໗. ສຸນິກ຺ຂິຕ຺ຕວິມານວຄ຺ໂຄ

໑. ຈິຕ຺ຕລຕາວິມານວຓ຺ຓນາ

ຍຖາ ວນໍ ຈິຕ຺ຕລຕໍ ປຠາສຕີຕິ ຈິຕ຺ຕລຕາວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສາວຕ຺ຖິຍໍ ອຎ຺ຎຕໂຣ ອຸປາສໂກ ທລິທ຺ໂທ ອປ຺ປໂຠໂຄ ປເຣສໍ ກມ຺ມໍ ກຕ຺ວາ ຊີວຕິ. ໂສ ສທ຺ໂຘ ປສນ຺ໂນ ຊິຓ຺ເຓ ວຸຑ຺ເຒ ມາຕາປິຕໂຣ ໂປເສນ຺ໂຕ ‘‘ອິຕ຺ຖິໂຍ ນາມ ປຕິກຸເລ ຐິຕາ ອິສ຺ສຣິຍໍ ກໂຣນ຺ຕິ, ສສ຺ສຸສສຸຣານໍ ມນາປຈາຣິນິໂຍ ທຸລ຺ລຠາ’’ຕິ ມາຕາປິຕູນໍ ຈິຕ຺ຕທຸກ຺ຂໍ ປຣິຫຣນ຺ໂຕ ທາຣປຣິຄ຺ຄຫໍ ອກຕ຺ວາ ສຍເມວ ເນ ອຸປຏ຺ຐຫຕິ, ສີລານິ ຣກ຺ຂຕິ, ອຸໂປສຖໍ ອຸປວສຕິ, ຍຖາວິຠວໍ ທານານິ ເທຕິ. ໂສ ອປຣຠາເຄ ກາລໍ ກຕ຺ວາ ຕາວຕິໍເສສຸ ທ຺ວາທສໂຍຊນິເກ ວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍນ ຄນ຺ຕ຺ວາ ກຕກມ຺ມໍ ອິມາຫິ ຄາຖາຫິ ປຏິປຸຈ຺ຉິ –

໑໑໑໔. ‘‘ຍຖາ ວນໍ ຈິຕ຺ຕລຕໍ ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໑໕. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໑໖. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໑໗. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທລິທ຺ໂທ ອຕາໂຓ ກປໂຓ ກມ຺ມກໂຣ ອໂຫສິໍ;

ຊິຓ຺ເຓ ຈ ມາຕາປິຕໂຣ ອຠາຣິໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໑໘. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ໂສປິ ຕສ຺ສ ພ຺ຍາກາສິ. ເສສໍ ວຸຕ຺ຕນຍເມວ.

ຈິຕ຺ຕລຕາວິມານວຓ຺ຓນາ ນິຏ຺ຐິຕາ.

໒. ນນ຺ທນວິມານວຓ຺ຓນາ

ຍຖາ ວນໍ ນນ຺ທນໍ ປຠາສຕີຕິ ນນ຺ທນວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສາວຕ຺ຖິຍໍ ອຎ຺ຎຕໂຣ ອຸປາສໂກຕິອາທິ ສພ຺ພໍ ອນນ຺ຕຣວິມານສທິສໍ. ອຍໍ ປນ ທາຣປຣິຄ຺ຄຫໍ ກຕ຺ວາ ມາຕາປິຕໂຣ ໂປເສສີຕິ ອຍເມວ ວິເສໂສ.

໑໑໒໐. ຍຖາ ວນໍ ນນ຺ທນໍ ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໒໑. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີຕິ.

໑໑໒໒. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໒໓. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທລິທ຺ໂທ ອຕາໂຓ ກປໂຓ ກມ຺ມກໂຣ ອໂຫສິໍ;

ຊິຓ຺ເຓ ຈ ມາຕາປິຕໂຣ ອຠາຣິໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໒໔. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ຄາຖາຫິ ພ຺ຍາກາສິ. ຕຕ຺ຖ ຄາຖາສຸປິ ອປຸພ຺ພໍ ນຕ຺ຖິ.

ນນ຺ທນວິມານວຓ຺ຓນາ ນິຏ຺ຐິຕາ.

໓. ມຓິຖູຓວິມານວຓ຺ຓນາ

ອຸຈ຺ຈມິທໍ ມຓິຖູຓໍ ວິມານນ຺ຕິ ມຓິຖູຓວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສມ຺ພຫຸລາ ເຖຣາ ຠິກ຺ຂູ ອຣຎ຺ຎາຍຕເນ ວິຫຣນ຺ຕິ. ເຕສໍ ຄາມໍ ປິຓ຺ຑາຍ ຄມນມຄ຺ເຄ ເອໂກ ອຸປາສໂກ ວິສມໍ ສມໍ ກໂຣຕິ, ກຓ຺ຏເກ ນີຫຣຕິ, ຄຈ຺ຉຄຸມ຺ເພ ອປເນຕິ, ອຸທກກາເລ ມາຕິກາສຸ ເສຕຸໍ ພນ຺ຘຕິ, ວິວນຏ຺ຐາເນສຸ ຉາຍາຣຸກ຺ເຂ ໂຣເປຕິ, ຊລາສເຍສຸ ມຕ຺ຕິກໍ ອຸທ຺ຘຣິຕ຺ວາ ເຕ ປຸຖຸລຄມ຺ຠີເຣ ກໂຣຕິ, ຕິຕ຺ເຖ ສມ຺ປາເທຕິ, ຍຖາວິຠວໍ ທານໍ ເທຕິ, ສີລໍ ຣກ຺ຂຕິ. ໂສ ອປຣຠາເຄ ກາລໍ ກຕ຺ວາ ຕາວຕິໍເສສຸ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລານຕ຺ເຖໂຣ ອຸປສງ຺ກມິຕ຺ວາ ອິມາຫິ ຄາຖາຫິ ປຏິປຸຈ຺ຉິ –

໑໑໒໖. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໑໒໗. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຈ຺ຉນ຺ນາ.

