໙. ມຏ຺ຐກຸຓ຺ຑລີວິມານວຓ຺ຓນາ

ອລງ຺ກໂຕ ມຏ຺ຐກຸຓ຺ຑລີຕິ ມຏ຺ຐກຸຓ຺ຑລີວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສາວຕ຺ຖິວາສີ ເອໂກ ພ຺ຣາຫ຺ມໂຓ ອທ຺ໂຘ ມຫທ຺ຘໂນ ມຫາໂຠໂຄ ອສ຺ສທ຺ໂຘ ອປ຺ປສນ຺ໂນ ມິຈ຺ຉາທິຏ຺ຐິໂກ ກສ຺ສຈິ ກິຎ຺ຈິ ນ ເທຕິ, ອທານໂຕ ເອວ ‘‘ອທິນ຺ນປຸພ຺ພໂກ’’ຕິ ປຎ຺ຎາຍິຕ຺ຖ. ໂສ ມິຈ຺ຉາທິຏ຺ຐິຠາເວນ ຈ ລຸທ຺ຘຠາເວນ ຈ ຕຖາຄຕໍ ວາ ຕຖາຄຕສາວກໍ ວາ ທຏ຺ຐຸມ຺ປິ ນ ອິຈ຺ຉຕິ. ມຏ຺ຐກຸຓ຺ຑລໍ ນາມ ອຕ຺ຕໂນ ປຸຕ຺ຕຎ຺ຈ ສິກ຺ຂາເປສິ ‘‘ຕາຕ, ຕຍາ ສມໂຓ ໂຄຕໂມ ຕສ຺ສ ສາວກາ ຈ ນ ອຸປສງ຺ກມິຕພ຺ພາ ນ ທຏ຺ຐພ຺ພາ’’ຕິ. ໂສປິ ຕຖາ ອກາສິ. ອຖສ຺ສ ປຸຕ຺ໂຕ ຄິລາໂນ ອໂຫສິ, ພ຺ຣາຫ຺ມໂຓ ຘນກ຺ຂຍຠເຍນ ເຠສຊ຺ຊໍ ນ ກາເຣສິ, ໂຣເຄ ປນ ວຑ຺ຒິເຕວ ເວຊ຺ເຊ ປກ຺ໂກສິຕ຺ວາ ທສ຺ເສສິ. ເວຊ຺ຊາ ຕສ຺ສ ສຣີຣໍ ໂອໂລເກຕ຺ວາ ‘‘ອເຕກິຈ຺ໂຉ’’ຕິ ຕໍ ຎຕ຺ວາ ອປກ຺ກມິໍສຸ. ພ຺ຣາຫ຺ມໂຓ ‘‘ປຸຕ຺ເຕ ອພ຺ຠນ຺ຕເຣ ມເຕ ນີຫຣຓໍ ທຸກ຺ຂ’’ນ຺ຕິ ປຸຕ຺ຕໍ ພຫິທ຺ວາຣໂກຏ຺ຐເກ ນິປຊ຺ຊາເປສິ.

