໖. ປາຍາສິວຄ຺ໂຄ

໑. ປຐມອຄາຣິຍວິມານວຓ຺ຓນາ

ຍຖາ ວນໍ ຈິຕ຺ຕລຕໍ ປຠາສຕີຕິ ອຄາຣິຍວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ຣາຊຄເຫ ເອກໍ ກຸລໍ ອຸຠໂຕປສນ຺ນໍ ໂຫຕິ ສີລາຈາຣສມ຺ປນ຺ນໍ ໂອປານຠູຕໍ ຠິກ຺ຂູນໍ ຠິກ຺ຂຸນີນໍ. ເຕ ທ຺ເວ ຊຍມ຺ປຕິກາ ຣຕນຕ຺ຕຍໍ ອຸທ຺ທິສ຺ສ ຍາວຊີວໍ ປຸຎ຺ຎານິ ກຕ຺ວາ ຕໂຕ ຈຸຕາ ຕາວຕິໍເສສຸ ນິພ຺ພຕ຺ຕິໍສຸ, ເຕສໍ ທ຺ວາທສໂຍຊນິກໍ ກນກວິມານໍ ນິພ຺ພຕ຺ຕິ. ເຕ ຕຕ຺ຖ ທິພ຺ພສມ຺ປຕ຺ຕິໍ ອນຸຠວນ຺ຕິ. ອຖາຍສ຺ມາ ມຫາໂມຄ຺ຄລ຺ລາໂນຕິອາທິ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ.

໑໐໔໘. ‘‘ຍຖາ ວນໍ ຈິຕ຺ຕລຕໍ ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໐໔໙. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. –

ເຖໂຣ ປຸຈ຺ຉິ.

໑໐໕໐. ‘‘ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໑໐໕໑. ‘‘ອຫຎ຺ຈ ຠຣິຍາ ຈ ມນຸສ຺ສໂລເກ, ໂອປານຠູຕາ ຆຣມາວສິມ຺ຫ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທມ຺ຫ.

໑໐໕໒. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອຕ຺ຕໂນ ສມ຺ປຕ຺ຕິໍ ພ຺ຍາກາສິ. ຄາຖາສຸປິ ອປຸພ຺ພໍ ນຕ຺ຖິ.

ປຐມອຄາຣິຍວິມານວຓ຺ຓນາ ນິຏ຺ຐິຕາ.

໒. ທຸຕິຍອຄາຣິຍວິມານວຓ຺ຓນາ

ຍຖາ ວນໍ ຈິຕ຺ຕລຕນ຺ຕິ ທຸຕິຍອຄາຣິຍວິມານໍ. ເອຕ຺ຖາປິ ອຏ຺ຐຸປ຺ປຕ຺ຕິ ອນນ຺ຕຣສທິສາວ.

໑໐໕໔. ‘‘ຍຖາ ວນໍ ຈິຕ຺ຕລຕໍ ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໐໕໕. ‘‘ເທວິທ຺ຘິປຕ຺ໂຕສິ ມຫານຸຠາໂວ,

ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ,

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ປຸຈ຺ຉິ;

໑໐໕໖. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໐໕໗. ‘‘ອຫຎ຺ຈ ຠຣິຍາ ຈ ມນຸສ຺ສໂລເກ, ໂອປານຠູຕາ ຆຣມາວສິມ຺ຫ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທມ຺ຫ.

໑໐໕໘. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອຕ຺ຕໂນ ສມ຺ປຕ຺ຕິໍ ພ຺ຍາກາສິ. ຄາຖາສຸປິ ອປຸພ຺ພໍ ນຕ຺ຖິ.

ທຸຕິຍອຄາຣິຍວິມານວຓ຺ຓນາ ນິຏ຺ຐິຕາ.

໓. ຜລທາຍກວິມານວຓ຺ຓນາ

ອຸຈ຺ຈມິທໍ ມຓິຖູຓນ຺ຕິ ຜລທາຍກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ຣຎ຺ໂຎ ພິມ຺ພິສາຣສ຺ສ ອກາເລ ອມ຺ພຜລານິ ປຣິຠຸຎ຺ຊິຕຸໍ ອິຈ຺ຉາ ອຸປ຺ປຊ຺ຊິ. ໂສ ອາຣາມປາລໍ ອາຫ – ‘‘ມຍ຺ຫໍ ໂຂ, ຠເຓ, ອມ຺ພຜເລສຸ ອິຈ຺ຉາ ອຸປ຺ປນ຺ນາ, ຕສ຺ມາ ອມ຺ພານິ ເມ ອາເນຕ຺ວາ ເທຫີ’’ຕິ. ‘‘ເທວ, ນຕ຺ຖິ ອມ຺ເພສຸ ອມ຺ພຜລໍ, ອປິຈາຫໍ ຕຖາ ກໂຣມິ, ສເຈ ເທໂວ ກິຎ຺ຈິ ກາລໍ ອາຄເມຕິ, ຍຖາ ອມ຺ພາ ນ ຈິຣສ຺ເສວ ຜລໍ ຄຓ຺ຫນ຺ຕີ’’ຕິ. ‘‘ສາຘຸ, ຠເຓ, ຕຖາ ກໂຣຫີ’’ຕິ. ອາຣາມປາໂລ ອາຣາມໍ ຄນ຺ຕ຺ວາ ອມ຺ພຣຸກ຺ຂມູເລສຸ ປໍສຸໍ ອປເນຕ຺ວາ ຕາທິສໍ ປໍສຸໍ ອາກິຣິ, ຕາທິສຎ຺ຈ ອຸທກໍ ອາສິຎ຺ຈິ, ຍຖາ ນ ຈິຣສ຺ເສວ ອມ຺ພຣຸກ຺ຂາ ສຈ຺ຉິນ຺ນປຕ຺ຕາ ອເຫສຸໍ. ອຖ ນໍ ປໍສຸໍ ອປເນຕ຺ວາ ຜາຣຸສກກສຏມິສ຺ສກໍ ປາກຕິກໍ ປໍສຸໍ ອາກິຣິຕ຺ວາ ສາຘຸກໍ ອຸທກໍ ອທາສິ. ຕທາ ອມ຺ພຣຸກ຺ຂາ ນ ຈິເຣເນວ ໂກຣກິຕາ ປລ຺ລວິຕາ ກຸຏມລກຊາຕາ ຫຸຕ຺ວາ ປຸປ຺ຜິໍສຸ, ອຖ ສລາຏຸກຊາຕາ ຫຸຕ຺ວາ ຜລານິ ຄຓ຺ຫິໍສຸ. ຕຕ຺ເຖກສ຺ມິໍ ອມ຺ພຣຸກ຺ເຂ ປຐມຕຣໍ ຈຕ຺ຕາຣິ ຜລານິ ມໂນສິລາຈຸຓ຺ຓປິຎ຺ຊຣວຓ຺ຓານິ ສມ຺ປນ຺ນຄນ຺ຘຣສານິ ປຣິຓຕານິ ອເຫສຸໍ.