໑໑໒໘. ‘‘ເກນ ເຕຕາທິໂສ ວຓ຺ໂຓ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິ ຕສ຺ສ ຄາຖາຫິ ພ຺ຍາກາສິ –

໑໑໓໐. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໓໑. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ວິວເນ ປເຖ ສງ຺ກມນໍ ອກາສິໍ;

ອາຣາມຣຸກ຺ຂານິ ຈ ໂຣປຍິສ຺ສໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໓໒. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໑໑໓໑. ຕຕ຺ຖ ວິວເນຕິ ອຣຎ຺ເຎ. ອາຣາມຣຸກ຺ຂານິ ຈາ ອາຣາມຠູເຕ ຣຸກ຺ເຂ, ອາຣາມໍ ກຕ຺ວາ ຕຕ຺ຖ ຣຸກ຺ເຂ ໂຣເປສິນ຺ຕິ ອຕ຺ໂຖ. ເສສໍ ສພ຺ພໍ ວຸຕ຺ຕນຍເມວ.

ມຓິຖູຓວິມານວຓ຺ຓນາ ນິຏ຺ຐິຕາ.

໔. ສຸວຓ຺ຓວິມານວຓ຺ຓນາ

ໂສວຓ຺ຓມເຍ ປພ຺ພຕສ຺ມິນ຺ຕິ ສຸວຓ຺ຓວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ອນ຺ຘກວິນ຺ເທ ວິຫຣຕິ. ເຕນ ສມເຍນ ອຎ຺ຎຕໂຣ ອຸປາສໂກ ສທ຺ໂຘ ປສນ຺ໂນ ວິຠວສມ຺ປນ຺ໂນ ຕສ຺ສ ຄາມສ຺ສ ອວິທູເຣ ອຎ຺ຎຕຣສ຺ມິໍ ມຸຓ຺ຑກປພ຺ພເຕ ສພ຺ພາກາຣສມ຺ປນ຺ນໍ ຠຄວໂຕ ວສນານຸຈ຺ຉວິກໍ ຄນ຺ຘກຸຏິໍ ກາເຣຕ຺ວາ ຕຕ຺ຖ ຠຄວນ຺ຕໍ ວສາເປນ຺ໂຕ ສກ຺ກຈ຺ຈໍ ອຸປຏ຺ຐຫິ, ສຍຎ຺ຈ ນິຈ຺ຈສີເລ ປຕິຏ຺ຐິໂຕ ສຸວິສຸທ຺ຘສີລສໍວໂຣ ຫຸຕ຺ວາ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິ. ຕສ຺ສ ກມ຺ມານຸຠາວສໍສູຈກໍ ນານາຣຕນຣໍສິຊາລສມຸຊ຺ຊລໍ ວິຈິຕ຺ຕເວທິກາປຣິກ຺ຂິຕ຺ຕໍ ວິວິຘວິປຸລາລງ຺ກາໂຣປໂສຠິຕໍ ສຸວິຠຕ຺ຕຠິຕ຺ຕິຕ຺ຖມ຺ຠໂສປານໍ ອາຣາມຣມຓີຍກໍ ກຎ຺ຈນປພ຺ພຕມຸທ຺ຘນິ ວິມານໍ ອຸປ຺ປຊ຺ຊິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ເທວຈາຣິກໍ ຈຣນ຺ໂຕ ທິສ຺ວາ ອິມາຫິ ຄາຖາຫິ ປຏິປຸຈ຺ຉິ –

໑໑໓໔. ‘‘ໂສວຓ຺ຓມເຍ ປພ຺ພຕສ຺ມິໍ, ວິມານໍ ສພ຺ພໂຕປຠໍ;

ເຫມຊາລປຏິຈ຺ຉນ຺ນໍ, ກິງ຺ກິຓິຊາລກປ຺ປິຕໍ.

໑໑໓໕. ‘‘ອຏ຺ຐໍສາ ສຸກຕາ ຖມ຺ຠາ, ສພ຺ເພ ເວຬຸຣິຍາມຍາ;

ເອກເມກາຍ ອໍສິຍາ, ຣຕນາ ສຕ຺ຕ ນິມ຺ມິຕາ.

໑໑໓໖. ‘‘ເວຬູຣິຍສຸວຓ຺ຓສ຺ສ, ຜລິກາ ຣູປິຍສ຺ສ ຈ;

ມສາຣຄລ຺ລມຸຕ຺ຕາຫິ, ໂລຫິຕງ຺ຄມຓີຫິ ຈ.

໑໑໓໗. ‘‘ຈິຕ຺ຣາ ມໂນຣມາ ຠູມິ, ນ ຕຕ຺ຖຸທ຺ຘໍສຕີ ຣໂຊ;

ໂຄປານສີຄຓາ ປີຕາ, ກູຏໍ ທາເຣນ຺ຕິ ນິມ຺ມິຕາ.

໑໑໓໘. ‘‘ໂສປານານິ ຈ ຈຕ຺ຕາຣິ, ນິມ຺ມິຕາ ຈຕຸໂຣ ທິສາ;

ນານາຣຕນຄພ຺ເຠຫິ, ອາທິຈ຺ໂຈວ ວິໂຣຈຕິ.

໑໑໓໙. ‘‘ເວທິຍາ ຈຕສ຺ໂສ ຕຕ຺ຖ, ວິຠຕ຺ຕາ ຠາຄໂສ ມິຕາ;

ທທ຺ທລ຺ລມານາ ອາຠນ຺ຕິ, ສມນ຺ຕາ ຈຕຸໂຣ ທິສາ.

໑໑໔໐. ‘‘ຕສ຺ມິໍ ວິມາເນ ປວເຣ, ເທວປຸຕ຺ໂຕ ມຫປ຺ປໂຠ;

ອຕິໂຣຈສິ ວຓ຺ເຓນ, ອຸທຍນ຺ໂຕວ ຠາຓຸມາ.

໑໑໔໑. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິໂຕ’’ຕິ.

ໂສປິສ຺ສ ອິມາຫິ ຄາຖາຫິ ພ຺ຍາກາສິ –

໑໑໔໒. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໔໓. ‘‘ອຫໍ ອນ຺ຘກວິນ຺ທສ຺ມິໍ, ພຸທ຺ຘສ຺ສາທິຈ຺ຈພນ຺ຘຸໂນ;

ວິຫາຣໍ ສຕ຺ຖຸ ກາເຣສິໍ, ປສນ຺ໂນ ເສຫິ ປາຓິຠິ.

