໑໐. ເສຣີສກວິມານວຓ຺ຓນາ

ສຸໂຓຖ ຍກ຺ຂສ຺ສ ຈ ວາຓິຊານ ຈາຕິ ເສຣີສກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ປຣິນິພ຺ພຸເຕ ອາຍສ຺ມາ ກຸມາຣກສ຺ສໂປ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ເສຕພ຺ຍນຄຣໍ ສມ຺ປຕ຺ໂຕ. ຕຕ຺ຖ ປາຍາສິຣາຊຎ຺ຎໍ ອຕ຺ຕໂນ ສນ຺ຕິກໍ ອຸປຄຕໍ ວິປຣີຕຄ຺ຄາຫໂຕ ວິເວເຈຕ຺ວາ ສມ຺ມາທສ຺ສເນ ປຕິຏ຺ຐາເປສິ. ໂສ ຕໂຕ ປຏ຺ຐາຍ ປຸຎ຺ຎປສຸໂຕ ຫຸຕ຺ວາ ສມຓພ຺ຣາຫ຺ມຓານໍ ທານໍ ເທນ຺ໂຕ ຕຕ຺ຖ ອກຕປຣິຈຍຕາຍ ອສກ຺ກຈ຺ຈໍ ທານໍ ທຕ຺ວາ ອປຣຠາເຄ ກາລໍ ກຕ຺ວາ ຈາຕຸມຫາຣາຊິກຠວເນ ສຸຎ຺ເຎ ເສຣີສເກ ວິມາເນ ນິພ຺ພຕ຺ຕິ.

ອຕີເຕ ກິຣ ກສ຺ສປສ຺ສ ຠຄວໂຕ ກາເລ ເອໂກ ຂີຓາສວຕ຺ເຖໂຣ ອຎ຺ຎຕຣສ຺ມິໍ ຄາເມ ປິຓ຺ຑາຍ ຈຣິຕ຺ວາ ພຫິຄາເມ ເທວສິກໍ ເອກສ຺ມິໍ ປເທເສ ຠຕ຺ຕກິຈ຺ຈໍ ອກາສິ. ຕໍ ທິສ຺ວາ ເອໂກ ໂຄປາລໂກ ‘‘ອຍ຺ໂຍ ສູຣິຍາຕເປນ ກິລມຕີ’’ຕິ ປສນ຺ນຈິຕ຺ໂຕ ຈຕູຫິ ສິຣີສຖມ຺ເຠຫິ ສາຂາມຓ຺ຑປໍ ກຕ຺ວາ ອທາສິ, ມຓ຺ຑປສ຺ສ ສມີເປ ສິຣີສຣຸກ຺ຂໍ ໂຣເປສີຕິ ຈ ວທນ຺ຕິ. ໂສ ກາລໍ ກຕ຺ວາ ເຕເນວ ປຸຎ຺ຎກມ຺ເມນ ຈາຕຸມຫາຣາຊິເກສຸ ນິພ຺ພຕ຺ຕິ, ຕສ຺ສ ປຸຣິມກມ຺ມສ຺ສ ສູຈກໍ ວິມານທ຺ວາເຣ ສິຣີສວນໍ ນິພ຺ພຕ຺ຕິ ວຓ຺ຓຄນ຺ຘສມ຺ປນ຺ເນຫິ ປຸປ຺ເຜຫິ ສພ຺ພກາລໍ ອຸປໂສຠມານໍ, ເຕນ ຕໍ ວິມານໍ ‘‘ເສຣີສກ’’ນ຺ຕິ ປຎ຺ຎາຍິຕ຺ຖ. ໂສ ຈ ເທວປຸຕ຺ໂຕ ເອກໍ ພຸທ຺ຘນ຺ຕຣໍ ເທເວສຸ ເຈວ ມນຸສ຺ເສສຸ ຈ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຍສຕ຺ເຖຣສ຺ສ ຈຕູສຸ ວິມລາທີສຸ ຄິຫິສຫາເຍສຸ ຄວມ຺ປຕິ ນາມ ຫຸຕ຺ວາ ຠຄວໂຕ ຘມ຺ມເທສນາຍ ອຣຫຕ຺ເຕ ປຕິຏ຺ຐິໂຕ ປຸພ຺ພາຈິຓ຺ຓວເສນ ຕໍ ສຸຎ຺ຎວິມານໍ ທິສ຺ວາ ອຠິຓ຺ຫໍ ທິວາວິຫາຣໍ ຄຈ຺ຉຕິ.

ໂສ ອປຣຠາເຄ ປາຍາສິເທວປຸຕ຺ຕໍ ຕຕ຺ຖ ທິສ຺ວາ ‘‘ໂກສິ ຕ຺ວໍ, ອາວຸໂສ’’ຕິ ປຸຈ຺ຉິຕ຺ວາ ເຕນ ‘‘ອຫໍ, ຠນ຺ເຕ, ປາຍາສິຣາຊຎ຺ໂຎ ອິຘູປປນ຺ໂນ’’ຕິ ວຸຕ຺ເຕ ‘‘ນນຸ ຕ຺ວໍ ມິຈ຺ຉາທິຏ຺ຐິໂກ ວິປຣີຕທສ຺ສໂນ ກຖມິຘູປປນ຺ໂນ’’ຕິ ອາຫ. ອຖ ນໍ ປາຍາສິເທວປຸຕ຺ໂຕ ‘‘ອຍ຺ເຍນມ຺ຫິ ກຸມາຣກສ຺ສປຕ຺ເຖເຣນ ມິຈ຺ຉາທສ຺ສນໂຕ ວິເວຈິໂຕ, ປຸຎ຺ຎກິຣິຍານໍ ອສກ຺ກຈ຺ຈກາຣິຕາຍ ປນ ສຸຎ຺ເຎ ວິມາເນ ນິພ຺ພຕ຺ໂຕ. ສາຘຸ, ຠນ຺ເຕ, ມນຸສ຺ສໂລກໍ ຄຕກາເລ ມມ ປຣິຊນສ຺ສ ອາໂຣເຈຖ ‘ປາຍາສິຣາຊຎ຺ໂຎ ອສກ຺ກຈ຺ຈໍ ທານໍ ທຕ຺ວາ ສຸຎ຺ຎໍ ເສຣີສກວິມານໍ ອຸປປນ຺ໂນ, ຕຸມ຺ເຫ ປນ ສກ຺ກຈ຺ຈໍ ປຸຎ຺ຎານິ ກຕ຺ວາ ຕຕ຺ຣູປປຕ຺ຕິຍາ ຈິຕ຺ຕໍ ປຓິທຫຖາ’’ຕິ. ເຖໂຣ ຕສ຺ສານຸກມ຺ປາຍ ຕຖາ ອກາສິ. ເຕປິ ເຖຣສ຺ສ ວຈນໍ ສຸຕ຺ວາ ຕຖາ ຈິຕ຺ຕໍ ປຓິຘາຍ ປຸຎ຺ຎານິ ກຕ຺ວາ ເສຣີສເກ ວິມາເນ ນິພ຺ພຕ຺ຕິໍສຸ. ເສຣີສກເທວປຸຕ຺ຕໍ ປນ ເວສ຺ສວຓມຫາຣາຊາ ມຣຸຠູມິຍໍ ຉາຍູທກຣຫິເຕ ມຄ຺ເຄ ມຄ຺ຄປຏິປນ຺ນານໍ ມນຸສ຺ສານໍ ອມນຸສ຺ສປຣິປນ຺ຖ ໂມຈນຕ຺ຖໍ ມຄ຺ຄຣກ຺ຂກໍ ຐເປສິ.

ອຖ ອປເຣນ ສມເຍນ ອງ຺ຄມຄຘວາສິໂນ ວາຓິຊາ ສກຏສຫສ຺ສໍ ຠຓ຺ຑສ຺ສ ປູເຣຕ຺ວາ ສິນ຺ຘຸໂສວີຣເທສໍ ຄຈ຺ຉນ຺ຕາ ມຣຸກນ຺ຕາເຣ ທິວາ ອຸຓ຺ຫຠເຍນ ມຄ຺ຄໍ ອປ຺ປຏິປຊ຺ຊິຕ຺ວາ ຣຕ຺ຕິໍ ນກ຺ຂຕ຺ຕສຎ຺ຎາຍ ມຄ຺ຄໍ ປຏິປຊ຺ຊິໍສຸ. ເຕ ມຄ຺ຄມູຬ຺ຫາ ຫຸຕ຺ວາ ອຎ຺ຎໍ ທິສໍ ອຄມໍສຸ. ເຕສໍ ອນ຺ຕເຣ ເອໂກ ອຸປາສໂກ ອໂຫສິ ສທ຺ໂຘ ປສນ຺ໂນ ສີລສມ຺ປນ຺ໂນ ອຣຫຕ຺ຕປ຺ປຕ຺ຕິຍາ ອຸປນິສ຺ສຍສມ຺ປນ຺ໂນ ມາຕາປິຕູນໍ ອຸປຏ຺ຐານຕ຺ຖໍ ວຓິຊ຺ຊາຍ ຄໂຕ. ຕໍ ອນຸຄ຺ຄຓ຺ຫນ຺ໂຕ ເສຣີສກເທວປຸຕ຺ໂຕ ສຫ ວິມາເນນ ອຕ຺ຕານໍ ທສ຺ເສສິ. ທສ຺ເສຕ຺ວາ ຈ ປນ ‘‘ກສ຺ມາ ຕຸມ຺ເຫ ອິມໍ ຉາຍູທກຣຫິຕໍ ວາລຸກາກນ຺ຕາຣໍ ປຏິປນ຺ນາ’’ຕິ ປຸຈ຺ຉິ. ເຕ ຈສ຺ສ ຕຕ຺ຖ ອຕ຺ຕໂນ ອາຄຕປ຺ປກາຣໍ ກເຖສຸໍ, ຕທຕ຺ຖທີປນາ ເທວປຸຕ຺ຕສ຺ສ ວາຓິຊານຎ຺ຈ ວຈນປຏິວຈນຄາຖາ ໂຫນ຺ຕິ. ອາທິໂຕ ປນ ທ຺ເວ ຄາຖາ ຕາສໍ ສມ຺ພນ຺ຘທສ຺ສນຕ຺ຖໍ ຘມ຺ມສງ຺ຄາຫເກຫິ ຐປິຕາ –

໑໒໒໘. ‘‘ສຸໂຓຖ ຍກ຺ຂສ຺ສ ຈ ວາຓິຊານ ຈ, ສມາຄໂມ ຍຕ຺ຖ ຕທາ ອໂຫສິ;

ຍຖາ ກຖໍ ອິຕຣິຕເຣນ ຈາປິ, ສຸຠາສິຕໍ ຕຎ຺ຈ ສຸຓາຖ ສພ຺ເພ.

