໗. ກຓ຺ຑກວິມານວຓ຺ຓນາ

ປຸຓ຺ຓມາເສ ຍຖາ ຈນ຺ໂທຕິ ກຓ຺ຑກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ຈ ສມເຍນ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍເນວ ເທວຈາຣິກໍ ຈຣນ຺ໂຕ ຕາວຕິໍສຠວນໍ ຄໂຕ. ຕສ຺ມິໍ ຂເຓ ກຓ຺ຑໂກ ເທວປຸຕ຺ໂຕ ສກຠວນໂຕ ນິກ຺ຂມິຕ຺ວາ ທິພ຺ພຍານໍ ອຠິຣຸຫິຕ຺ວາ ມຫນ຺ເຕນ ປຣິວາເຣນ ມຫຕິຍາ ເທວິທ຺ຘິຍາ ອຸຍ຺ຍານໍ ຄຈ຺ຉນ຺ໂຕ ອາຍສ຺ມນ຺ຕໍ ມຫາໂມຄ຺ຄລ຺ລານໍ ທິສ຺ວາ ສຎ຺ຊາຕຄາຣວພຫຸມາໂນ ສຫສາ ຍານໂຕ ໂອຣຸຍ຺ຫ ເຖຣໍ ອຸປສງ຺ກມິຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ສິຣສ຺ມິໍ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ອຖ ນໍ ເຖໂຣ –

໑໑໗໑. ‘‘ປຸຓ຺ຓມາເສ ຍຖາ ຈນ຺ໂທ, ນກ຺ຂຕ຺ຕປຣິວາຣິໂຕ;

ສມນ຺ຕາ ອນຸປຣິຍາຕິ, ຕາຣກາຘິປຕີ ສສີ.

໑໑໗໒. ‘‘ຕຖູປມໍ ອິທໍ ພ຺ຍມ຺ຫໍ, ທິພ຺ພໍ ເທວປຸຣມ຺ຫິ ຈ;

ອຕິໂຣຈຕິ ວຓ຺ເຓນ, ອຸທຍນ຺ໂຕວ ຣໍສິມາ.

໑໑໗໓. ‘‘ເວຬູຣິຍສຸວຓ຺ຓສ຺ສ, ຜລິກາ ຣູປິຍສ຺ສ ຈ;

ມສາຣຄລ຺ລມຸຕ຺ຕາຫິ, ໂລຫິຕງ຺ຄມຓີຫິ ຈ.

໑໑໗໔. ‘‘ຈິຕ຺ຣາ ມໂນຣມາ ຠູມິ, ເວຬູຣິຍສ຺ສ ສນ຺ຖຕາ;

ກູຏາຄາຣາ ສຸຠາ ຣມ຺ມາ, ປາສາໂທ ເຕ ສຸມາປິໂຕ.

໑໑໗໕. ‘‘ຣມ຺ມາ ຈ ເຕ ໂປກ຺ຂຣຓີ, ປຸຖຸໂລມນິເສວິຕາ;

ອຈ຺ໂຉທກາ ວິປ຺ປສນ຺ນາ, ໂສຓ຺ຓວາລຸກສນ຺ຖຕາ.

໑໑໗໖. ‘‘ນານາປທຸມສຎ຺ຉນ຺ນາ, ປຸຓ຺ຑຣີກສໂມຕຕາ;

ສຸຣຠິໍ ສມ຺ປວາຍນ຺ຕິ, ມນຸຎ຺ຎາ ມາຕຸເຕຣິຕາ.

໑໑໗໗. ‘‘ຕສ຺ສາ ເຕ ອຸຠໂຕ ປສ຺ເສ, ວນຄຸມ຺ພາ ສຸມາປິຕາ;

ອຸເປຕາ ປຸປ຺ຜຣຸກ຺ເຂຫິ, ຜລຣຸກ຺ເຂຫິ ຈູຠຍໍ.

໑໑໗໘. ‘‘ໂສວຓ຺ຓປາເທ ປລ຺ລງ຺ເກ, ມຸທຸເກ ໂຄນກຕ຺ຖເຕ;

ນິສິນ຺ນໍ ເທວຣາຊໍວ, ອຸປຕິຏ຺ຐນ຺ຕິ ອຈ຺ຉຣາ.