໑໑໔໔. ‘‘ຕຕ຺ຖ ຄນ຺ຘຎ຺ຈ ມາລຎ຺ຈ, ປຈ຺ຈຍຎ຺ຈ ວິເລປນໍ;

ວິຫາຣໍ ສຕ຺ຖຸ ອທາສິໍ, ວິປ຺ປສນ຺ເນນ ເຈຕສາ;

ເຕນ ມຍ຺ຫໍ ອິທໍ ລທ຺ຘໍ, ວສໍ ວຕ຺ເຕມິ ນນ຺ທເນ.

໑໑໔໕. ‘‘ນນ຺ທເນ ຈ ວເນ ຣມ຺ເມ, ນານາທິຊຄຓາຍຸເຕ;

ຣມາມິ ນຈ຺ຈຄີເຕຫິ, ອຈ຺ຉຣາຫິ ປຸຣກ຺ຂໂຕ’’ຕິ.

໑໑໓໔. ຕຕ຺ຖ ສພ຺ພໂຕປຠນ຺ຕິ ສພ຺ພຠາເຄຫິ ປຠາສນ຺ຕໍ ປຠາມຸຎ຺ຈນກໍ. ກິງ຺ກິຓິຊາລກປ຺ປິຕນ຺ຕິ ກປ຺ປິຕກິງ຺ກິຓິກຊາລໍ.

໑໑໓໕. ສພ຺ເພ ເວຬຸຣິຍາມຍາຕິ ສພ຺ເພ ຖມ຺ຠາ ເວຬຸຣິຍມຓິມຍາ. ຕຕ຺ຖ ປນ ເອກເມກາຍ ອໍສິຍາຕິ ອຏ຺ຐໍເສສຸ ຖມ຺ເຠສຸ ເອກເມກສ຺ມິໍ ອໍສຠາເຄ. ຣຕນາ ສຕ຺ຕ ນິມ຺ມິຕາຕິ ສຕ຺ຕຣຕນກມ຺ມນິມ຺ມິຕາ, ເອເກໂກ ອໍໂສ ສຕ຺ຕຣຕນມໂຍຕິ ອຕ຺ໂຖ.

໑໑໓໖. ‘‘ເວຬູຣິຍສຸວຓ຺ຓສ຺ສາ’’ຕິອາທິນາ ນານາຣຕນານິ ທສ຺ເສຕິ. ຕຕ຺ຖ ເວຬູຣິຍສຸວຓ຺ຓສ຺ສາຕິ ເວຬຸຣິເຍນ ຈ ສຸວຓ຺ເຓນ ຈ ນິມ຺ມິຕາ, ຈິຕ຺ຣາຕິ ວາ ໂຍຊນາ. ກຣຓຕ຺ເຖ ຫິ ອິທໍ ສາມິວຈນໍ. ຜລິກາ ຣູປິຍສ຺ສ ຈາຕິ ເອຕ຺ຖາປິ ເອເສວ ນໂຍ. ມສາຣຄລ຺ລມຸຕ຺ຕາຫີຕິ ກພຣມຓີຫິ. ໂລຫິຕງ຺ຄມຓີຫິ ຈາຕິ ຣຕ຺ຕມຓີຫິ.

໑໑໓໗. ນ ຕຕ຺ຖຸທ຺ຘໍສຕີ ຣໂຊຕິ ມຓິມຍຠູມິກຕ຺ຕາ ນ ຕສ຺ມິໍ ວິມາເນ ຣໂຊ ອຸຄ຺ຄຈ຺ຉຕິ. ໂຄປານສີຄຓາຕິ ໂຄປານສີສມູຫາ. ປີຕາຕິ ປີຕວຓ຺ຓາ, ສຸວຓ຺ຓມຍາ ເຈວ ຜຸສ຺ສຣາຄາທິມຓິມຍາ ຈາຕິ ອຕ຺ໂຖ. ກູຏໍ ຘາເຣນ຺ຕີຕິ ສຕ຺ຕຣຕນມຍໍ ກຓ຺ຓິກໍ ຘາເຣນ຺ຕິ.

໑໑໓໘-໙. ນານາຣຕນຄພ຺ເຠຫີຕິ ນານາຣຕນມເຍຫິ ໂອວຣເກຫິ. ເວທິຍາຕິ ເວທິກາ. ຈຕສ຺ໂສຕິ ຈຕູສຸ ທິສາສຸ ຈຕສ຺ໂສ. ເຕນາຫ ‘‘ສມນ຺ຕາ ຈຕຸໂຣ ທິສາ’’ຕິ.

໑໑໔໐. ມຫປ຺ປໂຠຕິ ມຫາຊຸຕິໂກ. ອຸທຍນ຺ໂຕຕິ ອຸຄ຺ຄຈ຺ຉນ຺ໂຕ. ຠາຓຸມາຕິ ອາທິຈ຺ໂຈ.

໑໑໔໓. ເສຫິ ປາຓິຠີຕິ ກາຍສາຣໍ ປຸຎ຺ຎໍ ປສວນ຺ໂຕ ອຕ຺ຕໂນ ປາຓີຫິ ຕໍ ຕໍ ກິຈ຺ຈໍ ກໂຣນ຺ໂຕ ວິຫາຣໍ ສຕ຺ຖຸ ກາເຣສິນ຺ຕິ ໂຍຊນາ. ອຖ ວາ ເສຫິ ປາຓິຠີຕິ ຕຕ຺ຖ ອນ຺ຘກວິນ຺ທສ຺ມິໍ ຄນ຺ຘຎ຺ຈ ມາລຎ຺ຈ ປຈ຺ຈຍຎ຺ຈ ວິເລປນຎ຺ຈ ປູຊາວເສນ. ຍຖາ ກຖໍ? ວິຫາຣຎ຺ຈ ວິປ຺ປສນ຺ເນນ ເຈຕສາ ສຕ຺ຖຸໂນ ອທາສິໍ ປູເຊສິໍ ນິຍ຺ຍາເທສິໍ ຈາຕິ ເອວເມຕ຺ຖ ໂຍຊນາ ເວທິຕພ຺ພາ.

໑໑໔໔. ເຕນາຕິ ເຕນ ຍຖາວຸຕ຺ເຕນ ປຸຎ຺ຎກມ຺ເມນ ກາຣຓຠູເຕນ. ມຍ຺ຫນ຺ຕິ ມຍາ. ອິທນ຺ຕິ ອິທໍ ປຸຎ຺ຎຜລໍ, ອິທໍ ວາ ທິພ຺ພໍ ອາຘິປເຕຍ຺ຍໍ. ເຕນາຫ ‘‘ວສໍ ວຕ຺ເຕມີ’’ຕິ.

