໙. ປີຕວິມານວຓ຺ຓນາ

ປີຕວຕ຺ເຖ ປີຕຘເຊຕິ ປີຕວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ປຣິນິພ຺ພຸເຕ ຣຎ຺ຎາ ອຊາຕສຕ຺ຕຸນາ ອຕ຺ຕນາ ປຏິລທ຺ຘາ ຠຄວໂຕ ສຣີຣຘາຕຸໂຍ ຄເຫຕ຺ວາ ຖູເປ ຈ ມເຫ ຈ ກເຕ ຣາຊຄຫວາສິນີ ອຎ຺ຎຕຣາ ອຸປາສິກາ ປາໂຕວ ກຕສຣີຣປຏິຊຄ຺ຄນາ ‘‘ສຕ຺ຖຸ ຖູປໍ ປູເຊສ຺ສາມີ’’ຕິ ຍຖາລທ຺ຘານິ ຈຕ຺ຕາຣິ ໂກສາຕກີປຸປ຺ຜານິ ຄເຫຕ຺ວາ ສທ຺ຘາເວເຄນ ສມຸສ຺ສາຫິຕມານສາ ມຄ຺ຄປຣິສ຺ສຍໍ ອນຸປຘາເຣຕ຺ວາວ ຖູປາຠິມຸຂີ ຄຈ຺ຉຕິ. ອຖ ນໍ ຕຣຸຓວຈ຺ຉາ ຄາວີ ອຠິຘາວນ຺ຕີ ເວເຄນ ອາປຕິຕ຺ວາ ສິງ຺ເຄນ ປຫຣິຕ຺ວາ ຊີວິຕກ຺ຂຍໍ ປາເປສິ. ສາ ຕາວເທວ ຕາວຕິໍສຠວເນ ນິພ຺ພຕ຺ຕນ຺ຕີ ສກ຺ກສ຺ສ ເທວຣຎ຺ໂຎ ອຸຍ຺ຍານກີຬາຍ ຄຈ຺ຉນ຺ຕສ຺ສ ປຣິວາຣຠູຕານໍ ອຑ຺ຒຕິຍານໍ ນາຏກໂກຏີນໍ ມຊ຺ເຌ ອຕ຺ຕໂນ ສຣີຣປຠາຍ ຕາ ສພ຺ພາ ອຠິຠວນ຺ຕີ ສຫ ຣເຖນ ປາຕຸຣໂຫສິ. ຕໍ ທິສ຺ວາ ສກ຺ໂກ ເທວຣາຊາ ວິມ຺ຫິຕຈິຕ຺ໂຕ ອຈ຺ຉຣິຍພ຺ຠຸຕຊາໂຕ ‘‘ກີທິເສນ ນຸ ໂຂ ໂອຬາຣິເກນ ກມ຺ມຸນາ ອຍໍ ເອທິສິໍ ສຸມຫຕິໍ ເທວິທ຺ຘິມຸປາຄຕາ’’ຕິ ຕໍ ອິມາຫິ ຄາຖາຫິ ປຸຈ຺ຉິ –

໗໙໕. ‘‘ປີຕວຕ຺ເຖ ປີຕຘເຊ, ປີຕາລງ຺ກາຣຠູສິເຕ;

ປີຕຈນ຺ທນລິຕ຺ຕງ຺ເຄ, ປີຕອຸປ຺ປລມາລິນີ.

໗໙໖. ‘‘ປີຕປາສາທສຍເນ, ປີຕາສເນ ປີຕຠາຊເນ;

ປີຕຉຕ຺ເຕ ປີຕຣເຖ, ປີຕສ຺ເສ ປີຕພີຊເນ.

໗໙໗. ‘‘ກິໍ ກມ຺ມມກຣີ ຠທ຺ເທ, ປຸພ຺ເພ ມານຸສເກ ຠເວ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

ສາປິສ຺ສ ອິມາຫິ ຄາຖາຫິ ພ຺ຍາກາສິ –

໗໙໘. ‘‘ໂກສາຕກີ ນາມ ລຕຕ຺ຖິ ຠນ຺ເຕ, ຕິຕ຺ຕິກາ ອນຠິຈ຺ຉິຕາ;

ຕສ຺ສາ ຈຕ຺ຕາຣິ ປຸປ຺ຜານິ, ຖູປໍ ອຠິຫຣິໍ ອຫໍ.

໗໙໙. ‘‘ສຕ຺ຖຸ ສຣີຣມຸທ຺ທິສ຺ສ, ວິປ຺ປສນ຺ເນນ ເຈຕສາ;

ນາສ຺ສ ມຄ຺ຄໍ ອເວກ຺ຂິສ຺ສໍ, ນ ຕຄ຺ຄມນສາ ສຕີ.

