໑໑. ວນ຺ທນວິມານວຓ຺ຓນາ

ອຠິກ຺ກນ຺ເຕນ ວຓ຺ເຓນາຕິ ວນ຺ທນວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ສມເຍນ ສມ຺ພຫຸລາ ຠິກ຺ຂູ ອຎ຺ຎຕຣສ຺ມິໍ ຄາມກາວາເສ ວສ຺ສໍ ວສິຕ຺ວາ ວຸຕ຺ຖວສ຺ສາ ປວາເຣຕ຺ວາ ເສນາສນໍ ປຏິສາເມຕ຺ວາ ປຕ຺ຕຈີວຣມາທາຍ ສາວຕ຺ຖິໍ ອຸທ຺ທິສ຺ສ ຠຄວນ຺ຕໍ ທສ຺ສນຕ຺ຖາຍ ຄຈ຺ຉນ຺ຕາ ອຎ຺ຎຕຣສ຺ສ ຄາມສ຺ສ ມຊ຺ເຌນ ອຕິກ຺ກມນ຺ຕິ. ຕຕ຺ຖ ອຎ຺ຎຕຣາ ອິຕ຺ຖີ ເຕ ຠິກ຺ຂູ ທິສ຺ວາ ປສນ຺ນຈິຕ຺ຕາ ສຎ຺ຊາຕຄາຣວພຫຸມານາ ປຎ຺ຈປຕິຏ຺ຐິເຕນ ວນ຺ທິຕ຺ວາ ສິຣສ຺ມິໍ ອຎ຺ຊລິໍ ປຄ຺ຄຍ຺ຫ ຍາວ ທສ຺ສນູປຈາຣາ ປສາທໂສມ຺ມານິ ອກ຺ຂີນິ ອຸມ຺ມີເລຕ຺ວາ ໂອໂລເກນ຺ຕີ ອຏ຺ຐາສິ. ສາ ອປເຣນ ສມເຍນ ກາລໍ ກຕ຺ວາ ຕາວຕິໍເສສຸ ນິພ຺ພຕ຺ຕິ. ອຖ ນໍ ຕຕ຺ຖ ທິພ຺ພສມ຺ປຕ຺ຕິໍ ອນຸຠວນ຺ຕິໍ ອາຍສ຺ມາ ມຫາໂມຄ຺ຄລ຺ລາໂນ ອິມາຫິ ຄາຖາຫິ ປຏິປຸຈ຺ຉິ –

໘໑໙. ‘‘ອຠິກ຺ກນ຺ເຕນ ວຓ຺ເຓນ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໘໒໒. ‘‘ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ’’.

໘໒໓. ‘‘ອຫໍ ມນຸສ຺ເສສຸ ມນຸສ຺ສຠູຕາ, ທິສ຺ວານ ສມເຓ ສີລວນ຺ເຕ;

ປາທານິ ວນ຺ທິຕ຺ວາ ມນໍ ປສາທຍິໍ, ວິຕ຺ຕາ ຈຫໍ ອຎ຺ຊລິກໍ ອກາສິໍ.

໘໒໔. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອິມາຫິ ຄາຖາຫິ ພ຺ຍາກາສິ.

໘໒໓. ຕຕ຺ຖ ສມເຓຕິ ສມິຕປາເປ. ສີລວນ຺ເຕຕິ ສີລຄຸຓຍຸຕ຺ເຕ. ມນໍ ປສາທຍິນ຺ຕິ ‘‘ສາຘຸຣູປາ ວຕິເມ ອຍ຺ຍາ ຘມ຺ມຈາຣິໂນ ສມຈາຣິໂນ ພ຺ຣຫ຺ມຈາຣິໂນ’’ຕິ ເຕສໍ ຄຸເຓ ອາຣພ຺ຠ ຈິຕ຺ຕໍ ປສາເທສິໍ. ວິຕ຺ຕາ ຈຫໍ ອຎ຺ຊລິກໍ ອກາສິນ຺ຕິ ຕຸຏ຺ຐາ ໂສມນສ຺ສຊາຕາ ອຫໍ ວນ຺ທິໍ. ເປສລານໍ ຠິກ຺ຂູນໍ ປສາທວິກສິຕານິ ອກ຺ຂີນິ ອຸມ຺ມີເລຕ຺ວາ ທສ຺ສນມຕ຺ຕມ຺ປິ ອິເມສໍ ສຕ຺ຕານໍ ພຫູປກາຣໍ, ປເຄວ ວນ຺ທນາຕິ. ເຕນາຫ ‘‘ເຕນ ເມຕາທິໂສ ວຓ຺ໂຓ’’ຕິອາທິ. ເສສໍ ວຸຕ຺ຕນຍເມວ.

ວນ຺ທນວິມານວຓ຺ຓນາ ນິຏ຺ຐິຕາ.