໑໑໔໕. ນນ຺ທເນຕິ ນນ຺ທິຍາ ທິພ຺ພສມິທ຺ຘິຍາ ອຸປ຺ປຊ຺ຊນຏ຺ຐາເນ ອິມສ຺ມິໍ ເທວໂລເກ, ຕຕ຺ຖາປິ ວິເສສໂຕ ນນ຺ທເນ ວເນ ຣມ຺ເມ, ເອວໍ ຣມຓີເຍ ອິມສ຺ມິໍ ນນ຺ທເນ ວເນ ຣມາມີຕິ ໂຍຊນາ. ເສສໍ ວຸຕ຺ຕນຍເມວ.

ເອວໍ ເທວຕາຍ ອຕ຺ຕໂນ ປຸຎ຺ຎກມ຺ເມ ອາວິກເຕ ເຖໂຣ ສປຣິວາຣສ຺ສ ຕສ຺ສ ເທວປຸຕ຺ຕສ຺ສ ຘມ຺ມໍ ເທເສຕ຺ວາ ຠຄວໂຕ ຕມຕ຺ຖໍ ນິເວເທສິ. ຠຄວາ ຕໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ສຸວຓ຺ຓວິມານວຓ຺ຓນາ ນິຏ຺ຐິຕາ.

໕. ອມ຺ພວິມານວຓ຺ຓນາ

ອຸຈ຺ຈມິທໍ ມຓິຖູຓນ຺ຕິ ອມ຺ພວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ຣາຊຄເຫ ອຎ຺ຎຕໂຣ ທຸຄ຺ຄຕປຸຣິໂສ ປເຣສໍ ຠຕ຺ຕເວຕນຠໂຕ ຫຸຕ຺ວາ ອມ຺ພວນໍ ຣກ຺ຂຕິ. ໂສ ເອກທິວສໍ ອາຍສ຺ມນ຺ຕໍ ສາຣິປຸຕ຺ຕໍ ຄິມ຺ຫສມເຍ ສູຣິຍາຕປສນ຺ຕຕ຺ເຕ ອຸຓ຺ຫວາລິການິປ຺ປີຬິເຕ ວິປ຺ຜນ຺ທມານມຣີຈິຊາລວິຕ຺ຖເຕ ຠູມິປ຺ປເທເສ ຕສ຺ສ ອມ຺ພາຣາມສ຺ສ ອວິທູເຣນ ມຄ຺ເຄນ ເສທາຄເຕນ ຄຕ຺ເຕນ ຄຈ຺ຉນ຺ຕໍ ທິສ຺ວາ ສຎ຺ຊາຕຄາຣວພຫຸມາໂນ ອຸປສງ຺ກມິຕ຺ວາ ເອວມາຫ ‘‘ມຫາ ອຍໍ, ຠນ຺ເຕ, ຆມ຺ມປຣິຬາໂຫ, ອຕິວິຍ ປຣິສ຺ສນ຺ຕຣູໂປ ວິຍ ທິສ຺ສຕິ, ສາຘຸ, ຠນ຺ເຕ, ອຍ຺ໂຍ ອິມໍ ອມ຺ພາຣາມໍ ປວິສິຕ຺ວາ ມຸຫຸຕ຺ຕໍ ວິສ຺ສມິຕ຺ວາ ອທ຺ຘານປຣິສ຺ສມໍ ປຏິວິໂນເທຕ຺ວາ ຄຈ຺ຉຖ ອນຸກມ຺ປໍ ອຸປາທາຍາ’’ຕິ. ເຖໂຣ ວິເສສໂຕ ຕສ຺ສ ຈິຕ຺ຕປ຺ປສາທໍ ປຣິພ຺ຣູເຫຕຸກາໂມ ຕໍ ອາຣາມໍ ປວິສິຕ຺ວາ ອຎ຺ຎຕຣສ຺ສ ອມ຺ພຣຸກ຺ຂສ຺ສ ມູເລ ນິສີທິ.

ປຸນ ໂສ ປຸຣິໂສ ອາຫ ‘‘ສເຈ, ຠນ຺ເຕ, ນ຺ຫາຍິຕຸກາມຕ຺ຖ, ອຫໍ ອິໂຕ ກູປໂຕ ອຸທກໍ ອຸທ຺ຘຣິຕ຺ວາ ຕຸມ຺ເຫ ນ຺ຫາເປສ຺ສາມິ, ປານີຍຎ຺ຈ ທສ຺ສາມີ’’ຕິ. ເຖໂຣປິ ອຘິວາເສສິ ຕຸຓ຺ຫີຠາເວນ. ໂສ ກູປໂຕ ອຸທກໍ ອຸທ຺ຘຣິຕ຺ວາ ປຣິສ຺ສາເວຕ຺ວາ ເຖຣໍ ນ຺ຫາເປສິ, ນ຺ຫາເປຕ຺ວາ ຈ ຫຕ຺ຖປາເທ ໂຘວິຕ຺ວາ ນິສິນ຺ນສ຺ສ ປານີຍໍ ອຸປເນສິ. ເຖໂຣ ປານີຍໍ ປິວິຕ຺ວາ ປຏິປ຺ປສ຺ສທ຺ຘທຣໂຖ ຕສ຺ສ ປຸຣິສສ຺ສ ອຸທກທາເນ ເຈວ ນ຺ຫາປເນ ຈ ອນຸໂມທນໍ ວຕ຺ວາ ປກ຺ກາມິ. ອຖ ໂສ ປຸຣິໂສ ‘‘ຆມ຺ມາຠິຕຕ຺ຕສ຺ສ ວຕ ເຖຣສ຺ສ ຆມ຺ມປຣິຬາຫໍ ປຏິປ຺ປສ຺ສມ຺ເຠສິໍ, ພຫຸໍ ວຕ ມຍາ ປຸຎ຺ຎໍ ປສຸຕ’’ນ຺ຕິ ອຸຬາຣປີຕິໂສມນສ຺ສໍ ປຏິສໍເວເທສິ. ໂສ ອປຣຠາເຄ ກາລໍ ກຕ຺ວາ ຕາວຕິໍເສສຸ ອຸປ຺ປຊ຺ຊິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ອຸປສງ຺ກມິຕ຺ວາ ອິມາຫິ ຄາຖາຫິ ກຕປຸຎ຺ຎໍ ປຸຈ຺ຉິ.

