໑໐. ປາຣິຈ຺ຉຕ຺ຕກວິມານວຓ຺ຓນາ

ປາຣິຈ຺ຉຕ຺ຕເກ ໂກວິຬາເຣຕິ ປາຣິຈ຺ຉຕ຺ຕກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສາວຕ຺ຖິວາສີ ອຎ຺ຎຕໂຣ ອຸປາສໂກ ຠຄວນ຺ຕໍ ອຸປສງ຺ກມິຕ຺ວາ, ສ຺ວາຕນາຍ ນິມນ຺ເຕຕ຺ວາ, ອຕ຺ຕໂນ ເຄຫທ຺ວາເຣ ມຫນ຺ຕໍ ມຓ຺ຑປໍ ສຊ຺ເຊຕ຺ວາ ສາຓິປາກາຣໍ ປຣິກ຺ຂິປິຕ຺ວາ ອຸປຣິ ວິຕານໍ ພນ຺ຘິຕ຺ວາ ຘຊປຏາກາທໂຍ ອຸສ຺ສາເປຕ຺ວາ ນານາວິຣາຄວຓ຺ຓານິ ວຕ຺ຖານິ ຄນ຺ຘທາມມາລາທາມານິ ຈ ໂອລມ຺ເພຕ຺ວາ ສິຕ຺ຕສມ຺ມຏ຺ເຐ ປເທເສ ອາສນານິ ປຎ຺ຎາເປຕ຺ວາ ຠຄວໂຕ ກາລໍ ອາໂຣເຈສິ. ອຖ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເທວວິມານໍ ວິຍ ອລງ຺ກຕປຏິຍຕ຺ຕໍ ມຓ຺ຑປໍ ປວິສິຕ຺ວາ ສຫສ຺ສຣໍສີ ວິຍ ອຓ຺ຓວກຸຈ຺ຉິໍ ໂອຠາສຍມາໂນ ປຎ຺ຎຕ຺ເຕ ອາສເນ ນິສີທິ. ອຸປາສໂກ ຄນ຺ຘປຸປ຺ຜຘູມທີເປຫິ ຠຄວນ຺ຕໍ ປູເຊສິ.

ເຕນ ຈ ສມເຍນ ອຎ຺ຎຕຣາ ກຏ຺ຐຫາຣິກາ ອິຕ຺ຖີ ອນ຺ຘວເນ ສຸປຸປ຺ຜິຕໍ ອໂສກຣຸກ຺ຂໍ ທິສ຺ວາ ສປລ຺ລວງ຺ກຸຣານິ ປິຓ຺ຑີກຕານິ ພຫູນິ ອໂສກປຸປ຺ຜານິ ຄເຫຕ຺ວາ ອາຄຈ຺ຉນ຺ຕີ, ຠຄວນ຺ຕໍ ຕຕ຺ຖ ນິສິນ຺ນໍ ທິສ຺ວາ ປສນ຺ນຈິຕ຺ຕາ ອາສນສ຺ສ ສມນ຺ຕໂຕ ເຕຫິ ປຸປ຺ເຜຫິ ປຸປ຺ຜສນ຺ຖຣໍ ສນ຺ຖຣນ຺ຕີ, ຠຄວໂຕ ປູຊໍ ກຕ຺ວາ ວນ຺ທິຕ຺ວາ ຕິກ຺ຂຕ຺ຕຸໍ ປທກ຺ຂິຓໍ ກຕ຺ວາ ນມສ຺ສມານາ ອຄມາສິ. ສາ ອປເຣນ ສມເຍນ ກາລໍ ກຕ຺ວາ ຕາວຕິໍເສສຸ ນິພ຺ພຕ຺ຕິ, ອຈ຺ຉຣາສຫສ຺ສປຣິວາຣາ ເຍຠຸຍ຺ເຍນ ນນ຺ທນວເນ ນຈ຺ຈນ຺ຕີ ຄາຍນ຺ຕີ ປາຣິຈ຺ຉຕ຺ຕກມາລາ ຄນ຺ເຖນ຺ຕີ ປໂມທມານາ ກີຬນ຺ຕີ ສຸຂໍ ອນຸຠວຕິ. ອຖາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍນ ເທວຈາຣິກໍ ຈຣນ຺ໂຕ ຕາວຕິໍສຠວນໍ ຄນ຺ຕ຺ວາ ຕໍ ທິສ຺ວາ ຕາຍ ກຕກມ຺ມໍ ອິມາຫິ ຄາຖາຫິ ປຸຈ຺ຉິ –