໑໑໗໙. ‘‘ສພ຺ພາຠຣຓສຎ຺ຉນ຺ນາ, ນານາມາລາວິຠູສິຕາ;

ຣເມນ຺ຕິ ຕໍ ມຫິທ຺ຘິກໍ, ວສວຕ຺ຕີວ ໂມທສິ.

໑໑໘໐. ‘‘ເຠຣິສງ຺ຂມຸທິງ຺ຄາຫິ, ວີຓາຫິ ປຓເວຫິ ຈ;

ຣມສິ ຣຕິສມ຺ປນ຺ໂນ, ນຈ຺ຈຄີເຕ ສຸວາທິເຕ.

໑໑໘໑. ‘‘ທິພ຺ພາ ເຕ ວິວິຘາ ຣູປາ, ທິພ຺ພາ ສທ຺ທາ ອໂຖ ຣສາ;

ຄນ຺ຘາ ຈ ເຕ ອຘິປ຺ເປຕາ, ໂຜຏ຺ຐພ຺ພາ ຈ ມໂນຣມາ.

໑໑໘໒. ‘‘ຕສ຺ມິໍ ວິມາເນ ປວເຣ, ເທວປຸຕ຺ຕ ມຫປ຺ປໂຠ;

ອຕິໂຣຈສິ ວຓ຺ເຓນ, ອຸທຍນ຺ໂຕວ ຠາຓຸມາ.

໑໑໘໓. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິໂຕ’’ຕິ. –

ອຘິຄຕສມ຺ປຕ຺ຕິກິຕ຺ຕນມຸເຂນ ກຕກມ຺ມໍ ປຸຈ຺ຉິ.

໑໑໘໔. ‘‘ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໑໑໘໕. ‘‘ອຫໍ ກປິລວຕ຺ຖຸສ຺ມິໍ, ສາກິຍານໍ ປຸຣຸຕ຺ຕເມ;

ສຸທ຺ໂຘທນສ຺ສ ປຸຕ຺ຕສ຺ສ, ກຓ຺ຑໂກ ສຫໂຊ ອຫໍ.

໑໑໘໖. ‘‘ຍທາ ໂສ ອຑ຺ຒຣຕ຺ຕາຍໍ, ໂພຘາຍ ມຠິນິກ຺ຂມິ;

ໂສ ມໍ ມຸທູຫິ ປາຓີຫິ, ຊາລິຕມ຺ພນເຂຫິ ຈ.

໑໑໘໗. ‘‘ສຕ຺ຖິໍ ອາໂກຏຍິຕ຺ວານ, ວຫ ສມ຺ມາຕິ ຈພ຺ຣວິ;

‘ອຫໍ ໂລກໍ ຕາຣຍິສ຺ສໍ, ປຕ຺ໂຕ ສມ຺ໂພຘິມຸຕ຺ຕມໍ’.

໑໑໘໘. ‘‘ຕໍ ເມ ຄິຣໍ ສຸຓນ຺ຕສ຺ສ, ຫາໂສ ເມ ວິປຸໂລ ອຫຸ;

ອຸທຄ຺ຄຈິຕ຺ໂຕ ສຸມໂນ, ອຠິສີສິໍ ຕທາ ອຫໍ.

໑໑໘໙. ‘‘ອຠິຣູຬ຺ຫຎ຺ຈ ມໍ ຎຕ຺ວາ, ສກ຺ຍປຸຕ຺ຕໍ ມຫາຍສໍ;

ອຸທຄ຺ຄຈິຕ຺ໂຕ ມຸທິໂຕ, ວຫິສ຺ສໍ ປຸຣິສຸຕ຺ຕມໍ.

໑໑໙໐. ‘‘ປເຣສໍ ວິຊິຕໍ ຄນ຺ຕ຺ວາ, ອຸຄ຺ຄຕສ຺ມິໍ ທິວາກເຣ;

ມມໍ ຉນ຺ນຎ຺ຈ ໂອຫາຍ, ອນເປກ຺ໂຂ ໂສ ອປກ຺ກມິ.

