໖. ນິທ຺ທາຕນ຺ທີສຸຕ຺ຕວຓ຺ຓນາ

໑໖. ຉຏ຺ເຐ ນິທ຺ທາຕິ, ‘‘ອຠິຊານາມຫໍ, ອຄ຺ຄິເວສ຺ສນ, ຄິມ຺ຫານໍ ປຈ຺ຉິເມ ມາເສ ນິທ຺ທໍ ໂອກ຺ກມິຕາ’’ຕິ (ມ. ນິ. ໑.໓໘໗) ເອວຣູປາຍ ອພ຺ຍາກຕນິທ຺ທາຍ ປຸພ຺ພຠາຄາປຣຠາເຄສຸ ເສຂປຸຖຸຊ຺ຊນານໍ ສສງ຺ຂາຣິກອກຸສເລ ຈິຕ຺ເຕ ອຸປ຺ປນ຺ນໍ ຖິນມິທ຺ຘໍ. ຕນ຺ທີຕິ ອຕິຈ຺ຉາຕາຕິສີຕາທິກາເລສຸ ອຸປ຺ປນ຺ນໍ ອາຄນ຺ຕຸກໍ ອາລສິຍໍ. ວຸຕ຺ຕມ຺ປິ ເຈຕໍ – ‘‘ຕຕ຺ຖ ກຕມາ ຕນ຺ທີ? ຍາ ຕນ຺ທີ ຕນ຺ທິຍນາ ຕນ຺ທິມນຕາ ອາລສ຺ຍໍ ອາລສ຺ຍາຍນາ ອາລສ຺ຍາຍິຕຕ຺ຕໍ, ອຍໍ ວຸຈ຺ຈຕິ ຕນ຺ທີ’’ຕິ (ວິຠ. ໘໕໗). ວິຊມ຺ຠິຕາຕິ ກາຍວິຊມ຺ຠນາ. ອຣຕີຕິ ອກຸສລປກ຺ຂາ ອຸກ຺ກຓ຺ຐິຕຕາ. ຠຕ຺ຕສມ຺ມໂທຕິ ຠຕ຺ຕມຸຈ຺ຉາ ຠຕ຺ຕກິລມໂຖ. ວິຕ຺ຖາໂຣ ປນ ເຕສໍ – ‘‘ຕຕ຺ຖ ກຕມາ ວິຊມ຺ຠິຕາ? ຍາ ກາຍສ຺ສ ຊມ຺ຠນາ ວິຊມ຺ຠນາ’’ຕິອາທິນາ ນເຍນ ອຠິຘມ຺ເມ ອາຄໂຕວ. ເອເຕນາຕິ ເອເຕນ ນິທ຺ທາທິນາ ອຸປກ຺ກິເລເສນ ອຸປກ຺ກິລິຏ຺ໂຐ ນິວາຣິຕປາຕຸຠາໂວ. ນປ຺ປກາສຕີຕິ ນ ໂຊຕຕິ, ນ ປາຕຸຠວຕີຕິ ອຕ຺ໂຖ. ອຣິຍມຄ຺ໂຄຕິ ໂລກຸຕ຺ຕຣມຄ຺ໂຄ. ອິຘາຕິ ອິມສ຺ມິໍ ໂລເກ. ປາຓິນນ຺ຕິ ສຕ຺ຕານໍ. ວີຣິເຍນາຕິ ມຄ຺ຄສຫຊາຕວີຣິເຍນ. ນໍ ປຓາເມຕ຺ວາຕິ ເອຕໍ ກິເລສຊາຕໍ ນີຫຣິຕ຺ວາ. ອຣິຍມຄ຺ໂຄຕິ ໂລກິຍໂລກຸຕ຺ຕຣມຄ຺ໂຄ. ອິຕິ ມຄ຺ເຄເນວ ອຸປກ຺ກິເລເສ ນີຫຣິຕ຺ວາ ມຄ຺ຄສ຺ສ ວິສຸທ຺ຘິ ວຸຕ຺ຕາຕິ.

ນິທ຺ທາຕນ຺ທີສຸຕ຺ຕວຓ຺ຓນາ ນິຏ຺ຐິຕາ.