໙. ວິສາລກ຺ຂິວິມານວຓ຺ຓນາ

ກາ ນາມ ຕ຺ວໍ ວິສາລກ຺ຂີຕິ ວິສາລກ຺ຂິວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ປຣິນິພ຺ພຸເຕ ຣຎ຺ຎາ ອຊາຕສຕ຺ຕຸນາ ອຕ຺ຕນາ ປຏິລທ຺ຘາ ຠຄວຕາ ສຣີຣຘາຕຸໂຍ ຄເຫຕ຺ວາ ຣາຊຄເຫ ຖູເປ ຈ ມເຫ ຈ ກເຕ ຣາຊຄຫວາສິນີ ເອກາ ມາລາກາຣຘີຕາ ສຸນນ຺ທາ ນາມ ອຸປາສິກາ ອຣິຍສາວິກາ ໂສຕາປນ຺ນາ ປິຕຸໍ ເຄຫໂຕ ເປສິຕໍ ພຫຸໍ ມາລຎ຺ຈ ຄນ຺ຘຎ຺ຈ ເປເສຕ຺ວາ ເທວສິກໍ ເຈຕິເຍ ປູຊໍ ກາເຣສິ, ອຸໂປສຖທິວເສສຸ ປນ ສຍເມວ ຄນ຺ຕ຺ວາ ປູຊໍ ອກາສິ. ສາ ອປຣຠາເຄ ອຎ຺ຎຕເຣນ ໂຣເຄນ ຜຸຏ຺ຐາ ກາລໍ ກຕ຺ວາ ສກ຺ກສ຺ສ ເທວຣຎ຺ໂຎ ປຣິຈາຣິກາ ຫຸຕ຺ວາ ນິພ຺ພຕ຺ຕິ. ອເຖກທິວສໍ ສາ ສກ຺ເກນ ເທວານມິນ຺ເທນ ສຫ ຈິຕ຺ຕລຕາວນໍ ປາວິສິ. ຕຕ຺ຖ ຈ ອຎ຺ຎາສໍ ເທວຕານໍ ປຠາ ປຸປ຺ຜາທີນໍ ປຠາຫິ ປຏິຫຕາ ຫຸຕ຺ວາ ວິຈິຕ຺ຕວຓ຺ຓາ ໂຫຕິ, ສຸນນ຺ທາຍ ປນ ປຠາ ຕາຫິ ອນຠິຠູຕາ ສຠາເວເນວ ອຏ຺ຐາສິ. ຕໍ ທິສ຺ວາ ສກ຺ໂກ ເທວຣາຊາ ຕາຍ ກຕສຸຈຣິຕໍ ຎາຕຸກາໂມ ອິມາຫິ ຄາຖາຫິ ປຸຈ຺ຉິ –

໖໖໖. ‘‘ກາ ນາມ ຕ຺ວໍ ວິສາລກ຺ຂິ, ຣມ຺ເມ ຈິຕ຺ຕລຕາວເນ;

ສມນ຺ຕາ ອນຸປຣິຍາສິ, ນາຣີຄຓປຸຣກ຺ຂຕາ.

໖໖໗. ‘‘ຍທາ ເທວາ ຕາວຕິໍສາ, ປວິສນ຺ຕິ ອິມໍ ວນໍ;

ສໂຍຄ຺ຄາ ສຣຖາ ສພ຺ເພ, ຈິຕ຺ຣາ ໂຫນ຺ຕິ ອິຘາຄຕາ.

໖໖໘. ‘‘ຕຸຍ຺ຫຎ຺ຈ ອິຘ ປຕ຺ຕາຍ, ອຸຍ຺ຍາເນ ວິຈຣນ຺ຕິຍາ;

ກາເຍ ນ ທິສ຺ສຕີ ຈິຕ຺ຕໍ, ເກນ ຣູປໍ ຕເວທິສໍ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໖໖໖. ຕຕ຺ຖ ກາ ນາມ ຕ຺ວນ຺ຕິ ປຸຣິມຕ຺ຕຠາເວ ກາ ນາມ ກີທິສີ ນາມ ຕ຺ວໍ, ຍຕ຺ຖ ກເຕນ ສຸຈຣິເຕນ ອຍໍ ເຕ ອີທິສີ ອານຸຠາວສມ຺ປຕ຺ຕິ ອໂຫສີຕິ ອຘິປ຺ປາໂຍ. ວິສາລກ຺ຂີຕິ ວິປຸລໂລຈເນ.