໑໒໒໙. ‘‘ໂຍ ໂສ ອຫຸ ຣາຊາ ປາຍາສິ ນາມ, ຠຸມ຺ມານໍ ສຫພ຺ຍຄໂຕ ຍສສ຺ສີ;

ໂສ ໂມທມາໂນວ ສເກ ວິມາເນ, ອມານຸໂສ ມານຸເສ ອຊ຺ຌຠາສີ’’ຕິ.

໑໒໒໘-໙. ຕຕ຺ຖ ສຸໂຓຖາຕິ ສວນາຓຕ຺ຕິກວຈນໍ. ຍໍ ມຍໍ ອິທານິ ຠຓາມ, ຕໍ ສຸໂຓຖາຕິ. ຍກ຺ຂສ຺ສາຕິ ເທວສ຺ສ. ເທໂວ ຫິ ມນຸສ຺ສານໍ ເອກຈ຺ຈານໍ ເທວານຎ຺ຈ ປູຊນີຍຠາວໂຕ ‘‘ຍກ຺ໂຂ’’ຕິ ວຸຈ຺ຈຕິ. ອປິຈ ສກ຺ໂກປິ ຈຕ຺ຕາໂຣ ມຫາຣາຊາໂນປິ ເວສ຺ສວຓປາຣິສຊ຺ຊາປິ ປຸຣິໂສປິ ‘‘ຍກ຺ໂຂ’’ຕິ ວຸຈ຺ຈຕິ. ຕຖາ ຫິ ‘‘ອຕິພາຬ຺ຫໍ ໂຂ ອຍໍ ຍກ຺ໂຂ ປມຕ຺ໂຕ ວິຫຣຕິ, ຍໍນູນາຫໍ ອິມໍ ຍກ຺ຂໍ ສໍເວເຊຍ຺ຍ’’ນ຺ຕິອາທີສຸ (ມ. ນິ. ໑.໓໙໓) ສກ຺ໂກ ‘‘ຍກ຺ໂຂ’’ຕິ ວຸຕ຺ໂຕ. ‘‘ຈຕ຺ຕາໂຣ ຍກ຺ຂາ ຂຄ຺ຄຫຕ຺ຖາ’’ຕິອາທີສຸ ມຫາຣາຊາໂນ. ‘‘ສນ຺ຕິ ຫິ, ຠນ຺ເຕ, ອຸຬາຣາ ຍກ຺ຂາ ຠຄວໂຕ ອປ຺ປສນ຺ນາ’’ຕິອາທີສຸ (ທີ. ນິ. ໓.໒໗໖) ເວສ຺ສວຓປາຣິສຊ຺ຊາ. ‘‘ເອຕ຺ຕາວຕາ ຍກ຺ຂສ຺ສ ສຸທ຺ຘີ’’ຕິອາທີສຸ (ສຸ. ນິ. ໔໘໒) ປຸຣິໂສ. ອິຘ ປນ ເວສ຺ສວຓປາຣິສຊ຺ໂຊ ອຘິປ຺ເປໂຕ. ວາຓິຊານ ຈາຕິ ຄາຖາພນ຺ຘສຸຂຕ຺ຖໍ ອນຸນາສິກໂລປໍ ກຕ຺ວາ ວຸຕ຺ຕໍ. ສມາຄໂມຕິ ສໂມຘານໍ. ຍຕ຺ຖາຕິ ຍສ຺ມິໍ ວຓ຺ຓຸປເຖ. ຕທາຕິ ຕສ຺ມິໍ ມຄ຺ຄມູຬ຺ຫາ ຫຸຕ຺ວາ ຄມນກາເລ. ອິຕຣິຕເຣນ ຈາປີຕິ ອິຕຣີຕຣຎ຺ຈາປິ, ອິທໍ ຍຖາຕິ ອິມິນາ ໂຍເຊຕພ຺ພໍ. ອຍຎ຺ເຫຕ຺ຖ ອຕ຺ໂຖ – ເສຣີສກເທວປຸຕ຺ຕສ຺ສ ວາຓິຊານຎ຺ຈ ຕທາ ຍຕ຺ຖ ສມາຄໂມ ອໂຫສິ, ຕໍ ສຸໂຓຖ, ຍຖາ ວາປິ ເຕຫິ ອຎ຺ຎມຎ຺ຎໍ ສຸຠາສິຕໍ ສຸລປິຕໍ ກຖໍ ປວຕ຺ຕິຕໍ, ຕຎ຺ຈ ສພ຺ເພ ໂອຫິຕຈິຕ຺ຕາ ສຸຓາຖາຕິ. ຠຸມ຺ມານນ຺ຕິ ຠຸມ຺ມເທວານໍ.

ອິທານິ ຍກ຺ຂສ຺ສ ປຸຈ຺ຉາຄາຖາໂຍ ໂຫນ຺ຕິ –

໑໒໓໐. ‘‘ວງ຺ເກ ອຣຎ຺ເຎ ອມນຸສ຺ສຏ຺ຐາເນ, ກນ຺ຕາເຣ ອປ຺ໂປທເກ ອປ຺ປຠກ຺ເຂ;

ສຸທຸຄ຺ຄເມ ວຓ຺ຓຸປຖສ຺ສ ມຊ຺ເຌ, ວງ຺ກໍຠຍາ ນຏ຺ຐມນາ ມນຸສ຺ສາ.

໑໒໓໑. ‘‘ນຍິຘ ຜລາ ມູລມຍາ ຈ ສນ຺ຕິ, ອຸປາທານໍ ນຕ຺ຖິ ກຸໂຕຘ ຠກ຺ໂຂ;

ອຎ຺ຎຕ຺ຣ ປໍສູຫິ ຈ ວາລຸກາຫິ ຈ, ຕຕ຺ຕາຫິ ອຸຓ຺ຫາຫິ ຈ ທາຣຸຓາຫິ ຈ.

໑໒໓໒. ‘‘ອຸຊ຺ຊງ຺ຄລໍ ຕຕ຺ຕມິວໍ ກປາລໍ, ອນາຍສໍ ປຣໂລເກນ ຕຸລ຺ຍໍ;

ລຸທ຺ທານມາວາສມິທໍ ປຸຣາຓໍ, ຠູມິປ຺ປເທໂສ ອຠິສຕ຺ຕຣູໂປ.

໑໒໓໓. ‘‘ອຖ ຕຸມ຺ເຫ ເກນ ວຓ຺ເຓນ, ກິມາສມານາ ອິມໍ ປເທສຎ຺ຫິ;

ອນຸປວິຏ຺ຐາ ສຫສາ ສເມຈ຺ຈ, ໂລຠາ ຠຍາ ອຖ ວາ ສມ຺ປມູຬ຺ຫາ’’ຕິ.

໑໒໓໐. ຕຕ຺ຖ ວງ຺ເກຕິ ສໍສຍຏ຺ຐາເນ. ຍຕ຺ຖ ປວິຏ຺ຐານໍ ‘‘ຊີວິສ຺ສາມ ນຸ ໂຂ, ມຣິສ຺ສາມ ນຸ ໂຂ’’ຕິ ຊີວິເຕ ສໍສໂຍ ໂຫຕິ, ຕາທິເສ ອຣຎ຺ເຎ. ອມນຸສ຺ສຏ຺ຐາເນຕິ ອມນຸສ຺ສານໍ ປິສາຈາທີນໍ ສຎ຺ຈຣຓຏ຺ຐາເນ, ມນຸສ຺ສານໍ ວາ ອໂຄຈຣຏ຺ຐາເນ. ກນ຺ຕາເຣຕິ ນິຣຸທເກ ອິຣິເຓ, ກໍ ຕາເຣນ຺ຕິ ນຍນ຺ຕິ ເອຕ຺ຖາຕິ ຫິ ກນ຺ຕາໂຣ, ອຸທກໍ ຄເຫຕ຺ວາ ຕຣິຕພ຺ພຏ຺ຐານໍ. ເຕນາຫ ‘‘ອປ຺ໂປທເກ’’ຕິ. ອປ຺ປ-ສທ຺ໂທ ເຫຕ຺ຖ ອຠາວຕ຺ໂຖ ‘‘ອປ຺ປິຈ຺ໂຉ ອປ຺ປນິຄ຺ໂຆໂສ’’ຕິອາທີສຸ (ອ. ນິ. ໘.໒໓; ຈູຬວ. ໔໕໖) ວິຍ. ວຓ຺ຓຸປຖສ຺ສ ມຊ຺ເຌຕິ ວາລຸກາກນ຺ຕາຣມຊ຺ເຌຕິ ອຕ຺ໂຖ. ວງ຺ກໍຠຍາຕິ ວງ຺ເກຫິ ຠີຕາ. ວງ຺ເກຫິ ຠຍໍ ເອເຕສນ຺ຕິ ‘‘ວງ຺ກຠຍາ’’ຕິ ວຕ຺ຕພ຺ເພ ຄາຖາສຸຂຕ຺ຖໍ ສານຸນາສິກໍ ກຕ຺ວາ ‘‘ວງ຺ກໍຠຍາ’’ຕິ ວຸຕ຺ຕໍ. ອິທຎ຺ຈ ວາລຸກາກນ຺ຕາຣປເວສນໂຕ ປຸພ຺ເພ ເຕສໍ ອຸປ຺ປນ຺ນຠຍໍ ສນ຺ຘາຍ ວຸຕ຺ຕໍ. ນຏ຺ຐມນາຕິ ມຄ຺ຄສຕິວິປ຺ປວາເສນ ນຏ຺ຐມານສາ, ມຄ຺ຄມູຬ຺ຫາຕິ ອຕ຺ໂຖ. ມນຸສ຺ສາຕິ ເຕສໍ ອາລປນໍ.