໖໘໐. ‘‘ປາຣິຈ຺ຉຕ຺ຕເກ ໂກວິຬາເຣ, ຣມຓີເຍ ມໂນຣເມ;

ທິພ຺ພມາລໍ ຄນ຺ຖມານາ, ຄາຍນ຺ຕີ ສມ຺ປໂມທສິ.

໖໘໑. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ສທ຺ທາ ນິຈ຺ຉຣນ຺ຕິ, ສວນີຍາ ມໂນຣມາ.

໖໘໒. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ຄນ຺ຘາ ປວາຍນ຺ຕິ, ສຸຈິຄນ຺ຘາ ມໂນຣມາ.

໖໘໓. ‘‘ວິວຕ຺ຕມານາ ກາເຍນ, ຍາ ເວຓີສຸ ປິຬນ຺ຘນາ;

ເຕສໍ ສຸຍ຺ຍຕິ ນິຄ຺ໂຆໂສ, ຕູຣິເຍ ປຎ຺ຈງ຺ຄິເກ ຍຖາ.

໖໘໔. ‘‘ວຏໍສກາ ວາຕຘຸຕາ, ວາເຕນ ສມ຺ປກມ຺ປິຕາ;

ເຕສໍ ສຸຍ຺ຍຕິ ນິຄ຺ໂຆໂສ, ຕູຣິເຍ ປຎ຺ຈງ຺ຄິເກ ຍຖາ.

໖໘໕. ‘‘ຍາປິ ເຕ ສິຣສ຺ມິໍ ມາລາ, ສຸຈິຄນ຺ຘາ ມໂນຣມາ;

ວາຕິ ຄນ຺ໂຘ ທິສາ ສພ຺ພາ, ຣຸກ຺ໂຂ ມຎ຺ຊູສໂກ ຍຖາ.

໖໘໖. ‘‘ຆາຍເສ ຕໍ ສຸຈິຄນ຺ຘໍ, ຣູປໍ ປສ຺ສສິ ອມານຸສໍ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໖໘໐. ຕຕ຺ຖ ປາຣິຈ຺ຉຕ຺ຕເກ ໂກວິຬາເຣຕິ ປາຣິຈ຺ຉຕ຺ຕກນາມເກ ໂກວິຬາຣປຸປ຺ເຜ ອາທາຍ ທິພ຺ພມາລໍ ຄນ຺ຖມານາຕິ ໂຍຊນາ. ຍຎ຺ຫິ ໂລກິຍາ ‘‘ປາຣິຊາຕ’’ນ຺ຕິ ວທນ຺ຕິ, ຕໍ ມາຄຘຠາສາຍ ‘‘ປາຣິຈ຺ຉຕ຺ຕກ’’ນ຺ຕິ ວຸຈ຺ຈຕິ. ໂກວິຬາໂຣຕິ ຈ ໂກວິຬາຣຊາຕິໂກ, ໂສ ຈ ມນຸສ຺ສໂລເກປິ ເທວໂລເກປິ ໂກວິຬາໂຣ, ຕສ຺ສາປິ ຊາຕີຕິ ວທນ຺ຕິ.