໑໑໙໑. ‘‘ຕສ຺ສ ຕມ຺ພນເຂ ປາເທ, ຊິວ຺ຫາຍ ປຣິເລຫິສໍ;

ຄຈ຺ຉນ຺ຕຎ຺ຈ ມຫາວີຣໍ, ຣຸທມາໂນ ອຸທິກ຺ຂິສໍ.

໑໑໙໒. ‘‘ອທສ຺ສເນນຫໍ ຕສ຺ສ, ສກ຺ຍປຸຕ຺ຕສ຺ສ ສິຣີມໂຕ;

ອລຕ຺ຖໍ ຄຣຸກາພາຘໍ, ຂິປ຺ປໍ ເມ ມຣຓໍ ອຫຸ.

໑໑໙໓. ‘‘ຕສ຺ເສວ ອານຸຠາເວນ, ວິມານໍ ອາວສາມິທໍ;

ສພ຺ພກາມຄຸໂຓເປຕໍ, ເທໂວ ເທວປຸຣມ຺ຫິວ.

໑໑໙໔. ‘‘ຍຎ຺ຈ ເມ ອຫຸວາ ຫາໂສ, ສທ຺ທໍ ສຸຕ຺ວານ ໂພຘິຍາ;

ເຕເນວ ກຸສລມູເລນ, ຜຸສິສ຺ສໍ ອາສວກ຺ຂຍໍ.

໑໑໙໕. ‘‘ສເຈ ຫິ ຠນ຺ເຕ ຄຈ຺ເຉຍ຺ຍາສິ, ສຕ຺ຖຸ ພຸທ຺ຘສ຺ສ ສນ຺ຕິເກ;

ມມາປິ ນໍ ວຈເນນ, ສິຣສາ ວຊ຺ຊາສິ ວນ຺ທນໍ.

໑໑໙໖. ‘‘ອຫມ຺ປິ ທຏ຺ຐຸໍ ຄຈ຺ຉິສ຺ສໍ, ຊິນໍ ອປ຺ປຏິປຸຄ຺ຄລໍ;

ທຸລ຺ລຠໍ ທສ຺ສນໍ ໂຫຕິ, ໂລກນາຖານ ຕາທິນ’’ນ຺ຕິ. –

ໂສປິ ອຕ຺ຕນາ ກຕກມ຺ມໍ ກເຖສິ. ອຍຎ຺ຫິ ອນນ຺ຕເຣ ອຕ຺ຕຠາເວ ອມ຺ຫາກໍ ໂພຘິສຕ຺ເຕນ ສຫຊາໂຕ ກຓ຺ຑໂກ ອສ຺ສຣາຊາ ອໂຫສິ. ໂສ ອຠິນິກ຺ຂມນສມເຍ ອຠິຣຸຬ຺ໂຫ ເຕເນວ ຣຕ຺ຕາວເສເສນ ຕີຓິ ຣຊ຺ຊານິ ມຫາປຸຣິສໍ ອຕິກ຺ກມາເປຕ຺ວາ ອໂນມານທີຕີຣໍ ສມ຺ປາເປສິ. ອຖ ໂສ ມຫາສຕ຺ເຕນ ສູຣິເຍ ອຸຄ຺ຄເຕ ຆຏິກາຣມຫາພ຺ຣຫ຺ມຸນາ ອຸປນີຕານິ ປຕ຺ຕຈີວຣານິ ຄເຫຕ຺ວາ ປພ຺ພຊິຕ຺ວາ ຉນ຺ເນນ ສທ຺ຘິໍ ກປິລວຕ຺ຖຸໍ ອຸທ຺ທິສ຺ສ ວິສ຺ສຊ຺ຊິໂຕ. ສິເນຫຠາຣິເກນ ຫທເຍນ ມຫາປຸຣິສສ຺ສ ປາເທ ອຕ຺ຕໂນ ຊິວ຺ຫາຍ ເລຫິຕ຺ວາ ປສາທໂສມ຺ມານິ ອກ຺ຂີນິ ອຸມ຺ມີເລຕ຺ວາ ຍາວ ທສ຺ສນປຖາ ໂອໂລເກນ຺ໂຕ ທສ຺ສນູປຈາຣໍ ປນ ອຕິກ຺ກນ຺ເຕ ໂລກນາເຖ ‘‘ເອວໍວິຘໍ ນາມ ໂລກຄ຺ຄນາຍກໍ ມຫາປຸຣິສໍ ອຫໍ ວຫິໍ, ສຜລໍ ວຕ ເມ ສຣີຣໍ ອໂຫສີ’’ຕິ ປສນ຺ນມານໂສ ຫຸຕ຺ວາ ປຸນ ຈິຣກາລໍ ສງ຺ຄຕສ຺ສ ເປມສ຺ສ ວເສນ ວິໂຍຄທຸກ຺ຂໍ ອສຫນ຺ໂຕ ຠາວິນິຍາ ທິພ຺ພສມ຺ປຕ຺ຕິຍາ ວເສນ ຘມ຺ມຕາຍ ໂຈທິຍມາໂນ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິ. ຕໍ ສນ຺ຘາຍ ວຸຕ຺ຕໍ ‘‘ປຸຓ຺ຓມາເສ ຍຖາ ຈນ຺ໂທ…ເປ… ອຫໍ ກປິລວຕ຺ຖຸສ຺ມິ’’ນ຺ຕິອາທິ.