ຠຄວາ ຣຕ຺ຕິຍາ ປຈ຺ຈູສສມເຍ ມຫາກຣຸຓາສມາປຕ຺ຕິໂຕ ວຸຏ຺ຐາຍ ໂລກໍ ໂວໂລເກນ຺ໂຕ ອທ຺ທສ ມຏ຺ຐກຸຓ຺ຑລີມາຓວໍ ຂີຓາຍຸກໍ ຕທເຫວ ຈວນຘມ຺ມໍ, ນິຣຍສໍວຕ຺ຕນິກຎ຺ຈສ຺ສ ກມ຺ມໍ ກໂຕກາສໍ. ‘‘ສເຈ ປນາຫໍ ຕຕ຺ຖ ຄມິສ຺ສາມິ, ໂສ ມຍິ ຈິຕ຺ຕໍ ປສາເທຕ຺ວາ ເທວໂລເກ ນິພ຺ພຕ຺ຕິຕ຺ວາ ປິຕຣໍ ອາຬາຫເນ ໂຣທມານໍ ອຸປຄນ຺ຕ຺ວາ ສໍເວເຊສ຺ສຕິ, ເອວໍ ໂສ ຈ ຕສ຺ສ ປິຕາ ຈ ມມ ສນ຺ຕິກໍ ອາຄມິສ຺ສຕິ, ມຫາຊນກາໂຍ ສນ຺ນິປຕິສ຺ສຕິ ຕຕ຺ຖ ມຍາ ຘມ຺ເມ ເທສິເຕ ມຫາຘມ຺ມາຠິສມໂຍ ຠວິສ຺ສຕີ’’ຕິ ເອວໍ ປນ ຎຕ຺ວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ມຫຕາ ຠິກ຺ຂຸສງ຺ເຆນ ສທ຺ຘິໍ ສາວຕ຺ຖິໍ ປິຓ຺ຑາຍ ປວິຏ຺ໂຐ ມຏ຺ຐກຸຓ຺ຑລີມາຓວສ຺ສ ປິຕຸ ເຄຫສມີເປ ຐຕ຺ວາ ຉພ຺ພຓ຺ຓພຸທ຺ຘຣໍສິໂຍ ວິສ຺ສຊ຺ເຊສິ. ຕາ ທິສ຺ວາ ມາຓໂວ ‘‘ກິເມຕ’’ນ຺ຕິ ອິໂຕ ຈິໂຕ ຈ ວິໂລເກນ຺ໂຕ ອທ຺ທສ ຠຄວນ຺ຕໍ ທນ຺ຕໍ ຄຸຕ຺ຕໍ ສນ຺ຕິນ຺ທ຺ຣິຍໍ ທ຺ວຕ຺ຕິໍສາຍ ມຫາປຸຣິສລກ຺ຂເຓຫິ ອສີຕິຍາ ອນຸພ຺ຍຎ຺ຊເນຫິ ພ຺ຍາມປ຺ປຠາຍ ເກຕຸມາລາຍ ຈ ວິຊ຺ໂຊຕມານໍ ອນຸປມາຍ ພຸທ຺ຘສິຣິຍາ ອຈິນ຺ເຕຍ຺ເຍນ ພຸທ຺ຘານຸຠາເວນ ວິໂຣຈມານໍ. ທິສ຺ວາ ຕສ຺ສ ເອຕທໂຫສິ ‘‘ພຸທ຺ໂຘ ນຸ ໂຂ ຠຄວາ ອິຘານຸປ຺ປຕ຺ໂຕ, ຍສ຺ສາຍໍ ຣູປສມ຺ປທາ ອຕ຺ຕໂນ ເຕຊສາ ສູຣິຍມ຺ປິ ອຠິຠວຕິ, ກນ຺ຕຠາເວນ ຈນ຺ທິມໍ, ອຸປສນ຺ຕຠາເວນ ສພ຺ເພປິ ສມຓພ຺ຣາຫ຺ມເຓ, ອຸປສເມນ ນາມ ເອຕ຺ເຖວ ຠວິຕພ຺ພໍ, ອຍເມວ ຈ ມຎ຺ເຎ ອິມສ຺ມິໍ ໂລເກ ອຄ຺ຄປຸຄ຺ຄໂລ, ມເມວ ຈ ອນຸກມ຺ປາຍ ອິຘານຸປ຺ປຕ຺ໂຕ’’ຕິ ພຸທ຺ຘາຣມ຺ມຓາຍ ປີຕິຍາ ນິຣນ຺ຕຣໍ ຜຸຏສຣີໂຣ ອນປ຺ປກໍ ປີຕິໂສມນສ຺ສໍ ປຏິສໍເວເທນ຺ໂຕ ປສນ຺ນຈິຕ຺ໂຕ ອຎ຺ຊລິໍ ປຄ຺ຄຍ຺ຫ ນິປຊ຺ຊິ. ຕໍ ທິສ຺ວາ ຠຄວາ ‘‘ອລໍ ອິມສ຺ສ ເອຕ຺ຕເກນ ສຄ຺ຄູປປຕ຺ຕິຍາ’’ຕິ ປກ຺ກາມິ.

ໂສປິ ຕໍ ປີຕິໂສມນສ຺ສໍ ອວິຊຫນ຺ໂຕວ ກາລໍ ກຕ຺ວາ ຕາວຕິໍເສສຸ ທ຺ວາທສໂຍຊນິເກ ວິມາເນ ນິພ຺ພຕ຺ຕິ. ປິຕາ ປນສ຺ສ ສຣີຣສກ຺ກາຣໍ ກຣິຕ຺ວາ ທຸຕິຍທິວເສ ປຈ຺ຈູສເວລາຍໍ ອາຬາຫນໍ ຄນ຺ຕ຺ວາ ‘‘ຫາ ຫາ ມຏ຺ຐກຸຓ຺ຑລິ, ຫາ ຫາ ມຏ຺ຐກຸຓ຺ຑລີ’’ຕິ ປຣິເທວມາໂນ ອາຬາຫນໍ ອນຸປຣິກ຺ກມນ຺ໂຕ ໂຣທຕິ. ເທວປຸຕ຺ໂຕ ອຕ຺ຕໂນ ວິຠວສມ຺ປຕ຺ຕິໍ ໂອໂລເກຕ຺ວາ ‘‘ກຸໂຕ ນຸ ໂຂ ອຫໍ ອິຘາຄໂຕ ກິຎ຺ຈ ກມ຺ມໍ ກຕ຺ວາ’’ຕິ ອຸປຘາເຣນ຺ໂຕ ອຕ຺ຕໂນ ປຸຣິມຕ຺ຕຠາວໍ ຎຕ຺ວາ ຕຕ຺ຖ ຈ ມຣຓກາເລ ຠຄວຕິ ປວຕ຺ຕິຕໍ ຈິຕ຺ຕປ຺ປສາທໍ ມໂນຫຣໍ ອຎ຺ຊລິກຣຓມຕ຺ຕໍ ທິສ຺ວາ ‘‘ອໂຫ ມຫານຸຠາວາ ພຸທ຺ຘາ ຠຄວນ຺ໂຕ’’ຕິ ສາຕິສຍໍ ຕຖາຄເຕ ສຎ຺ຊາຕປ຺ປສາທພຫຸມາໂນ ‘‘ອທິນ຺ນປຸພ຺ພກພ຺ຣາຫ຺ມໂຓ ນຸ ໂຂ ກິໍ ກໂຣຕີ’’ຕິ ອຸປຘາເຣນ຺ໂຕ ອາຬາຫເນ ໂຣທມານໍ ທິສ຺ວາ ‘‘ອຍໍ ມຍ຺ຫໍ ປຸພ຺ເພ ເຠສຊ຺ຊມຕ຺ຕມ຺ປິ ອກຕ຺ວາ ອິທານິ ນິຣຕ຺ຖກໍ ອາຬາຫເນ ໂຣທຕິ, ຫນ຺ທ ນໍ ສໍເວເຊຕ຺ວາ ກຸສເລ ປຕິຏ຺ຐາເປສ຺ສາມີ’’ຕິ ເທວໂລກໂຕ ອາຄນ຺ຕ຺ວາ ມຏ຺ຐກຸຓ຺ຑລີຣູເປນ ໂຣທມາໂນ ‘‘ຫາ ຫາ ຈນ຺ທ, ຫາ ຫາ ສູຣິຍາ’’ຕິ ພາຫາ ປຄ຺ຄຍ຺ຫ ກນ຺ທນ຺ໂຕ ປິຕຸ ສມີເປ ອຏ຺ຐາສິ. ອຖ ນໍ ພ຺ຣາຫ຺ມໂຓ ‘‘ອຍໍ ມຏ຺ຐກຸຓ຺ຑລີ ອາຄໂຕ’’ຕິ ຈິນ຺ເຕຕ຺ວາ ຄາຖາຍ ອຊ຺ຌຠາສິ –

