໗. ຈຕຸຣິຕ຺ຖິວິມານວຓ຺ຓນາ

ອຠິກ຺ກນ຺ເຕນ ວຓ຺ເຓນາຕິ ຈຕຸຣິຕ຺ຖິວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ສາວຕ຺ຖິຍໍ ວິຫຣນ຺ເຕ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍນ ເທວຈາຣິກໍ ຈຣນ຺ໂຕ ຕາວຕິໍສຠວນໍ ຄໂຕ. ໂສ ຕຕ຺ຖ ປຏິປາຏິຍາ ຐິເຕສຸ ຈຕູສຸ ວິມາເນສຸ ຈຕສ຺ໂສ ເທວຘີຕໂຣ ປຈ຺ເຈກໍ ອຈ຺ຉຣາສຫສ຺ສປຣິວາຣາ ທິພ຺ພສມ຺ປຕ຺ຕິໍ ອນຸຠວນ຺ຕິໂຍ ທິສ຺ວາ ຕາຫິ ປຸພ຺ເພ ກຕກມ຺ມໍ ປຸຈ຺ຉນ຺ໂຕ –

໗໕໕. ‘‘ອຠິກ຺ກນ຺ເຕນ ວຓ຺ເຓນ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. –

ອິມາຫິ ຄາຖາຫິ ປຏິປາຏິຍາ ປຸຈ຺ຉິ. ຕາປິ ຕສ຺ສ ປຸຈ຺ຉານນ຺ຕຣໍ ປຏິປາຏິຍາ ພ຺ຍາກຣິໍສຸ. ຕໍ ທສ຺ເສຕຸໍ –

໗໕໘. ‘‘ສາ ເທວຕາ ອຕ຺ຕມນາ…ເປ…ຍສ຺ສ ກມ຺ມສ຺ສິທໍ ຜລ’’ນ຺ຕິ. –

ອຍໍ ຄາຖາ ວຸຕ຺ຕາ.

ຕາ ກິຣ ກສ຺ສປສ຺ສ ຠຄວໂຕ ກາເລ ເອສິການາມເກ ຣຏ຺ເຐ ປຓ຺ຓກເຕ ນາມ ນຄເຣ ກຸລເຄເຫ ນິພ຺ພຕ຺ຕາ ວຍປ຺ປຕ຺ຕາ ຕສ຺ມິໍເຍວ ນຄເຣ ປຕິກຸລໍ ຄຕາ ສມຄ຺ຄວາສໍ ວສນ຺ຕິ. ຕາສຸ ເອກາ ອຎ຺ຎຕຣໍ ປິຓ຺ຑຈາຣິກໍ ຠິກ຺ຂຸໍ ທິສ຺ວາ ປສນ຺ນຈິຕ຺ຕາ ອິນ຺ທີວຣກລາປໍ ອທາສິ, ອປຣາ ອຎ຺ຎສ຺ສ ນີລຸປ຺ປລຫຕ຺ຖກໍ ອທາສິ, ອປຣາ ປທຸມຫຕ຺ຖກໍ ອທາສິ, ອປຣາ ສຸມນມກຸຬານິ ອທາສິ. ຕາ ອປເຣນ ສມເຍນ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິໍສຸ, ຕາສໍ ອຈ຺ຉຣາສຫສ຺ສໍ ປຣິວາໂຣ ອໂຫສິ. ຕາ ຕຕ຺ຖ ຍາວຕາຍຸກໍ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ຈຸຕາ ຕສ຺ເສວ ກມ຺ມສ຺ສ ວິປາກາວເສເສນ ອປຣາປຣໍ ຕຕ຺ເຖວ ສໍສຣນ຺ຕິໂຍ ອິມສ຺ມິໍ ພຸທ຺ຘຸປ຺ປາເທ ຕຕ຺ເຖວ ອຸປ຺ປນ຺ນາ ວຸຕ຺ຕນເຍນ ອາຍສ຺ມຕາ ມຫາໂມຄ຺ຄລ຺ລາເນນ ປຸຈ຺ຉິຕາ. ຕາສຸ ເອກາ ອຕ຺ຕນາ ກຕໍ ປຸພ຺ພກມ຺ມໍ ເຖຣສ຺ສ ກເຖນ຺ຕີ –

໗໕໙. ‘‘ອິນ຺ທີວຣານໍ ຫຕ຺ຖກໍ ອຫມທາສິໍ, ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ;

ເອສິການໍ ອຸຓ຺ຓຕສ຺ມິໍ, ນຄຣວເຣ ປຓ຺ຓກເຕ ຣມ຺ເມ.

໗໖໐. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອາຫ. ອປຣາ –

໗໖໖. ‘‘ນີລຸປ຺ປລຫຕ຺ຖກໍ ອຫມທາສິໍ, ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ;

ເອສິການໍ ອຸຓ຺ຓຕສ຺ມິໍ, ນຄຣວເຣ ປຓ຺ຓກເຕ ຣມ຺ເມ.