໑໑໗໑. ຕຕ຺ຖ ປຸຓ຺ຓມາເສຕິ ປຸຓ຺ຓມາສິຍໍ ສຸກ຺ກປກ຺ເຂ ປນ຺ນຣສິຍໍ. ຕາຣກາຘິປຕີຕິ ຕາຣການໍ ອຘິປຕິ. ສສີຕິ ສສລຎ຺ຉນວາ. ‘‘ຕາຣກາຘິປ ທິສ຺ສຕີ’’ຕິ ເກຈິ ປຐນ຺ຕິ, ເຕສໍ ຕາຣກາຘິປາຕິ ອວິຠຕ຺ຕິກນິທ຺ເທໂສ, ຕາຣການໍ ອຘິໂປ ຫຸຕ຺ວາ ທິສ຺ສຕິ ອນຸປຣິຍາຕິ ຈາຕິ ໂຍຊນາ ກາຕພ຺ພາ.

໑໑໗໒. ທິພ຺ພໍ ເທວປຸຣມ຺ຫິ ຈາຕິ ເທວປຸຣສ຺ມິມ຺ປິ ທິພ຺ພໍ. ຍຖາ ມນຸສ຺ສານໍ ຐານໂຕ ເທວປຸຣໍ ອຸຕ຺ຕມໍ, ເອວໍ ເທວປຸຣໂຕ ຈາປິ ອິທໍ ຕວ ວິມານໍ ອຸຕ຺ຕມນ຺ຕິ ທສ຺ເສຕິ. ເຕນາຫ ‘‘ອຕິໂຣຈຕິ ວຓ຺ເຓນ, ອຸທຍນ຺ໂຕວ ຣໍສິມາ’’ຕິ, ອຸຄ຺ຄຈ຺ຉນ຺ໂຕ ສູຣິໂຍ ວິຍາຕິ ອຕ຺ໂຖ.

໑໑໗໓. ເວຬູຣິຍສຸວຓ຺ຓສ຺ສາຕິ ເວຬຸຣິເຍນ ສຸວຓ຺ເຓນ ຈ ອິທໍ ພ຺ຍມ຺ຫໍ ນິມ຺ມິຕນ຺ຕິ ວຈນເສເສນ ໂຍຊນາ. ຜລິກາຕິ ຜລິກມຓິນາ.

໑໑໗໕. ໂປກ຺ຂຣຓີຕິ ໂປກ຺ຂຣຓິໂຍ.

໑໑໗໗-໘. ຕສ຺ສາຕິ ຕສ຺ສາ ໂປກ຺ຂຣຓິຍາ. ວນຄຸມ຺ພາຕິ ອຸຍ຺ຍາເນ ສຸປຸປ຺ຜຄຈ຺ເຉ ສນ຺ຘາຍ ວທຕິ. ເທວຣາຊໍວາຕິ ສກ຺ກໍ ວິຍ. ອຸປຕິຏ຺ຐນ຺ຕີຕິ ອຸປຏ຺ຐານໍ ກໂຣນ຺ຕິ.