໑໒໐໗. ‘‘ອລງ຺ກໂຕ ມຏ຺ຐກຸຓ຺ຑລີ, ມາລຘາຣີ ຫຣິຈນ຺ທນຸສ຺ສໂທ;

ພາຫາ ປຄ຺ຄຍ຺ຫ ກນ຺ທສິ, ວນມຊ຺ເຌ ກິໍ ທຸກ຺ຂິໂຕ ຕຸວ’’ນ຺ຕິ.

ຕຕ຺ຖ ອລງ຺ກໂຕຕິ ວິຠູສິໂຕ. ມຏ຺ຐກຸຓ຺ຑລີຕິ ສຣີຣປ຺ປເທສສ຺ສ ອຆໍສນຕ຺ຖໍ ມາລາລຕາທໂຍ ອທສ຺ເສຕ຺ວາ ມຏ຺ຐາກາເຣເນວ ກຕກຸຓ຺ຑໂລ. ອຖ ວາ ມຏ຺ຐກຸຓ຺ຑລີຕິ ວິສຸທ຺ຘກຸຓ຺ຑໂລ, ຕາເປຕ຺ວາ ຊາຕິຫິງ຺ຄຸລິກາຍ ມຊ຺ຊິຕ຺ວາ ໂຘວິຕ຺ວາ ສູກຣໂລເມນ ມຊ຺ຊິຕກຸຓ຺ຑໂລຕິ ອຕ຺ໂຖ. ມາລຘາຣີຕິ ມາລໍ ຘາເຣນ຺ໂຕ, ປິຬນ຺ຘິຕມາໂລຕິ ອຕ຺ໂຖ. ຫຣິຈນ຺ທນຸສ຺ສໂທຕິ ຣຕ຺ຕຈນ຺ທເນນ ສພ຺ພໂສ ອນຸລິຕ຺ຕຄຕ຺ໂຕ. ກິນ຺ຕິ ປຸຈ຺ຉາວຈນໍ. ທຸກ຺ຂິໂຕຕິ ທຸກ຺ຂປ຺ປຕ຺ໂຕ. ກິໍທຸກ຺ຂິໂຕຕິ ວາ ເອກເມວ ປທໍ, ເກນ ທຸກ຺ເຂນ ທຸກ຺ຂິໂຕຕິ ອຕ຺ໂຖ.

ອຖ ນໍ ເທວປຸຕ຺ໂຕ ອາຫ –

໑໒໐໘. ‘‘ໂສວຓ຺ຓມໂຍ ປຠສ຺ສໂຣ, ອຸປ຺ປນ຺ໂນ ຣຖປຎ຺ຊໂຣ ມມ;

ຕສ຺ສ ຈກ຺ກຍຸຄໍ ນ ວິນ຺ທາມິ, ເຕນ ທຸກ຺ເຂນ ຊຫາມິ ຊີວິຕ’’ນ຺ຕິ.

ອຖ ນໍ ພ຺ຣາຫ຺ມໂຓ ອາຫ –

໑໒໐໙. ‘‘ໂສວຓ຺ຓມຍໍ ມຓິມຍໍ, ໂລຫິຕກມຍໍ ອຖ ຣູປິຍມຍໍ;

ອາຈິກ຺ຂ ເມ ຠທ຺ທມາຓວ, ຈກ຺ກຍຸຄໍ ປຏິປາທຍາມິ ເຕ’’ຕິ.

