໒. ປຠສ຺ສຣວິມານວຓ຺ຓນາ

ປຠສ຺ສຣວຣວຓ຺ຓນິເຠຕິ ປຠສ຺ສຣວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ. ເຕນ ຈ ສມເຍນ ຣາຊຄເຫ ອຎ຺ຎຕໂຣ ອຸປາສໂກ ມຫາໂມຄ຺ຄລ຺ລານຕ຺ເຖເຣ ອຠິປ຺ປສນ຺ໂນ ໂຫຕິ. ຕສ຺ເສກາ ຘີຕາ ສທ຺ຘາ ປສນ຺ນາ, ສາປິ ເຖເຣ ຄຣຸຈິຕ຺ຕີກາຣພຫຸລາ ໂຫຕິ. ອເຖກທິວສໍ ອາຍສ຺ມາ ມຫາໂມຄ຺ຄລ຺ລາໂນ ຣາຊຄເຫ ປິຓ຺ຑາຍ ຈຣນ຺ໂຕ ຕໍ ກຸລໍ ອຸປສງ຺ກມິ. ສາ ເຖຣໍ ທິສ຺ວາ ໂສມນສ຺ສຊາຕາ ອາສນໍ ປຎ຺ຎາເປຕ຺ວາ ເຖເຣ ຕຕ຺ຖ ນິສິນ຺ເນ ສຸມນມາລາຍ ປູເຊຕ຺ວາ ມຘຸຣໍ ຄຸຬຜາຓິຕໍ ເຖຣສ຺ສ ປຕ຺ເຕ ອາກິຣິ, ເຖໂຣ ອນຸໂມທິຕຸກາໂມ ນິສີທິ. ສາ ຆຣາວາສສ຺ສ ພຫຸກິຈ຺ຈຕາຍ ອໂນກາສຕໍ ປເວເທຕ຺ວາ ‘‘ອຎ຺ຎສ຺ມິໍ ທິວເສ ຘມ຺ມໍ ໂສສ຺ສາມີ’’ຕິ ເຖຣໍ ວນ຺ທິຕ຺ວາ ອຸຍ຺ໂຍເຊສິ. ຕທເຫວ ຈ ສາ ກາລໍ ກຕ຺ວາ ຕາວຕິໍເສສຸ ນິພ຺ພຕ຺ຕິ. ຕໍ ອາຍສ຺ມາ ມຫາໂມຄ຺ຄລ຺ລາໂນ ອຸປສງ຺ກມິຕ຺ວາ ອິມາຫິ ຄາຖາຫິ ປຸຈ຺ຉິ –

໖໙໗. ‘‘ປຠສ຺ສຣວຣວຓ຺ຓນິເຠ, ສຸຣຕ຺ຕວຕ຺ຖວສເນ;

ມຫິທ຺ຘິເກ ຈນ຺ທນຣຸຈິຣຄຕ຺ເຕ,

ກາ ຕ຺ວໍ ສຸເຠ ເທວເຕ ວນ຺ທເສ ມມໍ.

໖໙໘. ‘‘ປລ຺ລງ຺ໂກ ຈ ເຕ ມຫຄ຺ໂຆ, ນານາຣຕນຈິຕ຺ຕິໂຕ ຣຸຈິໂຣ;

ຍຕ຺ຖ ຕ຺ວໍ ນິສິນ຺ນາ ວິໂຣຈສິ, ເທວຣາຊາຣິວ ນນ຺ທເນ ວເນ.

໖໙໙. ‘‘ກິໍ ຕ຺ວໍ ປຸເຣ ສຸຈຣິຕມາຈຣີ ຠທ຺ເທ, ກິສ຺ສ ກມ຺ມສ຺ສ ວິປາກໍ;

ອນຸໂຠສິ ເທວໂລກສ຺ມິໍ, ເທວເຕ ປຸຈ຺ຉິຕາຈິກ຺ຂ;

ກິສ຺ສ ກມ຺ມສ຺ສິທໍ ຜລ’’ນ຺ຕິ.