ໂສ ຕານິ ຄເຫຕ຺ວາ ‘‘ຣຎ຺ໂຎ ທສ຺ສາມີ’’ຕິ ຄຈ຺ຉນ຺ໂຕ ອນ຺ຕຣາມຄ຺ເຄ ອາຍສ຺ມນ຺ຕໍ ມຫາໂມຄ຺ຄລ຺ລານໍ ປິຓ຺ຑາຍ ຈຣມານໍ ທິສ຺ວາ ຈິນ຺ເຕສິ ‘‘ອິມານິ ອມ຺ພານິ ອຄ຺ຄຜລຠູຕານິ ອິມສ຺ສ ອຍ຺ຍສ຺ສ ທສ຺ສາມິ, ກາມໍ ມໍ ຣາຊາ ຫນຕຸ ວາ ປພ຺ພາເຊຕຸ ວາ, ຣຎ຺ໂຎ ຫິ ທິນ຺ເນ ທິຏ຺ຐຘມ຺ເມ ປູຊາມຕ຺ຕໍ ອປ຺ປມຕ຺ຕກໍ ຜລໍ, ອຍ຺ຍສ຺ສ ທິນ຺ເນ ປນ ທິຏ຺ຐຘມ຺ມິກມ຺ປິ ສມ຺ປຣາຍິກມ຺ປິ ອປຣິມາຓໍ ຜລໍ ຠວິສ຺ສຕີ’’ຕິ. ເອວໍ ປນ ຈິນ຺ເຕຕ຺ວາ ຕານິ ຜລານິ ເຖຣສ຺ສ ທຕ຺ວາ ຣາຊານໍ ອຸປສງ຺ກມິຕ຺ວາ ຣຎ຺ໂຎ ຕມຕ຺ຖໍ ອາໂຣເຈສິ. ຕໍ ສຸຕ຺ວາ ຣາຊາ ຣາຊປຸຣິເສ ອາຓາເປສິ ‘‘ວີມໍສຖ ຕາວ, ຠເຓ, ຍຖາຍໍ ອາຫາ’’ຕິ. ເຖໂຣ ປນ ຕານິ ຜລານິ ຠຄວໂຕ ອຸປນາເມສິ. ຠຄວາ ເຕສຸ ເອກໍ ສາຣິປຸຕ຺ຕຕ຺ເຖຣສ຺ສ, ເອກໍ ມຫາໂມຄ຺ຄລ຺ລານຕ຺ເຖຣສ຺ສ, ເອກໍ ມຫາກສ຺ສປຕ຺ເຖຣສ຺ສ ທຕ຺ວາ ເອກໍ ອຕ຺ຕນາ ປຣິຠຸຎ຺ຊິ. ປຸຣິສາ ຕໍ ປວຕ຺ຕິໍ ຣຎ຺ໂຎ ອາໂຣເຈສຸໍ.

ຣາຊາ ຕໍ ສຸຕ຺ວາ ‘‘ຘີໂຣ ວຕາຍໍ ປຸຣິໂສ, ໂຍ ອຕ຺ຕໂນ ຊີວິຕມ຺ປິ ປຣິຈ຺ຈຊິຕ຺ວາ ປຸຎ຺ຎປສຸໂຕ ອໂຫສິ, ອຕ຺ຕໂນ ປຣິສ຺ສມຎ຺ຈ ຐານຄຕເມວ ອກາສີ’’ຕິ ຕຸຏ຺ຐຈິຕ຺ໂຕ ຕສ຺ສ ເອກໍ ຄາມວຣໍ ວຕ຺ຖາລງ຺ກາຣາທີນິ ຈ ທຕ຺ວາ ‘‘ຍໍ ຕຍາ ຠເຓ ອມ຺ພຜລທາເນນ ປຸຎ຺ຎໍ ປສຸຕໍ, ຕໂຕ ເມ ປຕ຺ຕິໍ ເທຫີ’’ຕິ ອາຫ. ໂສ ‘‘ເທມິ, ເທວ, ຍຖາສຸຂໍ ປຕ຺ຕິໍ ຄຓ຺ຫາຫີ’’ຕິ ອໂວຈ. ອາຣາມປາໂລ ອປຣຠາເຄ ກາລໍ ກຕ຺ວາ ຕາວຕິໍເສສຸ ອຸປ຺ປຊ຺ຊິ, ຕສ຺ສ ໂສຬສໂຍຊນິກໍ ກນກວິມານໍ ນິພ຺ພຕ຺ຕິ ສຕ຺ຕສຕກູຏາຄາຣປຏິມຓ຺ຑິຕໍ. ຕໍ ທິສ຺ວາ ອາຍສ຺ມາ ມຫາໂມຄ຺ຄລ຺ລາໂນ ປຸຈ຺ຉິ –