໑໒໓໑. ອິຘາຕິ ອິມສ຺ມິໍ ມຣຸກນ຺ຕາເຣ. ຜລາຕິ ອມ຺ພຊມ຺ພຸຕາລນາຬິເກຣາທິຜລານິ ນ ສນ຺ຕີຕິ ໂຍຊນາ. ມູລມຍາ ຈາຕິ ມູລານິເຍວ ມູລມຍາ, ວລ຺ລິກນ຺ທາທີນິ ສນ຺ຘາຍ ວທຕິ. ອຸປາທານໍ ນຕ຺ຖີຕິ ກິຎ຺ຈາປິ ກິຎ຺ຈິ ຠກ຺ຂໍ ນຕ຺ຖິ, ອຸປາທານໍ ວາ ອິນ຺ຘນໍ, ອຄ຺ຄິສ຺ສ ອິນ຺ຘນມຕ຺ຕມ຺ປິ ນຕ຺ຖິ, ກຸໂຕ ເກນ ກາຣເຓນ ອິຘ ມຣຸກນ຺ຕາເຣ ຠກ຺ໂຂ ສິຍາຕິ ອຕ຺ໂຖ. ຍໍ ປນ ອຕ຺ຖິ ຕຕ຺ຖ, ຕໍ ທສ຺ເສຕຸໍ ‘‘ອຎ຺ຎຕ຺ຣ ປໍສູຫີ’’ຕິອາທິ ວຸຕ຺ຕໍ.

໑໒໓໒. ອຸຊ຺ຊງ຺ຄລນ຺ຕິ ຊງ຺ຄລໍ ວຸຈ຺ຈຕິ ລູຂຘູສໂຣ ອນຸທໂກ ຠູມິປ຺ປເທໂສ, ຕໍ ປນ ຐານໍ ຊງ຺ຄລໂຕປິ ອຸກ຺ກໍເສນ ຊງ຺ຄລນ຺ຕິ ອາຫ ‘‘ອຸຊ຺ຊງ຺ຄລ’’ນ຺ຕິ. ເຕນາຫ ‘‘ຕຕ຺ຕມິວໍ ກປາລ’’ນ຺ຕິ, ຕຕ຺ຕໍ ອໂຍກປາລສທິສນ຺ຕິ ອຕ຺ໂຖ. ຄາຖາສຸຂຕ຺ຖຎ຺ເຈຕ຺ຖ ສານຸນາສິກໍ ກຕ຺ວາ ວຸຕ຺ຕໍ, ຕຕ຺ຕມິວອິຈ຺ເຈວ ທຏ຺ຐພ຺ພໍ. ອນາຍສນ຺ຕິ ນຕ຺ຖິ ເອຕ຺ຖ ອາໂຍ ສຸຂນ຺ຕິ ອນາຍໍ, ຕໂຕ ເອວ ຊີວິຕໍ ສີຍຕິ ວິນາເສຕີຕິ ອນາຍສໍ. ອຖ ວາ ນ ອາຍສນ຺ຕິ ອນາຍສໍ. ປຣໂລເກນາຕິ ນຣເກນ ຕຸລ຺ຍໍ. ນຣກຎ຺ຫິ ສຕ຺ຕານໍ ເອກນ຺ຕານຕ຺ຖຕາຍ ປຣຠູໂຕ ປຏິສຕ຺ຕຸຠູໂຕ ໂລໂກຕິ ວິເສສໂຕ ‘‘ປຣໂລໂກ’’ຕິ ວຸຈ຺ຈຕິ, ສມນ຺ຕໂຕ ອໂຍມຍຕ຺ຕາ ອາຍສຎ຺ຈ, ອິທໍ ປນ ຕທຠາວໂຕ ອນາຍສໍ, ມຫໂຕ ທຸກ຺ຂສ຺ສ ອຸປ຺ປຕ຺ຕິຏ຺ຐານຕາຍ ປຣໂລກສທິສນ຺ຕິ ທສ຺ເສຕິ, ‘‘ອນສ຺ສຍ’’ນ຺ຕິ ຈ ເກຈິ ປຐນ຺ຕິ, ສຸຂສ຺ສ ອປ຺ປຕິຏ຺ຐານຠູຕນ຺ຕິ ອຕ຺ໂຖ. ລຸທ຺ທານມາວາສມິທໍ ປຸຣາຓນ຺ຕິ ອິທໍ ຐານໍ ຈິຣກາລໂຕ ປຏ຺ຐາຍ ລຸທ຺ທານໍ ທາຣຸຓານໍ ປິສາຈາທີນໍ ອາວາສຠູຕໍ. ອຠິສຕ຺ຕຣູໂປຕິ ‘‘ເອວໍ ລູໂຂ ໂຆຣາກາໂຣ ໂຫຕູ’’ຕິ ໂປຣາເຓຫິ ອິສີຫິ ສປິຕສທິໂສ, ທິນ຺ນສໂປ ວິຍາຕິ ອຕ຺ໂຖ.

໑໒໓໓. ເກນ ວຓ຺ເຓນາຕິ ເກນ ກາຣເຓນ. ກິມາສມານາຕິ ກິໍ ປຈ຺ຈາສີສນ຺ຕາ. ຫີຕິ ນິປາຕມຕ຺ຕໍ. ‘‘ປເທສມ຺ປີ’’ຕິ ຈ ປຐນ຺ຕິ, ອິມມ຺ປິ ນາມ ປເທສນ຺ຕິ ອຕ຺ໂຖ. ສຫສາ ສເມຈ຺ຈາຕິ ສຫສາ ອາທີນວານິສໍເສ ອວິຈາເຣຕ຺ວາ ສມວາເຍນ ອນຸປວິຏ຺ຐາ ສປ຺ປວິຏ຺ຐາ. ໂລຠາ ຠຍາ ອຖ ວາ ເກນຈິ ອນຕ຺ຖກາເມນ ປໂລຠິຕາ ໂລຠໂຕ ເກນຈິ ອມນຸສ຺ສາທິນາ ປຣິປາຕິຕາ ຠຍາ ວາ. ອຖ ວາ ສມ຺ປມູຬ຺ຫາຕິ ມຄ຺ຄວິປ຺ປນຏ຺ຐາ ອິມໍ ປເທສໍ ອນຸປວິຏ຺ຐາຕິ ໂຍຊນາ.

ອິທານິ ວາຓິຊາ ອາຫໍສຸ –

໑໒໓໔. ‘‘ມຄເຘສຸ ອງ຺ເຄສຸ ຈ ສຕ຺ຖວາຫາ, ອາໂຣປຍິຕ຺ວາ ປຓິຍໍ ປຸຖຸຕ຺ຕໍ;

ເຕ ຍາມເສ ສິນ຺ຘຸໂສວີຣຠູມິໍ, ຘນຕ຺ຖິກາ ອຸທ຺ທຍໍ ປຕ຺ຖຍານາ.

໑໒໓໕. ‘‘ທິວາ ປິປາສໍນຘິວາສຍນ຺ຕາ, ໂຍຄ຺ຄານຸກມ຺ປຎ຺ຈ ສເມກ຺ຂມານາ;

ເອເຕນ ເວເຄນ ອາຍາມ ສພ຺ເພ, ຣຕ຺ຕິໍ ມຄ຺ຄໍ ປຏິປນ຺ນາ ວິກາເລ.

໑໒໓໖. ‘‘ເຕ ທຸປ຺ປຍາຕາ ອປຣທ຺ຘມຄ຺ຄາ, ອນ຺ຘາກຸລາ ວິປ຺ປນຏ຺ຐາ ອຣຎ຺ເຎ;

ສຸທຸຄ຺ຄເມ ວຓ຺ຓຸປຖສ຺ສ ມຊ຺ເຌ, ທິສໍ ນ ຊານາມ ປມູຬ຺ຫຈິຕ຺ຕາ.

໑໒໓໗. ‘‘ອິທຎ຺ຈ ທິສ຺ວານ ອທິຏ຺ຐປຸພ຺ພໍ, ວິມານເສຏ຺ຐຎ຺ຈ ຕວຎ຺ຈ ຍກ຺ຂ;

ຕຕຸຕ຺ຕຣິໍ ຊີວິຕມາສມານາ, ທິສ຺ວາ ປຕີຕາ ສຸມນາ ອຸທຄ຺ຄາ’’ຕິ.

