໘. ອມ຺ພວິມານວຓ຺ຓນາ

ທິພ຺ພໍ ເຕ ອມ຺ພວນໍ ຣມ຺ມນ຺ຕິ ອມ຺ພວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສາວຕ຺ຖິຍໍ ອຎ຺ຎຕຣາ ອຸປາສິກາ ອາວາສທານສ຺ສ ມຫປ຺ຜລຕໍ ມຫານິສໍສຕຎ຺ຈ ສຸຕ຺ວາ ຉນ຺ທຊາຕາ ຠຄວນ຺ຕໍ ອຠິວາເທຕ຺ວາ ເອວມາຫ ‘‘ອຫໍ, ຠນ຺ເຕ, ເອກໍ ອາວາສໍ ກາເຣຕຸກາມາ, ອິຈ຺ຉາມິ ຕາທິສໍ ໂອກາສໍ, ອາຈິກ຺ຂຕູ’’ຕິ. ຠຄວາ ຠິກ຺ຂູ ອາຓາເປສິ, ຠິກ຺ຂູ ຕສ຺ສາ ໂອກາສໍ ທສ຺ເສສຸໍ. ສາ ຕຕ຺ຖ ຣມຓີຍໍ ອາວາສໍ ກາເຣຕ຺ວາ ຕສ຺ສ ສມນ຺ຕໂຕ ອມ຺ພຣຸກ຺ເຂ ໂຣເປສິ. ໂສ ອາວາໂສ ສມນ຺ຕໂຕ ອມ຺ພປນ຺ຕີຫິ ປຣິກ຺ຂິຕ຺ໂຕ ຉາຍູທກສມ຺ປນ຺ໂນ ມຸຕ຺ຕາຊາລສທິສວາລຸກາກິຓ຺ຓປຓ຺ຑຣຠູມິຠາໂຄ ອຕິວິຍ ມໂນຫໂຣ ອໂຫສິ. ສາ ຕໍ ວິຫາຣໍ ນານາວຓ຺ເຓຫິ ວຕ຺ເຖຫິ ປຸປ຺ຜທາມຄນ຺ຘທາມາທີຫິ ຈ ເທວວິມານໍ ວິຍ ອລງ຺ກຣິຕ຺ວາ ເຕລປທີປໍ ອາໂຣເປຕ຺ວາ ອມ຺ພຣຸກ຺ເຂ ຈ ອຫເຕຫິ ວຕ຺ເຖຫິ ເວເຐຕ຺ວາ ສງ຺ຆສ຺ສ ນິຍ຺ຍາເທສິ.

ສາ ອປຣຠາເຄ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິ, ຕສ຺ສາ ມຫນ຺ຕໍ ວິມານໍ ປາຕຸຣໂຫສິ ອມ຺ພວນປຣິກ຺ຂິຕ຺ຕໍ. ສາ ຕຕ຺ຖ ອຈ຺ຉຣາຄຓປຣິວາຣິຕາ ທິພ຺ພສມ຺ປຕ຺ຕິໍ ອນຸຠວຕິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ອຸປຄນ຺ຕ຺ວາ ອິມາຫິ ຄາຖາຫິ ປຸຈ຺ຉິ –

໗໘໓. ‘‘ທິພ຺ພໍ ເຕ ອມ຺ພວນໍ ຣມ຺ມໍ, ປາສາເທຕ຺ຖ ມຫລ຺ລໂກ;

ນານາຕູຣິຍສງ຺ຆຸຏ຺ໂຐ, ອຈ຺ຉຣາຄຓໂຆສິໂຕ.

໗໘໔. ‘‘ປທີໂປ ເຈຕ຺ຖ ຊລຕິ, ນິຈ຺ຈໍ ໂສວຓ຺ຓໂຍ ມຫາ;

ທຸສ຺ສຜເລຫິ ຣຸກ຺ເຂຫິ, ສມນ຺ຕາ ປຣິວາຣິໂຕ.

໗໘໕. ‘‘ເກນ ເຕຕາທິໂສ ວຓ຺ໂຓ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໗໘໗. ‘‘ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ’’.

໗໘໘. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຸຣິມາຍ ຊາຕິຍາ ມນຸສ຺ສໂລເກ;

ວິຫາຣໍ ສງ຺ຆສ຺ສ ກາເຣສິໍ, ອມ຺ເພຫິ ປຣິວາຣິຕໍ.