ຕໍ ສຸຕ຺ວາ ມາຓໂວ ‘‘ອຍໍ ປຸຕ຺ຕສ຺ສ ເຠສຊ຺ຊໍ ອກຕ຺ວາ ປຸຕ຺ຕປຕິຣູປກໍ ມໍ ທິສ຺ວາ ໂຣທນ຺ໂຕ ‘ສຸວຓ຺ຓາທິມຍໍ ຣຖຈກ຺ກໍ ກໂຣມີ’ຕິ ວທຕິ, ໂຫຕຸ ນິຄ຺ຄຓ຺ຫິສ຺ສາມິ ນ’’ນ຺ຕິ ຈິນ຺ເຕຕ຺ວາ ‘‘ກີວ ມຫນ຺ຕໍ ເມ ຈກ຺ກຍຸຄໍ ກຣິສ຺ສສີ’’ຕິ ວຕ຺ວາ ‘‘ຍາວ ມຫນ຺ຕໍ ອາກງ຺ຂສີ’’ຕິ ວຸຕ຺ເຕ ‘‘ຈນ຺ທິມສູຣິເຍຫິ ເມ ອຕ຺ໂຖ, ເຕ ເມ ເທຫີ’’ຕິ ຍາຈນ຺ໂຕ –

໑໒໑໐. ‘‘ໂສ ມາຓໂວ ຕສ຺ສ ປາວທິ, ຈນ຺ທສູຣິຍາ ອຸຠເຍຕ຺ຖ ທິສ຺ສເຣ;

ໂສວຓ຺ຓມໂຍ ຣໂຖ ມມ, ເຕນ ຈກ຺ກຍຸເຄນ ໂສຠຕີ’’ຕິ.

ອຖ ນໍ ພ຺ຣາຫ຺ມໂຓ ອາຫ –

໑໒໑໑. ‘‘ພາໂລ ໂຂ ຕ຺ວໍ ອສິ ມາຓວ, ໂຍ ຕ຺ວໍ ປຕ຺ຖຍເສ ອປຕ຺ຖິຍໍ;

ມຎ຺ຎາມິ ຕຸວໍ ມຣິສ຺ສສິ, ນ ຫິ ຕ຺ວໍ ລຈ຺ຉສິ ຈນ຺ທສູຣິເຍ’’ຕິ.

ອຖ ນໍ ມາຓໂວ ‘‘ກິໍ ປນ ປຎ຺ຎາຍມານສ຺ສຕ຺ຖາຍ ໂຣທນ຺ໂຕ ພາໂລ ໂຫຕິ, ອຸທາຫຸ ອປຎ຺ຎາຍມານສ຺ສາ’’ຕິ ວຕ຺ວາ –

໑໒໑໒. ‘‘ຄມນາຄມນມ຺ປິ ທິສ຺ສຕິ, ວຓ຺ຓຘາຕຸ ອຸຠຍຕ຺ຖ ວີຖິຍາ;

ເປໂຕ ກາລກໂຕ ນ ທິສ຺ສຕິ, ໂກ ນິຘ ກນ຺ທຕໍ ພາລ຺ຍຕໂຣ’’ຕິ.

ຕໍ ສຸຕ຺ວາ ພ຺ຣາຫ຺ມໂຓ ‘‘ຍຸຕ຺ຕໍ ເອສ ວທຕີ’’ຕິ ສລ຺ລກ຺ເຂຕ຺ວາ –

໑໒໑໓. ‘‘ສຈ຺ຈໍ ໂຂ ວເທສິ ມາຓວ, ອຫເມວ ກນ຺ທຕໍ ພາລ຺ຍຕໂຣ;

ຈນ຺ທໍ ວິຍ ທາຣໂກ ຣຸທໍ, ເປຕໍ ກາລກຕາຠິປຕ຺ຖຍິ’’ນ຺ຕິ. –

ວຕ຺ວາ ຕສ຺ສ ກຖາຍ ນິສ຺ໂສໂກ ຫຸຕ຺ວາ ມາຓວສ຺ສ ຖຸຕິໍ ກໂຣນ຺ໂຕ ອິມາ ຄາຖາ ອຠາສິ –

໑໒໑໔. ‘‘ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ, ສພ຺ພໍ ນິພ຺ພາປເຍ ທຣໍ.

໑໒໑໕. ‘‘ອພ຺ພຫີ ວຕ ເມ ສລ຺ລໍ, ໂສກໍ ຫທຍນິສ຺ສິຕໍ;

ໂຍ ເມ ໂສກປເຣຕສ຺ສ, ປຸຕ຺ຕໂສກໍ ອປານຸທິ.

໑໒໑໖. ‘‘ສ຺ວາຫໍ ອພ຺ພູຬ຺ຫສລ຺ໂລສ຺ມິ, ສີຕິຠູໂຕສ຺ມິ ນິພ຺ພຸໂຕ;

ນ ໂສຈາມິ ນ ໂຣທາມິ, ຕວ ສຸຕ຺ວານ ມາຓວາ’’ຕິ.

