໘. ອເນກວຓ຺ຓວິມານວຓ຺ຓນາ

ອເນກວຓ຺ຓໍ ທຣໂສກນາສນນ຺ຕິ ອເນກວຓ຺ຓວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍນ ເທວຈາຣິກໍ ຈຣນ຺ໂຕ ຕາວຕິໍສຠວນໍ ອຄມາສິ. ອຖ ນໍ ອເນກວຓ຺ໂຓ ເທວປຸຕ຺ໂຕ ທິສ຺ວາ ສຎ຺ຊາຕຄາຣວພຫຸມາໂນ ອຸປສງ຺ກມິຕ຺ວາ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ເຖໂຣ –

໑໑໙໙. ‘‘ອເນກວຓ຺ຓໍ ທຣໂສກນາສນໍ, ວິມານມາຣຸຍ຺ຫ ອເນກຈິຕ຺ຕໍ;

ປຣິວາຣິໂຕ ອຈ຺ຉຣາສງ຺ຄເຓນ, ສຸນິມ຺ມິໂຕ ຠູຕປຕີວ ໂມທສິ.

໑໒໐໐. ‘‘ສມສ຺ສໂມ ນຕ຺ຖິ ກຸໂຕ ປນຸຕ຺ຕໂຣ, ຍເສນ ປຸຎ຺ເຎນ ຈ ອິທ຺ຘິຍາ ຈ;

ສພ຺ເພ ຈ ເທວາ ຕິທສຄຓາ ສເມຈ຺ຈ, ຕໍ ຕໍ ນມສ຺ສນ຺ຕິ ສສິໍວ ເທວາ;

ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໒໐໑. ‘‘ເທວິທ຺ຘິປຕ຺ໂຕສິ ມຫານຸຠາໂວ,

ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ,

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. –

ອຘິຄຕສມ຺ປຕ຺ຕິກິຕ຺ຕນມຸເຂນ ກຕກມ຺ມໍ ປຸຈ຺ຉິ. ຕໍ ທສ຺ເສຕຸໍ –

໑໒໐໒. ‘‘ໂສ ເທວປຸຕ຺ໂຕ ອຕ຺ຕມໂນ…ເປ…ຍສ຺ສ ກມ຺ມສ຺ສິທໍ ຜລ’’ນ຺ຕິ. –

ວຸຕ຺ຕໍ. ໂສປິ –

໑໒໐໓. ‘‘ອຫໍ ຠທນ຺ເຕ ອຫຸວາສິ ປຸພ຺ເພ, ສຸເມຘນາມສ຺ສ ຊິນສ຺ສ ສາວໂກ;

ປຸຖຸຊ຺ຊໂນ ອນນຸໂພໂຘຫມສ຺ມິ, ໂສ ສຕ຺ຕ ວສ຺ສານິ ປຣິພ຺ພຊິສ຺ສຫໍ.

໑໒໐໔. ‘‘ໂສຫໍ ສຸເມຘສ຺ສ ຊິນສ຺ສ ສຕ຺ຖຸໂນ, ປຣິນິພ຺ພຸຕສ຺ໂສຆຕິຓ຺ຓສ຺ສ ຕາທິໂນ;

ຣຕນຸຈ຺ຈຍໍ ເຫມຊາເລນ ຉນ຺ນໍ, ວນ຺ທິຕ຺ວາ ຖູປສ຺ມິໍ ມນໍ ປສາທຍິໍ.

໑໒໐໕. ‘‘ນ ມາສິ ທານໍ ນ ຈ ມຕ຺ຖິ ທາຕຸໍ, ປເຣ ຈ ໂຂ ຕຕ຺ຖ ສມາທເປສິໍ;

ປູເຊຖ ນໍ ປູຊນີຍສ຺ສ ຘາຕຸໍ, ເອວໍ ກິຣ ສຄ຺ຄມິໂຕ ຄມິສ຺ສຖ.