໖໘໑. ຕສ຺ສາ ປນ ເທວຕາຍ ນຈ຺ຈນກາເລ ອງ຺ຄຠາຣວເສນ ສຣີຣໂຕ ຈ ປິຬນ຺ຘນໂຕ ຈ ອຕິວິຍ ມຘຸໂຣ ສທ຺ໂທ ນິຈ຺ຉຣຕິ, ຄນ຺ໂຘ ສທາ ສພ຺ພາ ທິສາປິ ຜຣິຕ຺ວາ ຕິຏ຺ຐຕິ. ເຕນາຫ ‘‘ຕສ຺ສາ ເຕ ນຈ຺ຈມານາຍາ’’ຕິອາທິ. ຕຕ຺ຖ ສວນີຍາຕິ ໂສຕຸໍ ຍຸຕ຺ຕາ, ສວນສ຺ສ ວາ ຫິຕາ, ກຓ຺ຓສຸຂາຕິ ອຕ຺ໂຖ.

໖໘໓. ວິວຕ຺ຕມານາ ກາເຍນາຕິ ຕວ ກາເຍນ ສຣີເຣນ ປຣິວຕ຺ຕມາເນນ, ອິຕ຺ຖມ຺ຠູຕລກ຺ຂເຓ ເຈຕໍ ກຣຓວຈນໍ. ຍາ ເວຓີສຸ ປິຬນ຺ຘນາຕິ ຍານິ ເຕ ເກສເວຓີສຸ ປິຬນ຺ຘນານິ, ວິຠຕ຺ຕິໂລໂປ ເຈຕ຺ຖ ທຏ຺ຐພ຺ໂພ, ລິງ຺ຄວິປລ຺ລາໂສ ວາ.

໖໘໔. ວຏໍສກາຕິ ຣຕນມຍາ ກຓ຺ຓິກາ ວຏໍສກາຕິ ອຕ຺ໂຖ. ວາຕຘຸຕາຕິ ມນ຺ເທນ ມາລຸເຕນ ຘູປຍມານາ. ວາເຕນ ສມ຺ປກມ຺ປິຕາຕິ ວາເຕນ ສມນ຺ຕໂຕ ວິເສສໂຕ ກມ຺ປິຕາ ຈລິຕາ. ອຖ ວາ ວຏໍສກາ ວາຕຘຸຕາ, ວາເຕນ ສມ຺ປກມ຺ປິຕາຕິ ອວາເຕຣິຕາປິ ວາເຕຣິຕາປິ ເຍ ເຕ ວຏໍສກາ ກມ຺ປິຕາ, ເຕສໍ ສຸຍ຺ຍຕິ ນິຄ຺ໂຆໂສຕິ ອຕ຺ຖໂຍຊນາ.

໖໘໕. ວາຕິ ຄນ຺ໂຘ ທິສາ ສພ຺ພາຕິ ຕສ຺ສາ ເຕ ສິຣສ຺ມິໍ ທິພ຺ພມາລາຍ ຄນ຺ໂຘ ວາຍຕິ ສພ຺ພາ ທິສາ. ຍຖາ ກິໍ? ຣຸກ຺ໂຂ ມຎ຺ຊູສໂກ ຍຖາຕິ, ຍຖາ ນາມ ມຎ຺ຊູສໂກ ຣຸກ຺ໂຂ ສຸປຸປ຺ຜິໂຕ ອຕ຺ຕໂນ ຄນ຺ເຘນ ພຫູນິ ໂຍຊນານິ ຜຣມາໂນ ສພ຺ພາ ທິສາ ວາຍຕິ, ເອວໍ ຕວ ສິຣສ຺ມິໍ ປິຬນ຺ຘນມາລາຍ ຄນ຺ໂຘຕິ ອຕ຺ໂຖ. ໂສ ກິຣ ຣຸກ຺ໂຂ ຄນ຺ຘມາທເນ ປຈ຺ເຈກພຸທ຺ຘານໍ ອຸໂປສຖກຣຓມຓ຺ຑລມາຬກມຊ຺ເຌ ຕິຏ຺ຐຕິ. ຍຕ຺ຕການິ ເທວໂລເກ ຈ ມນຸສ຺ສໂລເກ ຈ ສຸຣຠິກຸສຸມານິ, ຕານິ ຕສ຺ສ ສາຂຄ຺ເຄສຸ ນິພ຺ພຕ຺ຕນ຺ຕິ. ເຕນ ໂສ ອຕິວິຍ ສຸຄນ຺ໂຘ ໂຫຕິ. ເອວໍ ຕາຍ ເທວຕາຍ ປິຬນ຺ຘນມາລາຍ ຄນ຺ໂຘຕິ. ເຕນ ວຸຕ຺ຕໍ ‘‘ຣຸກ຺ໂຂ ມຎ຺ຊູສໂກ ຍຖາ’’ຕິ.