໑໒໓໔. ຕຕ຺ຖ ມຄເຘສຸ ອງ຺ເຄສຸ ຈ ສຕ຺ຖວາຫາຕິ ມຄຘຣຏ຺ເຐ ຈ ອງ຺ຄຣຏ຺ເຐ ຈ ຊາຕາ ສໍວຑ຺ຒາ ຕໍນິວາສິໂນ ສຕ຺ເຖ ສຕ຺ຖສ຺ສ ຈ ວາຫນກາ ສຕ຺ຖກາ ເຈວ ສຕ຺ຖສາມິກາ ຈ. ປຓິຍນ຺ຕິ ຠຓ຺ຑໍ. ເຕຕິ ເຕ ມຍໍ. ຍາມເສຕິ ຄຈ຺ຉາມ. ສິນ຺ຘຸໂສວີຣຠູມິນ຺ຕິ ສິນ຺ຘຸເທສໍ ໂສວີຣເທສຎ຺ຈ. ອຸທ຺ທຍນ຺ຕິ ອານິສໍສໍ ອຕິເຣກລາຠໍ.

໑໒໓໕. ອນຘິວາສຍນ຺ຕາຕິ ອຘິວາເສຕຸໍ ອສກ຺ໂກນ຺ຕາ. ໂຍຄ຺ຄານຸກມ຺ປນ຺ຕິ ໂຄຓາທີນໍ ສຕ຺ຕານໍ ອນຸຄ຺ຄຫໍ. ເອເຕນ ເວເຄນາຕິ ອິມິນາ ຊເວນ, ເຍນ ຕວ ທສ຺ສນໂຕ ປຸພ຺ເພ ອາຍາມ ອາຄຕມ຺ຫ. ຣຕ຺ຕິໍ ມຄ຺ຄໍ ປຏິປນ຺ນາຕິ ຣຕ຺ຕິຍໍ ມຄ຺ຄໍ ປຏິປນ຺ນາ. ວິກາເລຕິ ອກາເລ ອເວລາຍໍ.

໑໒໓໖. ທຸປ຺ປຍາຕາຕິ ທຸຏ຺ຐຸ ປຍາຕາ ອປເຖ ຄຕາ, ຕໂຕ ເອວ ອປຣທ຺ຘມຄ຺ຄາ. ອນ຺ຘາກຸລາຕິ ອນ຺ຘາ ວິຍ ອາກຸລາ, ມຄ຺ຄຊານນສມຕ຺ຖສ຺ສ ປຎ຺ຎາຈກ຺ຂຸໂນ ອຠາເວນ ອນ຺ຘາ, ຕໂຕ ເອວ ອາກຸລາ, ວິປ຺ປນຏ຺ຐາ ຈ ມຄ຺ຄສມ຺ມູຬ຺ຫຕາຍ. ທິສນ຺ຕິ ຄນ຺ຕພ຺ພທິສໍ, ຍສ຺ສໍ ທິສາຍໍ ສິນ຺ຘຸໂສວີຣເທໂສ, ຕໍ ທິສໍ. ປມູຬ຺ຫຈິຕ຺ຕາຕິ ທິສາສໍສຍສຸມູຬ຺ຫຈິຕ຺ຕາ.

໑໒໓໗. ຕວຎ຺ຈາຕິ ຕຸວຎ຺ຈ. ຍກ຺ຂາຕິ ອາລປນໍ. ຕຕຸຕ຺ຕຣິໍ ຊີວິຕມາສມານາຕິ ໂຍ ‘‘ອິໂຕ ປຣໍ ອມ຺ຫາກໍ ຊີວິຕໍ ນຕ຺ຖີ’’ຕິ ຊີວິຕສໍສໂຍ ອຸປ຺ປນ຺ໂນ, ອິທານິ ຕໂຕ ອຸຕ຺ຕຣິມ຺ປິ ຊີວິຕໍ ອາສີສນ຺ຕາ. ທິສ຺ວາຕິ ທສ຺ສນເຫຕຸ. ປຕີຕາຕິ ປຫຏ຺ຐາ. ສຸມນາຕິ ໂສມນສ຺ສປ຺ປຕ຺ຕາ. ອຸທຄ຺ຄາຕິ ອຸທຄ຺ຄາຍ ປີຕິຍາ ອຸທຄ຺ຄຈິຕ຺ຕາ.

ເອວໍ ວາຓິເຊຫິ ອຕ຺ຕໂນ ປວຕ຺ຕິຍາ ປກາສິຕາຍ ປຸນ ເທວປຸຕ຺ໂຕ ທ຺ວີຫິ ຄາຖາຫິ ປຸຈ຺ຉິ –

໑໒໓໘. ‘‘ປາຣໍ ສມຸທ຺ທສ຺ສ ອິມຎ຺ຈ ວຓ຺ຓຸໍ, ເວຕ຺ຕາຈຣໍ ສງ຺ກຸປຖຎ຺ຈ ມຄ຺ຄໍ;

ນທິໂຍ ປນ ປພ຺ພຕານຎ຺ຈ ທຸຄ຺ຄາ, ປຸຖຸທ຺ທິສາ ຄຈ຺ຉຖ ໂຠຄເຫຕຸ.

໑໒໓໙. ‘‘ປກ຺ຂນ຺ທິຍານ ວິຊິຕໍ ປເຣສໍ, ເວຣຊ຺ຊເກ ມານຸເສ ເປກ຺ຂມານາ;

ຍໍ ໂວ ສຸຕໍ ວາ ອຖ ວາປິ ທິຏ຺ຐໍ, ອຈ຺ເຉຣກໍ ຕໍ ໂວ ສຸໂຓມ ຕາຕາ’’ຕິ.

ຕສ຺ສຕ຺ໂຖ – ປາຣໍ ສມຸທ຺ທສ຺ສາຕິ ສມຸທ຺ທສ຺ສ ປຣຕີຣໍ, ອິມຎ຺ຈ ອີທິສໍ, ວຓ຺ຓຸໍ ວຓ຺ຓຸປຖໍ ເວຕ຺ຕລຕາ ພນ຺ຘິຕ຺ວາ ອາຈຣິຕພ຺ພໂຕ ເວຕ຺ຕາຈຣໍ ມຄ຺ຄໍ, ສງ຺ກຸເກ ຂາຓຸເກ ໂກຏ຺ເຏຕ຺ວາ ຄນ຺ຕພ຺ພໂຕ ສງ຺ກຸປຖໍ ມຄ຺ຄໍ, ນທິໂຍ ປນ ຈນ຺ທຠາຄາທິກາ, ປພ຺ພຕານຎ຺ຈ ວິສມປ຺ປເທສາຕິ ເອວໍ ທຸຄ຺ຄາ ປຸຖຸທ຺ທິສາ ໂຠຄນິມິຕ຺ຕໍ ຄຈ຺ຉຖ, ເອວໍ ຄຈ຺ຉນ຺ຕາ ຈ ປກ຺ຂນ຺ທິຍານ ປກ຺ຂນ຺ທິຕ຺ວາ ອນຸປວິສິຕ຺ວາ, ປເຣສໍ ຣາຊູນໍ ວິຊິຕໍ ຕຕ຺ຖ ເວຣຊ຺ຊເກ ວິເທສວາສິເກ ມນຸສ຺ເສ ເປກ຺ຂມານາ ຄຈ຺ຉຖ, ເອວໍຠູເຕຫິ ໂວ ຕຸມ຺ເຫຫິ ຍໍ ສຸຕໍ ວາ ອຖ ວາ ທິຏ຺ຐໍ ວາ ອຈ຺ເຉຣກໍ ອຈ຺ຉຣິຍໍ, ຕໍ ໂວ ສນ຺ຕິເກ ຕາຕາ ວາຓິຊາ ສຸໂຓມາຕິ ອຕ຺ຕໂນ ວິມານສ຺ສ ອຈ຺ຉຣິຍຠາວໍ ເຕຫິ ກຖາເປຕຸກາໂມ ປຸຈ຺ຉຕິ.

ເອວໍ ເທວປຸຕ຺ເຕນ ປຸຏ຺ຐາ ວາຓິຊາ ອາຫໍສຸ –

໑໒໔໐. ‘‘ອິໂຕປິ ອຈ຺ເຉຣຕຣໍ ກຸມາຣ, ນ ໂນ ສຸຕໍ ວາ ອຖ ວາປິ ທິຏ຺ຐໍ;

ອຕີຕມານຸສກເມວ ສພ຺ພໍ, ທິສ຺ວາ ນ ຕປ຺ປາມ ອໂນມວຓ຺ຓໍ.

໑໒໔໑. ‘‘ເວຫາຍສໍ ໂປກ຺ຂຣຎ຺ໂຎ ສວນ຺ຕິ, ປຫູຕມລ຺ຍາ ພຫຸປຸຓ຺ຑຣີກາ;

ທຸມາ ຈິເມ ນິຈ຺ຈຜລູປປນ຺ນາ, ອຕີວ ຄນ຺ຘາ ສຸຣຠິໍ ປວາຍນ຺ຕິ.

໑໒໔໒. ‘‘ເວຬູຣິຍຖມ຺ຠາ ສຕມຸສ຺ສິຕາເສ, ສິລາປວາຬສ຺ສ ຈ ອາຍຕໍສາ;

ມສາຣຄລ຺ລາ ສຫໂລຫິຕງ຺ຄາ, ຖມ຺ຠາ ອິເມ ໂຊຕິຣສາມຍາເສ.

໑໒໔໓. ‘‘ສຫສ຺ສຖມ຺ຠໍ ອຕຸລານຸຠາວໍ, ເຕສູປຣິ ສາຘຸມິທໍ ວິມານໍ;

ຣຕນນ຺ຕຣໍ ກຎ຺ຈນເວທິມິສ຺ສໍ, ຕປນີຍປຏ຺ເຏຫິ ຈ ສາຘຸຉນ຺ນໍ.

໑໒໔໔. ‘‘ຊມ຺ໂພນທຸຕ຺ຕຕ຺ຕມິທໍ ສຸມຏ຺ໂຐ, ປາສາທໂສປານຜລູປປນ຺ໂນ;

ທຬ຺ໂຫ ຈ ວຄ຺ຄຸ ຈ ສຸສງ຺ຄໂຕ ຈ, ອຕີວ ນິຊ຺ຌານຂໂມ ມນຸຎ຺ໂຎ.