໘໐໐. ‘‘ຕໂຕ ມໍ ອວຘີ ຄາວີ, ຖູປໍ ອປຕ຺ຕມານສໍ;

ຕຎ຺ຈາຫໍ ອຠິສຎ຺ເຈຍ຺ຍໍ, ຠິຍ຺ໂຍ ນູນ ອິໂຕ ສິຍາ.

໘໐໑. ‘‘ເຕນ ກມ຺ເມນ ເທວິນ຺ທ, ມຆວາ ເທວກຸຎ຺ຊຣ;

ປຫາຍ ມານຸສໍ ເທຫໍ, ຕວ ສຫພ຺ຍມາຄຕາ’’ຕິ.

໗໙໕-໖. ຕຕ຺ຖ ປີຕຈນ຺ທນລິຕ຺ຕງ຺ເຄຕິ ສຸວຓ຺ຓວຓ຺ເຓນ ຈນ຺ທເນນ ອນຸລິຕ຺ຕສຣີເຣ. ປີຕປາສາທສຍເນຕິ ສພ຺ພໂສວຓ຺ຓມເຍນ ປາສາເທນ ສຸວຓ຺ຓປຣິກ຺ຂິຕ຺ເຕຫິ ສຍເນຫິ ຈ ສມນ຺ນາຄເຕ. ເອວໍ ສພ຺ພຕ຺ຖ ເຫຏ຺ຐາ ອຸປຣິ ຈ ປີຕສທ຺ເທນ ສຸວຓ຺ຓເມວ ຄຫິຕນ຺ຕິ ທຏ຺ຐພ຺ພໍ.

໗໙໘. ລຕຕ຺ຖີຕິ ລຕາ ອຕ຺ຖິ. ຠນ຺ເຕຕິ ສກ຺ກໍ ເທວຣາຊານໍ ຄາຣເວນ ອາລປຕິ. ອນຠິຈ຺ຉິຕາຕິ ນ ອຠິກງ຺ຂິຕາ.

໗໙໙. ສຣີຣນ຺ຕິ ສຣີຣຠູຕໍ ຘາຕຸໍ. ອວຍເວ ຈາຍໍ ສມຸທາຍໂວຫາໂຣ ຍຖາ ‘‘ປໂຏ ຑຑ຺ໂຒ, ສມຸທ຺ໂທ ທິຏ຺ໂຐ’’ຕິ ຈ. ອສ຺ສາຕິ ໂຄຣູປສ຺ສ. ມຄ຺ຄນ຺ຕິ ອາຄມນມຄ຺ຄໍ. ນ ອເວກ຺ຂິສ຺ສນ຺ຕິ ນ ໂອໂລກຍິໍ. ກສ຺ມາ? ນ ຕຄ຺ຄມນສາ ສຕີຕິ, ຕສ຺ສໍ ຄາວິຍໍ ຄຕມນາ ຐປິຕມນາ ນ ໂຫນ຺ຕີ, ອຎ຺ຎທຕ຺ຖຸ ຠຄວໂຕ ຖູປຄຕມນາ ເອວ ສມານາຕິ ອຕ຺ໂຖ. ‘‘ຕທງ຺ຄມນສາ ສຕີ’’ຕິ ຈ ປາໂຐ, ຕທງ຺ເຄ ຕສ຺ສ ຠຄວໂຕ ຘາຕຸຍາ ອງ຺ເຄ ມໂນ ເອຕິສ຺ສາຕິ ຕທງ຺ຄມນສາ. ເອວໍຠູຕາ ອຫໍ ຕທາ ຕສ຺ສາ ມຄ຺ຄໍ ນາເວກ຺ຂິສ຺ສນ຺ຕິ ທສ຺ເສຕິ.