໑໑໔໖. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໑໔໗. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໑໑໔໘. ‘‘ເກນ ເຕຕາທິໂສ ວຓ຺ໂຓ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໕໐. ‘‘ໂສ ເທວປຸຕ຺ໂຕ ອຕ຺ຕມໂນ…ເປ…

ຍສ຺ສ ກມ຺ມສ຺ສິທໍ ຜລໍ’’.

໑໑໕໑. ‘‘ຄິມ຺ຫານໍ ປຈ຺ຉິເມ ມາເສ, ປຕປນ຺ເຕ ທິວງ຺ກເຣ;

ປເຣສໍ ຠຕໂກ ໂປໂສ, ອມ຺ພາຣາມມສິຎ຺ຈຕິ.

໑໑໕໒. ‘‘ອຖ ເຕນາຄມາ ຠິກ຺ຂຸ, ສາຣິປຸຕ຺ໂຕຕິ ວິສ຺ສຸໂຕ;

ກິລນ຺ຕຣູໂປ ກາເຍນ, ອກິລນ຺ໂຕວ ເຈຕສາ.

໑໑໕໓. ‘‘ຕຎ຺ຈ ທິສ຺ວານ ອາຍນ຺ຕໍ, ອໂວຈໍ ອມ຺ພສິຎ຺ຈໂກ;

ສາຘຸ ຕໍ ຠນ຺ເຕ ນ຺ຫາເປຍ຺ຍໍ, ຍໍ ມມສ຺ສ ສຸຂາວຫໍ.

໑໑໕໔. ‘‘ຕສ຺ສ ເມ ອນຸກມ຺ປາຍ, ນິກ຺ຂິປິ ປຕ຺ຕຈີວຣໍ;

ນິສີທິ ຣຸກ຺ຂມູລສ຺ມິໍ, ຉາຍາຍ ເອກຈີວໂຣ.

໑໑໕໕. ‘‘ຕຎ຺ຈ ອຈ຺ເຉນ ວາຣິນາ, ປສນ຺ນມານໂສ ນໂຣ;

ນ຺ຫາປຍີ ຣຸກ຺ຂມູລສ຺ມິໍ, ຉາຍາຍ ເອກຈີວຣໍ.

໑໑໕໖. ‘‘ອມ຺ໂພ ຈ ສິຕ຺ໂຕ ສມໂຓ ຈ ນ຺ຫາປິໂຕ,

ມຍາ ຈ ປຸຎ຺ຎໍ ປສຸຕໍ ອນປ຺ປກໍ;

ອິຕິ ໂສ ປີຕິຍາ ກາຍໍ, ສພ຺ພໍ ຜຣຕິ ອຕ຺ຕໂນ.

໑໑໕໗. ‘‘ຕເທວ ເອຕ຺ຕກໍ ກມ຺ມໍ, ອກາສິໍ ຕາຍ ຊາຕິຍາ;

ປຫາຍ ມານຸສໍ ເທຫໍ, ອຸປປນ຺ໂນມ຺ຫິ ນນ຺ທນໍ.

໑໑໕໘. ‘‘ນນ຺ທເນ ຈ ວເນ ຣມ຺ເມ, ນານາທິຊຄຓາຍຸເຕ;

ຣມາມິ ນຈ຺ຈຄີເຕຫິ, ອຈ຺ຉຣາຫິ ປຸຣກ຺ຂໂຕ’’ຕິ. –

ໂສປິ ຕສ຺ສ ອິມາຫິ ຄາຖາຫິ ພ຺ຍາກາສິ.

໑໑໕໑. ຕຕ຺ຖ ຄິມ຺ຫານໍ ປຈ຺ຉິເມ ມາເສຕິ ອາສາຬ຺ຫິມາເສ. ປຕປນ຺ເຕຕິ ອຕິວິຍ ທິປ຺ປນ຺ເຕ, ສພ຺ພໂສ ອຸຓ຺ຫໍ ວິສ຺ສຊ຺ເຊນ຺ເຕຕິ ອຕ຺ໂຖ. ທິວງ຺ກເຣຕິ ທິວາກເຣ, ອຍເມວ ວາ ປາໂຐ. ອສິຎ຺ຈຕີຕິ ສິຎ຺ຈຕິ, -ກາໂຣ ນິປາຕມຕ຺ຕໍ, ສິຎ຺ຈຕິ ອມ຺ພຣຸກ຺ຂມູເລສຸ ຘຸວໍ ຊລເສກໍ ກໂຣຕີຕິ ອຕ຺ໂຖ. ‘‘ອສິຎ຺ຈຖາ’’ຕິ ຈ ປາໂຐ, ສິຎ຺ຈິຕ຺ຖາຕິ ອຕ຺ໂຖ. ‘‘ອສິຎ຺ຈຫ’’ນ຺ຕິ ຈ ປຐນ຺ຕິ, ປເຣສໍ ຠຕໂກ ໂປໂສ ຫຸຕ຺ວາ ຕທາ ອມ຺ພາຣາມໍ ອສິຎ຺ຈິໍ ອຫນ຺ຕິ ອຕ຺ໂຖ.

໑໑໕໒. ເຕນາຕິ ເຍນ ທິສາຠາເຄນ ໂສ ອມ຺ພາຣາໂມ, ເຕນ ອຄມາ ອຄຎ຺ຉິ. ອກິລນ຺ໂຕວ ເຈຕສາຕິ ເຈໂຕທຸກ຺ຂສ຺ສ ມຄ຺ເຄເນວ ປຫີນຕ຺ຕາ ເຈຕສາ ອກິລນ຺ໂຕປິ ສມາໂນ ກິລນ຺ຕຸຣູໂປ ກາເຍນ ເຕນ ມຄ຺ເຄນ ອຄມາຕິ ໂຍຊນາ.

໑໑໕໓-໔. ອໂວຈໍ ອຫໍ ຕທາ ອມ຺ພສິຎ຺ຈໂກ ຫຸຕ຺ວາຕິ ໂຍຊນາ. ເອກຈີວໂຣຕິ ນ຺ຫາຍິຕຸກາໂມຕິ ອຘິປ຺ປາໂຍ.