໑໒໔໕. ‘‘ຣຕນນ຺ຕຣສ຺ມິໍ ພຫຸອນ຺ນປານໍ, ປຣິວາຣິໂຕ ອຈ຺ຉຣາສງ຺ຄເຓນ;

ມຸຣຊອາລມ຺ພຣຕູຣິຍຆຸຏ຺ໂຐ, ອຠິວນ຺ທິໂຕສິ ຖຸຕິວນ຺ທນາຍ.

໑໒໔໖. ‘‘ໂສ ໂມທສິ ນາຣິຄຓປ຺ປໂພຘໂນ, ວິມານປາສາທວເຣ ມໂນຣເມ;

ອຈິນ຺ຕິໂຍ ສພ຺ພຄຸຓູປປນ຺ໂນ, ຣາຊາ ຍຖາ ເວສ຺ສວໂຓ ນຬິນ຺ຍາ.

໑໒໔໗. ‘‘ເທໂວ ນຸ ອາສິ ອຸທວາສິ ຍກ຺ໂຂ,

ອຸທາຫຸ ເທວິນ຺ໂທ ມນຸສ຺ສຠູໂຕ;

ປຸຈ຺ຉນ຺ຕິ ຕໍ ວາຓິຊາ ສຕ຺ຖວາຫາ,

ອາຈິກ຺ຂ ໂກ ນາມ ຕຸວໍສິ ຍກ຺ໂຂ’’ຕິ.

໑໒໔໐-໒. ຕຕ຺ຖ ກຸມາຣາຕິ ປຐມວເຍ ຐິຕຕ຺ຕາ ເທວປຸຕ຺ຕໍ ອາລປຕິ. ສພ຺ພນ຺ຕິ ເທວປຸຕ຺ຕໍ ຕສ຺ສ ວິມານປຏິພທ຺ຘຎ຺ຈ ສນ຺ຘາຍ ວທຕິ. ໂປກ຺ຂຣຎ຺ໂຎຕິ ໂປກ຺ຂຣຓິໂຍ. ສຕມຸສ຺ສິຕາເສຕິ ສຕຣຕນຸພ຺ເພຘາ. ສິລາປວາຬສ຺ສາຕິ ສິລາຍ ປວາຬສ຺ສ ຈ, ສິລາມຍາ ປວາຬມຍາຕິ ອຕ຺ໂຖ. ອາຍຕໍສາຕິ ທີຆໍສາ. ອຖ ວາ ອາຍຕາ ຫຸຕ຺ວາ ອຏ຺ຐໂສຬສທ຺ວຕ຺ຕິໍສາທິອໍສວນ຺ໂຕ.

໑໒໔໒. ເຕສູປຣີຕິ ເຕສໍ ຖມ຺ຠານໍ ອຸປຣິ. ສາຘຸມິທນ຺ຕິ ສຸນ຺ທຣໍ ອິທໍ ຕວ ວິມານໍ. ຣຕນນ຺ຕຣນ຺ຕິ ຣຕນນ຺ຕຣວນ຺ຕໍ, ຠິຕ຺ຕິຖມ຺ຠໂສປານາທີສຸ ນານາວິເຘຫິ ອຎ຺ເຎຫິ ຣຕເນຫິ ຍຸຕ຺ຕໍ. ກຎ຺ຈນເວທິມິສ຺ສນ຺ຕິ ສຸວຓ຺ຓມຍາຍ ເວທິກາຍ ສຫິຕໍ ປຣິກ຺ຂິຕ຺ຕໍ. ຕປນີຍປຏ຺ເຏຫິ ຈ ສາຘຸຉນ຺ນນ຺ຕິ ຕປນີຍມເຍຫິ ອເນກຣຕນມເຍຫິ ຈ ຉທເນຫິ ຕຕ຺ຖ ຕຕ຺ຖ ສຸຏ຺ຐຸ ຉາທິຕໍ.

໑໒໔໔. ຊມ຺ໂພນທຸຕ຺ຕຕ຺ຕມິທນ຺ຕິ ອິທໍ ຕວ ວິມານໍ ເຍຠຸຍ຺ເຍນ ອຸຕ຺ຕຕ຺ຕຊມ຺ພຸນທຠາສຸຣໍ. ສຸມຏ຺ໂຐ ປາສາທໂສປານຜລູປປນ຺ໂນຕິ ຕສ຺ສ ຈ ໂສ ໂສ ປເທໂສ ສຸມຏ຺ໂຐ ສຸຏ຺ຐຸ ມຊ຺ຊິໂຕ, ເຕຫິ ເຕຫິ ອນນ຺ຕຣປາສາເທຫິ ໂສປານວິເສເສຫິ ຣມຓີເຍຫິ ຜລເກຫິ ຈ ຍຸຕ຺ໂຕ. ທຬ຺ໂຫຕິ ຖິໂຣ. ວຄ຺ຄູຕິ ອຠິຣູໂປ ສມຸຄ຺ຄໂຕ. ສຸສງ຺ຄໂຕຕິ ສຸຏ຺ຐຸ ສງ຺ຄຕາວຍໂວ ອຎ຺ຎມຎ຺ຎານຸຣູປປາສາທາວຍໂວ. ອຕີວ ນິຊ຺ຌານຂໂມຕິ ປຠສ຺ສຣຠາເວປິ ອຕິວິຍ ໂອໂລກນກ຺ຂໂມ. ມນຸຎ຺ໂຎຕິ ມໂນຣໂມ.

໑໒໔໕. ຣຕນນ຺ຕຣສ຺ມິນ຺ຕິ ຣຕນມເຍ, ຣຕນຠູເຕ ວາ ສາຣຠູເຕ ວິມານສ຺ສ ອພ຺ຠນ຺ຕເຣ. ພຫຸອນ຺ນປານນ຺ຕິ ເປສລໍ ປຫູຕໍ ອນ຺ນຎ຺ຈ ປານຎ຺ຈ ວິຊ຺ຊຕິ, ອຸປລພ຺ຠຕີຕິ ອຘິປ຺ປາໂຍ. ມຸຣຊອາລມ຺ພຣຕູຣິຍຆຸຏ຺ໂຐຕິ ມຸທິງ຺ຄານໍ ອາລມ຺ພຣານໍ ອວສິຏ຺ຐຕູຣິຍານຎ຺ຈ ສທ຺ເທຫິ ນິຈ຺ຈໂຆສິໂຕ. ອຠິວນ຺ທິໂຕສີຕິ ນມສ຺ສິໂຕ, ໂຖມິໂຕ ວາ ອສິ. ເຕນາຫ ‘‘ຖູຕິວນ຺ທນາຍາ’’ຕິ.

໑໒໔໖. ອຈິນ຺ຕິໂຍຕິ ອຈິນ຺ເຕຍ຺ຍານຸຠາໂວ. ນຬິນ຺ຍາຕິ ເອວໍນາມເກ ກີຬນຏ຺ຐາເນ ຍຖາ ເວສ຺ສວໂຓ ມຫາຣາຊາ, ເອວໍ ຕ຺ວໍ ໂມທສີຕິ ໂຍຊນາ.

໑໒໔໗. ອາສີຕິ ອສິ ຠວສິ. ເທວິນ຺ໂທຕິ ສກ຺ໂກ ເທວຣາຊາ. ມນຸສ຺ສຠູໂຕຕິ ມນຸສ຺ເສສຸ ຠູໂຕ ມນຸສ຺ສຊາຕິໂກ. ຍກ຺ໂຂຕິ ເທວາທິຠາວໍ ປຸຈ຺ຉິຕ຺ວາປິ ຍກ຺ຂຠາວໍ ອາສງ຺ກນ຺ຕາ ວທນ຺ຕິ.

ອິທານິ ໂສ ເທວປຸຕ຺ໂຕ ອຕ຺ຕານໍ ຊານາເປນ຺ໂຕ –

໑໒໔໘. ‘‘ເສຣີສໂກ ນາມ ອຫມ຺ຫິ ຍກ຺ໂຂ, ກນ຺ຕາຣິໂຍ ວຓ຺ຓຸປຖມ຺ຫິ ຄຸຕ຺ໂຕ;

ອິມໍ ປເທສໍ ອຠິປາລຍາມິ, ວຈນກໂຣ ເວສ຺ສວຓສ຺ສ ຣຎ຺ໂຎ’’ຕິ. –

ອາຫ. ຕຕ຺ຖ ອຫມ຺ຫີ ຍກ຺ໂຂຕິ ອຫໍ ຍກ຺ໂຂ ອມ຺ຫິ. ກນ຺ຕາຣິໂຍຕິ ອາຣກ຺ຂຓຕ຺ຖໍ ກນ຺ຕາເຣ ນິຍຸຕ຺ໂຕ. ຄຸຕ຺ໂຕຕິ ໂຄປໂກ. ເຕນາຫ ‘‘ອຠິປາລຍາມີ’’ຕິ.

ອິທານິ ວາຓິຊາ ຕສ຺ສ ກມ຺ມາທີນິ ປຸຈ຺ຉນ຺ຕາ ອາຫໍສຸ –

໑໒໔໙. ‘‘ອຘິຈ຺ຈລທ຺ຘໍ ປຣິຓາມຊໍ ເຕ, ສຍໍກຕໍ ອຸທາຫຸ ເທເວຫິ ທິນ຺ນໍ;

ປຸຈ຺ຉນ຺ຕິ ຕໍ ວາຓິຊາ ສຕ຺ຖວາຫາ, ກຖໍ ຕຍາ ລທ຺ຘມິທໍ ມນຸຎ຺ຎ’’ນ຺ຕິ.