໗໘໙. ‘‘ປຣິໂຍສິເຕ ວິຫາເຣ, ກາເຣນ຺ເຕ ນິຏ຺ຐິເຕ ມເຫ;

ອມ຺ເພຫິ ຉາທຍິຕ຺ວານ, ກຕ຺ວາ ທຸສ຺ສມເຍ ຜເລ.

໗໙໐. ‘‘ປທີປໍ ຕຕ຺ຖ ຊາເລຕ຺ວາ, ໂຠຊຍິຕ຺ວາ ຄຓຸຕ຺ຕມໍ;

ນິຍ຺ຍາເທສິໍ ຕໍ ສງ຺ຆສ຺ສ, ປສນ຺ນາ ເສຫິ ປາຓິຠິ.

໗໙໑. ‘‘ເຕນ ເມ ອມ຺ພວນໍ ຣມ຺ມໍ, ປາສາເທຕ຺ຖ ມຫລ຺ລໂກ;

ນານາຕູຣິຍສງ຺ຆຸຏ຺ໂຐ, ອຈ຺ຉຣາຄຓໂຆສິໂຕ.

໗໙໒. ‘‘ປທີໂປ ເຈຕ຺ຖ ຊລຕິ, ນິຈ຺ຈໍ ໂສວຓ຺ຓໂຍ ມຫາ;

ທຸສ຺ສຜເລຫິ ຣຸກ຺ເຂຫິ, ສມນ຺ຕາ ປຣິວາຣິໂຕ.

໗໙໓. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ສາ ເທວຕາ ພ຺ຍາກາສິ.

໗໘໓. ຕຕ຺ຖ ມຫລ຺ລໂກຕິ ມຫນ຺ໂຕ ອາຍາມວິຕ຺ຖາເຣຫິ ອຸພ຺ເພເຘນ ຈ ວິປຸໂລ, ອຸຬາຣຕໂມຕິ ອຕ຺ໂຖ. ອຈ຺ຉຣາຄຓໂຆສິໂຕຕິ ຕໍ ປໂມທິຕຸໍ ສງ຺ຄີຕິວເສນ ເຈວ ປິຍສລ຺ລາປວເສນ ຈ ອຈ຺ຉຣາສງ຺ເຆນ ສມຸຄ຺ໂຆສິໂຕ.

໗໘໔. ປທີໂປ ເຈຕ຺ຖ ຊລຕີຕິ ສູຣິຍຣສ຺ມິສມຸຊ຺ຊລກິຣຓວິຕາໂນ ຣຕນປ຺ປທີໂປ ຈ ເອຕ຺ຖ ເອຕສ຺ມິໍ ປາສາເທ ອຠິຊລຕິ. ທຸສ຺ສຜເລຫີຕິ ທຸສ຺ສານິ ຜລານິ ເອເຕສນ຺ຕິ ທຸສ຺ສຜລາ. ເຕຫິ ສມຸຄ຺ຄິຣິຍມານທິພ຺ພວຕ຺ເຖຫີຕິ ອຕ຺ໂຖ.

໗໘໙. ກາເຣນ຺ເຕ ນິຏ຺ຐິເຕ ມເຫຕິ ກຕປຣິໂຍສິຕສ຺ສ ວິຫາຣສ຺ສ ມເຫ ປູຊາຍ ກຣີຍມານາຍ ຈ. ກຕ຺ວາ ທຸສ຺ສມເຍ ຜເລຕິ ທຸສ຺ເສເຍວ ເຕສໍ ອມ຺ພານໍ ຜລໍ ກຕ຺ວາ.

໗໙໐. ຄຓຸຕ຺ຕມນ຺ຕິ ຄຓານໍ ອຸຕ຺ຕມໍ ຠຄວໂຕ ສາວກສງ຺ຆໍ. ນິຍ຺ຍາເທສິນ຺ຕິ ສມ຺ປຏິຈ຺ຉາເປສິໍ, ອທາສິນ຺ຕິ ອຕ຺ໂຖ. ເສສໍ ວຸຕ຺ຕນຍເມວ.

ອມ຺ພວິມານວຓ຺ຓນາ ນິຏ຺ຐິຕາ.