໑໑໗໙. ສພ຺ພາຠຣຓສຎ຺ຉນ຺ນາຕິ ສພ຺ເພຫິ ອິຕ຺ຖາລງ຺ກາເຣຫິ ປຏິຈ຺ຉາທິຕາ, ສພ຺ພໂສ ວິຠູສິຕສຣີຣາຕິ ອຕ຺ໂຖ. ວສວຕ຺ຕີວາຕິ ວສວຕ຺ຕິເທວຣາຊາ ວິຍ.

໑໑໘໐. ເຠຣິສງ຺ຂມຸທິງ຺ຄາຫີຕິ ລິງ຺ຄວິປລ຺ລາເສນ ວຸຕ຺ຕໍ, ເຠຣີຫິ ຈ ສງ຺ເຂຫິ ຈ ມຸທິງ຺ເຄຫິ ຈາຕິ ໂຍຊນາ. ຣຕິສມ຺ປນ຺ໂນຕິ ທິພ຺ພາຍ ຣຕິຍາ ສມງ຺ຄີຠູໂຕ. ນຈ຺ຈຄີເຕ ສຸວາທິເຕຕິ ນຈ຺ເຈ ຈ ຄີເຕ ຈ ສຸນ຺ທເຣ ວາທິເຕ ຈ, ນຈ຺ຈເນ ຈ ຄາຍເນ ຈ ສຸນ຺ທເຣ ວາທິເຕ ຈ ເຫຕຸຠູເຕ. ນິມິຕ຺ຕຕ຺ເຖ ຫິ ເອຕໍ ຠຸມ຺ມໍ, ປວຕ຺ຕິເຕຕິ ວາ ວຈນເສໂສ.

໑໑໘໑. ທິພ຺ພາ ເຕ ວິວິຘາ ຣູປາຕິ ເທວໂລກປຣິຍາປນ຺ນາ ນານປ຺ປກາຣາ ຈກ຺ຂຸວິຎ຺ເຎຍ຺ຍາ ຣູປາ ຕຸຍ຺ຫໍ ອຘິປ຺ເປຕາ ຍຖາຘິປ຺ເປຕາ ມໂນຣມາ ວິຊ຺ຊນ຺ຕີຕິ ກິຣິຍາປທໍ ອາເນຕ຺ວາ ໂຍເຊຕພ຺ພໍ. ທິພ຺ພາ ສທ຺ທາຕິອາທີສຸປິ ເອເສວ ນໂຍ.

໑໑໘໕. ກຓ຺ຑໂກ ສຫໂຊ ອຫນ຺ຕິ ເອຕ຺ຖ ອຫນ຺ຕິ ນິປາຕມຕ຺ຕໍ. ‘‘ອຫູ’’ຕິ ເກຈິ ປຏ຺ຐນ຺ຕິ, ກຓ຺ຑໂກ ນາມ ອສ຺ສຣາຊາ ມຫາສຕ຺ເຕນ ສຫ ເອກສ຺ມິໍເຍວ ທິວເສ ຊາຕຕ຺ຕາ ສຫໂຊ ອໂຫສິນ຺ຕິ ອຕ຺ໂຖ.

໑໑໘໖. ອຑ຺ຒຣຕ຺ຕາຍນ຺ຕິ ອຑ຺ຒຣຕ຺ຕິຍໍ, ມຊ຺ຌິມຍາມສມເຍຕິ ອຕ຺ໂຖ. ໂພຘາຍ ມຠິນິກ຺ຂມີຕິ ມ-ກາໂຣ ປທສນ຺ຘິກໂຣ, ອຠິສມ຺ໂພຘິອຕ຺ຖໍ ມຫາຠິນິກ຺ຂມນໍ ນິກ຺ຂມີຕິ ອຕ຺ໂຖ. ມຸທູຫິ ປາຓີຫີຕິ ມຸທຸຫຕ຺ຖຕໍ ມຫາປຸຣິສລກ຺ຂຓໍ ວທຕິ. ຊາລິຕມ຺ພນເຂຫີຕິ ຊາລວນ຺ເຕຫິ ອຠິໂລຫິຕນເຂຫິ. ເຕນ ຊາລຫຕ຺ຖຕໍ ມຫາປຸຣິສລກ຺ຂຓໍ ຕມ຺ພນຂຕໍ ອນຸພ຺ຍຎ຺ຊນຎ຺ຈ ທສ຺ເສຕິ.