ຕຕ຺ຖ ອຘິຈ຺ຈລທ຺ຘນ຺ຕິ ອຘິຈ຺ຈສມຸປ຺ປຕ຺ຕິກໍ, ຍທິຈ຺ຉກໍ ລທ຺ຘນ຺ຕິ ອຕ຺ໂຖ. ປຣິຓາມຊໍ ເຕຕິ ນິຍຕິສງ຺ຄຕິຠາວປຣິຓຕໍ, ກາລປຣິຓຕໍ ວາ. ສຍໍກຕນ຺ຕິ ຕຍາ ສຍເມວ ກຕໍ, ເທວິທ຺ຘິຍາ ຕຍາ ສຍເມວ ນິພ຺ພຕ຺ຕິຕນ຺ຕິ ອຕ຺ໂຖ. ອຸທາຫຸ ເທເວຫິ ທິນ຺ນນ຺ຕິ ຕຍາ ອາຣາຘິເຕຫິ ເທເວຫິ ປສາທວເສນ ນິສ຺ສຏ຺ຐໍ.

ອິທານິ ເທວປຸຕ຺ໂຕ ຈຕຸໂຣປິ ປກາເຣ ປຏິກ຺ຂິປິຕ຺ວາ ປຸຎ຺ຎເມວ ອປທິສນ຺ໂຕ –

໑໒໕໐. ‘‘ນາຘິຈ຺ຈລທ຺ຘໍ ນ ປຣິຓາມຊໍ ເມ, ນ ສຍໍກຕໍ ນ ຫິ ເທເວຫິ ທິນ຺ນໍ;

ສເກຫິ ກມ຺ເມຫິ ອປາປເກຫິ, ປຸຎ຺ເຎຫິ ເມ ລທ຺ຘມິທໍ ມນຸຎ຺ຎ’’ນ຺ຕິ. –

ຄາຖມາຫ.

ຕໍ ສຸຕ຺ວາ ວາຓິຊາ ປຸນ ‘‘ນາຘິຈ຺ຈລທ຺ຘ’’ນ຺ຕິ ຄາຖາຍໍ ປຸຎ຺ຎາຘິກເມວ ເຕ ຈຕຸໂຣ ປກາເຣ ອາໂຣເປຕ຺ວາ ປຸຎ຺ຎສ຺ສ ຈ ສຣູປໍ ປຸຈ຺ຉິໍສຸ –

໑໒໕໑. ‘‘ກິໍ ເຕ ວຕໍ ກິໍ ປນ ພ຺ຣຫ຺ມຈຣິຍໍ, ກິສ຺ສ ສຸຈິຓ຺ຓສ຺ສ ອຍໍ ວິປາໂກ;

ປຸຈ຺ຉນ຺ຕິ ຕໍ ວາຓິຊາ ສຕ຺ຖວາຫາ, ກຖໍ ຕຍາ ລທ຺ຘມິທໍ ວິມານ’’ນ຺ຕິ.

ຕຕ຺ຖ ວຕນ຺ຕິ ວຕສມາທານໍ. ພ຺ຣຫ຺ມຈຣິຍນ຺ຕິ ເສຏ຺ຐຈຣິຍໍ.

ປຸນ ເທວປຸຕ຺ໂຕ ເຕ ປຏິກ຺ຂິປິຕ຺ວາ ອຕ຺ຕານໍ ຍຖູປຈິຕໍ ປຸຎ຺ຎຎ຺ຈ ທສ຺ເສນ຺ໂຕ –

໑໒໕໒. ‘‘ມມໍ ປາຍາສີຕິ ອຫຸ ສມຎ຺ຎາ, ຣຊ຺ຊໍ ຍທາ ກາຣຍິໍ ໂກສລານໍ;

ນຕ຺ຖິກທິຏ຺ຐິ ກທຣິໂຍ ປາປຘມ຺ໂມ, ອຸຈ຺ເຉທວາທີ ຈ ຕທາ ອໂຫສິໍ.

໑໒໕໓. ‘‘ສມໂຓ ຈ ໂຂ ອາສິ ກຸມາຣກສ຺ສໂປ, ພຫຸສ຺ສຸໂຕ ຈິຕ຺ຕກຖີ ອຸຬາໂຣ;

ໂສ ເມ ຕທາ ຘມ຺ມກຖໍ ອຠາສິ, ທິຏ຺ຐິວິສູການິ ວິໂນທຍີ ເມ.

໑໒໕໔. ‘‘ຕາຫໍ ຕສ຺ສ ຘມ຺ມກຖໍ ສຸຓິຕ຺ວາ, ອຸປາສກຕ຺ຕໍ ປຏິເວທຍິສ຺ສໍ;

ປາຓາຕິປາຕາ ວິຣໂຕ ອໂຫສິໍ, ໂລເກ ອທິນ຺ນໍ ປຣິວຊ຺ຊຍິສ຺ສໍ;

ອມຊ຺ຊໂປ ໂນ ຈ ມຸສາ ອຠາຓິໍ, ສເກນ ທາເຣນ ຈ ອໂຫສິໍ ຕຸຏ຺ໂຐ.

໑໒໕໕. ‘‘ຕໍ ເມ ວຕໍ ຕໍ ປນ ພ຺ຣຫ຺ມຈຣິຍໍ, ຕສ຺ສ ສຸຈິຓ຺ຓສ຺ສ ອຍໍ ວິປາໂກ;

ເຕເຫວ ກມ຺ເມຫິ ອປາປເກຫິ, ປຸຎ຺ເຎຫິ ເມ ລທ຺ຘມິທໍ ວິມານ’’ນ຺ຕິ. –

ອາຫ. ຕໍ ສຸວິຎ຺ເຎຍ຺ຍເມວ.

ອຖ ວາຓິຊາ ເທວປຸຕ຺ຕໍ ວິມານຎ຺ຈສ຺ສ ປຈ຺ຈກ຺ຂໂຕ ທິສ຺ວາ ກມ຺ມຜລໍ ສທ຺ທຫິຕ຺ວາ ອຕ຺ຕໂນ ກມ຺ມຜເລ ສທ຺ຘໍ ປເວເທນ຺ຕາ –

໑໒໕໖. ‘‘ສຈ຺ຈໍ ກິຣາຫໍສຸ ນຣາ ສປຎ຺ຎາ, ອນຎ຺ຎຖາ ວຈນໍ ປຓ຺ຑິຕານໍ;

ຍຫິໍ ຍຫິໍ ຄຈ຺ຉຕິ ປຸຎ຺ຎກມ຺ໂມ, ຕຫິໍ ຕຫິໍ ໂມທຕິ ກາມກາມີ.

໑໒໕໗. ‘‘ຍຫິໍ ຍຫິໍ ໂສກປຣິທ຺ທໂວ ຈ, ວໂຘ ຈ ພນ຺ໂຘ ຈ ປຣິກ຺ກິເລໂສ;

ຕຫິໍ ຕຫິໍ ຄຈ຺ຉຕິ ປາປກມ຺ໂມ, ນ ມຸຈ຺ຈຕິ ທຸຄ຺ຄຕິຍາ ກທາຈີ’’ຕິ. –

ຄາຖາທ຺ວຍໍ ອໂວຈຸໍ. ຕຕ຺ຖ ໂສກປຣິທ຺ທໂວຕິ ໂສໂກ ຈ ປຣິເທໂວ ຈ. ປຣິກ຺ກິເລໂສຕິ ວຸຕ຺ຕາ ອນຕ຺ຖຸປ຺ປຕ຺ຕິ.

ເອວໍ ເຕສຸ ກເຖນ຺ເຕສຸເຍວ ວິມານທ຺ວາເຣ ສິຣີສຣຸກ຺ຂໂຕ ປຣິປາເກນ ມຸຕ຺ຕພນ຺ຘນາ ປຣິປກ຺ກາ ສິປາຏິກາ ປຕິ, ເຕນ ເທວປຸຕ຺ໂຕ ສປຣິຊໂນ ໂທມນສ຺ສປ຺ປຕ຺ໂຕ ອໂຫສິ. ຕໍ ທິສ຺ວາ ວາຓິຊາ –

໑໒໕໘. ‘‘ສມ຺ມູຬ຺ຫຣູໂປວ ຊໂນ ອໂຫສິ, ອສ຺ມິໍ ມຸຫຸຕ຺ເຕ ກລລີກໂຕວ;

ຊນສ຺ສິມສ຺ສ ຕຸຍ຺ຫຎ຺ຈ ກຸມາຣ, ອປ຺ປຈ຺ຈໂຍ ເກນ ນຸ ໂຂ ອໂຫສີ’’ຕິ. –

ຄາຖມາຫໍສຸ. ຕຕ຺ຖ ສມ຺ມູຬ຺ຫຣູໂປວາຕິ ໂສກວເສນ ສພ຺ພໂສ ມູຬ຺ຫສຠາໂວ ວິຍ. ຊໂນຕິ ເທວຊໂນ. ອສ຺ມິໍ ມຸຫຸຕ຺ເຕຕິ ອິມສ຺ມິໍ ມຸຫຸຕ຺ຕມຕ຺ເຕ. ກລລີກໂຕຕິ ກລລໍ ວິຍ ກໂຕ, ກລລນິສ຺ສິຕອຸທກີຠູໂຕ ວິຍ ອາວິໂລຕິ ອຘິປ຺ປາໂຍ. ຊນສ຺ສິມສ຺ສ ຕຸຍ຺ຫຎ຺ຈາຕິ ອິມສ຺ສ ຕວ ປຣິຊນສ຺ສ ຕຸຍ຺ຫຎ຺ຈ. ອປ຺ປຈ຺ຈໂຍຕິ ໂທມນສ຺ສໍ.