໗໖໗. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອາຫ. ອປຣາ –

໗໗໓. ‘‘ໂອທາຕມູລກໍ ຫຣິຕປຕ຺ຕໍ, ອຸທກສ຺ມິໍ ສເຣ ຊາຕໍ ອຫມທາສິໍ;

ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ, ເອສິການໍ ອຸຓ຺ຓຕສ຺ມິໍ;

ນຄຣວເຣ ປຓ຺ຓກເຕ ຣມ຺ເມ.

໗໗໔. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອາຫ. ອປຣາ –

໗໘໐. ‘‘ອຫໍ ສຸມນາ ສຸມນສ຺ສ ສຸມນມກຸຬານິ, ທນ຺ຕວຓ຺ຓານິ ອຫມທາສິໍ;

ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ, ເອສິການໍ ອຸຓ຺ຓຕສ຺ມິໍ;

ນຄຣວເຣ ປຓ຺ຓກເຕ ຣມ຺ເມ.

໗໘໑. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອາຫ.

໗໕໙. ຕຕ຺ຖ ອິນ຺ທີວຣານໍ ຫຕ຺ຖກນ຺ຕິ ອຸທ຺ທາລກປຸປ຺ຜຫຕ຺ຖໍ ວາຕຆາຕກປຸປ຺ຜກລາປໍ. ເອສິການນ຺ຕິ ເອສິກາຣຏ຺ຐສ຺ສ. ອຸຓ຺ຓຕສ຺ມິໍ ນຄຣວເຣຕິ ອຸຓ຺ຓເຕ ຠູມິປເທເສ ນິວິຏ຺ເຐ ເມໂຆທຣໍ ລິຫນ຺ເຕຫິ ວິຍ ອຈ຺ຈຸຄ຺ຄເຕຫິ ປາສາທກູຏາຄາຣາທີຫິ ອຸຓ຺ຓເຕ ອຸຕ຺ຕມນຄເຣ. ປຓ຺ຓກເຕຕິ ເອວໍນາມເກ ນຄເຣ.

໗໖໖. ນີລຸປ຺ປລຫຕ຺ຖກນ຺ຕິ ກຸວລຍກລາປໍ.

໗໗໓. ໂອທາຕມູລກນ຺ຕິ ເສຕມູລໍ, ຠິສມູລານໍ ຘວລຕາຍ ວຸຕ຺ຕໍ, ປທຸມກລາປໍ ສນ຺ຘາຍ ວທຕິ. ເຕນາຫ ‘‘ຫຣິຕປຕ຺ຕ’’ນ຺ຕິອາທິ. ຕຕ຺ຖ ຫຣິຕປຕ຺ຕນ຺ຕິ ນີລປຕ຺ຕໍ. ອວິຊຫິຕມກຸຬປຕ຺ຕສ຺ສ ຫິ ປທຸມສ຺ສ ພາຫິຣປຕ຺ຕານິ ຫຣິຕວຓ຺ຓານິ ເອວ ໂຫນ຺ຕິ. ອຸທກສ຺ມິໍ ສເຣ ຊາຕນ຺ຕິ ສເຣ ອຸທກມ຺ຫິ ຊາຕໍ, ສໂຣຣຸຫນ຺ຕິ ອຕ຺ໂຖ.

໗໘໐. ສຸມນາຕິ ເອວໍນາມາ. ສຸມນສ຺ສາຕິ ສຸນ຺ທຣຈິຕ຺ຕສ຺ສ. ສຸມນມກຸຬານີຕິ ຊາຕິສຸມນປຸປ຺ຜມກຸຬານິ. ທນ຺ຕວຓ຺ຓານີຕິ ສຊ຺ຊຸກໍ ອຸລ຺ລິຂິຕຫຕ຺ຖິທນ຺ຕສທິສວຓ຺ຓານິ.

ເອວໍ ຕາຫິ ອຕ຺ຕນາ ກຕກມ຺ເມ ກຖິເຕ ເຖໂຣ ຕາສໍ ອນຸປຸພ຺ພິໍ ກຖໍ ກເຖຕ຺ວາ ສຈ຺ຈານິ ປກາເສສິ. ສຈ຺ຈປຣິໂຍສາເນ ສາ ສພ຺ພາປິ ສຫປຣິວາຣາ ໂສຕາປນ຺ນາ ອເຫສຸໍ. ເຖໂຣ ຕໍ ປວຕ຺ຕິໍ ມນຸສ຺ສໂລກໍ ອາຄນ຺ຕ຺ວາ ຠຄວໂຕ ອາໂຣເຈສິ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ຘມ຺ມເທສນາ ມຫາຊນສ຺ສ ສາຕ຺ຖິກາ ຊາຕາຕິ.

ຈຕຸຣິຕ຺ຖິວິມານວຓ຺ຓນາ ນິຏ຺ຐິຕາ.