໑໐໖໐. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ໂສຬສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໐໖໑. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ອຏ຺ຐຏ຺ຐກາ ສິກ຺ຂິຕາ ສາຘຸຣູປາ, ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ;

ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໐໖໒. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໖໓. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໐໖໔. ‘‘ຜລທາຍີ ຜລໍ ວິປຸລໍ ລຠຕິ, ທທມຸຊຸຄເຕສຸ ປສນ຺ນມານໂສ;

ໂສ ຫິ ປໂມທຕິ ສຄ຺ຄຄໂຕ ຕິທິເວ, ອນຸໂຠຕິ ຈ ປຸຎ຺ຎຜລໍ ວິປຸລໍ.

໑໐໖໕. ‘‘ຕເວວາຫໍ ມຫາມຸນິ, ອທາສິໍ ຈຕຸໂຣ ຜເລ.

໑໐໖໖. ‘‘ຕສ຺ມາ ຫິ ຜລໍ ອລເມວ ທາຕຸໍ, ນິຈ຺ຈໍ ມນຸສ຺ເສນ ສຸຂຕ຺ຖິເກນ;

ທິພ຺ພານິ ວາ ປຕ຺ຖຍຕາ ສຸຂານິ, ມນຸສ຺ສໂສຠຄ຺ຄຕມິຈ຺ຉຕາ ວາ.

໑໐໖໗. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. – ໂສປິສ຺ສ ພ຺ຍາກາສິ;

໑໐໖໑. ຕຕ຺ຖ ອຏ຺ຐຏ຺ຐກາຕິ ເອເກກສ຺ມິໍ ກູຏາຄາເຣ ອຏ຺ຐຏ຺ຐກາ ຈຕຸສຏ຺ຐິປຣິມາຓາ. ສາຘຸຣູປາຕິ ຣູປສມ຺ປຕ຺ຕິຍາ ຈ ສີລາຈາຣສມ຺ປຕ຺ຕິຍາ ຈ ສິກ຺ຂາສມ຺ປຕ຺ຕິຍາ ຈ ສຸນ຺ທຣສຠາວາ. ທິພ຺ພາ ຈ ກຎ຺ຎາຕິ ເທວຈ຺ຉຣາໂຍ. ຕິທສຈຣາຕິ ຕິທເສສຸ ສຸຂາຈາຣາ ສຸຂວິຫາຣິນິໂຍ. ອຸຬາຣາຕິ ອຸຬາຣວິຠວາ.

໑໐໖໔. ຜລທາຍີຕິ ອຕ຺ຕນາ ອມ຺ພຜລສ຺ສ ທິນ຺ນຕ຺ຕາ ອຕ຺ຕານໍ ສນ຺ຘາຍ ວທຕິ. ຜລນ຺ຕິ ປຸຎ຺ຎຜລໍ. ວິປຸລນ຺ຕິ ມຫນ຺ຕໍ ລຠຕິ ມນຸສ຺ສໂລເກ ປຕິຏ຺ຐິໂຕຕິ ອຘິປ຺ປາໂຍ. ທທນ຺ຕິ ທທນ຺ໂຕ ທານເຫຕຸ. ອຸຊຸຄເຕສູຕິ ອຸຊຸປຏິປນ຺ເນສຸ. ສຄ຺ຄຄໂຕຕິ ອຸປ຺ປຊ຺ຊນວເສນ ສຄ຺ຄໍ ຄໂຕ, ຕຕ຺ຖາປິ ຕິທິເວ ຕາວຕິໍສຠວເນ ອນຸໂຠຕິ ຈ ປຸຎ຺ຎຜລໍ ວິປຸລໍ ຍຖາຫໍ, ເອວໍ ອຎ຺ໂຎປີຕິ ອຕ຺ໂຖ.

໑໐໖໖. ຕສ຺ມາຕິ ຍສ຺ມາ ຈຕຸນ຺ນໍ ຜລານໍ ທານມຕ຺ເຕນ ອີທິສີ ສມ຺ປຕ຺ຕິ ອຘິຄຕາ, ຕສ຺ມາ. ອລເມວ ຍຸຕ຺ຕເມວ. ນິຈ຺ຈນ຺ຕິ ສພ຺ພກາລໍ. ທິພ຺ພານີຕິ ເທວໂລກປຣິຍາປນ຺ນານິ. ມນຸສ຺ສໂສຠຄ຺ຄຕນ຺ຕິ ມນຸສ຺ເສສຸ ສຸຠຄຠາວໍ. ເສສໍ ວຸຕ຺ຕນຍເມວ.

ຜລທາຍກວິມານວຓ຺ຓນາ ນິຏ຺ຐິຕາ.