ຕໍ ສຸຕ຺ວາ ເທວປຸຕ຺ໂຕ –

໑໒໕໙. ‘‘ອິເມ ຈ ສິຣີສວນາ ຕາຕາ, ທິພ຺ພາ ຄນ຺ຘາ ສຸຣຠີ ສມ຺ປວນ຺ຕິ;

ເຕ ສມ຺ປວາຍນ຺ຕິ ອິມໍ ວິມານໍ, ທິວາ ຈ ຣຕ຺ໂຕ ຈ ຕມໍ ນິຫນ຺ຕ຺ວາ.

໑໒໖໐. ‘‘ອິເມສຎ຺ຈ ໂຂ ວສ຺ສສຕຈ຺ຈເຍນ, ສິປາຏິກາ ຜລຕິ ເອກເມກາ;

ມານຸສ຺ສກໍ ວສ຺ສສຕໍ ອຕີຕໍ, ຍທຄ຺ເຄ ກາຍມ຺ຫິ ອິຘູປປນ຺ໂນ.

໑໒໖໑. ‘‘ທິສ຺ວານຫໍ ວສ຺ສສຕານິ ປຎ຺ຈ,

ອສ຺ມິໍ ວິມາເນ ຐຕ຺ວານ ຕາຕາ;

ອາຍຸກ຺ຂຍາ ປຸຎ຺ຎກ຺ຂຍາ ຈວິສ຺ສໍ,

ເຕເນວ ໂສເກນ ປມຸຈ຺ຉິໂຕສ຺ມີ’’ຕິ. – ອາຫ;

໑໒໕໖. ຕຕ຺ຖ ສິຣີສວນາຕິ ສິຣີສວິປິນໂຕ. ຕາຕາຕິ ວາຓິເຊ ອາລປຕິ. ອິເມ ຕຸມ຺ຫາກໍ ມຍ຺ຫຎ຺ຈ ປຈ຺ຈກ຺ຂຠູຕາ ທິພ຺ພາ ຄນ຺ຘາ ສຸຣຠີ ອຕິວິຍ ສຸຄນ຺ຘາເຍວ ສມນ຺ຕໂຕ ປວນ຺ຕິ ປວາຍນ຺ຕິ. ເຕ ທິພ຺ພາ ຄນ຺ຘາ ເອວໍ ວາຍນ຺ຕາ ອິມໍ ວິມານໍ ສມ຺ປວາຍນ຺ຕິ ສມ຺ມເທວ ຄນ຺ຘໍ ຄາຫາເປນ຺ຕິ, ນ ເກວລໍ ສມ຺ປວາຍນເມວ, ອຖ ໂຂ ອຕ຺ຕໂນ ປຠາຍ ຕມມ຺ປິ ນິຫນ຺ຕິ. ເຕນາຫ ‘‘ທິວາ ຈ ຣຕ຺ໂຕ ຈ ຕມໍ ນິຫນ຺ຕ຺ວາ’’ຕິ.

໑໒໖໐-໖໑. ອິເມສນ຺ຕິ ສິຣີສານໍ. ສິປາຏິກາຕິ ຜລກຸຏ຺ຐິລິກາ. ຜລຕີຕິ ປຈ຺ຈິຕ຺ວາ ວຓ຺ຏໂຕ ມຸຈ຺ຈຕິ, ປຸຏເຠທໍ ວາ ປຕ຺ວາ ສິສ຺ສຕິ. ມານຸສ຺ສກໍ ວສ຺ສສຕໍ ອຕີຕນ຺ຕິ ຍສ຺ມາ ວສ຺ສສຕສ຺ສ ອຈ຺ຈເຍນ ອິມສ຺ສ ສິຣີສສ຺ສ ສິປາຏິກາ ຜລຕິ, ອຍຎ຺ຈ ຜລິຕາ, ຕສ຺ມາ ມຍ຺ຫໍ ມານຸສ຺ສກໍ ວສ຺ສສຕໍ ອຕີຕໍ. ຍທຄ຺ເຄ ຍໂຕ ປຏ຺ຐາຍ, ກາຍມ຺ຫິ ອິຘ ອິມສ຺ມິໍ ເທວນິກາເຍ ອຸປປນ຺ໂນ ນິພ຺ພຕ຺ໂຕ. ມຍ຺ຫຎ຺ຈ ເທວຄຓນາຍ ປຎ຺ຈ ວສ຺ສສຕານິ ອາຍຸ, ຕສ຺ມາ ຂີຍຕິ ເມ ອາຍູຕິ ໂສກວເສນ ສມ຺ປມູຬ຺ໂຫຕິ ທສ຺ເສຕິ. ເຕນາຫ ‘‘ທິສ຺ວານຫໍ ວສ຺ສສຕານິ ປຎ຺ຈ…ເປ… ເຕເນວ ໂສເກນ ປມຸຈ຺ຉິໂຕສ຺ມີ’’ຕິ.

ອຖ ນໍ ວາຓິຊາ ສມສ຺ສາເສນ຺ໂຕ –

໑໒໖໒. ‘‘ກຖໍ ນຸ ໂສເຈຍ຺ຍ ຕຖາວິໂຘ ໂສ, ລທ຺ຘາ ວິມານໍ ອຕຸລໍ ຈິຣາຍ;

ເຍ ຈາປິ ໂຂ ອິຕ຺ຕຣມຸປປນ຺ນາ, ເຕ ນູນ ໂສເຈຍ຺ຍຸໍ ປຣິຕ຺ຕປຸຎ຺ຎາ’’ຕິ. –

ອາຫໍສຸ. ຕຕ຺ຖ ຍາທິເສຫິ ອປ຺ປາຍຸເກຫິ ມຣຓໍ ປຏິຈ຺ຈ ໂສຈິຕພ຺ພໍ ສິຍາ, ຕາທິໂສ ປນ ເອວໍ ທິພ຺ພານຸຠາວສມ຺ປນ຺ໂນ ນວຸຕິວສ຺ສສຕສຫສ຺ສາຍຸໂກ ກຖໍ ນຸ ໂສເຈຍ຺ຍ, ນ ໂສຈິຕພ຺ພເມວາຕິ ອຘິປ຺ປາໂຍ.

ເທວປຸຕ຺ໂຕ ຕຕ຺ຕເກເນວ ສມສ຺ສາເສຕ຺ວາ ເຕສໍ ວຈນໍ ສມ຺ປຏິຈ຺ຉນ຺ໂຕ ເຕສຎ຺ຈ ອຸປເທສໍ ເທນ຺ໂຕ –

໑໒໖໓. ‘‘ອນຸຈ຺ຉວິໍ ໂອວທິຍຎ຺ຈ ເມຕໍ, ຍໍ ມໍ ຕຸມ຺ເຫ ເປຍ຺ຍວາຈໍ ວເທຖ;

ຕຸມ຺ເຫ ຈ ໂຂ ຕາຕາ ມຍານຸຄຸຕ຺ຕາ, ເຍຫິຈ຺ຉກໍ ເຕນ ປເລຖ ໂສຕ຺ຖິ’’ນ຺ຕິ. –

ຄາຖມາຫ. ຕຕ຺ຖ ອນຸຈ຺ຉວິນ຺ຕິ ອນຸຈ຺ຉວິກໍ, ຕຸມ຺ຫາກເມວ ຕໍ ຍຸຕ຺ຕຣູປໍ. ໂອວທິຍຎ຺ຈ ເມຕນ຺ຕິ ເມ ມຍ຺ຫໍ ຕຸມ຺ເຫຫິ ໂອວທິຍໍ ໂອວາທວເສນ ວຕ຺ຕພ຺ພເມຕໍ. ຍໍ ຍສ຺ມາ, ມໍ ມຍ຺ຫໍ, ຕຸມ຺ເຫ ‘‘ກຖໍ ນຸ ໂສເຈຍ຺ຍ’’ນ຺ຕິອາທິນາ ເປຍ຺ຍວາຈໍ ປິຍວຈນໍ ວເທຖ. ຍໍ ວາ ເປຍ຺ຍວາຈາຍ ວທນໍ ກຖນໍ, ຕໍ ຕຸມ຺ຫາກເມວ ອນຸຈ຺ຉວິກນ຺ຕິ ໂຍຊນາ. ອຖ ວາ ຍໍ ຍສ຺ມາ ຕຸມ຺ເຫ ເປຍ຺ຍວາຈໍ ວເທຖ, ຕສ຺ມາ ອນຸຈ຺ຉວິກໍ ໂອວທິຍຎ຺ຈ ໂອວທິຕພ຺ພໍ ໂອວາທານຸຣູປໍ ກາຕພ຺ພຎ຺ຈ ເມ ມຍາ ກຕໍ, ກິໍ ປນ ຕນ຺ຕິ ອາຫ ‘‘ຕຸມ຺ເຫ ຈ ໂຂ ຕາຕາ’’ຕິອາທິ. ຕຕ຺ຖ ມຍານຸຄຸຕ຺ຕາຕິ ອິມສ຺ມິໍ ອມນຸສ຺ສປຣິຄ຺ຄເຫ ມຣຸກນ຺ຕາເຣ ຍາວ ກນ຺ຕາຣາຕິກ຺ກມາ ມຍາ ອນຸຄຸຕ຺ຕາ ຣກ຺ຂິຕາ, ເຍນິຈ຺ຉກໍ ຍຖາຣຸຈິເຕນ, ໂສຕ຺ຖິໍ ເຂເມນ, ປເລຖ ຄຈ຺ຉຖາຕິ ອຕ຺ໂຖ.