໑໑໘໗. ສຕ຺ຖິ ນາມ ຊງ຺ຆາ, ອິຘ ປນ ສຕ຺ຖິໂນ ອາສນ຺ນຏ຺ຐານຠູໂຕ ອູຣຸປ຺ປເທໂສ ‘‘ສຕ຺ຖີ’’ຕິ ວຸຕ຺ໂຕ. ອາໂກຏຍິຕ຺ວານາຕິ ອປ຺ໂປເຐຕ຺ວາ. ‘‘ວຫ ສມ຺ມາ’’ຕິ ຈພ຺ຣວີຕິ ‘‘ສມ຺ມ ກຓ຺ຑກ, ອຊ຺ເຊກຣຕ຺ຕິໍ ມໍ ວຫ, ມຍ຺ຫໍ ໂອປວຸຍ຺ຫໍ ໂຫຫີ’’ຕິ ຈ ກເຖສິ. ວຫເນ ປນ ປໂຍຊນໍ ຕທາ ມຫາສຕ຺ເຕນ ທສ຺ສິຕໍ ວທນ຺ໂຕ ‘‘ອຫໍ ໂລກໍ ຕາຣຍິສ຺ສໍ, ປຕ຺ໂຕ ສມ຺ໂພຘິມຸຕ຺ຕມ’’ນ຺ຕິ ອາຫ. ເຕນ ‘‘ອຫໍ ອຸຕ຺ຕມໍ ອນຸຕ຺ຕຣໍ ສມ຺ມາສມ຺ໂພຘິໍ ປຕ຺ໂຕ ອຘິຄໂຕ ຫຸຕ຺ວາ ສເທວກໍ ໂລກໍ ສໍສາຣມໂຫຆໂຕ ຕາຣຍິສ຺ສາມິ, ຕສ຺ມາ ນຍິທໍ ຄມນໍ ຍໍກິຎ຺ຈີຕິ ຈິນ຺ເຕຍ຺ຍາສີ’’ຕິ ຄມເນ ປໂຍຊນສ຺ສ ອນຸຕ຺ຕຣຠາວໍ ທສ຺ເສຕິ.

໑໑໘໘-໙. ຫາໂສຕິ ຕຸຏ຺ຐິ. ວິປຸໂລຕິ ມຫາອຸຬາໂຣ. ອຠິສີສິນ຺ຕິ ອາສິສິໍ ອິຈ຺ຉິໍ ສມ຺ປຏິຈ຺ຉິໍ. ອຠິຣູຬ຺ຫຎ຺ຈ ມໍ ຎຕ຺ວາ, ສກ຺ຍປຸຕ຺ຕໍ ມຫາຍສນ຺ຕິ ປຕ຺ຖຏວິປຸລຍສໍ ສກ຺ຍຣາຊປຸຕ຺ຕໍ ມຫາສຕ຺ຕໍ ມໍ ອຠິຣຸຍ຺ຫ ນິສິນ຺ນໍ ຊານິຕ຺ວາ. ວຫິສ຺ສນ຺ຕິ ເນສິໍ.

໑໑໙໐-໙໑. ປເຣສນ຺ຕິ ປຣຣາຊູນໍ. ວິຊິຕນ຺ຕິ ເທສໍ ປຣຣຊ຺ຊໍ. ໂອຫາຍາຕິ ວິສ຺ສຊ຺ຊິຕ຺ວາ. ອປກ຺ກມີຕິ ອປກ຺ກມິຕຸໍ ອາຣຠິ. ‘‘ປຣິພ຺ພຊີ’’ຕິ ຈ ປຐນ຺ຕິ. ປຣິເລຫິສນ຺ຕິ ປຣິໂຕ ເລຫິໍ. ອຸທິກ຺ຂິສນ຺ຕິ ໂອໂລເກສິໍ.

