໑໐. (ອຸຕ຺ຕຣ) ປາຍາສິວິມານວຓ຺ຓນາ

ຍາ ເທວຣາຊສ຺ສ ສຠາ ສຸຘມ຺ມາຕິ ອຸຕ຺ຕຣວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ປຣິນິພ຺ພຸເຕ ຘາຕຸວິຠາເຄ ຈ ກເຕ ຕຕ຺ຖ ຕຕ຺ຖ ຖູເປສຸ ປຕິຏ຺ຐາປິຍມາເນສຸ ຘມ຺ມວິນຍໍ ສງ຺ຄາຍິຕຸໍ ອຸຈ຺ຈິນິຕ຺ວາ ຄຫິເຕສຸ ມຫາກສ຺ສປປ຺ປມຸເຂສຸ ມຫາເຖເຣສຸ ຍາວ ວສ຺ສູປຄມນາ ອຎ຺ເຎສຸ ຈ ເຖເຣສຸ ອຕ຺ຕໂນ ອຕ຺ຕໂນ ປຣິສາຍ ສທ຺ຘິໍ ຕຕ຺ຖ ຕຕ຺ຖ ວສນ຺ເຕສຸ ອາຍສ຺ມາ ກຸມາຣກສ຺ສໂປ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ເສຕພ຺ຍນຄຣໍ ຄນ຺ຕ຺ວາ ສິໍສປາວເນ ວສິ. ອຖ ປາຍາສິ ຣາຊຎ຺ໂຎ ເຖຣສ຺ສ ຕຕ຺ຖ ວສນຠາວໍ ສຸຕ຺ວາ ມຫຕາ ຊນກາເຍນ ປຣິວຸໂຕ ຕໍ ອຸປສງ຺ກມິຕ຺ວາ ປຏິສນ຺ຖາຣໍ ກຕ຺ວາ ນິສິນ຺ໂນ ອຕ຺ຕໂນ ທິຏ຺ຐິຄຕໍ ປເວເທສິ. ອຖ ນໍ ເຖໂຣ ຈນ຺ທິມສູຣິຍູທາຫຣຓາທີຫິ ປຣໂລກສ຺ສ ອຕ຺ຖິຠາວໍ ປກາເສນ຺ໂຕ ອເນກວິຫິຕເຫຕູປມາລງ຺ກຕໍ ທິຏ຺ຐິຄຓ຺ຐິວິນິເວຐນໍ ນານານຍວິຈິຕ຺ຕໍ ປາຍາສິສຸຕ຺ຕໍ (ທີ. ນິ. ໒.໔໐໖ ອາທໂຍ) ເທເສຕ຺ວາ ຕໍ ທິຏ຺ຐິສມ຺ປທາຍໍ ປຕິຏ຺ຐາເປສິ.

ໂສ ວິສຸທ຺ຘທິຏ຺ຐິໂກ ຫຸຕ຺ວາ ສມຓພ຺ຣາຫ຺ມຓກປຓທ຺ຘິກາທີນໍ ທານໍ ເທນ຺ໂຕ ອນຸຬາຣຊ຺ຌາສຍຕາຍ ລູຂໍ ອທາສິ ຆາສຈ຺ຉາທນມຕ຺ຕໍ ກຓາຊກໍ ພິລງ຺ຄທຸຕິຍໍ ສາຓານິ ຈ ວຕ຺ຖານິ. ເອວໍ ປນ ອສກ຺ກຈ຺ຈທານໍ ທຕ຺ວາ ກາຍສ຺ສ ເຠທາ ຫີນກາຍໍ ອຸປປຊ຺ຊິ ຈາຕຸມຫາຣາຊິການໍ ສຫພ຺ຍຕໍ. ຕສ຺ສ ປນ ກິຈ຺ຈາກິຈ຺ເຈສຸ ຍຸຕ຺ຕປ຺ປຍຸຕ຺ໂຕ ອຸຕ຺ຕໂຣ ນາມ ມາຓໂວ ອໂຫສິ ທາເນ ພ຺ຍາວໂຏ. ໂສ ສກ຺ກຈ຺ຈທານໍ ທຕ຺ວາ ຕາວຕິໍສກາຍໍ ອຸປປນ຺ໂນ, ຕສ຺ສ ທ຺ວາທສໂຍຊນິກໍ ວິມານໍ ນິພ຺ພຕ຺ຕິ. ໂສ ກຕຎ຺ຎຸຕໍ ວິຠາເວນ຺ໂຕ ສຫ ວິມາເນນ ກຸມາຣກສ຺ສປຕ຺ເຖຣໍ ອຸປສງ຺ກມິຕ຺ວາ ວິມານໂຕ ໂອຣຸຍ຺ຫ ປຎ຺ຈປຕິຏ຺ຐິເຕນ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ຕໍ ເຖໂຣ –