໔. ປຐມອຸປສ຺ສຍທາຍກວິມານວຓ຺ຓນາ

ຈນ຺ໂທ ຍຖາ ວິຄຕວລາຫເກ ນເຠຕິ ອຸປສ຺ສຍທາຍກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ອຎ຺ຎຕໂຣ ຠິກ຺ຂຸ ຄາມກາວາເສ ວສ຺ສໍ ວສິຕ຺ວາ ວຸຕ຺ຖວສ຺ໂສ ປວາເຣຕ຺ວາ ຠຄວນ຺ຕໍ ວນ຺ທິຕຸໍ ຣາຊຄຫໍ ຄຈ຺ຉນ຺ໂຕ ອນ຺ຕຣາມຄ຺ເຄ ສາຍໍ ອຎ຺ຎຕຣໍ ຄາມໍ ປວິສິຕ຺ວາ ວສນຏ຺ຐານໍ ປຣິເຍສນ຺ໂຕ ອຎ຺ຎຕຣໍ ອຸປາສກໍ ທິສ຺ວາ ປຸຈ຺ຉິ – ‘‘ອຸປາສກ, ອິມສ຺ມິໍ ຄາເມ ອຕ຺ຖິ ກິຎ຺ຈິ ປພ຺ພຊິຕານໍ ວສນໂຍຄ຺ຄຏ຺ຐານ’’ນ຺ຕິ. ອຸປາສໂກ ປສນ຺ນຈິຕ຺ໂຕ ເຄຫໍ ຄນ຺ຕ຺ວາ ຠຣິຍາຍ ສທ຺ຘິໍ ມນ຺ເຕຕ຺ວາ ເຖຣສ຺ສ ວສນໂຍຄ຺ຄໍ ຐານໍ ປຣິຈ຺ຉິນ຺ທິຕ຺ວາ ຕຕ຺ຖ ອາສນໍ ປຎ຺ຎາເປຕ຺ວາ ປາໂທທກໍ ປາທປີຐໍ ອຸປຏ຺ຐເປຕ຺ວາ ເຖຣໍ ປເວເສຕ຺ວາ ຕສ຺ມິໍ ປາເທ ໂຘວນ຺ເຕ ປທີປໍ ອຸຊ຺ຊາເລຕ຺ວາ ມຎ຺ເຈ ປຈ຺ຈຕ຺ຖຣຓານິ ປຎ຺ຎາເປຕ຺ວາ ອທາສິ. ສ຺ວາຕນາຍ ຈ ນິມນ຺ເຕຕ຺ວາ ເຖຣສ຺ສ ທຸຕິຍທິວເສ ໂຠເຊຕ຺ວາ ປານກຕ຺ຖາຍ ຄຸຬປິຓ຺ຑຎ຺ຈ ທຕ຺ວາ ເຖຣໍ ຄຈ຺ຉນ຺ຕໍ ອນຸຄນ຺ຕ຺ວາ ນິວຕ຺ຕິ. ໂສ ອປເຣນ ສມເຍນ ສຫ ຠຣິຍາຍ ກາລໍ ກຕ຺ວາ ຕາວຕິໍສຠວເນ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ທ຺ວີຫິ ຄາຖາຫິ ປຏິປຸຈ຺ຉິ –

໑໐໖໙. ‘‘ຈນ຺ໂທ ຍຖາ ວິຄຕວລາຫເກ ນເຠ, ໂອຠາສຍໍ ຄຈ຺ຉຕິ ອນ຺ຕລິກ຺ເຂ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໐໗໐. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສ ເທວປຸຕ຺ໂຕ ອິມາຫິ ຄາຖາຫິ ພ຺ຍາກາສິ –

໑໐໗໑. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໐໗໒. ‘‘ອຫຎ຺ຈ ຠຣິຍາ ຈ ມນຸສ຺ສໂລເກ, ອຸປສ຺ສຍໍ ອຣຫໂຕ ອທມ຺ຫ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທມ຺ຫ.

໑໐໗໓. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຕຕ຺ຖ ຄາຖາສຸ ຍໍ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕນຍເມວ;

ປຐມອຸປສ຺ສຍທາຍກວິມານວຓ຺ຓນາ ນິຏ຺ຐິຕາ.

໕. ທຸຕິຍອຸປສ຺ສຍທາຍກວິມານວຓ຺ຓນາ

ສູຣິໂຍ ຍຖາ ວິຄຕວລາຫເກ ນເຠຕິ ທຸຕິຍອຸປສ຺ສຍທາຍກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ສມ຺ພຫຸລາ ຠິກ຺ຂູ ຄາມກາວາເສ ວສ຺ສໍ ວສິຕ຺ວາ ຠຄວນ຺ຕໍ ທສ຺ສນາຍ ຣາຊຄຫໍ ອຸທ຺ທິສ຺ສ ຄຈ຺ຉນ຺ຕາ ສາຍໍ ອຎ຺ຎຕຣໍ ຄາມໍ ສມ຺ປາປຸຓິໍສຸ. ເສສໍ ອນນ຺ຕຣວິມານສທິສເມວ.

໑໐໗໕. ‘‘ສູຣິໂຍ ຍຖາ ວິຄຕວລາຫເກ ນເຠ…ເປ….

(ຍຖາ ປຸຣິມວິມານໍ, ຕຖາ ວິຕ຺ຖາເຣຕພ຺ພໍ;)

໑໐໗໙. ‘‘ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຕຕ຺ຖ ຄາຖາສຸປິ ອປຸພ຺ພໍ ນຕ຺ຖິ;

ທຸຕິຍອຸປສ຺ສຍທາຍກວິມານວຓ຺ຓນາ ນິຏ຺ຐິຕາ.

