ ອງ຺ຄານິ. ສໂມທຫນ຺ຕິ ສໂມທຫນ຺ໂຕ, ສໂມທຫິຕ຺ວາ ວາ. ມໂນວິຕກ຺ເກຕິ ມນມ຺ຫິ ອຸປ຺ປນ຺ນວິຕກ຺ເກ. ເອຕ຺ຕາວຕາ ອິທໍ ທສ຺ເສຕິ – ຍຖາ ກຸມ຺ໂມ ໂສຓ຺ຑິປຎ຺ຈມານິ ອງ຺ຄານິ ສເກ ກປາເລ ສໂມທຫນ຺ໂຕ ສິງ຺ຄາລສ຺ສ ໂອຕາຣໍ ນ ເທຕິ, ສໂມທຫິຕ຺ວາ ຈສ຺ສ ອປ຺ປສຍ຺ຫຕໍ ອາປຊ຺ຊຕິ, ເອວເມວໍ ຠິກ຺ຂຸ ມນມ຺ຫິ ອຸປ຺ປນ຺ນວິຕກ຺ເກ ສເກ ອາຣມ຺ມຓກປາເລ ສໂມທຫໍ ມາຣສ຺ສ ໂອຕາຣໍ ນ ເທຕິ, ສໂມທຫິຕ຺ວາ ຈສ຺ສ ອປ຺ປສຍ຺ຫຕໍ ອາປຊ຺ຊຕີຕິ. ອນິສ຺ສິໂຕຕິ ຕຓ຺ຫາທິຏ຺ຐິນິສ຺ສເຍຫິ ອນິສ຺ສິໂຕ ຫຸຕ຺ວາ. ອເຫຐຍາໂນຕິ ອວິຫິໍສມາໂນ. ປຣິນິພ຺ພຸໂຕຕິ ກິເລສນິພ຺ພາເນນ ປຣິນິພ຺ພຸໂຕ. ນູປວເທຍ຺ຍ ກຎ຺ຈີຕິ ຍໍກິຎ຺ຈິ ປຸຄ຺ຄລໍ ອາຈາຣວິປຕ຺ຕິອາທີສຸ ຍາຍ ກາຍຈິ ມງ຺ກຸໍ ກາຕຸກາໂມ ຫຸຕ຺ວາ ນ ວເທຍ຺ຍ, ‘‘ກາເລນ ວກ຺ຂາມິ ໂນ ອກາເລນາ’’ຕິອາທໂຍ ປນ ປຎ຺ຈ ຘມ຺ເມ ອຊ຺ຌຕ຺ຕໍ ອຸປຏ຺ຐເປຕ຺ວາ ອຸລ຺ລຸມ຺ປນສຠາວສຓ຺ຐິເຕນ ຈິຕ຺ເຕນ ກາຣຸຎ຺ຎຕໍ ປຏິຈ຺ຈ ວເທຍ຺ຍາຕິ.

ທຸກ຺ກຣສຸຕ຺ຕວຓ຺ຓນາ ນິຏ຺ຐິຕາ.