໑໑໕໖. ອິຕີຕິ ເອວໍ ‘‘ອມ຺ໂພ ຈ ສິຕ຺ໂຕ, ສມໂຓ ຈ ນ຺ຫາປິໂຕ, ມຍາ ຈ ປຸຎ຺ຎໍ ປສຸຕໍ ອນປ຺ປກໍ, ເອເກເນວ ປໂຍເຄນ ຕິວິໂຘປິ ອຕ຺ໂຖ ສາຘິໂຕ’’ຕິ ອິມິນາກາເຣນ ປວຕ຺ຕາຍ ປີຕິຍາ ໂສ ປຸຣິໂສ ອຕ຺ຕໂນ ສພ຺ພໍ ກາຍໍ ຜຣຕິ, ນິຣນ຺ຕຣໍ ຜຸຏໍ ກໂຣຕີຕິ ໂຍຊນາ. ອຕີຕຕ຺ເຖ ເຈຕໍ ວຕ຺ຕມານວຈນໍ, ຜຣີຕິ ອຕ຺ໂຖ.

໑໑໕໗. ຕເທວ ເອຕ຺ຕກໍ ກມ຺ມນ຺ຕິ ຕໍ ເອຕ຺ຕກໍ ເອວໍ ປານີຍທານມຕ຺ຕກໍ ກມ຺ມໍ ອກາສິໍ, ຕາຍ ຕສ຺ສໍ ຊາຕິຍໍ ອຎ຺ຎໍ ນານຸສ຺ສຣາມີຕິ ອຘິປ຺ປາໂຍ. ເຕສໍ ວຸຕ຺ຕນຍເມວ.

ອມ຺ພວິມານວຓ຺ຓນາ ນິຏ຺ຐິຕາ.

໖. ໂຄປາລວິມານວຓ຺ຓນາ

ທິສ຺ວານ ເທວໍ ປຏິປຸຈ຺ຉິ ຠິກ຺ຂູຕິ ໂຄປາລວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ຣາຊຄຫວາສີ ອຎ຺ຎຕໂຣ ໂຄປາລໂກ ປາຕຣາສຕ຺ຖາຍ ປິໂລຕິກາຍ ປຸຏພທ຺ຘໍ ກຸມ຺ມາສໍ ຄເຫຕ຺ວາ ນຄຣໂຕ ນິກ຺ຂມິຕ຺ວາ ຄາວີນໍ ຈຣຓຏ຺ຐານຠູຕໍ ໂຄຈຣຠູມິໍ ສມ຺ປາປຸຓິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ‘‘ອຍໍ ອິທາເນວ ກາລໍ ກຣິສ຺ສຕິ, ມຍ຺ຫຎ຺ຈ ກຸມ຺ມາສໍ ທຕ຺ວາ ຕາວຕິໍເສສຸ ອຸປ຺ປຊ຺ຊິສ຺ສຕີ’’ຕິ ຈ ຎຕ຺ວາ ຕສ຺ສ ສມີປໍ ອຄມາສິ. ໂສ ເວລໍ ໂອໂລເກຕ຺ວາ ເຖຣສ຺ສ ກຸມ຺ມາສໍ ທາຕຸກາໂມ ອໂຫສິ. ເຕນ ຈ ສມເຍນ ຄາວິໂຍ ມາສກ຺ເຂຕ຺ຕໍ ປວິສນ຺ຕິ. ອຖ ໂສ ໂຄປາໂລ ຈິນ຺ເຕສິ ‘‘ກິໍ ນຸ ໂຂ ເຖຣສ຺ສ ກຸມ຺ມາສໍ ທເທຍ຺ຍໍ, ອຸທາຫຸ ຄາວິໂຍ ມາສກ຺ເຂຕ຺ຕໂຕ ນີຫເຣຍ຺ຍ’’ນ຺ຕິ. ອຖສ຺ສ ເອຕທໂຫສິ ‘‘ມາສສາມິກາ ມໍ ຍໍ ອິຈ຺ຉນ຺ຕິ, ຕໍ ກໂຣນ຺ຕຸ, ເຖເຣ ປນ ຄເຕ ກຸມ຺ມາສທານນ຺ຕຣາໂຍ ເມ ສິຍາ, ຫນ຺ທາຫໍ ປຐມໍ ອຍ຺ຍສ຺ສ ກຸມ຺ມາສໍ ທສ຺ສາມີ’’ຕິ ຕໍ ເຖຣສ຺ສ ອຸປເນສິ. ປຏິຄ຺ຄເຫສິ ເຖໂຣ ອນຸກມ຺ປໍ ອຸປາທາຍ.

ອຖ ນໍ ຄາວິໂຍ ນິວຕ຺ເຕຕຸໍ ປຣິສ຺ສຍໍ ອໂນໂລເກຕ຺ວາ ເວເຄນ ອຸປຘາວນ຺ຕໍ ປາເທນ ຜຸຏ຺ໂຐ ອາສີວິໂສ ຑໍສິ. ເຖໂຣປິ ຕໍ ອນຸກມ຺ປມາໂນ ຕໍ ກຸມ຺ມາສໍ ປຣິຠຸຎ຺ຊິຕຸໍ ອາຣຠິ. ໂຄປາລໂກປິ ຄາວິໂຍ ນິວຕ຺ເຕຕ຺ວາ ອາຄໂຕ ເຖຣໍ ກຸມ຺ມາສໍ ປຣິຠຸຎ຺ຊນ຺ຕໍ ທິສ຺ວາ ປສນ຺ນຈິຕ຺ໂຕ ອຸຬາຣໍ ປີຕິໂສມນສ຺ສໍ ປຏິສໍເວເທນ຺ໂຕ ນິສີທິ. ຕາວເທວສ຺ສ ສກລສຣີຣໍ ວິສໍ ອຊ຺ໂຌຕ຺ຖຣິ. ມຸຫຸຕ຺ຕເມວ ເວເຄ ມຸທ຺ຘປຕ຺ເຕ ກາລມກາສິ, ກາລກໂຕ ຈ ຕາວຕິໍເສສຸ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ທິສ຺ວາ ອິມາຫິ ຄາຖາຫິ ປຏິປຸຈ຺ຉິ –

໑໑໕໙. ‘‘ທິສ຺ວານ ເທວໍ ປຏິປຸຈ຺ຉິ ຠິກ຺ຂຸ, ອຸຈ຺ເຈ ວິມານມ຺ຫິ ຈິຣຏ຺ຐິຕິເກ;

ອາມຸຕ຺ຕຫຕ຺ຖາຠຣຓໍ ຍສສ຺ສິໍ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໑໖໐. ‘‘ອລງ຺ກໂຕ ມລ຺ຍຘໂຣ ສຸວຕ຺ໂຖ, ສຸກຸຓ຺ຑລີ ກປ຺ປິຕເກສມສ຺ສຸ;

ອາມຸຕ຺ຕຫຕ຺ຖາຠຣໂຓ ຍສສ຺ສີ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໑໖໑. ‘‘ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ; ອຏ຺ຐຏ຺ຐກາ ສິກ຺ຂິຕາ ສາຘຸຣູປາ;

ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໑໖໒. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິ ຕສ຺ສ ພ຺ຍາກາສິ –

໑໑໖໓. ‘‘ໂສ ເທວປຸຕ຺ໂຕ ອຕ຺ຕມໂນ…ເປ…ຍສ຺ສ ກມ຺ມສ຺ສິທໍ ຜລໍ’’.