໑໒໐໘-໑໐. ຕຕ຺ຖ ຣຖປຎ຺ຊໂຣຕິ ຣຖູປຕ຺ຖໍ. ນ ວິນ຺ທາມີຕິ ນ ລຠາມິ. ຠທ຺ທມາຓວາຕິ ອາລປນໍ. ປຏິປາທຍາມີຕິ ສມ຺ປາເທຕ຺ວາ ທທາມິ, ມາ ຈກ຺ກຍຸຄາຠາເວນ ຊີວິຕໍ ຊຫີຕິ ອຘິປ຺ປາໂຍ. ອຸຠເຍຕ຺ຖ ທິສ຺ສເຣຕິ ອຸໂຠປິ ເອຕ຺ຖ ຈນ຺ທສູຣິຍາ ອາກາເສ ທິສ຺ສນ຺ຕິ. ຍ-ກາໂຣ ປທສນ຺ຘິກໂຣ, ອຸຠເຍ ເອຕ຺ຖາຕິ ວາ ປທວິຠາໂຄ.

໑໒໑໒. ຄມນາຄມນນ຺ຕິ ທິວເສ ທິວເສ ໂອຄມນຸຄ຺ຄມນວເສນ ຈນ຺ທສູຣິຍານໍ ຄມນໍ ອາຄມນຎ຺ຈ ທິສ຺ສຕິ. ‘‘ຄມໂນຄມນ’’ນ຺ຕິປິ ປາຬິ, ອຸຄ຺ຄມນໍ ໂອຄມນຎ຺ຈາຕິ ອຕ຺ໂຖ. ວຓ຺ຓຘາຕູຕິ ສີຕິຠາວວິສິຏ຺ຐາ ກນ຺ຕຠາວຠາສຸຣາ, ອຸຓ຺ຫຠາວວິສິຏ຺ຐາ ຕິກ຺ຂຠາວຠາສຸຣາ ຈ ວຓ຺ຓນິຠາ. ອຸຠຍຕ຺ຖາຕິ ຈນ຺ເທ ສູຣິເຍ ຈາຕິ ທ຺ວີສຸປິ ວຓ຺ຓຘາຕຸ ທິສ຺ສຕີຕິ ໂຍເຊຕພ຺ພໍ. ວີຖິຍາຕິ ປວຕ຺ຕນວີຖິຍໍ ອາກາເສ, ນາຄວີຖິຍາທິວີຖິຍໍ ວາ. ‘‘ອຸຠເຍຕ຺ຖາ’’ຕິປິ ປາໂຐ, ອຸຠເຍ ເອຕ຺ຖາຕິ ປທວິສນ຺ຘິ. ພາລ຺ຍຕໂຣຕິ ພາລຕໂຣ ອຕິສເຍນ ພາໂລ.

໑໒໑໓. ອິມໍ ປນ ກຖໍ ສຸຕ຺ວາ ‘‘ອລພ຺ຠນີຍວຕ຺ຖຸໍ ວຕາຫໍ ປຕ຺ເຖຕ຺ວາ ເກວລໍ ໂສກຄ຺ຄິນາ ຑຍ຺ຫາມິ, ກິໍ ເມ ນິຣຕ຺ຖເກນ ອນຍພ຺ຍສເນນາ’’ຕິ ປຏິສງ຺ຂາເນ ອຏ຺ຐາສິ. ອຖ ເທວປຸຕ຺ໂຕ ມຏ຺ຐກຸຓ຺ຑລີຣູປໍ ປຏິສໍຫຣິຕ຺ວາ ອຕ຺ຕໂນ ທິພ຺ພຣູເປເນວ ອຏ຺ຐາສິ. ພ຺ຣາຫ຺ມໂຓ ປນ ຕໍ ອໂນໂລເກຕ຺ວາ ມາຓວໂວຫາເຣເນວ ໂວຫຣນ຺ໂຕ ‘‘ສຈ຺ຈໍ ໂຂ ວເທສິ ມາຓວາ’’ຕິອາທິມາຫ. ຕຕ຺ຖ ຈນ຺ທໍ ວິຍ ທາຣໂກ ຣຸທນ຺ຕິ ຈນ຺ທໍ ອຠິປຕ຺ຖຍໍ ຣຸທນ຺ໂຕ ທາຣໂກ ວິຍາຕິ ອຕ຺ໂຖ. ກາລກຕາຠິປຕ຺ຖຍິນ຺ຕິ ກາລກຕໍ ອຠິປຕ຺ຖຍິໍ. ‘‘ອຠິປຕ຺ຖຍ’’ນ຺ຕິປິ ປາໂຐ.

໑໒໑໔-໕. ອາທິຕ຺ຕນ຺ຕິ ໂສກຄ຺ຄິນາ ອາທິຕ຺ຕໍ. ນິພ຺ພາປເຍ ທຣນ຺ຕິ ນິພ຺ພາປຍິ ທຣຖໍ ໂສກປຣິຬາຫໍ. ອພ຺ພຫີຕິ ອຸທ຺ຘຣິ.

