໑໐. ອຸຈ຺ຉຸວິມານວຓ຺ຓນາ

ໂອຠາສຍິຕ຺ວາ ປຖວິໍ ສເທວກນ຺ຕິ ອຸຈ຺ຉຸວິມານໍ. ຕໍ ເຫຏ຺ຐາ ອຸຈ຺ຉຸວິມາເນນ ປາຬິໂຕ ຈ ອຏ຺ຐຸປ຺ປຕ຺ຕິໂຕ ຈ ສທິສເມວ. ເກວລໍ ຕຕ຺ຖ ສສ຺ສຸ ສຸຓິສໍ ປີຐເກນ ປຫຣິຕ຺ວາ ມາເຣສິ, ອິຘ ປນ ເລຑ຺ຑຸນາຕິ ອຍເມວ ວິເສໂສ. ວຕ຺ຖຸໂນ ປນ ຠິນ຺ນຕ຺ຕາ ອຸຠຍມ຺ປິ ວິສຸໍເຍວ ສງ຺ຄຫໍ ອາຣຸຬ຺ຫນ຺ຕິ ເວທິຕພ຺ພໍ.

໘໐໘. ‘‘ໂອຠາສຍິຕ຺ວາ ປຖວິໍ ສເທວກໍ, ອຕິໂຣຈສິ ຈນ຺ທິມສູຣິຍາ ວິຍ;

ສິຣິຍາ ຈ ວຓ຺ເຓນ ຍເສນ ເຕຊສາ, ພ຺ຣຫ຺ມາວ ເທເວ ຕິທເສ ສຫິນ຺ທເກ.

໘໐໙. ‘‘ປຸຈ຺ຉາມິ ຕໍ ອຸປ຺ປລມາລຘາຣິນີ, ອາເວຬິນີ ກຎ຺ຈນສນ຺ນິຠຕ຺ຕເຈ;

ອລງ຺ກເຕ ອຸຕ຺ຕມວຕ຺ຖຘາຣິນີ, ກາ ຕ຺ວໍ ສຸເຠ ເທວເຕ ວນ຺ທເສ ມມໍ.

໘໑໐. ‘‘ກິໍ ຕ຺ວໍ ປຸເຣ ກມ຺ມມກາສິ ອຕ຺ຕນາ, ມນຸສ຺ສຠູຕາ ປຸຣິມາຍ ຊາຕິຍາ;

ທານໍ ສຸຈິຓ຺ຓໍ ອຖ ສີລສຎ຺ຎມໍ, ເກນຸປປນ຺ນາ ສຸຄຕິໍ ຍສສ຺ສິນີ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ. –

ອາຍສ຺ມາ ມຫາໂມຄ຺ຄລ຺ລານຕ຺ເຖໂຣ ປຸຈ຺ຉິ. ຕໂຕ ເທວຕາ ອິມາຫິ ຄາຖາຫິ ພ຺ຍາກາສິ –

໘໑໑. ‘‘ອິທານິ ຠນ຺ເຕ ອິມເມວ ຄາມໍ, ປິຓ຺ຑາຍ ອມ຺ຫາກໍ ຆຣໍ ອຸປາຄມິ;

ຕໂຕ ເຕ ອຸຈ຺ຉຸສ຺ສ ອທາສິໍ ຂຓ຺ຑິກໍ, ປສນ຺ນຈິຕ຺ຕາ ອຕຸລາຍ ປີຕິຍາ.

໘໑໒. ‘‘ສສ຺ສຸ ຈ ປຈ຺ຉາ ອນຸຍຸຎ຺ຊເຕ ມມໍ, ກຫໍ ນຸ ອຸຈ຺ຉຸໍ ວຘຸເກ ອວາກິຣິ;

ນ ຉຑ຺ຑິຕໍ ໂນ ປນ ຂາທິຕໍ ມຍາ, ສນ຺ຕສ຺ສ ຠິກ຺ຂຸສ຺ສ ສຍໍ ອທາສຫໍ.

໘໑໓. ‘‘‘ຕຸຍ຺ຫໍ ນ຺ວິທໍ ອິສ຺ສຣິຍໍ ອໂຖ ມມ’, ອິຕິສ຺ສາ ສສ຺ສຸ ປຣິຠາສເຕ ມມໍ;

ເລຑ຺ຑຸໍ ຄເຫຕ຺ວາ ປຫາຣໍ ອທາສິ ເມ, ຕໂຕ ຈຸຕາ ກາລກຕາມ຺ຫິ ເທວຕາ.

໘໑໔. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ກມ຺ມໍ ອນຸໂຠມິ ອຕ຺ຕນາ;

ເທເວຫິ ສທ຺ຘິໍ ປຣິຈາຣຍາມຫໍ, ໂມທາມຫໍ ກາມຄຸເຓຫິ ປຎ຺ຈຫິ.

໘໑໕. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ກມ຺ມໍ ອນຸໂຠມິ ອຕ຺ຕນາ;

ເທວິນ຺ທຄຸຕ຺ຕາ ຕິທເສຫິ ຣກ຺ຂິຕາ, ສມປ຺ປິຕາ ກາມຄຸເຓຫິ ປຎ຺ຈຫິ.

໘໑໖. ‘‘ເອຕາທິສໍ ປຸຎ຺ຎຜລໍ ອນປ຺ປກໍ, ມຫາວິປາກາ ມມ ອຸຈ຺ຉຸທກ຺ຂິຓາ;

ເທເວຫິ ສທ຺ຘິໍ ປຣິຈາຣຍາມຫໍ, ໂມທາມຫໍ ກາມຄຸເຓຫິ ປຎ຺ຈຫິ.

໘໑໗. ‘‘ເອຕາທິສໍ ປຸຎ຺ຎຜລໍ ອນປ຺ປກໍ, ມຫາຊຸຕິກາ ມມ ອຸຈ຺ຉຸທກ຺ຂິຓາ;

ເທວິນ຺ທຄຸຕ຺ຕາ ຕິທເສຫິ ຣກ຺ຂິຕາ, ສຫສ຺ສເນຕ຺ໂຕຣິວ ນນ຺ທເນ ວເນ.

໘໑໘. ‘‘ຕຸວຎ຺ຈ ຠນ຺ເຕ ອນຸກມ຺ປກໍ ວິທຸໍ, ອຸເປຈ຺ຈ ວນ຺ທິໍ ກຸສລຎ຺ຈ ປຸຈ຺ຉິສໍ;

ຕໂຕ ເຕ ອຸຈ຺ຉຸສ຺ສ ອທາສິໍ ຂຓ຺ຑິກໍ, ປສນ຺ນຈິຕ຺ຕາ ອຕຸລາຍ ປີຕິຍາ’’ຕິ.

ເສສໍ ວຸຕ຺ຕສທິສເມວາຕິ.

ອຸຈ຺ຉຸວິມານວຓ຺ຓນາ ນິຏ຺ຐິຕາ.