໖. ຠິກ຺ຂາທາຍກວິມານວຓ຺ຓນາ

ອຸຈ຺ຈມິທໍ ມຓິຖູຓໍ ວິມານນ຺ຕິ ຠິກ຺ຂາທາຍກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ອຎ຺ຎຕໂຣ ຠິກ຺ຂຸ ອທ຺ຘານມຄ຺ຄປຏິປນ຺ໂນ ອຎ຺ຎຕຣໍ ຄາມໍ ປິຓ຺ຑາຍ ປວິຏ຺ໂຐ ເອກສ຺ສ ຆຣທ຺ຘາເຣ ອຏ຺ຐາສິ. ຕຕ຺ຖ ອຎ຺ຎຕໂຣ ປຸຣິໂສ ໂຘຕຫຕ຺ຖປາໂທ ‘‘ຠຸຎ຺ຊິສ຺ສາມີ’’ຕິ ນິສິນ຺ໂນ ໂຠຊນໍ ອຸປເນຕ຺ວາ ປາຕິຍາ ປກ຺ຂິຕ຺ເຕ ຕໍ ຠິກ຺ຂຸໍ ທິສ຺ວາ ປາຕິຍາ ຠຕ຺ຕໍ ຕສ຺ສ ຠິກ຺ຂຸໂນ ປຕ຺ເຕ ອາກິຣນ຺ໂຕ ເຕນ ‘‘ເອກເທສເມວ ເທຫີ’’ຕິ ວຸຕ຺ໂຕປິ ສພ຺ພເມວ ອາກິຣິ. ໂສ ຠິກ຺ຂຸ ອນຸໂມທນໍ ວຕ຺ວາ ປກ຺ກາມິ. ໂສ ປຸຣິໂສ ‘‘ຉາຕຊ຺ຌຕ຺ຕສ຺ສ ຠິກ຺ຂຸໂນ ມຍາ ອຠຸຎ຺ຊິຕ຺ວາ ຠຕ຺ຕໍ ທິນ຺ນ’’ນ຺ຕິ ອນຸສ຺ສຣນ຺ໂຕ ອຸຬາຣໍ ປີຕິໂສມນສ຺ສໍ ປຏິລຠິ. ໂສ ອປຣຠາເຄ ກາລໍ ກຕ຺ວາ ຕາວຕິໍເສສຸ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລານຕ຺ເຖໂຣ ເທວຈາຣິກໍ ຈຣນ຺ໂຕ ມຫຕິຍາ ເທວິທ຺ຘິຍາ ວິໂຣຈມານໍ ທິສ຺ວາ ອິມາຫິ ຄາຖາຫິ ປຏິປຸຈ຺ຉິ –

໑໐໘໑. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໐໘໒. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິ ຕສ຺ສ ອິມາຫິ ຄາຖາຫິ ພ຺ຍາກາສິ –

໑໐໘໓. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໐໘໔. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທິສ຺ວານ ຠິກ຺ຂຸໍ ຕສິຕໍ ກິລນ຺ຕໍ;

ເອກາຫໍ ຠິກ຺ຂໍ ປຏິປາທຍິສ຺ສໍ, ສມງ຺ຄິ ຠຕ຺ເຕນ ຕທາ ອກາສິໍ.

໑໐໘໕. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໑໐໘໔. ຕຕ຺ຖ ເອກາຫໍ ຠິກ຺ຂນ຺ຕິ ເອກໍ ອຫໍ ຠິກ຺ຂາມຕ຺ຕໍ, ເອກໍ ຠຕ຺ຕວຑ຺ຒິຕກນ຺ຕິ ອຕ຺ໂຖ. ປຏິປາທຍິສ຺ສນ຺ຕິ ປຏິປາເທສິໍ ອທາສິໍ. ສມງ຺ຄິ ຠຕ຺ເຕນາຕິ ຠຕ຺ເຕນ ສມງ຺ຄີຠູຕໍ, ລທ຺ຘຠິກ຺ຂນ຺ຕິ ອຕ຺ໂຖ. ເອວໍ ມຫາເຖໂຣ ເຕນ ເທວປຸຕ຺ເຕນ ອຕ຺ຕໂນ ສຸຈຣິຕກມ຺ເມ ປກາສິເຕ ສປຣິວາຣສ຺ສ ຕສ຺ສ ຘມ຺ມໍ ເທເສຕ຺ວາ ມນຸສ຺ສໂລກມາຄໂຕ, ຕໍ ປວຕ຺ຕິໍ ສມ຺ມາສມ຺ພຸທ຺ຘສ຺ສ ກເຖສິ. ສຕ຺ຖາ ຕໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕມຫາຊນສ຺ສ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ຠິກ຺ຂາທາຍກວິມານວຓ຺ຓນາ ນິຏ຺ຐິຕາ.