ອຖ ພ຺ຣາຫ຺ມໂຓ ໂສກໍ ວິໂນເທຕ຺ວາ ອຕ຺ຕໂນ ອຸປເທສທາຍກໍ ທິພ຺ພຣູເປນ ຐິຕໍ ທິສ຺ວາ ‘‘ໂກ ນາມ ຕ຺ວ’’ນ຺ຕິ ປຸຈ຺ຉນ຺ໂຕ –

໑໒໑໗. ‘‘ເທວຕາ ນຸສິ ຄນ຺ຘພ຺ໂພ, ອທຸ ສກ຺ໂກ ປຸຣິນ຺ທໂທ;

ໂກ ວາ ຕ຺ວໍ ກສ຺ສ ວາ ປຸຕ຺ໂຕ, ກຖໍ ຊາເນມຸ ຕໍ ມຍ’’ນ຺ຕິ. –

ອາຫ. ໂສປິ ຕສ຺ສ –

໑໒໑໘. ‘‘ຍຎ຺ຈ ກນ຺ທສິ ຍຎ຺ຈ ໂຣທສິ, ປຸຕ຺ຕໍ ອາຬາຫເນ ສຍໍ ທຫິຕ຺ວາ;

ສ຺ວາຫໍ ກຸສລໍ ກຣິຕ຺ວາ ກມ຺ມໍ, ຕິທສານໍ ສຫພ຺ຍຕໍ ຄໂຕ’’ຕິ. –

ອຕ຺ຕານໍ ກເຖສິ. ຕຕ຺ຖ ຍຎ຺ຈ ກນ຺ທສິ ຍຎ຺ຈ ໂຣທສີຕິ ຍໍ ຕວ ປຸຕ຺ຕໍ ມຏ຺ຐກຸຓ຺ຑລິໍ ອຸທ຺ທິສ຺ສ ໂຣທສິ, ອສ຺ສູນິ ມຸຎ຺ຈສິ.

ອຖ ນໍ ພ຺ຣາຫ຺ມໂຓ ອາຫ –

໑໒໑໙. ‘‘ອປ຺ປໍ ວາ ພຫຸໍ ວາ ນາທ຺ທສາມ, ທານໍ ທທນ຺ຕສ຺ສ ສເກ ອຄາເຣ;

ອຸໂປສຖກມ຺ມໍ ວາ ຕາທິສໍ, ເກນ ກມ຺ເມນ ຄໂຕສິ ເທວໂລກ’’ນ຺ຕິ.

ຕຕ຺ຖ ‘‘ອຸໂປສຖກມ຺ມໍ ວາ ຕາທິສໍ ນາທ຺ທສາມາ’’ຕິ ໂຍຊນາ.

ອຖ ນໍ ມາຓໂວ ອາຫ –

໑໒໒໐. ‘‘ອາພາຘິໂກຫໍ ທຸກ຺ຂິໂຕ ຄິລາໂນ, ອາຕຸຣຣູໂປມ຺ຫິ ສເກ ນິເວສເນ;

ພຸທ຺ຘໍ ວິຄຕຣຊໍ ວິຕິຓ຺ຓກງ຺ຂໍ, ອທ຺ທກ຺ຂິໍ ສຸຄຕໍ ອໂນມປຎ຺ຎໍ.

໑໒໒໑. ‘‘ສ຺ວາຫໍ ມຸທິຕມໂນ ປສນ຺ນຈິຕ຺ໂຕ, ອຎ຺ຊລິໍ ອກຣິໍ ຕຖາຄຕສ຺ສ;

ຕາຫໍ ກຸສລໍ ກຣິຕ຺ວານ ກມ຺ມໍ, ຕິທສານໍ ສຫພ຺ຍຕໍ ຄໂຕ’’ຕິ.

໑໒໒໐-໒໑. ຕຕ຺ຖ ອາພາຘິໂກຕິ ອາພາຘສມງ຺ຄີ. ທຸກ຺ຂິໂຕຕິ ເຕເນວ ອາພາຘິກຠາເວນ ຊາຕທຸກ຺ໂຂ. ຄິລາໂນຕິ ຄິລາຍມາໂນຕິ ອຕ຺ໂຖ. ອາຕຸຣຣູໂປຕິ ທຸກ຺ຂເວທນາຠິຕຸນ຺ນກາໂຍ. ວິຄຕຣຊນ຺ຕິ ວິຄຕຣາຄາທິຣຊໍ. ວິຕິຓ຺ຓກງ຺ຂນ຺ຕິ ສພ຺ພໂສ ສໍສຍານໍ ສມຸຈ຺ຉິນ຺ນຕ຺ຕາ ຕິຓ຺ຓວິຈິກິຈ຺ຉໍ. ອໂນມປຎ຺ຎນ຺ຕິ ປຣິປຸຓ຺ຓປຎ຺ຎໍ, ສພ຺ພຎ຺ຎຸນ຺ຕິ ອຕ຺ໂຖ. ອກຣິນ຺ຕິ ອກາສິໍ. ຕາຫນ຺ຕິ ຕໍ ອຫໍ.

ເອວໍ ຕສ຺ມິໍ ກເຖນ຺ເຕເຍວ ພ຺ຣາຫ຺ມຓສ຺ສ ສກລສຣີຣໍ ປີຕິຍາ ປຣິປູຣິ. ໂສ ຕໍ ປີຕິໍ ປເວເທນ຺ໂຕ –

໑໒໒໒. ‘‘ອຈ຺ຉຣິຍໍ ວຕ ອພ຺ຠຸຕໍ ວຕ,

ອຎ຺ຊລິກມ຺ມສ຺ສ ອຍມີທິໂສ ວິປາໂກ;

ອຫມ຺ປິ ມຸທິຕມໂນ ປສນ຺ນຈິຕ຺ໂຕ,

ອຊ຺ເຊວ ພຸທ຺ຘໍ ສຣຓໍ ວຊາມີ’’ຕິ. – ອາຫ;

