໓. ນາຄວິມານວຓ຺ຓນາ

ອລງ຺ກຕາ ມຓິກຎ຺ຈນາຈິຕນ຺ຕິ ນາຄວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ພາຣາຓສິຍໍ ວິຫຣຕິ ອິສິປຕເນ ມິຄທາເຍ. ເຕນ ສມເຍນ ພາຣາຓສິວາສິນີ ເອກາ ອຸປາສິກາ ສທ຺ຘາ ປສນ຺ນາ ສີລາຈາຣສມ຺ປນ຺ນາ ຠຄວນ຺ຕໍ ອຸທ຺ທິສ຺ສ ວຕ຺ຖຍຸຄໍ ວາຍາເປຕ຺ວາ ສຸປຣິໂຘຕໍ ກາຣາເປຕ຺ວາ ອຸປສງ຺ກມິຕ຺ວາ ຠຄວໂຕ ປາທມູເລ ຐເປຕ຺ວາ ເອວມາຫ ‘‘ປຏິຄ຺ຄຓ຺ຫາຕຸ, ຠນ຺ເຕ ຠຄວາ, ອິມໍ ວຕ຺ຖຍຸຄໍ ອນຸກມ຺ປໍ ອຸປາທາຍ ຍໍ ມມ ອສ຺ສ ທີຆຣຕ຺ຕໍ ຫິຕາຍ ສຸຂາຍາ’’ຕິ. ຠຄວາ ຕໍ ປຏິຄ຺ຄເຫຕ຺ວາ ຕສ຺ສາ ອຸປນິສ຺ສຍສມ຺ປຕ຺ຕິໍ ທິສ຺ວາ ຘມ຺ມໍ ເທເສສິ, ສາ ເທສນາວສາເນ ໂສຕາປຕ຺ຕິຜເລ ປຕິຏ຺ຐຫິຕ຺ວາ ຠຄວນ຺ຕໍ ວນ຺ທິຕ຺ວາ ປທກ຺ຂິຓໍ ກຕ຺ວາ ເຄຫໍ ອຄມາສິ. ສາ ນ ຈິຣສ຺ເສວ ກາລໍ ກຕ຺ວາ ຕາວຕິໍເສສຸ ອຸປ຺ປນ຺ນາ ສກ຺ກສ຺ສ ເທວຣາຊສ຺ສ ປິຍາ ອໂຫສິ ວລ຺ລຠາ ຍສຸຕ຺ຕຣາ ນາມ ນາເມນ. ຕສ຺ສາ ປຸຎ຺ຎານຸຠາເວນ ເຫມຊາລສຎ຺ຉນ຺ໂນ ກຸຎ຺ຊຣວໂຣ ນິພ຺ພຕ຺ຕິ, ຕສ຺ສ ຈ ຂນ຺ເຘ ມຓິມໂຍ ມຓ຺ຑໂປ, ມຊ຺ເຌ ສຸປຎ຺ຎຕ຺ຕຣຕນປລ຺ລງ຺ໂກ ນິພ຺ພຕ຺ຕິ, ທ຺ວີສຸ ທນ຺ເຕສຸ ຈສ຺ສ ກມລກຸວລຍຸຊ຺ຊລາ ຣມຓີຍາ ທ຺ເວ ໂປກ຺ຂຣຓິໂຍ ປາຕຸຣເຫສຸໍ. ຕຕ຺ຖ ປທຸມກຓ຺ຓິກາສຸ ຐິຕາ ເທວຘີຕາ ປຄ຺ຄຫິຕປຎ຺ຈງ຺ຄິກຕູຣິຍາ ນຈ຺ຈນ຺ຕິ ເຈວ ຄາຍນ຺ຕິ ຈ.

ສຕ຺ຖາ ພາຣາຓສິຍໍ ຍຖາຠິຣນ຺ຕໍ ວິຫຣິຕ຺ວາ ເຍນ ສາວຕ຺ຖິ ເຕນ ຈາຣິກໍ ປກ຺ກາມິ. ອນຸປຸພ຺ເພນ ສາວຕ຺ຖິໍ ປຕ຺ວາ ຕຕ຺ຣ ສຸທໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ສາ ເທວຕາ ອຕ຺ຕນາ ອນຸຠຸຍ຺ຍມານໍ ທິພ຺ພສມ຺ປຕ຺ຕິໍ ໂອໂລເກຕ຺ວາ ຕສ຺ສາ ກາຣຓໍ ອຸປຘາເຣນ຺ຕີ ‘‘ສຕ຺ຖຸ ວຕ຺ຖຍຸຄທານກາຣຓ’’ນ຺ຕິ ຎຕ຺ວາ ສຎ຺ຊາຕໂສມນສ຺ສາ ຠຄວຕິ ປສາທພຫຸມານາ ວນ຺ທິຕຸກາມາ ອຠິກ຺ກນ຺ຕາຍ ຣຕ຺ຕິຍາ ຫຕ຺ຖິກ຺ຂນ຺ຘວຣຄຕາ ອາກາເສນ ອາຄນ຺ຕ຺ວາ ຕໂຕ ໂອຕຣິຕ຺ວາ ຠຄວນ຺ຕໍ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ເອກມນ຺ຕໍ ອຏ຺ຐາສິ. ຕໍ ອາຍສ຺ມາ ວງ຺ຄີໂສ ຠຄວໂຕ ອນຸຎ຺ຎາຍ ອິມາຫິ ຄາຖາຫິ ປຸຈ຺ຉິ –