໑໑໙໒-໓. ຄຣຸກາພາຘນ຺ຕິ ຄຣຸກໍ ພາຬ຺ຫໍ ອາພາຘໍ, ມຣຓນ຺ຕິກໍ ທຸກ຺ຂນ຺ຕິ ອຕ຺ໂຖ. ເຕນາຫ ‘‘ຂິປ຺ປໍ ເມ ມຣຓໍ ອຫູ’’ຕິ. ໂສ ຫິ ອເນກາສຸ ຊາຕີສຸ ມຫາສຕ຺ເຕນ ທຬ຺ຫຠຕ຺ຕິໂກ ຫຸຕ຺ວາ ອາຄໂຕ, ຕສ຺ມາ ວິໂຍຄທຸກ຺ຂໍ ສຫິຕຸໍ ນາສກ຺ຂິ, ‘‘ສມ຺ມາສມ຺ໂພຘິໍ ອຘິຄນ຺ຕຸໍ ນິກ຺ຂນ຺ໂຕ’’ຕິ ປນ ສຸຕ຺ວາ ນິຣາມິສໍ ອຸຬາຣໍ ປີຕິໂສມນສ຺ສຎ຺ຈ ອຸປ຺ປຊ຺ຊິ, ເຕນ ມຣຓານນ຺ຕຣໍ ຕາວຕິໍເສສຸ ນິພ຺ພຕ຺ຕິ, ອຸຬາຣາ ຈສ຺ສ ທິພ຺ພສມ຺ປຕ຺ຕິໂຍ ປາຕຸຣເຫສຸໍ. ເຕນ ວຸຕ຺ຕໍ ‘‘ຕສ຺ເສວ ອານຸຠາເວນາ’’ຕິ, ຐານຄຕສ຺ສ ປສາທມຍປຸຎ຺ຎສ຺ສ ພເລນ. ເທໂວ ເທວປຸຣມ຺ຫິວາຕິ ຕາວຕິໍສຠວເນ ສກ຺ໂກ ເທວຣາຊາ ວິຍ.

໑໑໙໔. ຍຎ຺ຈ ເມ ອຫຸວາ ຫາໂສ, ສທ຺ທໍ ສຸຕ຺ວານ ໂພຘິຍາຕິ ‘‘ປຕ຺ໂຕ ສມ຺ໂພຘິມຸຕ຺ຕມ’’ນ຺ຕິ ປຐມຕຣໍ ໂພຘິສທ຺ທໍ ສຸຕ຺ວາ ຕທາ ມຍ຺ຫໍ ຫາໂສ ອຫຸ, ຍໍ ຫາສສ຺ສ ຠວນໍ ສຸສ຺ສນໍ, ເຕເນວ ກຸສລມູເລນ ເຕເນວ ກຸສລພີເຊນ ຜຸສິສ຺ສນ຺ຕິ ຜຸສິສ຺ສາມິ ປາປຸຓິສ຺ສາມິ.

໑໑໙໕. ເອວໍ ເທວປຸຕ຺ໂຕ ຍຖາຘິຄຕາຍ ອນາຄຕາຍ ຠວສມ຺ປຕ຺ຕິຍາ ກາຣຓຠູຕໍ ອຕ຺ຕໂນ ກຸສລກມ຺ມໍ ກເຖນ຺ໂຕ ອິທານິ ອຕ຺ຕນາ ຠຄວໂຕ ສນ຺ຕິກໍ ຄນ຺ຕຸກາໂມປິ ປຸເຣຕຣໍ ເຖເຣນ ສຕ຺ຖຸ ວນ຺ທນໍ ເປເສນ຺ໂຕ ‘‘ສເຈ’’ຕິ ຄາຖມາຫ. ຕຕ຺ຖ ສເຈ ຄຈ຺ເຉຍ຺ຍາສີຕິ ຍທິ ຄມິສ຺ສສິ. ‘‘ສເຈ ຄຈ຺ຉສີ’’ຕິ ເກຈິ ປຐນ຺ຕິ, ໂສ ເອວຕ຺ໂຖ. ມມາປິ ນໍ ວຈເນນາຕິ ນ ເກວລໍ ຕວ ສຠາເວເນວ, ອຖ ໂຂ ມມາປິ ວຈເນນ ຠຄວນ຺ຕໍ. ວຊ຺ຊາສີຕິ ວເທຍ຺ຍາສິ, ມມາປິ ສິຣສາ ວນ຺ທນນ຺ຕິ ໂຍຊນາ.