໑໒໐໖. ‘‘ຕເທວ ກມ຺ມໍ ກຸສລໍ ກຕໍ ມຍາ,

ສຸຂຎ຺ຈ ທິພ຺ພໍ ອນຸໂຠມິ ອຕ຺ຕນາ;

ໂມທາມຫໍ ຕິທສຄຓສ຺ສ ມຊ຺ເຌ,

ນ ຕສ຺ສ ປຸຎ຺ຎສ຺ສ ຂຍມ຺ປິ ອຊ຺ຌຄ’’ນ຺ຕິ. – ກເຖສິ;

ອິໂຕ ກິຣ ຕິໍສກປ຺ປສຫສ຺ເສ ສຸເມໂຘ ນາມ ສມ຺ມາສມ຺ພຸທ຺ໂຘ ໂລເກ ອຸປ຺ປຊ຺ຊິຕ຺ວາ ສເທວກໍ ໂລກໍ ເອໂກຠາສໍ ກຕ຺ວາ ກຕພຸທ຺ຘກິຈ຺ໂຈ ປຣິນິພ຺ພຸໂຕ, ມນຸສ຺ເສຫິ ຈ ຠຄວໂຕ ຘາຕຸໍ ຄເຫຕ຺ວາ ຣຕນເຈຕິເຍ ກເຕ ອຎ຺ຎຕໂຣ ປຸຣິໂສ ສຕ຺ຖຸ ສາສເນ ປພ຺ພຊິຕ຺ວາ ສຕ຺ຕ ວສ຺ສານິ ພ຺ຣຫ຺ມຈຣິຍໍ ຈຣິຕ຺ວາ ອນວຏ຺ຐິຕຈິຕ຺ຕຕາຍ ກຸກ຺ກຸຈ຺ຈໂກ ຫຸຕ຺ວາ ອຸປ຺ປພ຺ພຊິ. ອຸປ຺ປພ຺ພຊິໂຕ ຈ ສໍເວຄພຫຸລຕາຍ ຘມ຺ມຈ຺ຉນ຺ທວນ຺ຕຕາຍ ຈ ເຈຕິຍງ຺ຄເຓ ສມ຺ມຊ຺ຊນປຣິຠຓ຺ຑາທີນິ ກໂຣນ຺ໂຕ ນິຈ຺ຈສີລອຸໂປສຖສີລານິ ຣກ຺ຂນ຺ໂຕ ຘມ຺ມໍ ສຸຓນ຺ໂຕ ອຎ຺ເຎ ຈ ປຸຎ຺ຎກິຣິຍາຍ ສມາທເປນ຺ໂຕ ວິຈຣິ. ໂສ ອາຍຸປຣິໂຍສາເນ ກາລກໂຕ ຕາວຕິໍເສສຸ ນິພ຺ພຕ຺ຕິ. ໂສ ປຸຎ຺ຎກມ຺ມສ຺ສ ອຸຬາຣຠາເວນ ມເຫສກ຺ໂຂ ມຫານຸຠາໂວ ສກ຺ກາທີຫິ ເທວຕາຫິ ສກ຺ກຕປູຊິໂຕ ຫຸຕ຺ວາ ຕຕ຺ຖ ຍາວຕາຍຸກໍ ຐຕ຺ວາ ຕໂຕ ຈຸໂຕ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຕສ຺ເສວ ກມ຺ມສ຺ສ ວິປາກາວເສເສນ ຕາວຕິໍສຠວເນ ນິພ຺ພຕ຺ຕິ, ‘‘ອເນກວຓ຺ໂຓ’’ຕິ ນໍ ເທວຕາ ສຎ຺ຊານິໍສຸ. ຕໍ ສນ຺ຘາຍ ວຸຕ຺ຕໍ ‘‘ອຖ ນໍ ອເນກວຓ຺ໂຓ ເທວປຸຕ຺ໂຕ…ເປ… ນ ຕສ຺ສ ປຸຎ຺ຎສ຺ສ ຂຍມ຺ປິ ອຊ຺ຌຄນ຺ຕິ ກເຖສີ’’ຕິ.

໑໑໙໙. ຕຕ຺ຖ ອເນກວຓ຺ຓນ຺ຕິ ນີລປີຕາທິວເສນ ວິວິຘວຓ຺ຓຕາຍ ອນນ຺ຕຣວິມານາທີນໍ ວິວິຘສຓ຺ຐານຕາຍ ຈ ນານາວິຘວຓ຺ຓໍ. ທຣໂສກນາສນນ຺ຕິ ສີຕລຠາເວນ ທຣຖປຣິຬາຫານໍ ວິໂນທນໂຕ ມນຸຎ຺ຎຕາຍ ທສ຺ສນີຍຕາຍ ຈ ໂສກສ຺ສ ອໂນກາສໂຕ ທຣໂສກນາສນໍ. ອເນກຈິຕ຺ຕນ຺ຕິ ນານາວິຘຈິຕ຺ຕຣູປໍ. ສຸນິມ຺ມິໂຕ ຠູຕປຕີວາຕິ ຕາວຕິໍສກາຍິໂກປິ ອຸຬາຣທິພ຺ພໂຠຄຕາຍ ສຸນິມ຺ມິຕເທວຣາຊາ ວິຍ ໂມທສິ ຕຸສ຺ສສິ ອຠິຣມສິ.

