໑໑. ສຸນິກ຺ຂິຕ຺ຕວິມານວຓ຺ຓນາ

ອຸຈ຺ຈມິທໍ ມຓິຖູຓໍ ວິມານນ຺ຕິ ສຸນິກ຺ຂິຕ຺ຕວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍເນວ ເທວຈາຣິກໍ ຈຣນ຺ໂຕ ຕາວຕິໍສຠວນໍ ອຸປຄໂຕ. ຕສ຺ມິຎ຺ຈ ຂເຓ ອຎ຺ຎຕໂຣ ເທວປຸຕ຺ໂຕ ອຕ຺ຕໂນ ວິມານທ຺ວາເຣ ຐິໂຕ ອາຍສ຺ມນ຺ຕໍ ມຫາໂມຄ຺ຄລ຺ລານໍ ທິສ຺ວາ ສຎ຺ຊາຕຄາຣວພຫຸມາໂນ ອຸປສງ຺ກມິຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ອຏ຺ຐາສິ.

ໂສ ກິຣ ອຕີເຕ ກສ຺ສປສມ຺ມາສມ຺ພຸທ຺ເຘ ປຣິນິພ຺ພຸເຕ ຕສ຺ສ ສຣີຣຘາຕຸໂຍ ປກ຺ຂິປິຕ຺ວາ ໂຍຊນິເກ ກນກຖູເປ ຈ ກເຕ ຈຕສ຺ໂສ ປຣິສາ ກາເລນ ກາລໍ ອຸປສງ຺ກມິຕ຺ວາ ຄນ຺ຘປຸປ຺ຜຘູປາທີຫິ ເຈຕິເຍ ປູຊໍ ກໂຣນ຺ຕິ, ຕຕ຺ຖ ອຎ຺ຎຕໂຣ ອຸປາສໂກ ອຎ຺ເຎສຸ ປຸປ຺ຜປູຊໍ ກຕ຺ວາ ຄເຕສຸ ເຕຫິ ປູຊິຕຏ຺ຐາເນ ທຸນ຺ນິກ຺ຂິຕ຺ຕານິ ປຸປ຺ຜານິ ທິສ຺ວາ ຕຕ຺ເຖວ ຕານິ ສມ຺ມເທວ ຐເປນ຺ໂຕ ສນ຺ນິເວສວເສນ ທສ຺ສນີຍໍ ປາສາທິກໍ ວິຠຕ຺ຕິວິເສສຍຸຕ຺ຕໍ ປຸປ຺ຜປູຊໍ ອກາສິ. ກຕ຺ວາ ຈ ປນ ເອຕໍ ອາຣມ຺ມຓໍ ຄຓ຺ຫນ຺ໂຕ ສຕ຺ຖຸ ຄຸເຓ ອນຸສ຺ສຣິຕ຺ວາ ປສນ຺ນຈິຕ຺ໂຕ ຕໍ ປຸຎ຺ຎໍ ຫທເຍ ຐເປສິ.

ໂສ ອປຣຠາເຄ ກາລໍ ກຕ຺ວາ ຕສ຺ເສວ ກມ຺ມສ຺ສ ອານຸຠາເວນ ຕາວຕິໍສຠວເນ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິ, ມຫານຸຠາໂວ ມຫາ ຈສ຺ສ ປຣິວາໂຣ ອໂຫສິ. ຕໍ ສນ຺ຘາຍ ວຸຕ຺ຕໍ ‘‘ຕສ຺ມິຎ຺ຈ ຂເຓ ອຎ຺ຎຕໂຣ ເທວປຸຕ຺ໂຕ…ເປ… ອຏ຺ຐາສີ’’ຕິ. ອຖ ນໍ ອາຍສ຺ມາ ມຫາໂມຄ຺ຄລ຺ລາໂນ ຍຖາລທ຺ຘສມ຺ປຕ຺ຕິກິຕ຺ຕນມຸເຂນ ກຕສຸຈຣິຕກມ຺ມໍ ອິມາຫິ ຄາຖາຫິ ປຸຈ຺ຉິ –