໖໙໗. ຕຕ຺ຖ ປຠສ຺ສຣວຣວຓ຺ຓນິເຠຕິ ນິຠາຕິ ທິພ຺ພຕີຕິ ນິຠາ, ວຓ຺ໂຓວ ນິຠາ ວຓ຺ຓນິຠາ, ອຕິວິຍ ໂອຠາສນໂຕ ປຠສ຺ສຣາ ຉວິໂທສາຠາເວນ ວຣາ ອຸຕ຺ຕມາ ວຓ຺ຓນິຠາ ເອຕິສ຺ສາຕິ ປຠສ຺ສຣວຣວຓ຺ຓນິຠາ. ອາມນ຺ຕນວເສນ ‘‘ປຠສ຺ສຣວຣວຓ຺ຓນິເຠ’’ຕິ ວຸຕ຺ຕໍ. ສຸຣຕ຺ຕວຕ຺ຖວສເນຕິ ສຸຏ຺ຐຸ ຣຕ຺ຕວຕ຺ຖນິວຕ຺ເຖ. ຈນ຺ທນຣຸຈິຣຄຕ຺ເຕຕິ ຈນ຺ທນານຸລິຕ຺ຕໍ ວິຍ ຣຸຈິຣຄຕ຺ເຕ, ໂຄສີຕຈນ຺ທເນນ ພຫລຕຣານຸລິຕ຺ຕໍ ວິຍ ສຸຣຕ຺ຕມນຸຎ຺ຎສຣີຣາວຍເວຕິ ອຕ຺ໂຖ, ຈນ຺ທນານຸເລເປນ ວາ ຣຸຈິຣຄຕ຺ເຕ.

ເອວໍ ເຖເຣນ ປຸຏ຺ຐາ ເທວຕາ ອິມາຫິ ຄາຖາຫິ ພ຺ຍາກາສິ –

໗໐໐. ‘‘ປິຓ຺ຑາຍ ເຕ ຈຣນ຺ຕສ຺ສ, ມາລໍ ຜາຓິຕຎ຺ຈ ອທທໍ ຠນ຺ເຕ;

ຕສ຺ສ ກມ຺ມສ຺ສິທໍ ວິປາກໍ, ອນຸໂຠມິ ເທວໂລກສ຺ມິໍ.

໗໐໑. ‘‘ໂຫຕິ ຈ ເມ ອນຸຕາໂປ, ອປຣທ຺ຘໍ ທຸກ຺ຂິຕຎ຺ຈ ເມ ຠນ຺ເຕ;

ສາຫໍ ຘມ຺ມໍ ນາສ຺ໂສສິໍ, ສຸເທສິຕໍ ຘມ຺ມຣາເຊນ.

໗໐໒. ‘‘ຕໍ ຕໍ ວທາມິ ຠທ຺ທນ຺ເຕ, ຍສ຺ສ ເມ ອນຸກມ຺ປິໂຍ ໂກຈິ;

ຘມ຺ເມສຸ ຕໍ ສມາທເປຖ, ສຸເທສິຕໍ ຘມ຺ມຣາເຊນ.

໗໐໓. ‘‘ເຍສໍ ອຕ຺ຖິ ສທ຺ຘາ ພຸທ຺ເຘ, ຘມ຺ເມ ຈ ສງ຺ຆຣຕເນ;

ເຕ ມໍ ອຕິວິໂຣຈນ຺ຕິ, ອາຍຸນາ ຍສສາ ສິຣິຍາ.

໗໐໔. ‘‘ປຕາເປນ ວຓ຺ເຓນ ອຸຕ຺ຕຣິຕຣາ, ອຎ຺ເຎ ມຫິທ຺ຘິກຕຣາ ມຍາ ເທວາ’’ຕິ.