໗. ຍວປາລກວິມານວຓ຺ຓນາ

ອຸຈ຺ຈມິທໍ ມຓິຖູຓໍ ວິມານນ຺ຕິ ຍວປາລກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ຣາຊຄເຫ ອຎ຺ຎຕໂຣ ທຸຄ຺ຄຕທາຣໂກ ຍວເຂຕ຺ຕໍ ຣກ຺ຂຕິ. ໂສ ເອກທິວສໍ ປາຕຣາສຕ຺ຖາຍ ກຸມ຺ມາສໍ ລຠິຕ຺ວາ ‘‘ເຂຕ຺ຕໍ ຄນ຺ຕ຺ວາ ຠຸຎ຺ຊິສ຺ສາມີ’’ຕິ ຕໍ ກຸມ຺ມາສໍ ຄເຫຕ຺ວາ ຍວເຂຕ຺ຕໍ ຄນ຺ຕ຺ວາ ຣຸກ຺ຂມູເລ ນິສີທິ. ຕສ຺ມິໍ ຂເຓ ອຎ຺ຎຕໂຣ ຂີຓາສວຕ຺ເຖໂຣ ມຄ຺ຄປ຺ປຏິປນ຺ໂນ ອຸປກຏ຺ເຐ ກາເລ ຕໍ ຐານໍ ປຕ຺ວາ ຍວປາລເກນ ນິສິນ຺ນໍ ຣຸກ຺ຂມູລໍ ອຸປສງ຺ກມິ. ຍວປາລໂກ ເວລໍ ໂອໂລເກຕ຺ວາ ‘‘ກຈ຺ຈິ, ຠນ຺ເຕ, ອາຫາໂຣ ລທ຺ໂຘ’’ຕິ ອາຫ. ເຖໂຣ ຕຸຓ຺ຫີ ອໂຫສິ. ໂສ ອລທ຺ຘຠາວໍ ຎຕ຺ວາ ‘‘ຠນ຺ເຕ, ອຸປກຏ຺ຐາ ເວລາ, ປິຓ຺ຑາຍ ຈຣິຕ຺ວາ ຠຸຎ຺ຊິຕຸໍ ນ ສກ຺ກາ, ມຍ຺ຫໍ ອນຸກມ຺ປາຍ ອິມໍ ກຸມ຺ມາສໍ ປຣິຠຸຎ຺ຊຖາ’’ຕິ ວຕ຺ວາ ເຖຣສ຺ສ ຕໍ ກຸມ຺ມາສໍ ອທາສິ. ເຖໂຣ ຕໍ ອນຸກມ຺ປນ຺ໂຕ ຕສ຺ສ ປສ຺ສນ຺ຕສ຺ເສວ ຕໍ ປຣິຠຸຎ຺ຊິຕ຺ວາ ອນຸໂມທນໍ ວຕ຺ວາ ປກ຺ກາມິ. ໂສປິ ທາຣໂກ ‘‘ສຸທິນ຺ນໍ ວຕ ມຍາ ອີທິສສ຺ສ ກຸມ຺ມາສທານໍ ທທນ຺ເຕນາ’’ຕິ ຈິຕ຺ຕໍ ປສາເທຕ຺ວາ ອປຣຠາເຄ ກາລໍ ກຕ຺ວາ ຕາວຕິໍສຠວເນ ວຸຕ຺ຕນເຍເນວ ວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລານຕ຺ເຖໂຣ ອິມາຫິ ຄາຖາຫິ ປຏິປຸຈ຺ຉິ –

໑໐໘໗. ‘‘ອຸຈ຺ຈມິທໍ ມຓິຖູຓໍ ວິມານໍ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິ ຕສ຺ສ ອິມາຫິ ຄາຖາຫິ ພ຺ຍາກາສິ –

໑໐໘໙. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໐໙໐. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ອໂຫສິໍ ຍວປາລໂກ;

ອທ຺ທສໍ ວິຣຊໍ ຠິກ຺ຂຸໍ, ວິປ຺ປສນ຺ນມນາວິລໍ.

໑໐໙໑. ‘‘ຕສ຺ສ ອທາສຫໍ ຠາຄໍ, ປສນ຺ໂນ ເສຫິ ປາຓິຠິ;

ກຸມ຺ມາສປິຓ຺ຑໍ ທຕ຺ວານ, ໂມທາມິ ນນ຺ທເນ ວເນ.

໑໐໙໒. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຕຕ຺ຖ ຄາຖາສຸປິ ອປຸພ຺ພໍ ນຕ຺ຖິ.

ຍວປາລກວິມານວຓ຺ຓນາ ນິຏ຺ຐິຕາ.

໘. ປຐມກຸຓ຺ຑລີວິມານວຓ຺ຓນາ

ອລງ຺ກໂຕ ມລ຺ຍຘໂຣ ສຸວຕ຺ໂຖຕິ ກຸຓ຺ຑລີວິມານໍ. ຕສ຺ສ ກາ ອຸປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ທ຺ເວ ອຄ຺ຄສາວກາ ສປຣິວາຣາ ກາສີສຸ ຈາຣິກໍ ຈຣນ຺ຕາ ສູຣິຍຕ຺ຖງ຺ຄມນເວລາຍໍ ອຎ຺ຎຕຣໍ ວິຫາຣໍ ປາປຸຓິໍສຸ. ຕໍ ປວຕ຺ຕິໍ ສຸຕ຺ວາ ຕສ຺ສ ວິຫາຣສ຺ສ ໂຄຈຣຄາເມ ອຎ຺ຎຕໂຣ ອຸປາສໂກ ເຖເຣ ອຸປສງ຺ກມິຕ຺ວາ ວນ຺ທິຕ຺ວາ ປາທໂຘວນໍ ປາທພ຺ຠຎ຺ຊນເຕລໍ ມຎ຺ຈປີຐໍ ປຈ຺ຈຕ຺ຖຣຓໍ ປທີປິຍຎ຺ຈ ອຸປເນຕ຺ວາ ສ຺ວາຕນາຍ ຈ ນິມນ຺ເຕຕ຺ວາ ທຸຕິຍທິວເສ ມຫາທານໍ ປວຕ຺ເຕສິ, ເຖຣາ ຕສ຺ສ ອນຸໂມທນໍ ວຕ຺ວາ ປກ຺ກມິໍສຸ. ໂສ ອປເຣນ ສມເຍນ ກາລໍ ກຕ຺ວາ ຕາວຕິໍເສສຸ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລານຕ຺ເຖໂຣ ອິມາຫິ ຄາຖາຫິ ປຏິປຸຈ຺ຉິ –