໑໒໐໐. ສມສ຺ສໂມຕິ ສໂມ ເອວ ຫຸຕ຺ວາ ສໂມ, ນິພ຺ພຣິຍາເຍນ ສທິໂສ ເຕ ຕຸຍ຺ຫໍ ນຕ຺ຖິ, ກຸໂຕ ປນ ເກນ ກາຣເຓນ ອຸຕ຺ຕຣິ ອຘິໂກ ໂກ ນາມ ສິຍາ. ເກນ ປນ ສມຕາ ອຸຕ຺ຕຣິຕຣຕາ ຈາຕິ ອາຫ ‘‘ຍເສນ ປຸຎ຺ເຎນ ຈ ອິທ຺ຘິຍາ ຈາ’’ຕິ. ຕຕ຺ຖ ຍເສນາຕິ ປຣິວາເຣນ. ອິທ຺ຘິຍາຕິ ອານຸຠາເວນ. ຍເສນາຕິ ວາ ອິສ຺ສຣິເຍນ, ອິທ຺ຘິຍາຕິ ເທວິທ຺ຘິຍາ. ຍເສນາຕິ ວາ ວິຠວສມ຺ປຕ຺ຕິຍາ, ອິທ຺ຘິຍາຕິ ຍຖິຈ຺ຉິ ຕສ຺ສ ກາມຄຸຓສ຺ສ ອິຊ຺ຌເນນ. ຍເສນາຕິ ວາ ກິຕ຺ຕິໂຆເສນ, ອິທ຺ຘິຍາຕິ ສມິທ຺ຘິຍາ. ປຸຎ຺ເຎນາຕິ ຕຕ຺ຖ ຕຕ຺ຖ ວຸຕ຺ຕາວສິຏ຺ຐປຸຎ຺ຎຜເລນ, ປຸຎ຺ຎກມ຺ເມເນວ ວາ.

‘‘ສພ຺ເພ ຈ ເທວາ’’ຕິ ສາມຎ຺ຎໂຕ ຄຫິຕມຕ຺ຖໍ ‘‘ຕິທສຄຓາ’’ຕິ ອິມິນາ ວິເສເສຕ຺ວາ ວຸຕ຺ຕໍ. ເອກຈ຺ຈສ຺ສ ປຈ຺ເຈກໍ ນິປຈ຺ຈກາຣໍ ກໂຣນ຺ຕາປິ ປມຸທິຕາ ນ ກໂຣນ຺ຕິ, ນ ເອວເມຕສ຺ສ. ເອຕສ຺ສ ປນ ປມຸທິຕາປິ ກໂຣນ຺ຕິເຍວາຕິ ທສ຺ເສຕຸໍ ‘‘ສເມຈ຺ຈາ’’ຕິ ວຸຕ຺ຕໍ. ຕໍ ຕນ຺ຕິ ຕໍ ຕ຺ວໍ. ສສິໍວ ເທວາຕິ ຍຖາ ນາມ ສຸກ຺ກປກ຺ຂປາຏິປທິຍໍ ທິສ຺ສມານໍ ສສິໍ ຈນ຺ທໍ ມນຸສ຺ສາ ເທວາ ຈ ອາທຣຊາຕາ ນມສ຺ສນ຺ຕິ, ເອວໍ ຕໍ ສພ຺ເພປິ ຕິທສຄຓາ ນມສ຺ສນ຺ຕີຕິ ອຕ຺ໂຖ.

໑໒໐໓. ຠທນ຺ເຕຕິ ເຖຣໍ ຄາຣວພຫຸມາເນນ ສມຸທາຈຣຕິ. ອຫຸວາສິນ຺ຕິ ອໂຫສິໍ. ປຸພ຺ເພຕິ ປຸຣິມຊາຕິຍໍ. ສຸເມຘນາມສ຺ສ ຊິນສ຺ສ ສາວໂກຕິ ສຸເມໂຘຕິ ເອວໍ ປາກຏນາມສ຺ສ ສມ຺ມາສມ຺ພຸທ຺ທສ຺ສ ສາສເນ ປພ຺ພຊິຕຠາເວນ ສາວໂກ. ປຸຖູຊ຺ຊໂນຕິ ອນຣິໂຍ. ຕຕ຺ຖາປິ ສຈ຺ຈານໍ ອນຸໂພຘມຕ຺ຕສ຺ສາປິ ອຠາເວນ ອນນຸໂພໂຘ. ໂສ ສຕ຺ຕ ວສ຺ສານິ ປຣິພ຺ພຊິສ຺ສຫນ຺ຕິ ໂສ ອຫໍ ສຕ຺ຕ ສໍວຈ຺ຉຣານິ ປພ຺ພຊ຺ຊາຄຸຓມຕ຺ເຕນ ວິຈຣິໍ, ອຸຕ຺ຕຣິມນຸສ຺ສຘມ຺ມໍ ນາຘິຄຈ຺ຉິນ຺ຕິ ອຘິປ຺ປາໂຍ.