໗໐໐. ຕຕ຺ຖ ມາລນ຺ຕິ ສຸມນປຸປ຺ຜໍ. ຜາຓິຕນ຺ຕິ ອຸຈ຺ຉຸຣສໍ ຄເຫຕ຺ວາ ກຕຜາຓິຕໍ.

໗໐໑. ອນຸຕາໂປຕິ ວິປ຺ປຏິສາໂຣ. ຕສ຺ສ ກາຣຓມາຫ ‘‘ອປຣທ຺ຘໍ ທຸກ຺ຂຕຎ຺ຈ ເມ ຠນ຺ເຕ’’ຕິ. ອິທານິ ຕໍ ສຣູປໂຕ ທສ຺ເສຕິ ‘‘ສາຫໍ ຘມ຺ມໍ ນາສ຺ໂສສິ’’ນ຺ຕິ, ສາ ອຫໍ ຕທາ ຕວ ເທເສຕຸກາມສ຺ສ ຘມ຺ມໍ ນ ສຸຓິໍ. ກີທິສໍ? ສຸເທສິຕໍ ຘມ຺ມຣາເຊນາຕິ, ສມ຺ມາສມ຺ພຸທ຺ເຘນ ອາທິກລ຺ຍາຓາທິຕາຍ ເອກນ຺ຕນິຍ຺ຍານິກຕາຍ ຈ ສ຺ວາຂາຕນ຺ຕິ ອຕ຺ໂຖ.

໗໐໒. ຕນ຺ຕິ ຕສ຺ມາ ຘມ຺ມຣາເຊນ ສຸເທສິຕຕ຺ຕາ ອສວນສ຺ສ ຈ ມາທິສານໍ ອນຸຕາປເຫຕຸຠາວໂຕ. ຕນ຺ຕິ ຕຸວໍ, ຕຸຍ຺ຫນ຺ຕິ ອຕ຺ໂຖ. ຍສ຺ສາຕິ ໂຍ ອສ຺ສ. ອນຸກມ຺ປິໂຍຕິ ອນຸກມ຺ປິຕພ຺ໂພ. ໂກຈີຕິ ໂຍ ໂກຈິ. ຘມ຺ເມສູຕິ ສີລາທິຘມ຺ເມສຸ. ‘‘ຘມ຺ເມ ຫີ’’ຕິ ວາ ປາໂຐ, ສາສນຘມ຺ເມຕິ ອຕ຺ໂຖ. ຫີຕິ ນິປາຕມຕ຺ຕໍ, ວຈນວິປລ຺ລາໂສ ວາ. ຕນ຺ຕິ ອນຸກມ຺ປິຕພ຺ພປຸຄ຺ຄລໍ. ສຸເທສິຕນ຺ຕິ ສຸຏ຺ຐຸ ເທສິຕໍ.

໗໐໓-໔. ເຕ ມໍ ອຕິວິໂຣຈນ຺ຕີຕິ ເຕ ຣຕນຕ຺ຕເຍ ປສນ຺ນາ ເທວປຸຕ຺ຕາ ມໍ ອຕິກ຺ກມິຕ຺ວາ ວິໂຣຈນ຺ຕິ. ປຕາເປນາຕິ ເຕຊສາ ອານຸຠາເວນ. ອຎ຺ເຎຕິ ເຍ ອຎ຺ເຎ. ມຍາຕິ ນິສ຺ສກ຺ເກ ກຣຓວຈນໍ. ວຓ຺ເຓນ ອຸຕ຺ຕຣິຕຣາ ມຫິທ຺ຘິກຕຣາ ຈ ເທວາ, ເຕ ຣຕນຕ຺ຕເຍ ອຠິປ຺ປສນ຺ນາເຍວາຕິ ທສ຺ເສຕິ. ເສສໍ ວຸຕ຺ຕນຍເມວ.

ປຠສ຺ສຣວິມານວຓ຺ຓນາ ນິຏ຺ຐິຕາ.