໘໐໐. ຖູປໍ ອປຕ຺ຕມານສນ຺ຕິ ຖູປໍ ເຈຕິຍໍ ອສມ຺ປຕ຺ຕອຊ຺ຌາສຍໍ, ມນສິ ຠໂວຕິ ຫິ ມານໂສ, ອຊ຺ຌາສໂຍ ມໂນຣໂຖ. ‘‘ຖູປໍ ອຸປຄນ຺ຕ຺ວາ ປຸປ຺ເຜຫິ ປູເຊສ຺ສາມີ’’ຕິ ອຸປ຺ປນ຺ນມໂນຣຖສ຺ສ ອສມ຺ປຸຓ຺ຓຕາຍ ເອວໍ ວຸຕ຺ຕໍ. ຖູປໍ ເຈຕິຍໍ ປນ ປຸປ຺ເຜຫິ ປູຊນຈິຕ຺ຕໍ ສິທ຺ຘເມວ, ເຍນ ສາ ເທວໂລເກ ອຸປ຺ປນ຺ນ. ຕຎ຺ຈາຫໍ ອຠິສຎ຺ເຈຍ຺ຍນ຺ຕິ ຕຎ຺ເຈ ອຫໍ ອຠິສຎ຺ຈິເນຍ຺ຍໍ, ປຸປ຺ຜປູຊເນນ ຫິ ປຸຎ຺ຎໍ ອຫໍ ຖູປໍ ອຠິຄນ຺ຕ຺ວາ ຍຖາຘິປ຺ປາຍໍ ປູຊເນນ ສມ຺ມເທວ ຈິເນຍ຺ຍໍ ອຸປຈິເນຍ຺ຍນ຺ຕິ ອຕ຺ໂຖ. ຠິຍ຺ໂຍ ນູນ ອິໂຕ ສິຍາຕິ ອິໂຕ ຍຖາລທ຺ຘສມ຺ປຕ຺ຕິໂຕປິ ຠິຍ຺ໂຍ ອຸປຣິ ອຸຕ຺ຕຣິຕຣາ ສມ຺ປຕ຺ຕິ ສິຍາຕິ ມຎ຺ເຎຕິ ອຕ຺ໂຖ.

໘໐໑. ມຆວາ ເທວກຸຎ຺ຊຣາຕິ ອາລປນໍ. ຕຕ຺ຖ ເທວກຸຎ຺ຊຣາຕິ ສພ຺ພພລປຣກ຺ກມາທິວິເສເສຫິ ເທເວສຸ ກຸຎ຺ຊຣສທິໂສ. ສຫພ຺ຍນ຺ຕິ ສຫຠາວໍ.

໘໐໒. ‘‘ອິທໍ ສຸຕ຺ວາ ຕິທສາຘິປຕິ, ມຆວາ ເທວກຸຎ຺ຊໂຣ;

ຕາວຕິໍເສ ປສາເທນ຺ໂຕ, ມາຕລິໍ ເອຕທພ຺ຣວີ’’ຕິ. –

ອິທໍ ຘມ຺ມສງ຺ຄາຫກວຈນໍ. ຕໂຕ ສກ຺ໂກ ມາຕລິປມຸຂສ຺ສ ເທວຄຓສ຺ສ ອິມາຫິ ຄາຖາຫິ ຘມ຺ມໍ ເທເສສິ –

໘໐໓. ‘‘ປສ຺ສ ມາຕລິ ອຈ຺ເຉຣໍ, ຈິຕ຺ຕໍ ກມ຺ມຜລໍ ອິທໍ;

ອປ຺ປກມ຺ປິ ກຕໍ ເທຍ຺ຍໍ, ປຸຎ຺ຎໍ ໂຫຕິ ມຫປ຺ຜລໍ.

໘໐໔. ‘‘ນຕ຺ຖິ ຈິຕ຺ເຕ ປສນ຺ນມ຺ຫິ, ອປ຺ປກາ ນາມ ທກ຺ຂິຓາ;

ຕຖາຄເຕ ວາ ສມ຺ພຸທ຺ເຘ, ອຖ ວາ ຕສ຺ສ ສາວເກ.

໘໐໕. ‘‘ເອຫິ ມາຕລິ ອມ຺ເຫປິ, ຠິຍ຺ໂຍ ຠິຍ຺ໂຍ ມເຫມເສ;

ຕຖາຄຕສ຺ສ ຘາຕຸໂຍ, ສຸໂຂ ປຸຎ຺ຎານມຸຈ຺ຈໂຍ.

໘໐໖. ‘‘ຕິຏ຺ຐນ຺ເຕ ນິພ຺ພຸເຕ ຈາປິ, ສເມ ຈິຕ຺ເຕ ສມໍ ຜລໍ;

ເຈໂຕປຓິຘິເຫຕຸຫິ, ສຕ຺ຕາ ຄຈ຺ຉນ຺ຕິ ສຸຄ຺ຄຕິໍ.

໘໐໗. ‘‘ພຫູນໍ ວຕ ອຕ຺ຖາຍ, ອຸປ຺ປຊ຺ຊນ຺ຕິ ຕຖາຄຕາ;

ຍຕ຺ຖ ກາຣໍ ກຣິຕ຺ວານ, ສຄ຺ຄໍ ຄຈ຺ຉນ຺ຕິ ທາຍກາ’’ຕິ.