໑໒໐໔. ຣຕນຸຈ຺ຈຍນ຺ຕິ ມຓິກນກາທິຣຕເນຫິ ອຸຈ຺ຈິຕໍ ອຸສ຺ສິຕຣຕນເຈຕິຍໍ. ເຫມຊາເລນ ຉນ຺ນນ຺ຕິ ສມນ຺ຕໂຕ ອຸປຣິ ຈ ກຎ຺ຈນຊາເລນ ປຏິຈ຺ຉາທິຕໍ. ວນ຺ທິຕ຺ວາຕິ ປຎ຺ຈປຕິຏ຺ຐິເຕນ ຕຕ຺ຖ ຕຕ຺ຖ ປຓາມໍ ກຕ຺ວາ. ຖູປສ຺ມິໍ ມນໍ ປສາທຍິນ຺ຕິ ‘‘ສພ຺ພຎ຺ຎຸຄຸຓາຘິຏ຺ຐານາຍ ວຕ ຘາຕຸຍາ ອຍໍ ຖູໂປ’’ຕິ ຖູປສ຺ມິໍ ຈິຕ຺ຕໍ ປສາເທສິໍ.

໑໒໐໕. ນ ມາສິ ທານນ຺ຕິ ເມ ມຍາ ກຕໍ ທານໍ ນາສິ ນາໂຫສິ. ກສ຺ມາ ປນ? ນ ຈ ເມຕ຺ຖິ ທາຕຸນ຺ຕິ ເມ ມມ ປຣິຄ຺ຄຫຠູຕໍ ທານໍ ທາຕຸໍ ນ ອຕ຺ຖິ, ນ ກິຎ຺ຈິ ເທຍ຺ຍວຕ຺ຖຸ ວິຊ຺ຊຕິ, ປເຣ ຈ ໂຂ ສຕ຺ເຕ ຕຕ຺ຖ ທາເນ ສມາທເປສິໍ. ‘‘ປເຣສຎ຺ຈ ຕຕ຺ຖ ສມາທເປສິ’’ນ຺ຕິ ຈ ປຐນ຺ຕິ, ຕຕ຺ຖ ປເຣສນ຺ຕິ ອຸປໂຍຄຕ຺ເຖ ສາມິວຈນໍ ທຏ຺ຐພ຺ພໍ. ປູເຊຖ ນນ຺ຕິອາທິ ສມາທປນາກາຣທສ຺ສນໍ, ຕໍ ຘາຕຸນ຺ຕິ ໂຍຊນາ. ເອວໍ ກິຣາຕິ ກິຣ-ສທ຺ໂທ ອນຸສ຺ສວຕ຺ໂຖ.

໑໒໐໖. ນ ຕສ຺ສ ປຸຎ຺ຎສ຺ສ ຂຍມ຺ປິ ອຊ຺ຌຄນ຺ຕິ ຕສ຺ສ ຕທາ ສຸເມຘໍ ຠຄວນ຺ຕໍ ອຸທ຺ທິສ຺ສ ກຕສ຺ສ ປຸຎ຺ຎກມ຺ມສ຺ສ ປຣິກ຺ຂຍໍ ນາຘິຄຈ຺ຉິໍ, ຕສ຺ເສວ ກມ຺ມສ຺ສ ວິປາກາວເສສໍ ປຈ຺ຈນຸໂຠມີຕິ ທສ຺ເສຕິ. ຍໍ ປເນຕ຺ຖ ນ ວຸຕ຺ຕໍ, ຕໍ ເຫຏ຺ຐາ ວຸຕ຺ຕນຍຕ຺ຕາ ສຸວິຎ຺ເຎຍ຺ຍເມວາຕິ ທຏ຺ຐພ຺ພໍ.

ອເນກວຓ຺ຓວິມານວຓ຺ຓນາ ນິຏ຺ຐິຕາ.