໗໐໕. ‘‘ອລງ຺ກຕາ ມຓິກຎ຺ຈນາຈິຕໍ, ໂສວຓ຺ຓຊາລຈິຕໍ ມຫນ຺ຕໍ;

ອຠິຣຸຍ຺ຫ ຄຊວຣໍ ສຸກປ຺ປິຕໍ, ອິຘາຄມາ ເວຫາຍສໍ ອນ຺ຕລິກ຺ເຂ.

໗໐໖. ‘‘ນາຄສ຺ສ ທນ຺ເຕສຸ ທຸເວສຸ ນິມ຺ມິຕາ, ອຈ຺ໂຉທກາ ປທຸມິນິໂຍ ສຸຜຸລ຺ລາ;

ປທຸເມສຸ ຈ ຕູຣິຍຄຓາ ປຠິຊ຺ຊເຣ, ອິມາ ຈ ນຈ຺ຈນ຺ຕິ ມໂນຫຣາໂຍ.

໗໐໗. ‘‘ເທວິທ຺ຘິປຕ຺ຕາສິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໗໐໕. ຕຕ຺ຖ ອລງ຺ກຕາຕິ ສພ຺ພາຠຣຓວິຠູສິຕາ. ມຓິກຎ຺ຈນາຈິຕນ຺ຕິ ເຕຫິ ທິພ຺ພມາເນຫິ ມຓິສຸວຓ຺ເຓຫິ ອາຈິຕໍ. ໂສວຓ຺ຓຊາລຈິຕນ຺ຕິ ເຫມຊາລສຎ຺ຉນ຺ນໍ. ມຫນ຺ຕນ຺ຕິ ວິປຸລໍ. ສຸກປ຺ປິຕນ຺ຕິ ຄມນສນ຺ນາຫວເສນ ສຸຏ຺ຐຸ ສນ຺ນທ຺ຘໍ. ເວຫາຍສນ຺ຕິ ເວຫາຍສຠູເຕ ຫຕ຺ຖິປິຏ຺ເຐ. ອນ຺ຕລິກ຺ເຂຕິ ອາກາເສ, ‘‘ອລງ຺ກຕມຓິກຎ຺ຈນາຈິຕ’’ນ຺ຕິປິ ປາໂຐ. ອຍຎ຺ເຫຕ຺ຖ ສງ຺ເຂປຕ຺ໂຖ – ເທວເຕ, ຕ຺ວໍ ສພ຺ພາລງ຺ກາເຣຫິ ອລງ຺ກຕາ ອລງ຺ກຕມຓິກຎ຺ຈນາຈິຕໍ, ອຕິວິຍ ທິພ຺ພມາເນຫິ ມຓີຫິ ກຎ຺ຈເນຫິ ຈ ອລງ຺ກຣຓວເສນ ຂຈິຕໍ, ເຫມຊາເລຫິ ກຸມ຺ຠາລງ຺ກາຣາທິເຠເທຫິ ຫຕ຺ຖາລງ຺ກາເຣຫິ ຈິຕໍ ອາມຸຕ຺ຕໍ ມຫນ຺ຕໍ ອຕິວິຍ ພ຺ຣຫນ຺ຕໍ ອຸຕ຺ຕມໍ ຄຊໍ ອາຣຸຍ຺ຫ ຫຕ຺ຖິປິຏ຺ຐິຍາ ນິສິນ຺ນາ ອາກາເສເນວ ອິຘ ອມ຺ຫາກໍ ສນ຺ຕິກໍ ອາຄຕາຕິ.

