ອາສວວາຣວຓ຺ຓນາ
໑໐໔. ອາສວວາເຣ ອວິຊ຺ຊາສມຸທຍາຕິ ເອຕ຺ຖ ອວິຊ຺ຊາ ກາມາສວຠວາສວານໍ ສຫຊາຕາທິວເສນ ປຈ຺ຈໂຍ ໂຫຕິ. ອວິຊ຺ຊາສວສ຺ສ ອຸປນິສ຺ສຍວເສເນວ. ອປຣາປຣຸປ຺ປນ຺ນາ ເຈຕ຺ຖ ອວິຊ຺ຊາ ອວິຊ຺ຊາສໂວຕິ ເວທິຕພ຺ພາ. ປຸພ຺ພຸປ຺ປນ຺ນາ ອວິຊ຺ຊາເຍວສ຺ສ ອປຣາປຣຸປ຺ປນ຺ນສ຺ສ ອວິຊ຺ຊາສວສ຺ສ ອຸປນິສ຺ສຍປຈ຺ຈໂຍ ໂຫຕິ. ເສສໍ ວຸຕ຺ຕນຍເມວາຕິ. ອຍໍ ວາໂຣ ຍາ ເອສາ ປຏິຈ຺ຈສມຸປ຺ປາທປເທສຸ ເຊຏ຺ຐິກາ ອວິຊ຺ຊາ, ຕສ຺ສາປິ ປຈ຺ຈຍທສ຺ສນວເສນ ວຸຕ຺ໂຕ. ເອວໍ ວຸຕ຺ເຕນ ວາເຣນ ສໍສາຣສ຺ສ ອນມຕຄ຺ຄຕາ ສາຘິຕາ ໂຫຕິ. ກຖໍ? ອາສວສມຸທເຍນ ຫິ ອວິຊ຺ຊາສມຸທໂຍ. ອວິຊ຺ຊາສມຸທເຍນາປິ ອາສວສມຸທໂຍ. ເອວໍ ອາສວາ ອວິຊ຺ຊາຍ ອວິຊ຺ຊາປິ ອາສວານໍ ປຈ຺ຈໂຍຕິ ກຕ຺ວາ ປຸພ຺ພໂກຏິ ນ ປຎ຺ຎາຍຕິ ອວິຊ຺ຊາຍ, ຕສ຺ສາ ອປຎ຺ຎາຍນໂຕ ສໍສາຣສ຺ສ ອນມຕຄ຺ຄຕາ ສິທ຺ຘາ ໂຫຕີຕິ.
ເອວໍ ສພ຺ເພປິເມ ອິມສ຺ມິໍ ສຸຕ຺ເຕ ກມ຺ມປຖວາໂຣ ອາຫາຣວາໂຣ ທຸກ຺ຂວາໂຣ ຊຣາ-ມຣຓ-ຊາຕິ-ຠວ-ອຸປາທານ-ຕຓ຺ຫາ-ເວທນາ-ຜສ຺ສ-ສຬາຍຕນ-ນາມຣູປ- ວິຎ຺ຎາຓ-ສງ຺ຂາຣ-ອວິຊ຺ຊາ-ອາສວວາໂຣຕິ ໂສຬສວາຣາ ວຸຕ຺ຕາ.
ເຕສຸ ເອເກກສ຺ສ ວາຣສ຺ສ ສງ຺ເຂປວິຕ຺ຖາຣວເສນ ທ຺ວິຘາ ວິຠຕ຺ຕາ ທ຺ວຕ຺ຕິໍສຏ຺ຐານານິ ໂຫນ຺ຕິ. ອິຕິ ອິມສ຺ມິໍ ສຸຕ຺ເຕ ອິເມສຸ ທ຺ວຕ຺ຕິໍສຏ຺ຐາເນສຸ ຈຕ຺ຕາຣິ ສຈ຺ຈານິ ກຖິຕານິ. ເອເຕສໍເຍວ ວິຕ຺ຖາຣວເສນ ວຸຕ຺ເຕສຸ ໂສຬສສຸ ຐາເນສຸ ອຣຫຕ຺ຕໍ ກຖິຕໍ. ເຖຣສ຺ສ ປນ ມເຕນ ທ຺ວຕ຺ຕິໍສາຍປິ ຐາເນສຸ ຈຕ຺ຕາຣິ ສຈ຺ຈານິ ຈຕ຺ຕາໂຣ ຈ ມຄ຺ຄາ ກຖິຕາຕິ. ອິຕິ ສກເລປິ ປຎ຺ຈມຫານິກາຍສງ຺ຄຫິເຕ ພຸທ຺ຘວຈເນ ນຕ຺ຖິ ຕໍ ສຸຕ຺ຕໍ, ຍຕ຺ຖ ທ຺ວຕ຺ຕິໍສກ຺ຂຕ຺ຕຸໍ ຈຕ຺ຕາຣິ ສຈ຺ຈານິ ທ຺ວຕ຺ຕິໍສກ຺ຂຕ຺ຕຸຎ຺ຈ ອຣຫຕ຺ຕໍ ປກາສິຕໍ ອຎ຺ຎຕ຺ຣ ອິມມ຺ຫາ ສມ຺ມາທິຏ຺ຐິສຸຕ຺ຕາຕິ.
ອິທມໂວຈາຍສ຺ມາ ສາຣິປຸຕ຺ໂຕຕິ ອິທໍ ທ຺ວຕ຺ຕິໍສາຍ ຈຕຸສຈ຺ຈປຣິຍາເຍຫິ ທ຺ວຕ຺ຕິໍສາຍ ອຣຫຕ຺ຕປຣິຍາເຍຫີຕິ ຈຕຸສຏ຺ຐິຍາ ກາຣເຓຫິ ອລງ຺ກຣິຕ຺ວາ ສມ຺ມາທິຏ຺ຐິສຸຕ຺ຕໍ ອາຍສ຺ມາ ສາຣິປຸຕ຺ໂຕ ອໂວຈ, ອຕ຺ຕມນາ ເຕ ຠິກ຺ຂູ ອາຍສ຺ມໂຕ ສາຣິປຸຕ຺ຕສ຺ສ ຠາສິຕໍ ອຠິນນ຺ທຸນ຺ຕິ.
ອາສວວາຣວຓ຺ຓນາ ນິຏ຺ຐິຕາ.
ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ
ສມ຺ມາທິຏ຺ຐິສຸຕ຺ຕວຓ຺ຓນາ ນິຏ຺ຐິຕາ.