໖໖໗. ຍທາຕິ ຍສ຺ມິໍ ກາເລ. ອິມໍ ວນນ຺ຕິ ອິມໍ ຈິຕ຺ຕລຕານາມກໍ ອຸປວນໍ. ຈິຕ຺ຣາ ໂຫນ຺ຕີຕິ ອິມສ຺ມິໍ ຈິຕ຺ຕລຕາວເນ ວິຈິຕ຺ຕປຠາສໍສຄ຺ເຄນ ອຕ຺ຕໂນ ສຣີຣວຕ຺ຖາລງ຺ກາຣາທີນໍ ປກຕິໂອຠາສໂຕປິ ວິສິຏ຺ຐຠາວປ຺ປຕ຺ຕິຍາ ວິຈິຕ຺ຣາກາຣາ ໂຫນ຺ຕິ. ອິຘາຄຕາຕິ ອິຘ ອາຄຕາ ສມ຺ປຕ຺ຕາ, ອິຘ ວາ ອາຄມນເຫຕຸ.

໖໖໘. ອິຘ ປຕ຺ຕາຍາຕິ ອິມໍ ຐານໍ ສມ຺ປຕ຺ຕາຍ ອຸປຄຕາຍ. ເກນ ຣູປໍ ຕເວທິສນ຺ຕິ ເກນ ກາຣເຓນ ຕວ ຣູປໍ ສຣີຣໍ ເອທິສໍ ເອວຣູປໍ, ຈິຕ຺ຕລຕາວນສ຺ສ ປຠໍ ອຠິຠວນ຺ຕໍ ຕິຏ຺ຐຕີຕິ ອຘິປ຺ປາໂຍ.

ເອວໍ ສກ຺ເກນ ປຸຏ຺ຐາ ສາ ເທວຕາ ອິມາຫິ ຄາຖາຫິ ພ຺ຍາກາສິ –

໖໖໙. ‘‘ເຍນ ກມ຺ເມນ ເທວິນ຺ທ, ຣູປໍ ມຍ຺ຫໍ ຄຕີ ຈ ເມ;

ອິທ຺ຘິ ຈ ອານຸຠາໂວ ຈ, ຕໍ ສຸໂຓຫິ ປຸຣິນ຺ທທ.

໖໗໐. ‘‘ອຫໍ ຣາຊຄເຫ ຣມ຺ເມ, ສຸນນ຺ທາ ນາມຸປາສິກາ;

ສທ຺ຘາ ສີເລນ ສມ຺ປນ຺ນາ, ສໍວິຠາຄຣຕາ ສທາ.

໖໗໑. ‘‘ອຈ຺ຉາທນຎ຺ຈ ຠຕ຺ຕຎ຺ຈ, ເສນາສນໍ ປທີປິຍໍ;

ອທາສິໍ ອຸຊຸຠູເຕສຸ, ວິປ຺ປສນ຺ເນນ ເຈຕສາ.

໖໗໒. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໖໗໓. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ສຎ຺ຎມາ ສໍວິຠາຄາ ຈ, ວິມານໍ ອາວສາມຫໍ.

໖໗໔. ‘‘ປາຓາຕິປາຕາ ວິຣຕາ, ມຸສາວາທາ ຈ ສຎ຺ຎຕາ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣກາ.

໖໗໕. ‘‘ປຎ຺ຈສິກ຺ຂາປເທ ຣຕາ, ອຣິຍສຈ຺ຈານ ໂກວິທາ;

ອຸປາສິກາ ຈກ຺ຂຸມໂຕ, ໂຄຕມສ຺ສ ຍສສ຺ສິໂນ.

໖໗໖. ‘‘ຕສ຺ສາ ເມ ຎາຕິກຸລາ ທາສີ, ສທາ ມາລາຠິຫາຣຕິ;

ຕາຫໍ ຠຄວໂຕ ຖູເປ, ສພ຺ພເມວາຠິໂຣປຍິໍ.

໖໗໗. ‘‘ອຸໂປສເຖ ຈຫໍ ຄນ຺ຕ຺ວາ, ມາລາຄນ຺ຘວິເລປນໍ;

ຖູປສ຺ມິໍ ອຠິໂຣເປສິໍ, ປສນ຺ນາ ເສຫິ ປາຓິຠິ.

໖໗໘. ‘‘ເຕນ ກມ຺ເມນ ເທວິນ຺ທ, ຣູປໍ ມຍ຺ຫໍ ຄຕີ ຈ ເມ;

ອິທ຺ຘິ ຈ ອານຸຠາໂວ ຈ, ຍໍ ມາລໍ ອຠິໂຣປຍິໍ.

໖໗໙. ‘‘ຍຎ຺ຈ ສີລວຕີ ອາສິໍ, ນ ຕໍ ຕາວ ວິປຈ຺ຈຕິ;

ອາສາ ຈ ປນ ເມ ເທວິນ຺ທ, ສກທາຄາມິນີ ສິຍ’’ນ຺ຕິ.