໑໒໘໒. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໒໘໓. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໑໒໘໔. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໒໘໕. ‘‘ປຸຈ຺ຉາມິ ຕໍ ເທວ ມຫານຸຠາວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິ ຕສ຺ສ ອຕ຺ຕໂນ ກຕກມ຺ມໍ ອິມາຫິ ຄາຖາຫິ ກເຖສິ. ຕໍ ທສ຺ເສນ຺ຕາ ສງ຺ຄີຕິກາຣາ ອາຫໍສຸ –

໑໒໘໖. ‘‘ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໑໒໘໗. ‘‘ທຸນ຺ນິກ຺ຂິຕ຺ຕໍ ມາລໍ ສຸນິກ຺ຂິປິຕ຺ວາ, ປຕິຏ຺ຐເປຕ຺ວາ ສຸຄຕສ຺ສ ຖູເປ;

ມຫິທ຺ຘິໂກ ຈມ຺ຫິ ມຫານຸຠາໂວ, ທິພ຺ເພຫິ ກາເມຫິ ສມງ຺ຄິຠູໂຕ.

໑໒໘໘. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໒໘໙. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູໂຕ ຍມຫໍ ອກາສິໍ;

ເຕນມ຺ຫິ ເອວໍ ຊລິຕານຸຠາໂວ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໑໒໘໗. ຕຕ຺ຖ ທຸນ຺ນິກ຺ຂິຕ຺ຕໍ ມາລນ຺ຕິ ເຈຕິເຍ ປູຊາກຣຓຏ຺ຐາເນ ນິຣນ຺ຕຣຏ຺ຐປນາທິນາ ຣຈນາວິເສເສນ ອຏ຺ຐເປຕ຺ວາ ຍຖານິກ຺ຂິຕ຺ຕຕາຍ ນ ສຸຏ຺ຐຸ ນິກ຺ຂິຕ຺ຕໍ, ວາເຕນ ວາ ປຫຣິຕ຺ວາ ທຸນ຺ນິກ຺ຂິຕ຺ຕໍ ປຸປ຺ຜໍ. ສຸນິກ຺ຂິປິຕ຺ວາຕິ ສຸຏ຺ຐຸ ນິກ຺ຂິປິຕ຺ວາ ຣຈນາວິເສເສນ ທສ຺ສນີຍໍ ປາສາທິກໍ ກຕ຺ວາ ນິກ຺ຂິປິຍ. ປຕິຏ຺ຐເປຕ຺ວາຕິ ວິຠຕ຺ຕິວິເສສາທິວເສນ ປຸປ຺ຜໍ ປຕິຏ຺ຐາເປຕ຺ວາ. ຕໍ ວາ ປຸປ຺ຜໍ ນິກ຺ຂິປນ຺ໂຕ ສຕ຺ຖຸ ເຈຕິຍໍ ອຸທ຺ທິສ຺ສ ມມ ສນ຺ຕາເນ ກຸສລຘມ຺ມໍ ປຕິຏ຺ຐາເປຕ຺ວາຕິ ເອວໍ ເອຕ຺ຖ ອຕ຺ໂຖ ທຏ຺ຐພ຺ໂພ. ເສສໍ ວຸຕ຺ຕນຍເມວ.

ເອວໍ ເທວປຸຕ຺ເຕນ ອຕ຺ຕໂນ ສຸຈຣິຕກມ຺ເມ ປກາສິເຕ ເຖໂຣ ຕສ຺ສ ຘມ຺ມໍ ເທເສຕ຺ວາ ອາຄນ຺ຕ຺ວາ ຠຄວໂຕ ຕມຕ຺ຖໍ ນິເວເທສິ. ຠຄວາ ຕໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕມຫາຊນສ຺ສ ຘມ຺ມໍ ເທເສສິ. ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ສຸນິກ຺ຂິຕ຺ຕວິມານວຓ຺ຓນາ ນິຏ຺ຐິຕາ.

ອິຕິ ປຣມຕ຺ຖທີປນິຍາ ຂຸທ຺ທກ-ອຏ຺ຐກຖາຍ ວິມານວຕ຺ຖຸສ຺ມິໍ

ເອກາທສວຕ຺ຖຸປຏິມຓ຺ຑິຕສ຺ສ ສຕ຺ຕມສ຺ສ

ສຸນິກ຺ຂິຕ຺ຕວຄ຺ຄສ຺ສ ອຕ຺ຖວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ປຸຣິສວິມານວຓ຺ຓນາ.