ອຖ ວາຓິຊາ ກຕຎ຺ຎຸຠາວໍ ປກາເສນ຺ຕາ –

໑໒໖໔. ‘‘ຄນ຺ຕ຺ວາ ມຍໍ ສິນ຺ຘຸໂສວີຣຠູມິໍ, ຘນຕ຺ຖິກາ ອຸທ຺ທຍໍ ປຕ຺ຖຍານາ;

ຍຖາປໂຍຄາ ປຣິປຸຓ຺ຓຈາຄາ, ກາຫາມ ເສຣີສມຫໍ ອຸຬາຣນ຺ຕິ. –

ຄາຖມາຫໍສຸ. ຕຕ຺ຖ ຍຖາປໂຍຄາຕິ ອິທານິ ກຕປຏິຎ຺ຎານຸຣູປປໂຍຄາ. ປຣິປຸຓ຺ຓຈາຄາຕິ ສມຕ຺ຕຈາຄາ, ອຸຬາຣສ຺ສ ມຫສ຺ສ ປຣິຍຕ຺ຕປຣິຈ຺ຈາຄາ. ມຫນ຺ຕິ ອຸສ຺ສວປູຊໍ.

ປຸນ ເທວປຸຕ຺ໂຕ ມຫກຣຓໍ ປຏິກ຺ຂິປນ຺ໂຕ ກຕ຺ຕພ຺ເພສຸ ຈ ເຕ ນິໂຍເຊນ຺ໂຕ –

໑໒໖໕. ‘‘ມາ ເຈວ ເສຣີສມຫໍ ອກຕ຺ຖ, ສພ຺ພຎ຺ຈ ໂວ ຠວິສ຺ສຕິ ຍໍ ວເທຖ;

ປາປານິ ກມ຺ມານິ ວິວຊ຺ຊຍາຖ, ຘມ຺ມານຸໂຍຄຎ຺ຈ ອຘິຏ຺ຐຫາຖາ’’ຕິ. –

ຄາຖມາຫ. ຕຕ຺ຖ ຍໍ ວເທຖາຕິ ຍໍ ຕຸມ຺ເຫ ເຂເມນ ສິນ຺ຘຸໂສວີຣເທສປຕ຺ຕິໍ ຕຕ຺ຖ ຈ ວິປຸລໍ ອຸທ຺ທຍໍ ລາຠໍ ປຈ຺ຈາສີສນ຺ຕາ ‘‘ຄນ຺ຕ຺ວາ ມຍ’’ນ຺ຕິອາທີນິ ວທຖ. ສພ຺ພໍ ຕໍ ໂວ ຕຸມ຺ຫາກໍ ຕເຖວ ຠວິສ຺ສຕິ, ຕຕ຺ຖ ນິກ຺ກງ຺ຂາ ໂຫຖ, ຕຸມ຺ເຫ ປນ ອິໂຕ ປຏ຺ຐາຍ ປາປານິ ກມ຺ມານິ ປາຓາຕິປາຕາທີນິ ວິວຊ຺ຊຍາຖ ປຣິວຊ຺ເຊຖ. ຘມ຺ມານຸໂຍຄນ຺ຕິ ທານາທິກຸສລຘມ຺ມສ຺ສ ອນຸຍຸຎ຺ຊນໍ. ອຘິຏ຺ຐຫາຖາຕິ ອນຸສິກ຺ຂຖ ອິທໍ ເສຣີສກມຫນ຺ຕິ ທສ຺ເສຕິ.

ຍໍ ປນ ອຸປາສກໍ ອນຸຄ຺ຄຓ຺ຫນ຺ໂຕ ເຕສໍ ຣກ຺ຂາວຣຓໍ ກາຕຸກາໂມ ອໂຫສິ, ຕສ຺ສ ຄຸຓໍ ກິຕ຺ເຕຕ຺ວາ ຕໍ ເຕສໍ ອຸທ຺ທິສນ຺ໂຕ ອິມາ ຄາຖາໂຍ ອາຫ –

໑໒໖໖. ‘‘ອຸປາສໂກ ອຕ຺ຖິ ອິມມ຺ຫິ ສງ຺ເຆ, ພຫຸສ຺ສຸໂຕ ສີລວຕູປປນ຺ໂນ;

ສທ຺ໂຘ ຈ ຈາຄີ ຈ ສຸເປສໂລ ຈ, ວິຈກ຺ຂໂຓ ສນ຺ຕຸສິໂຕ ມຸຕີມາ.

໑໒໖໗. ‘‘ສຎ຺ຊານມາໂນ ນ ມຸສາ ຠເຓຍ຺ຍ, ປຣູປຆາຕາຍ ນ ເຈຕເຍຍ຺ຍ;

ເວຠູຕິກໍ ເປສຸຓໍ ໂນ ກເຣຍ຺ຍ, ສຓ຺ຫຎ຺ຈ ວາຈໍ ສຂິລໍ ຠເຓຍ຺ຍ.

໑໒໖໘. ‘‘ສຄາຣໂວ ສປ຺ປຕິສ຺ໂສ ວິນີໂຕ, ອປາປໂກ ອຘິສີເລ ວິສຸທ຺ໂຘ;

ໂສ ມາຕຣໍ ປິຕຣຎ຺ຈາປິ ຊນ຺ຕຸ, ຘມ຺ເມນ ໂປເສຕິ ອຣິຍວຸຕ຺ຕິ.

໑໒໖໙. ‘‘ມຎ຺ເຎ ໂສ ມາຕາປິຕູນໍ ກາຣຓາ, ໂຠຄານິ ປຣິເຍສຕິ ນ ອຕ຺ຕເຫຕຸ;

ມາຕາປິຕູນຎ຺ຈ ໂຍ ອຈ຺ຈເຍນ, ເນກ຺ຂມ຺ມໂປໂຓ ຈຣິສ຺ສຕິ ພ຺ຣຫ຺ມຈຣິຍໍ.

໑໒໗໐. ‘‘ອຸຊູ ອວງ຺ໂກ ອສໂຐ ອມາໂຍ, ນ ເລສກປ຺ເປນ ຈ ໂວຫເຣຍ຺ຍ;

ໂສ ຕາທິໂສ ສຸກຕກມ຺ມກາຣີ, ຘມ຺ເມ ຐິໂຕ ກິນ຺ຕິ ລເຠຖ ທຸກ຺ຂໍ.

໑໒໗໑. ‘‘ຕໍກາຣຓາ ປາຕຸກໂຕມ຺ຫິ ອຕ຺ຕນາ, ຕສ຺ມາ ຘມ຺ມໍ ປສ຺ສຖ ວາຓິຊາເສ;

ອຎ຺ຎຕ຺ຣ ເຕນິຫ ຠສ຺ມີ ຠເວຖ, ອນ຺ຘາກຸລາ ວິປ຺ປນຏ຺ຐາ ອຣຎ຺ເຎ;

ຕໍ ຂິປ຺ປມາເນນ ລຫຸໍ ປເຣນ, ສຸໂຂ ຫເວ ສປ຺ປຸຣິເສນ ສງ຺ຄໂມ’’ຕິ.

໑໒໖໖. ຕຕ຺ຖ ສງ຺ເຆຕິ ສຕ຺ຕສມູເຫ. ວິຈກ຺ຂໂຓຕິ ຕຕ຺ຖ ຕຕ຺ຖ ກຕ຺ຕພ຺ພຕາຍ ກຸສໂລ. ສນ຺ຕຸສິໂຕຕິ ສນ຺ຕຸຏ຺ໂຐ. ມຸຕີມາຕິ ກມ຺ມສ຺ສກຕຎາຓາທິນາ ອິຘໂລກປຣໂລກຫິຕານໍ ມຸນນໂຕ ມຸຕິມາ.

໑໒໖໗. ສຎ຺ຊານມາໂນ ນ ມຸສາ ຠເຓຍ຺ຍາຕິ ສມ຺ປຊານມຸສາ ນ ຠາເສຍ຺ຍ. ເວຠູຕິກນ຺ຕິ ສຫິຕານໍ ວິນາຠາວກຣຓໂຕ ‘‘ເວຠູຕິກ’’ນ຺ຕິ ລທ຺ຘນາມໍ ປິສຸຓໍ, ໂນ ກເຣຍ຺ຍ ນ ວເທຍ຺ຍ.

໑໒໖໘. ສປ຺ປຕິສ຺ໂສຕິ ປຕິສ຺ສໂຍ ຄຣຸຏ຺ຐານິເຍສຸ ນິວາຕວຸຕ຺ຕິກຕ຺ຕາ ໂສຣຈ຺ຈໍ, ສຫ ປຕິສ຺ເສນາຕິ ສປ຺ປຕິສ຺ໂສ. ອຘິສີເລຕິ ອຸປາສເກນ ຣກ຺ຂິຕພ຺ພອຘິສີລສິກ຺ຂາຍ. ອຣິຍວຸຕ຺ຕີຕິ ປຣິສຸທ຺ຘວຸຕ຺ຕິ.

໑໒໖໙. ເນກ຺ຂມ຺ມໂປໂຓຕິ ນິພ຺ພານນິນ຺ໂນ. ຈຣິສ຺ສຕິ ພ຺ຣຫ຺ມຈຣິຍນ຺ຕິ ປພ຺ພຊ຺ຊໍ ສາສນພ຺ຣຫ຺ມຈຣິຍໍ ຈຣິສ຺ສຕິ.

໑໒໗໐. ເລສກປ຺ເປນາຕິ ກປ຺ປິຍເລເສນ. ນ ຈ ໂວຫເຣຍ຺ຍາຕິ ມາຍາສາເຐຍ຺ຍວເສນ ວຈນໍ ນ ນິຈ຺ຉາເຣຍ຺ຍ. ຘມ຺ເມ ຐິໂຕ ກິນ຺ຕິ ລເຠຖ ທຸກ຺ຂນ຺ຕິ ເອວໍ ວຸຕ຺ຕນເຍນ ຘມ຺ເມ ຐິໂຕ ຘມ຺ມຈາຣີ ສມຈາຣີ ກິນ຺ຕິ ເກນ ປກາເຣນ ທຸກ຺ຂໍ ລເຠຖ ປາປຸເຓຍ຺ຍ.