໖໖໙. ຕຕ຺ຖ ຄຕີຕິ ອຍໍ ເທວຄຕິ, ນິພ຺ພຕ຺ຕິ ວາ. ອິທ຺ຘີຕິ ອຍໍ ເທວິທ຺ຘິ, ອຘິປ຺ປາຍສມິຊ຺ຌນໍ ວາ. ອານຸຠາໂວຕິ ປຠາໂວ. ປຸຣິນ຺ທທາຕິ ສກ຺ກໍ ອາລປຕິ. ໂສ ຫິ ປຸເຣ ທານໍ ອທາສີຕິ ‘‘ປຸຣິນ຺ທໂທ’’ຕິ ວຸຈ຺ຈຕິ.

໖໗໖. ຎາຕິກຸລາຕິ ປິຕຸ ເຄຫໍ ສນ຺ຘາຍ ວທຕິ. ສທາ ມາລາຠິຫາຣຕີຕິ ສທາ ສພ຺ພກາລໍ ທິວເສ ທິວເສ ຎາຕິກຸລໂຕ ທາສິຍາ ປຸປ຺ຜໍ ມຍ຺ຫໍ ອຠິຫຣີຍຕິ. ສພ຺ພເມວາຠິໂຣປຍິນ຺ຕິ ມຍ຺ຫໍ ປິຬນ຺ຘນຕ຺ຖາຍ ປິຕຸເຄຫໂຕ ອາຫຏໍ ມາລໍ ອຎ຺ຎຎ຺ຈ ຄນ຺ຘາທິໍ ສພ຺ພເມວ ອຕ຺ຕນາ ອປຣິຠຸຎ຺ຊິຕ຺ວາ ຠຄວໂຕ ຖູເປ ປູຊນວເສນ ອຠິໂຣປຍິໍ ປູຊໍ ກາເຣສິໍ.

໖໗໗-໘. ອຸໂປສເຖ ຈຫໍ ຄນ຺ຕ຺ວາຕິ ອຸໂປສຖທິວເສ ອຫເມວ ຖູປຏ຺ຐານໍ ຄນ຺ຕ຺ວາ. ຍໍ ມາລໍ ອຠິໂຣປຍິນ຺ຕິ ຍໍ ຕທາ ຠຄວໂຕ ຖູເປ ມາລາຄນ຺ຘາຠິໂຣປນໍ ກຕໍ, ເຕນ ກມ຺ເມນາຕິ ໂຍຊນາ.

໖໗໙. ນ ຕໍ ຕາວ ວິປຈ຺ຈຕີຕິ ຍໍ ສີລວຕີ ອາສິໍ, ຕໍ ສີລຣກ຺ຂຓໍ ຕໍ ຣກ຺ຂິຕໍ ສີລໍ ປູຊາມຍປຸຎ຺ຎສ຺ສ ພລວຠາເວນ ອລທ຺ໂຘກາສໍ ນ ຕາວ ວິປຈ຺ຈຕິ, ນ ວິປຈ຺ຈິຕຸໍ ອາຣທ຺ຘໍ, ອປຣສ຺ມິໍເຍວ ອຕ຺ຕຠາເວ ຕສ຺ສ ວິປາໂກຕິ ອຕ຺ໂຖ. ອາສາ ຈ ປນ ເມ ເທວິນ຺ທ, ສກທາຄາມິນີ ສິຍນ຺ຕິ ‘‘ກຖໍ ນຸ ໂຂ ອຫໍ ສກທາຄາມິນີ ຠເວຍ຺ຍ’’ນ຺ຕິ ປຕ຺ຖນາ ຈ ເມ ເທວິນ຺ທ, ອຣິຍຘມ຺ມວິສຍາວ, ນ ຠວວິເສສວິສຍາ. ສາ ປນ ສປ຺ປິມຓ຺ຑໍ ອິຈ຺ຉໂຕ ທຘິໂຕ ປຈິຕໍ ວິຍ ອນິປ຺ຜາທິນີຕິ ທສ຺ເສຕິ. ເສສໍ ວຸຕ຺ຕນຍເມວ.

ອິມໍ ປນ ອຕ຺ຖໍ ສກ຺ໂກ ເທວານມິນ຺ໂທ ອຕ຺ຕນາ ຈ ຕາຍ ເທວຘີຕາຍ ຈ ວຸຕ຺ຕນິຍາເມເນວ ອາຍສ຺ມໂຕ ວງ຺ຄີສຕ຺ເຖຣສ຺ສ ອາໂຣເຈສິ. ອາຍສ຺ມາ ວງ຺ຄີໂສ ສງ຺ຄີຕິກາເລ ຘມ຺ມສງ຺ຄາຫການໍ ມຫາເຖຣານໍ ອາໂຣເຈສິ, ເຕ ຈ ຕໍ ຕເຖວ ສງ຺ຄີຕິໍ ອາໂຣປຍິໍສູຕິ.

ວິສາລກ຺ຂິວິມານວຓ຺ຓນາ ນິຏ຺ຐິຕາ.