໑໑໖໔. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ສງ຺ຄມ຺ມ ຣກ຺ຂິສ຺ສໍ ປເຣສໍ ເຘນຸໂຍ;

ຕໂຕ ຈ ອາຄາ ສມໂຓ ມມນ຺ຕິເກ, ຄາໂວ ຈ ມາເສ ອຄມໍສຸ ຂາທິຕຸໍ.

໑໑໖໕. ‘‘ທ຺ວຍຊ຺ຊ ກິຈ຺ຈໍ ອຸຠຍຎ຺ຈ ກາຣິຍໍ, ອິຈ຺ເຈວຫໍ ຠນ຺ເຕ ຕທາ ວິຈິນ຺ຕຍິໍ;

ຕໂຕ ຈ ສຎ຺ຎໍ ປຏິລທ຺ຘ ໂຍນິໂສ, ‘ທທາມິ ຠນ຺ເຕ’ຕິ ຂິປິໍ ອນນ຺ຕກໍ.

໑໑໖໖. ‘‘ໂສ ມາສເຂຕ຺ຕໍ ຕຸຣິໂຕ ອວາສຣິໍ, ປຸຣາ ອຍໍ ຠຎ຺ຊຕິ ຍສ຺ສິທໍ ຘນໍ;

ຕໂຕ ຈ ກຓ຺ໂຫ ອຸຣໂຄ ມຫາວິໂສ, ອຑໍສິ ປາເທ ຕຸຣິຕສ຺ສ ເມ ສໂຕ.

໑໑໖໗. ‘‘ສ຺ວາຫໍ ອຏ຺ໂຏມ຺ຫິ ທຸກ຺ເຂນ ປີຬິໂຕ, ຠິກ຺ຂຸ ຈ ຕໍ ສາມໍ ມຸຎ຺ຈິຕ຺ວານນ຺ຕກໍ;

ອຫາສິ ກຸມ຺ມາສໍ ມມານຸກມ຺ປຍາ, ຕໂຕ ຈຸໂຕ ກາລກໂຕມ຺ຫິ ເທວຕາ.

໑໑໖໘. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ກມ຺ມໍ ອນຸໂຠມິ ອຕ຺ຕນາ;

ຕຍາ ຫິ ຠນ຺ເຕ ອນຸກມ຺ປິໂຕ ຠຸສໍ, ກຕຎ຺ຎຸຕາຍ ອຠິວາທຍາມິ ຕໍ.

໑໑໖໙. ‘‘ສເທວເກ ໂລເກ ສມາຣເກ ຈ, ອຎ຺ໂຎ ມຸນິ ນຕ຺ຖິ ຕຍານຸກມ຺ປໂກ;

ຕຍາ ຫິ ຠນ຺ເຕ ອນຸກມ຺ປິໂຕ ຠຸສໍ, ກຕຎ຺ຎຸຕາຍ ອຠິວາທຍາມິ ຕໍ.

໑໑໗໐. ‘‘ອິມສ຺ມິໍ ໂລເກ ປຣສ຺ມິໍ ວາ ປນ, ອຎ຺ໂຎ ມຸນີ ນຕ຺ຖິ ຕຍານຸກມ຺ປໂກ;

ຕຍາ ຫິ ຠນ຺ເຕ ອນຸກມ຺ປິໂຕ ຠຸສໍ, ກຕຎ຺ຎຸຕາຍ ອຠິວາທຍາມິ ຕ’’ນ຺ຕິ.

ອຖາຍສ຺ມາ ມຫາໂມຄ຺ຄລ຺ລາໂນ ອຕ຺ຕນາ ຈ ເທວຕາຍ ຈ ກຖິຕນິຍາເມເນວ ຕໍ ຠຄວໂຕ ອາໂຣເຈສິ. ສຕ຺ຖາ ຕມຕ຺ຖໍ ປຈ຺ຈນຸຠາສິຕ຺ວາ ຕໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສຕຸໍ ‘‘ທິສ຺ວານ ເທວໍ ປຏິປຸຈ຺ຉິ ຠິກ຺ຂູ’’ຕິອາທິມາຫ.

໑໑໕໙. ຕຕ຺ຖ ເທວນ຺ຕິ ໂຄປາລເທວປຸຕ຺ຕໍ. ຠິກ຺ຂູຕິ ອາຍສ຺ມນ຺ຕໍ ມຫາໂມຄ຺ຄລ຺ລານໍ ສນ຺ຘາຍ ສຕ຺ຖາ ວທຕິ. ໂສ ຫິ ສພ຺ພໂສ ຠິນ຺ນກິເລສຕາຍ ຠິກ຺ຂຸ. ວິມານສ຺ສ ພຫຸກາລາວຏ຺ຐາຍິຕາຍ ກປ຺ປຏ຺ຐິຕິກຕາຍ ເອວ ວາ ‘‘ຈິຣຏ຺ຐິຕິເກ’’ຕິ ວຸຕ຺ຕໍ, ‘‘ຈິຣຏ຺ຐິຕິກ’’ນ຺ຕິປິ ເກຈິ ປຐນ຺ຕິ. ຕຎ຺ຫິ ‘‘ເທວ’’ນ຺ຕິ ອິມິນາ ສມ຺ພນ຺ຘິຕພ຺ພໍ. ໂສປິ ຫິ ສຏ຺ຐິສຕສຫສ຺ສາຘິກາ ຕິສ຺ໂສ ວສ຺ສໂກຏິໂຍ ຕຕ຺ຖ ອວຏ຺ຐານໂຕ ‘‘ຈິຣຏ຺ຐິຕິເກ’’ຕິ ວຕ຺ຕພ຺ພຕໍ ລຠຕິ. ຍຖາປິ ຈນ຺ທິມາຕິ ຍຖາ ຈນ຺ທິມາ ເທວປຸຕ຺ໂຕ ກນ຺ຕສີຕລມໂນຫຣກິຣຓຊາລສມຸຊ຺ຊເລ ອຕ຺ຕໂນ ທິພ຺ເພ ວິມານມ຺ຫິ ວິໂຣຈຕິ, ເອວໍ ວິໂຣຈມານນ຺ຕິ ວຈນເສສາ.