໑໑໐໘. ‘‘ຍາ ເທວຣາຊສ຺ສ ສຠາ ສຸຘມ຺ມາ, ຍຕ຺ຖຈ຺ຉຕິ ເທວສງ຺ໂຆ ສມຄ຺ໂຄ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໐໙. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ຄາຖາຫິ ປຏິປຸຈ຺ຉິ;

໑໑໑໐. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໑໑. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ຣຎ຺ໂຎ ປາຍາສິສ຺ສ ອໂຫສິໍ ມາຓໂວ;

ລທ຺ຘາ ຘນໍ ສໍວິຠາຄໍ ອກາສິໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໑໒. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ໂສ ເທວປຸຕ຺ໂຕ ຕສ຺ສ ອິມາຫິ ຄາຖາຫິ ພ຺ຍາກາສິ.

໑໑໐໘. ຕຕ຺ຖ ເທວຣາຊສ຺ສາຕິ ສກ຺ກສ຺ສ. ສຠາ ສຸຘມ຺ມາຕິ ເອວໍນາມກໍ ສນ຺ຖາຄາຣໍ. ຍຕ຺ຖາຕິ ຍສ຺ສໍ ສຠາຍໍ. ອຈ຺ຉຕີຕິ ນິສີທຕິ. ເທວສງ຺ໂຆຕິ ຕາວຕິໍສເທວກາໂຍ. ສມຄ຺ໂຄຕິ ສຫິໂຕ ສນ຺ນິປຕິໂຕ.

໑໑໑໑. ປາຍາສິສ຺ສ ອໂຫສິໍ ມາຓໂວຕິ ປາຍາສິຣາຊຎ຺ຎສ຺ສ ກິຈ຺ຈາກິຈ຺ຈກໂຣ ທຫຣຕາຍ ມາຓໂວ, ນາເມນ ປນ ອຸຕ຺ຕໂຣ ນາມ ອໂຫສິໍ. ສໍວິຠາຄໍ ອກາສິນ຺ຕິ ອຫເມວ ອຠຸຎ຺ຊິຕ຺ວາ ຍຖາລທ຺ຘໍ ຘນໍ ທານມຸເຂ ປຣິຈ຺ຈຊນວເສນ ສໍວິຠຊນໍ ອກາສິໍ. ອນ຺ນຎ຺ຈ ປານຎ຺ຈ ປຣິຈ຺ຈຊນ຺ໂຕຕິ ວຈນເສໂສ. ອຖ ວາ ທານໍ ວິປຸລໍ ອທາສິໍ. ກຖໍ? ສກ຺ກຈ຺ຈໍ. ກີທິສໍ? ອນ຺ນຎ຺ຈ ປານຎ຺ຈາຕິ ໂຍເຊຕພ຺ພໍ.

(ອຸຕ຺ຕຣ) ປາຍາສິວິມານວຓ຺ຓນາ ນິຏ຺ຐິຕາ.

ອິຕິ ປຣມຕ຺ຖທີປນິຍາ ຂຸທ຺ທກ-ອຏ຺ຐກຖາຍ ວິມານວຕ຺ຖຸສ຺ມິໍ

ທສວຕ຺ຖຸປຏິມຓ຺ຑິຕສ຺ສ ຉຏ຺ຐສ຺ສ ປາຍາສິວຄ຺ຄສ຺ສ

ອຕ຺ຖວຓ຺ຓນາ ນິຏ຺ຐິຕາ.