໗໐໖. ນາຄສ຺ສ ທນ຺ເຕສຸ ທຸເວສຸ ນິມ຺ມິຕາຕິ ເອຣາວຓສ຺ສ ວິຍ ນາຄຣາຊສ຺ສ ອິມສ຺ສ ທ຺ວີສຸ ທນ຺ເຕສຸ ທ຺ເວ ໂປກ຺ຂຣຓິໂຍ ສຸຈຣິຕສິປ຺ປິນາ ສຸຏ຺ຐຸ ວິຣຈິຕາ. ຕູຣິຍຄຓາຕິ ປຎ຺ຈງ຺ຄິກຕູຣິຍສມູຫາ. ປຠິຊ຺ຊເຣຕິ ທ຺ວາທສນ຺ນໍ ລຍເຠທານໍ ວເສນ ປເຠທໍ ຄຈ຺ຉນ຺ຕິ. ‘‘ປວຊ຺ຊເຣ’’ຕິ ຈ ປຐນ຺ຕິ, ປກາເຣຫິ ວາທີຍນ຺ຕີຕິ ອຕ຺ໂຖ.

ເອວໍ ເຖເຣນ ປຸຏ຺ຐາ ເທວຕາ ອິມາຫິ ຄາຖາຫິ ວິສ຺ສຊ຺ເຊສິ –

໗໐໘. ‘‘ພາຣາຓສິຍໍ ອຸປສງ຺ກມິຕ຺ວາ, ພຸທ຺ຘສ຺ສຫໍ ວຕ຺ຖຍຸຄໍ ອທາສິໍ;

ປາທານິ ວນ຺ທິຕ຺ວາ ຉມາ ນິສີທິໍ, ວິຕ຺ຕາ ຈຫໍ ອຎ຺ຊລິກໍ ອກາສິໍ.

໗໐໙. ‘‘ພຸທ຺ໂຘ ຈ ເມ ກຎ຺ຈນສນ຺ນິຠຕ຺ຕໂຈ, ອເທສຍິ ສມຸທຍທຸກ຺ຂນິຈ຺ຈຕໍ;

ອສງ຺ຂຕໍ ທຸກ຺ຂນິໂຣຘສສ຺ສຕໍ, ມຄ຺ຄໍ ອເທສຍິ ຍໂຕ ວິຊານິສໍ.

໗໑໐. ‘‘ອປ຺ປາຍຸກີ ກາລກຕາ ຕໂຕ ຈຸຕາ, ອຸປປນ຺ນາ ຕິທສຄຓໍ ຍສສ຺ສິນີ;

ສກ຺ກສ຺ສຫໍ ອຎ຺ຎຕຣາ ປຊາປຕິ, ຍສຸຕ຺ຕຣາ ນາມ ທິສາສຸ ວິສ຺ສຸຕາ’’ຕິ.

໗໐໘-໙. ຕຕ຺ຖ ຉມາຕິ ຠູມິຍໍ. ຠຸມ຺ມຕ຺ເຖ ຫິ ອິທໍ ປຈ຺ຈຕ຺ຕວຈນໍ. ວິຕ຺ຕາຕິ ຕຸຏ຺ຐາ. ຍໂຕຕິ ຍໂຕ ສຕ຺ຖຸ ສາມຸກ຺ກໍສິກຘມ຺ມເທສນໂຕ. ວິຊານິສນ຺ຕິ ຈຕ຺ຕາຣິ ອຣິຍສຈ຺ຈານິ ປຏິວິຊ຺ຌິໍ.

໗໑໐. ອປ຺ປາຍຸກີຕິ ‘‘ອີທິສໍ ນາມ ອຸຬາຣໍ ປຸຎ຺ຎໍ ກຕ຺ວາ ນ ຕຍາ ເອຕສ຺ມິໍ ທຸກ຺ຂພຫຸເລ ມນຸສ຺ສຕ຺ຕຠາເວ ເອວໍ ຐາຕພ຺ພ’’ນ຺ຕິ ສຎ຺ຊາຕາຠິສນ຺ຘິນາ ວິຍ ປຣິກ຺ຂຍໍ ຄເຕນ ກມ຺ມຸນາ ອປ຺ປາຍຸກາ ສມານາ. ອຎ຺ຎຕຣາ ປຊາປຕີຕິ ໂສຬສສຫສ຺ສານໍ ມເຫສີນໍ ອຎ຺ຎຕຣາ. ທິສາສຸ ວິສ຺ສຸຕາຕິ ທ຺ວີສຸ ເທວໂລເກສຸ ສພ຺ພທິສາສຸ ປາກຏາ ປຎ຺ຎາຕາ. ເສສໍ ວຸຕ຺ຕນຍເມວ.

ນາຄວິມານວຓ຺ຓນາ ນິຏ຺ຐິຕາ.