ຕຕ຺ຖ ອນຠິຓ຺ຫປ຺ປວຕ຺ຕິຕາຍ ອຈ຺ຉຣໍ ປຫຣິຕຸໍ ໂຍຄ຺ຄນ຺ຕິ ອຈ຺ຉຣິຍໍ, ອຠູຕປຸພ຺ພຕາຍ ອພ຺ຠຸຕໍ. ອຸຠເຍນປິ ວິມ຺ຫຍາວຫຕໍເຍວ ທສ຺ເສຕ຺ວາ ‘‘ອຫມ຺ປິ ມຸທິຕມໂນ ປສນ຺ນຈິຕ຺ໂຕ, ອຊ຺ເຊວ ພຸທ຺ຘໍ ສຣຓໍ ວຊາມີ’’ຕິ ອາຫ.

ອຖ ນໍ ເທວປຸຕ຺ໂຕ ສຣຓຄມເນ ສີລສມາທາເນ ຈ ນິໂຍເຊນ຺ໂຕ –

໑໒໒໓. ‘‘ອຊ຺ເຊວ ພຸທ຺ຘໍ ສຣຓໍ ວຊາຫິ, ຘມ຺ມຎ຺ຈ ສງ຺ຆຎ຺ຈ ປສນ຺ນຈິຕ຺ໂຕ;

ຕເຖວ ສິກ຺ຂາຍ ປທານິ ປຎ຺ຈ, ອຂຓ຺ຑຜຸລ຺ລານິ ສມາທິຍສ຺ສຸ.

໑໒໒໔. ‘‘ປາຓາຕິປາຕາ ວິຣມສ຺ສຸ ຂິປ຺ປໍ, ໂລເກ ອທິນ຺ນໍ ປຣິວຊ຺ຊຍສ຺ສຸ;

ອມຊ຺ຊໂປ ມາ ຈ ມຸສາ ຠຓາຫິ, ສເກນ ທາເຣນ ຈ ໂຫຫິ ຕຸຏ຺ໂຐ’’ຕິ. –

ຄາຖາທ຺ວຍມາຫ.

໑໒໒໓. ຕຕ຺ຖ ຕເຖວາຕິ ຍຖາ ປສນ຺ນຈິຕ຺ໂຕ ‘‘ສມ຺ມາສມ຺ພຸທ຺ໂຘ ຠຄວາ’’ຕິ ພຸທ຺ຘໍ ສຣຓໍ ວເຊສິ, ຕເຖວ ‘‘ສ຺ວາກ຺ຂາໂຕ ຘມ຺ໂມ, ສຸປ຺ປຏິປນ຺ໂນ ສງ຺ໂຆ’’ຕິ ປສນ຺ນຈິຕ຺ໂຕ ຘມ຺ມຎ຺ຈ ສງ຺ຆຎ຺ຈ ສຣຓໍ ວຊາຫິ. ຍຖາ ວາ ປສນ຺ນຈິຕ຺ໂຕ ຣຕນຕ຺ຕຍໍ ສຣຓໍ ວເຊສິ, ຕເຖວ ‘‘ອຍໍ ເອກໍສໂຕ ທິຏ຺ເຐວ ຘມ຺ເມ ອຠິສມ຺ປຣາຍຎ຺ຈ ຫິຕສຸຂາວໂຫ’’ຕິ ປສນ຺ນຈິຕ຺ໂຕ ສິກ຺ຂາຍ ອຘິສີລສິກ຺ຂາຍ ປທານິ ໂກຏ຺ຐາສຠູຕານິ ອຘິຈິຕ຺ຕອຘິປຎ຺ຎາສິກ຺ຂາຍ ວາ ອຸປາຍຠູຕານິ ປຎ຺ຈສີລານິ ອວິໂກປນໂຕ ຈ ອສໍກິລິສ຺ສນໂຕ ຈ ອຂຓ຺ຑຜຸລ຺ລານິ ສມາທິຍສ຺ສຸ, ສມາທາຍ ວຕ຺ຕສ຺ສູຕິ ອຕ຺ໂຖ.

ເອວໍ ເທວປຸຕ຺ເຕນ ສຣຓຄມເນ ສີລສມາທາເນ ຈ ນິໂຍຊິໂຕ ພ຺ຣາຫ຺ມໂຓ ຕສ຺ສ ວຈນໍ ສິຣສາ ສມ຺ປຏິຈ຺ຉນ຺ໂຕ –

໑໒໒໕. ‘‘ອຕ຺ຖກາໂມສິ ເມ ຍກ຺ຂ, ຫິຕກາໂມສິ ເທວເຕ;

ກໂຣມິ ຕຸຍ຺ຫໍ ວຈນໍ, ຕ຺ວໍສິ ອາຈຣິໂຍ ມມາ’’ຕິ. –

ຄາຖໍ ວຕ຺ວາ ຕຕ຺ຖ ປຕິຏ຺ຐຫນ຺ໂຕ –

໑໒໒໖. ‘‘ອຸເປມິ ສຣຓໍ ພຸທ຺ຘໍ, ຘມ຺ມຎ຺ຈາປິ ອນຸຕ຺ຕຣໍ;

ສງ຺ຆຎ຺ຈ ນຣເທວສ຺ສ, ຄຈ຺ຉາມິ ສຣຓໍ ອຫໍ.