໖໘໖. ຍທິປິ ຕສ຺ສ ສຄ຺ຄສ຺ສ ຉຜສ຺ສາຍຕນິກຠາວໂຕ ສພ຺ພານິປິ ຕຕ຺ຖ ອາຣມ຺ມຓານິ ປິຍຣູປານິເຍວ, ຄນ຺ຘຣູປານໍ ປນ ສວິເສສານໍ ຕສ຺ສາ ເທວຕາຍ ລາຠິຠາວໂຕ ‘‘ຆາຍເສ ຕໍ ສຸຈິຄນ຺ຘໍ, ຣູປໍ ປສ຺ສສິ ອມານຸສ’’ນ຺ຕິ ວຸຕ຺ຕໍ.

ອຖ ເທວຕາ ທ຺ວີຫິ ຄາຖາຫິ ພ຺ຍາກາສິ –

໖໘໗. ‘‘ປຠສ຺ສຣໍ ອຈ຺ຈິມນ຺ຕໍ, ວຓ຺ຓຄນ຺ເຘນ ສໍຍຸຕໍ;

ອໂສກປຸປ຺ຜມາລາຫໍ, ພຸທ຺ຘສ຺ສ ອຸປນາມຍິໍ.

໖໘໘. ‘‘ຕາຫໍ ກມ຺ມໍ ກຣິຕ຺ວານ, ກຸສລໍ ພຸທ຺ຘວຓ຺ຓິຕໍ;

ອເປຕໂສກາ ສຸຂິຕາ, ສມ຺ປໂມທາມນາມຍາ’’ຕິ.

໖໘໗. ຕຕ຺ຖ ສຸໂຘຕປວາຬສງ຺ຆາຕສນ຺ນິຠສ຺ສ ກິຎ຺ຊກ຺ຂເກສຣສມຸທາເຍນ ຠາຓຸຣໍສິຊາລສ຺ສ ວິຍ ອໂສກປຸປ຺ຜຸຕ຺ຕມສ຺ສ ຕທາ ອຸປຏ຺ຐິຕຕໍ ສນ຺ຘາຍາຫ ‘‘ປຠສ຺ສຣໍ ອຈ຺ຈິມນ຺ຕ’’ນ຺ຕິ. ເສສໍ ວຸຕ຺ຕນຍເມວ.

ອຖາຍສ຺ມາ ມຫາໂມຄ຺ຄລ຺ລາໂນ ຕາຍ ເທວຕາຍ ອຕ຺ຕໂນ ສຸຈຣິຕກມ຺ເມ ກຖິເຕ ສປຣິວາຣາຍ ຕສ຺ສາ ຘມ຺ມໍ ເທເສຕ຺ວາ ຕໂຕ ມນຸສ຺ສໂລກໍ ອາຄນ຺ຕ຺ວາ ຠຄວໂຕ ຕໍ ປວຕ຺ຕິໍ ກເຖສິ. ຠຄວາ ຕໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕມຫາຊນສ຺ສ ຘມ຺ມໍ ເທເສສິ, ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ປາຣິຈ຺ຉຕ຺ຕກວິມານວຓ຺ຓນາ ນິຏ຺ຐິຕາ.

ອິຕິ ປຣມຕ຺ຖທີປນິຍາ ຂຸທ຺ທກ-ອຏ຺ຐກຖາຍ ວິມານວຕ຺ຖຸສ຺ມິໍ

ທສວຕ຺ຖຸປຏິມຓ຺ຑິຕສ຺ສ ຕຕິຍສ຺ສ ປາຣິຈ຺ຉຕ຺ຕກວຄ຺ຄສ຺ສ

ອຕ຺ຖວຓ຺ຓນາ ນິຏ຺ຐິຕາ.