໑໑໙໖. ຍທິປິ ທານິ ວນ຺ທນຎ຺ຈ ເປເສມິ, ເປເສຕ຺ວາ ເອວ ປນ ນ ຕິຏ຺ຐາມີຕິ ທສ຺ເສນ຺ໂຕ ອາຫ ‘‘ອຫມ຺ປິ ທຏ຺ຐຸໍ ຄຈ຺ຉິສ຺ສໍ, ຊິນໍ ອປ຺ປຏິປຸຄ຺ຄລ’’ນ຺ຕິ. ຄມເນ ປນ ທຬ຺ຫຕຣໍ ກາຣຓໍ ທສ຺ເສຕຸໍ ‘‘ທຸລ຺ລຠໍ ທສ຺ສນໍ ໂຫຕິ, ໂລກນາຖານ ຕາທິນ’’ນ຺ຕິ ອາຫ.

໑໑໙໗. ‘‘ໂສ ກຕຎ຺ຎູ ກຕເວທີ, ສຕ຺ຖາຣໍ ອຸປສງ຺ກມິ;

ສຸຕ຺ວາ ຄິຣໍ ຈກ຺ຂຸມໂຕ, ຘມ຺ມຈກ຺ຂຸໍ ວິໂສຘຍິ.

໑໑໙໘. ‘‘ວິໂສເຘຕ຺ວາ ທິຏ຺ຐິຄຕໍ, ວິຈິກິຈ຺ຉໍ ວຕານິ ຈ;

ວນ຺ທິຕ຺ວາ ສຕ຺ຖຸໂນ ປາເທ, ຕຕ຺ເຖວນ຺ຕຣຘາຍຖາ’’ຕິ. –

ອິມາ ທ຺ເວ ຄາຖາ ສງ຺ຄີຕິກາເຣຫິ ຐປິຕາ.

໑໑໙໗. ຕຕ຺ຖ ສຸຕ຺ວາ ຄິຣໍ ຈກ຺ຂຸມໂຕຕິ ປຎ຺ຈຫິ ຈກ຺ຂູຫິ ຈກ຺ຂຸມໂຕ ສມ຺ມາສມ຺ພຸທ຺ຘສ຺ສ ວຈນໍ ສຸຕ຺ວາ. ຘມ຺ມຈກ຺ຂຸນ຺ຕິ ໂສຕາປຕ຺ຕິມຄ຺ຄໍ. ວິໂສຘຍີຕິ ອຘິຄຈ຺ຉິ. ອຘິຄໂມເຍວ ຫິ ຕສ຺ສ ວິໂສຘນໍ.

໑໑໙໘. ວິໂສເຘຕ຺ວາ ທິຏ຺ຐິຄຕນ຺ຕິ ທິຏ຺ຐິຄຕໍ ສມຸຄ຺ຆາເຕຕ຺ວາ. ວິຈິກິຈ຺ຉໍ ວຕານິ ຈາຕິ ໂສຬສວຕ຺ຖຸກໍ ອຏ຺ຐວຕ຺ຖຸກຎ຺ຈ ວິຈິກິຈ຺ຉຎ຺ຈ ‘‘ສີລພ຺ພເຕຫິ ສຸທ຺ຘີ’’ຕິ ປວຕ຺ຕນກສີລພ຺ພຕປຣາມາເສ ຈ ວິໂສຘຍີຕິ ໂຍຊນາ. ຕຕ຺ຖ ຫິ ສຫ ປຣິຍາເຍຫິ ຕຖາ ປວຕ຺ຕາ ປຣາມາສາ ‘‘ວຕານີ’’ຕິ ວຸຕ຺ຕໍ. ເສສໍ ວຸຕ຺ຕນຍເມວ.

ກຓ຺ຑກວິມານວຓ຺ຓນາ ນິຏ຺ຐິຕາ.