໑໐໙໔. ‘‘ອລງ຺ກໂຕ ມລ຺ຍຘໂຣ ສຸວຕ຺ໂຖ, ສຸກຸຓ຺ຑລີ ກປ຺ປິຕເກສມສ຺ສຸ;

ອາມຸຕ຺ຕຫຕ຺ຖາຠຣໂຓ ຍສສ຺ສີ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໐໙໕. ‘‘ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ, ອຏ຺ຐຏ຺ຐກາ ສິກ຺ຂິຕາ ສາຘຸຣູປາ;

ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໐໙໖. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິ ຕສ຺ສ ອິມາຫິ ຄາຖາຫິ ພ຺ຍາກາສິ –

໑໐໙໗. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໐໙໘. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທິສ຺ວານ ສມເຓ ສີລວນ຺ເຕ;

ສມ຺ປນ຺ນວິຊ຺ຊາຈຣເຓ ຍສສ຺ສີ, ພຫຸສ຺ສຸເຕ ຕຓ຺ຫກ຺ຂຍູປປນ຺ເນ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໐໙໙. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໑໐໙໔. ຕຕ຺ຖ ສຸກຸຓ຺ຑລີຕິ ສຸນ຺ທເຣຫິ ກຸຓ຺ຑເລຫິ ອລງ຺ກຕກຓ຺ໂຓ. ‘‘ສກຸຓ຺ຑລີ’’ຕິປິ ປາໂຐ, ສທິສໍ ກຸຓ຺ຑລໍ ສກຸຓ຺ຑລໍ, ຕໍ ອສ຺ສ ອຕ຺ຖີຕິ ສກຸຓ຺ຑລີ, ຍຸຕ຺ຕກຸຓ຺ຑລີ ອຎ຺ຎມຎ຺ຎຎ຺ຈ ຕຸຍ຺ຫຎ຺ຈ ອນຸຈ຺ຉວິກກຸຓ຺ຑລີຕິ ອຕ຺ໂຖ. ກປ຺ປິຕເກສມສ຺ສູຕິ ສມ຺ມາກປ຺ປິຕເກສມສ຺ສຸ. ອາມຸຕ຺ຕຫຕ຺ຖາຠຣໂຓຕິ ປຏິມຸກ຺ກອງ຺ຄຸລິຍາທິຫຕ຺ຖາຠຣໂຓ.

໑໐໙໘. ຕຓ຺ຫກ຺ຂຍູປປນ຺ເນຕິ ຕຓ຺ຫກ຺ຂຍໍ ອຣຫຕ຺ຕໍ, ນິພ຺ພານເມວ ວາ ອຸປຄເຕ, ອຘິຄຕວນ຺ເຕຕິ ອຕ຺ໂຖ. ເສສໍ ວຸຕ຺ຕນຍເມວ.

ປຐມກຸຓ຺ຑລີວິມານວຓ຺ຓນາ ນິຏ຺ຐິຕາ.

໙. ທຸຕິຍກຸຓ຺ຑລີວິມານວຓ຺ຓນາ

ອລງ຺ກໂຕ ມລ຺ຍຘໂຣ ສຸວຕ຺ໂຖຕິ ທຸຕິຍກຸຓ຺ຑລີວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ທ຺ເວ ອຄ຺ຄສາວກາ ກາສີສຸ ຊນປທຈາຣິກໍ ຈຣນ຺ຕາຕິອາທິ ສພ຺ພໍ ອນນ຺ຕຣສທິສເມວ.

໑໑໐໑. ‘‘ອລງ຺ກໂຕ ມລ຺ຍຘໂຣ ສຸວຕ຺ໂຖ, ສຸກຸຓ຺ຑລີ ກປ຺ປິຕເກສມສ຺ສຸ;

ອາມຸຕ຺ຕຫຕ຺ຖາຠຣໂຓ ຍສສ຺ສີ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໑໐໒. ‘‘ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ອຏ຺ຐຏ຺ຐກາ ສິກ຺ຂິຕາ ສາຘຸຣູປາ;

ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໑໐໓. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ປຸຈ຺ຉິ;

໑໑໐໔. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໐໕. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທິສ຺ວານ ສມເຓ ສາຘຸຣູເປ;

ສມ຺ປນ຺ນວິຊ຺ຊາຈຣເຓ ຍສສ຺ສີ, ພຫຸສ຺ສຸເຕ ສີລວນ຺ເຕ ປສນ຺ເນ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໐໖. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຄາຖາສຸປິ ອປຸພ຺ພໍ ນຕ຺ຖິ.

ທຸຕິຍກຸຓ຺ຑລີວິມານວຓ຺ຓນາ ນິຏ຺ຐິຕາ.