ນິຄມນກຖາ

ເອຕ຺ຕາວຕາ ຈ –

ເທວຕານໍ ວິມານາທິ-ສມ຺ປຕ຺ຕິໍ ຕສ຺ສ ກາຣຓໍ;

ປກາສຍນ຺ຕີ ສຕ຺ຕານໍ, ສພ຺ພໂລກຫິຕາວຫາ.

ອປ຺ປການມ຺ປິ ກາຣານໍ, ຍາ ວິຠາເວຕິ ເທສນາ;

ອຸຬາຣຜລຕໍ ຈິຕ຺ຕ-ເຂຕ຺ຕສມ຺ປຕ຺ຕິໂຍຄໂຕ.

ຍໍ ກຖາວຕ຺ຖຸກຸສລາ, ສຸປຣິຎ຺ຎາຕວຕ຺ຖຸກາ;

ວິມານວຕ຺ຖຸອິຈ຺ເຈວ, ສງ຺ຄາຍິໍສຸ ມເຫສໂຍ.

ຕສ຺ສ ອຕ຺ຖໍ ປກາເສຕຸໍ, ໂປຣາຓຏ຺ຐກຖານຍໍ;

ສນ຺ນິສ຺ສາຍ ສມາຣທ຺ຘາ, ອຕ຺ຖສໍວຓ຺ຓນາ ມຍາ.

ຍາ ຕຕ຺ຖ ປຣມຕ຺ຖານໍ, ຕຕ຺ຖ ຕຕ຺ຖ ຍຖາຣຫໍ;

ປກາສນາ ປຣມຕ຺ຖ-ທີປນີ ນາມ ນາມໂຕ.

ສມ຺ປຕ຺ຕາ ປຣິນິຏ຺ຐານໍ, ອນາກຸລວິນິຈ຺ຉຍາ;

ສາ ສຕ຺ຕຣສມຕ຺ຕາຍ, ປາຬິຍາ ຠາຓວາຣໂຕ.

ອິຕິ ຕໍ ສງ຺ຂໂຣນ຺ເຕນ, ຍໍ ຕໍ ອຘິຄຕໍ ມຍາ;

ປຸຎ຺ຎໍ ຕສ຺ສານຸຠາເວນ, ໂລກນາຖສ຺ສ ສາສນໍ.

ໂອຄາເຫຕ຺ວາ ວິສຸທ຺ຘາຍ, ສີລາທິປຏິປຕ຺ຕິຍາ;

ສພ຺ເພປິ ເທຫິໂນ ໂຫນ຺ຕຸ, ວິມຸຕ຺ຕິຣສຠາຄິໂນ.

ຈິຣໍ ຕິຏ຺ຐຕຸ ໂລກສ຺ມິໍ, ສມ຺ມາສມ຺ພຸທ຺ຘສາສນໍ;

ຕສ຺ມິໍ ສຄາຣວາ ນິຈ຺ຈໍ, ໂຫນ຺ຕຸ ສພ຺ເພປິ ປາຓິໂນ.

ສມ຺ມາ ວສ຺ສຕຸ ກາເລນ, ເທໂວປິ ຊຄຕີປຕິ;

ສທ຺ຘມ຺ມນິຣໂຕ ໂລກໍ, ຘມ຺ເມເນວ ປສາສຕູຕິ.

ອິຕິ ພທຣຕິຕ຺ຖວິຫາຣວາສິນາ ອາຈຣິຍຘມ຺ມປາເລນ

ກຕາຍ

ປຣມຕ຺ຖທີປນິຍາ ຂຸທ຺ທກ-ອຏ຺ຐກຖາຍ

ວິມານວຕ຺ຖຸອຕ຺ຖວຓ຺ຓນາ ນິຏ຺ຐິຕາ.

ວິມານວຕ຺ຖຸ-ອຏ຺ຐກຖາ ສມຕ຺ຕາ.