໑໒໒໗. ‘‘ປາຓາຕິປາຕາ ວິຣມາມິ ຂິປ຺ປໍ, ໂລເກ ອທິນ຺ນໍ ປຣິວຊ຺ຊຍາມິ;

ອມຊ຺ຊໂປ ໂນ ຈ ມຸສາ ຠຓາມິ, ສເກນ ທາເຣນ ຈ ໂຫມິ ຕຸຏ຺ໂຐ’’ຕິ. –

ຄາຖາທ຺ວຍມາຫ. ຕມ຺ປິ ສຸວິຎ຺ເຎຍ຺ຍເມວ.

ຕໂຕ ເທວປຸຕ຺ໂຕ ‘‘ກຕໍ ມຍາ ພ຺ຣາຫ຺ມຓສ຺ສ ກຕ຺ຕພ຺ພຍຸຕ຺ຕກໍ, ອິທານິ ສຍເມວ ຠຄວນ຺ຕໍ ອຸປສງ຺ກມິສ຺ສຕີ’’ຕິ ຕຕ຺ເຖວ ອນ຺ຕຣຘາຍິ. ພ຺ຣາຫ຺ມໂຓປິ ໂຂ ຠຄວຕິ ສຎ຺ຊາຕປສາທພຫຸມາໂນ ເທວຕາຍ ຈ ໂຈທິຍມາໂນ ‘‘ສມຓໍ ໂຄຕມໍ ອຸປສງ຺ກມິສ຺ສາມີ’’ຕິ ວິຫາຣາຠິມຸໂຂ ຄຈ຺ຉຕິ. ຕໍ ທິສ຺ວາ ມຫາຊໂນ ‘‘ອຍໍ ພ຺ຣາຫ຺ມໂຓ ເອຕ຺ຕກໍ ກາລໍ ຕຖາຄຕໍ ອນຸປສງ຺ກມິຕ຺ວາ ອຊ຺ຊ ປຸຕ຺ຕໂສເກນ ອຸປສງ຺ກມຕິ, ກີທິສີ ນຸ ໂຂ ຘມ຺ມເທສນາ ຠວິສ຺ສຕີ’’ຕິ ຕໍ ອນຸພນ຺ຘິ.

ພ຺ຣາຫ຺ມໂຓ ຠຄວນ຺ຕໍ ອຸປສງ຺ກມິຕ຺ວາ ປຏິສນ຺ຖາຣໍ ກຕ຺ວາ ເອວມາຫ ‘‘ສກ຺ກາ ນຸ ໂຂ ໂຠ ໂຄຕມ ກິຎ຺ຈິ ທານໍ ອທຕ຺ວາ ສີລໍ ວາ ອຣກ຺ຂິຕ຺ວາ ເກວລໍ ຕຸມ຺ເຫສຸ ປສາທມຕ຺ເຕນ ສຄ຺ເຄ ນິພ຺ພຕ຺ຕິຕຸ’’ນ຺ຕິ. ‘‘ນນຸ, ພ຺ຣາຫ຺ມຓ, ອຊ຺ຊ ປຈ຺ຈູສເວລາຍໍ ມຏ຺ຐກຸຓ຺ຑລິນາ ເທວປຸຕ຺ເຕນ ອຕ຺ຕໂນ ເທວໂລກູປປຕ຺ຕິກາຣຓໍ ຕຸຍ຺ຫໍ ກຖິກ’’ນ຺ຕິ ຠຄວາ ອໂວຈ. ຕສ຺ມິໍ ຂເຓ ມຏ຺ຐກຸຓ຺ຑລີເທວປຸຕ຺ໂຕ ສຫ ວິມາເນນ ອາຄນ຺ຕ຺ວາ ທິສ຺ສມານຣູໂປ ວິມານໂຕ ໂອຣຸຍ຺ຫ ຠຄວນ຺ຕໍ ອຠິວາເທຕ຺ວາ ອຎ຺ຊລິໍ ປຄ຺ຄຍ຺ຫ ເອກມນ຺ຕໍ ອຏ຺ຐາສິ. ອຖ ຠຄວາ ຕສ຺ສໍ ປຣິສຕິ ເຕນ ເທວປຸຕ຺ເຕນ ກຕສຸຈຣິຕໍ ກເຖຕ຺ວາ ປຣິສາຍ ຈິຕ຺ຕກລ຺ລຕໍ ຎຕ຺ວາ ສາມຸກ຺ກໍສິກໍ ຘມ຺ມເທສນໍ ອກາສິ. ເທສນາປຣິໂຍສາເນ ເທວປຸຕ຺ໂຕ ຈ ພ຺ຣາຫ຺ມໂຓ ຈ ສນ຺ນິປຕິຕປຣິສາ ຈາຕິ ຈຕຸຣາສີຕິຍາ ປາຓສຫສ຺ສານໍ ຘມ຺ມາຠິສມໂຍ ອໂຫສີຕິ.

ມຏ຺ຐກຸຓ຺ຑລີວິມານວຓ຺ຓນາ ນິຏ຺ຐິຕາ.