໑໐. (ອຸຕ຺ຕຣ) ປາຍາສິວິມານວຓ຺ຓນາ

ຍາ ເທວຣາຊສ຺ສ ສຠາ ສຸຘມ຺ມາຕິ ອຸຕ຺ຕຣວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ປຣິນິພ຺ພຸເຕ ຘາຕຸວິຠາເຄ ຈ ກເຕ ຕຕ຺ຖ ຕຕ຺ຖ ຖູເປສຸ ປຕິຏ຺ຐາປິຍມາເນສຸ ຘມ຺ມວິນຍໍ ສງ຺ຄາຍິຕຸໍ ອຸຈ຺ຈິນິຕ຺ວາ ຄຫິເຕສຸ ມຫາກສ຺ສປປ຺ປມຸເຂສຸ ມຫາເຖເຣສຸ ຍາວ ວສ຺ສູປຄມນາ ອຎ຺ເຎສຸ ຈ ເຖເຣສຸ ອຕ຺ຕໂນ ອຕ຺ຕໂນ ປຣິສາຍ ສທ຺ຘິໍ ຕຕ຺ຖ ຕຕ຺ຖ ວສນ຺ເຕສຸ ອາຍສ຺ມາ ກຸມາຣກສ຺ສໂປ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ເສຕພ຺ຍນຄຣໍ ຄນ຺ຕ຺ວາ ສິໍສປາວເນ ວສິ. ອຖ ປາຍາສິ ຣາຊຎ຺ໂຎ ເຖຣສ຺ສ ຕຕ຺ຖ ວສນຠາວໍ ສຸຕ຺ວາ ມຫຕາ ຊນກາເຍນ ປຣິວຸໂຕ ຕໍ ອຸປສງ຺ກມິຕ຺ວາ ປຏິສນ຺ຖາຣໍ ກຕ຺ວາ ນິສິນ຺ໂນ ອຕ຺ຕໂນ ທິຏ຺ຐິຄຕໍ ປເວເທສິ. ອຖ ນໍ ເຖໂຣ ຈນ຺ທິມສູຣິຍູທາຫຣຓາທີຫິ ປຣໂລກສ຺ສ ອຕ຺ຖິຠາວໍ ປກາເສນ຺ໂຕ ອເນກວິຫິຕເຫຕູປມາລງ຺ກຕໍ ທິຏ຺ຐິຄຓ຺ຐິວິນິເວຐນໍ ນານານຍວິຈິຕ຺ຕໍ ປາຍາສິສຸຕ຺ຕໍ (ທີ. ນິ. ໒.໔໐໖ ອາທໂຍ) ເທເສຕ຺ວາ ຕໍ ທິຏ຺ຐິສມ຺ປທາຍໍ ປຕິຏ຺ຐາເປສິ.

ໂສ ວິສຸທ຺ຘທິຏ຺ຐິໂກ ຫຸຕ຺ວາ ສມຓພ຺ຣາຫ຺ມຓກປຓທ຺ຘິກາທີນໍ ທານໍ ເທນ຺ໂຕ ອນຸຬາຣຊ຺ຌາສຍຕາຍ ລູຂໍ ອທາສິ ຆາສຈ຺ຉາທນມຕ຺ຕໍ ກຓາຊກໍ ພິລງ຺ຄທຸຕິຍໍ ສາຓານິ ຈ ວຕ຺ຖານິ. ເອວໍ ປນ ອສກ຺ກຈ຺ຈທານໍ ທຕ຺ວາ ກາຍສ຺ສ ເຠທາ ຫີນກາຍໍ ອຸປປຊ຺ຊິ ຈາຕຸມຫາຣາຊິການໍ ສຫພ຺ຍຕໍ. ຕສ຺ສ ປນ ກິຈ຺ຈາກິຈ຺ເຈສຸ ຍຸຕ຺ຕປ຺ປຍຸຕ຺ໂຕ ອຸຕ຺ຕໂຣ ນາມ ມາຓໂວ ອໂຫສິ ທາເນ ພ຺ຍາວໂຏ. ໂສ ສກ຺ກຈ຺ຈທານໍ ທຕ຺ວາ ຕາວຕິໍສກາຍໍ ອຸປປນ຺ໂນ, ຕສ຺ສ ທ຺ວາທສໂຍຊນິກໍ ວິມານໍ ນິພ຺ພຕ຺ຕິ. ໂສ ກຕຎ຺ຎຸຕໍ ວິຠາເວນ຺ໂຕ ສຫ ວິມາເນນ ກຸມາຣກສ຺ສປຕ຺ເຖຣໍ ອຸປສງ຺ກມິຕ຺ວາ ວິມານໂຕ ໂອຣຸຍ຺ຫ ປຎ຺ຈປຕິຏ຺ຐິເຕນ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ຕໍ ເຖໂຣ –

໑໑໐໘. ‘‘ຍາ ເທວຣາຊສ຺ສ ສຠາ ສຸຘມ຺ມາ, ຍຕ຺ຖຈ຺ຉຕິ ເທວສງ຺ໂຆ ສມຄ຺ໂຄ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໐໙. ‘‘ເທວິທ຺ຘິປຕ຺ໂຕສິ ມຫານຸຠາໂວ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ຄາຖາຫິ ປຏິປຸຈ຺ຉິ;

໑໑໑໐. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໑໑໑໑. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ຣຎ຺ໂຎ ປາຍາສິສ຺ສ ອໂຫສິໍ ມາຓໂວ;

ລທ຺ຘາ ຘນໍ ສໍວິຠາຄໍ ອກາສິໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໑໒. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ໂສ ເທວປຸຕ຺ໂຕ ຕສ຺ສ ອິມາຫິ ຄາຖາຫິ ພ຺ຍາກາສິ.