໑໑໖໐. ອລງ຺ກໂຕຕິອາທິ ຕສ຺ສ ເທວປຸຕ຺ຕສ຺ສ ເຖເຣນ ປຸຈ຺ຉິຕາກາຣທສ຺ສນໍ, ຕໍ ເຫຏ຺ຐາ ວຸຕ຺ຕຕ຺ຖເມວ.

໑໑໖໔. ສງ຺ຄມ຺ມາຕິ ສງ຺ຄເມຕ຺ວາ, ສງ຺ຄມ຺ມາຕິ ວາ ສງ຺ຄເຫຕ຺ວາ. ເຫຕ຺ວຕ຺ໂຖປິ ຫິ ອິຘ ອນ຺ໂຕນີໂຕ, ພຫູ ເອກໂຕ ຫຸຕ຺ວາຕິ ອຕ຺ໂຖ. ອາຄາຕິ ອາຄຎ຺ຉິ. ມາເສຕິ ມາສສສ຺ສານິ.

໑໑໖໕. ທ຺ວຍຊ຺ຊາຕິ ທ຺ວຍໍ ອຊ຺ຊ ເອຕຣຫິ ກິຈ຺ຈໍ ກາຕພ຺ພໍ. ອຸຠຍຎ຺ຈ ກາຣິຍນ຺ຕິ ວຸຕ຺ຕສ຺ເສວຕ຺ຖສ຺ສ ປຣິຍາຍວຈນໍ. ສຎ຺ຎນ຺ຕິ ຘມ຺ມສຎ຺ຎໍ. ເຕນາຫ ‘‘ໂຍນິໂສ’’ຕິ ປຏິລທ຺ຘາຕິ ປຏິລຠິຕ຺ວາ. ຂິປິນ຺ຕິ ປນິຄ຺ຄາຫາປນວເສນ ຫຕ຺ເຖ ຂິປິໍ. ອນນ຺ຕກນ຺ຕິ ນນ຺ຕກໍ ກຸມ຺ມາສໍ ປກ຺ຂິປິຕ຺ວາ ພນ຺ຘິຕ຺ວາ ຐປິຕໍ ປິໂລຕິກໍ. ອ-ກາໂຣ ເຈຕ຺ຖ ນິປາຕມຕ຺ຕໍ.

໑໑໖໖. ໂສຕິ ໂສ ອຫໍ. ຕຸຣິໂຕຕິ ຕຸຣິໂຕ ສມ຺ຠມນ຺ໂຕ. ອວາສຣິນ຺ຕິ ອຸປຄຈ຺ຉິ, ປາວິສິໍ ວາ. ປຸຣາ ອຍໍ ຠຎ຺ຊຕິ ຍສ຺ສິທໍ ຘນນ຺ຕິ ຍສ຺ສ ເຂຕ຺ຕສາມິກສ຺ສ ອິທໍ ມາສສສ຺ສໍ ຘນໍ, ຕໍ ອຍໍ ໂຄຄໂຓ ຠຎ຺ຊຕິ ປຸຣາ ຕສ຺ສ ຠຎ຺ຊນໂຕ, ອາມທ຺ທນໂຕ ປຸເຣຕຣເມວາຕິ ອຕ຺ໂຖ. ຕໂຕຕິ ຕຕ຺ຖ. ຕຸຣິຕສ຺ສ ເມ ສໂຕຕິ ສມ຺ຠມນ຺ຕສ຺ສ ເມ ສມານສ຺ສ, ສຫສາ ຄມເນນ ມຄ຺ເຄ ກຓ຺ຫສປ຺ປໍ ອໂນໂລເກຕ຺ວາ ຄຕສ຺ສາຕິ ອຘິປ຺ປາໂຍ.

໑໑໖໗. ອຏ຺ໂຏມ຺ຫິ ທຸກ຺ເຂນ ປີຬິໂຕຕິ ເຕນ ອາສີວິສຑໍສເນນ ອຏ຺ໂຏ ອຏ຺ຏິໂຕ ອຸປທ຺ທຸໂຕ ມຣຓທຸກ຺ເຂນ ພາຘິໂຕ ຠວາມິ. ອຫາສີຕິ ອຊ຺ໂຌຫຣິ, ປຣິຠຸຎ຺ຊີຕິ ອຕ຺ໂຖ. ຕໂຕ ຈຸໂຕ ກາລກໂຕມ຺ຫິ ເທວຕາຕິ ຕໂຕ ມນຸສ຺ສຕ຺ຕຠາວໂຕ ຈຸໂຕ ມຣຓກາລປ຺ປຕ຺ຕິຍາ, ຕຕ຺ຖ ວາ ອາຍຸສງ຺ຂາຣສ຺ສ ເຂປນສງ຺ຂາຕສ຺ສ ກາລສ຺ສ ກຕຕ຺ຕາ ກາລກໂຕ, ຕທນນ຺ຕຣເມວ ຈ ອມ຺ຫິ ເທວຕາ ເທວຕ຺ຕຠາວປ຺ປຕ຺ຕິຍາ ເທວຕາ ໂຫມີຕິ ອຕ຺ໂຖ.

໑໑໖໙. ຕຍາຕິ ຕຍາ ສທິໂສ ອຎ຺ໂຎ ມຸນິ ໂມເນຍ຺ຍຄຸຓຍຸຕ຺ໂຕ ອິສິ ນຕ຺ຖິ. ຕຍາຕິ ວາ ນິສ຺ສກ຺ເກ ອິທໍ ກຣຓວຈນໍ. ເສສໍ ວຸຕ຺ຕນຍເມວ.

ໂຄປາລວິມານວຓ຺ຓນາ ນິຏ຺ຐິຕາ.