໘໐໒. ຕຕ຺ຖ ປສາເທນ຺ໂຕຕິ ປສນ຺ເນ ກໂຣນ຺ໂຕ, ຣຕນຕ຺ຕເຍ ສທ຺ຘໍ ອຸປ຺ປາເທນ຺ໂຕຕິ ອຕ຺ໂຖ.

໘໐໓. ຈິຕ຺ຕນ຺ຕິ ວິຈິຕ຺ຕໍ ອຈິນ຺ເຕຍ຺ຍໍ. ກມ຺ມຜລນ຺ຕິ ເທຍ຺ຍຘມ຺ມສ຺ສ ອນຸຬາຣຕ຺ເຕປິ ເຂຕ຺ຕສມ຺ປຕ຺ຕິຍາ ຈ ຈິຕ຺ຕສມ຺ປຕ຺ຕິຍາ ຈ ອຸຬາຣສ຺ສ ປຸຎ຺ຎກມ຺ມສ຺ສ ຜລໍ ປສ຺ສາຕິ ໂຍຊນາ. ອປ຺ປກມ຺ປິ ກຕໍ ເທຍ຺ຍໍ, ປຸຎ຺ຎໍ ໂຫຕິ ມຫປ຺ຜລນ຺ຕິ ເອຕ຺ຖ ກຕນ຺ຕິ ກາຣວເສນ ສກ຺ກາຣວເສນ ອາຍຕເນ ວິນິຍຸຕ຺ຕໍ. ເທຍ຺ຍນ຺ຕິ ທາຕພ຺ພວຕ຺ຖຸໍ. ປຸຎ຺ຎນ຺ຕິ ຕຖາປວຕ຺ຕໍ ປຸຎ຺ຎກມ຺ມໍ.

໘໐໔. ອິທານິ ຍຕ຺ຖ ອປ຺ປກມ຺ປິ ກຕໍ ປຸຎ຺ຎໍ ມຫປ຺ຜລໍ ໂຫຕິ, ຕໍ ປາກຏໍ ກຕ຺ວາ ທສ຺ເສນ຺ໂຕ ‘‘ນຕ຺ຖິ ຈິຕ຺ເຕ ປສນ຺ນມ຺ຫີ’’ຕິ ຄາຖມາຫ. ຕໍ ສຸວິຎ຺ເຎຍ຺ຍເມວ.

໘໐໕-໖. ອມ຺ເຫປີຕິ ມຍມ຺ປິ. ມເຫມເສຕິ ມຫາມເສ ປູຊາມເສ. ເຈໂຕປຓິຘິເຫຕຸ ຫີຕິ ອຕ຺ຕໂນ ຈິຕ຺ຕສ຺ສ ສມ຺ມເທວ ຐປນນິມິຕ຺ຕໍ, ອຕ຺ຕສມ຺ມາປຓິຘາເນນາຕິ ອຕ຺ໂຖ. ເຕນາຫ ຠຄວາ –

‘‘ນ ຕໍ ມາຕາປິຕາ ກຍິຣາ, ອຎ຺ເຎ ວາປິ ຈ ຎາຕກາ;

ສມ຺ມາ ປຓິຫິຕໍ ຈິຕ຺ຕໍ, ເສຍ຺ຍໂສ ນໍ ຕໂຕ ກເຣ’’ຕິ. (ຘ. ປ. ໔໓);

ເອວຎ຺ຈ ປນ ວຕ຺ວາ ສກ຺ໂກ ເທວານມິນ຺ໂທ ອຸຍ຺ຍານກີຬາຍ ອຸສ຺ສາຫໍ ປຏິປ຺ປສ຺ສມ຺ເຠຕ຺ວາ ຕໂຕວ ປຏິນິວຕ຺ຕິຕ຺ວາ ອຕ຺ຕນາ ອຠິຓ຺ຫໍ ປູຊເນຍ຺ຍຏ຺ຐານຠູເຕ ຈູຬາມຓິເຈຕິເຍ ສຕ຺ຕາຫໍ ປູຊໍ ອກາສິ. ອຖ ອປເຣນ ສມເຍນ ເທວຈາຣິກໍ ຄຕສ຺ສ ອາຍສ຺ມໂຕ ນາຣທຕ຺ເຖຣສ຺ສ ຕໍ ປວຕ຺ຕິໍ ຄາຖາເຫວ ກເຖສິ, ເຖໂຣ ຘມ຺ມສງ຺ຄາຫການໍ ອາໂຣເຈສິ, ເຕ ຕຖາ ນໍ ສງ຺ຄຫໍ ອາໂຣເປສຸນ຺ຕິ.

ປີຕວິມານວຓ຺ຓນາ ນິຏ຺ຐິຕາ.