໕. ຄຸຕ຺ຕິລວິມານວຓ຺ຓນາ

ສຕ຺ຕຕນ຺ຕິໍ ສຸມຘຸຣນ຺ຕິ ຄຸຕ຺ຕິລວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ຣາຊຄເຫ ວິຫຣນ຺ເຕ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍເນວ ເທວຈາຣິກໍ ຈຣນ຺ໂຕ ຕາວຕິໍສຠວນໍ ຄນ຺ຕ຺ວາ ຕຕ຺ຖ ປຏິປາຏິຍາ ຐິເຕສຸ ຉຕ຺ຕິໍສາຍ ວິມາເນສຸ ຉຕ຺ຕິໍສ ເທວຘີຕໂຣ ປຈ຺ເຈກໍ ອຈ຺ຉຣາສຫສ຺ສປຣິວາຣາ ມຫຕິໍ ທິພ຺ພສມ຺ປຕ຺ຕິໍ ອນຸຠວນ຺ຕິໂຍ ທິສ຺ວາ ຕາຫິ ປຸພ຺ເພ ກຕກມ຺ມໍ ‘‘ອຠິກ຺ກນ຺ເຕນ ວຓ຺ເຓນາ’’ຕິອາທີຫິ ຕີຫິ ຄາຖາຫິ ປຏິປາຏິຍາ ປຸຈ຺ຉິ. ຕາປິ ຕສ຺ສ ປຸຈ຺ຉານນ຺ຕຣໍ ‘‘ວຕ຺ຖຸຕ຺ຕມທາຍິກາ ນາຣີ’’ຕິອາທິນາ ພ຺ຍາກຣິໍສຸ. ອຖ ເຖໂຣ ຕໂຕ ມນຸສ຺ສໂລກໍ ອາຄນ຺ຕ຺ວາ ຠຄວໂຕ ເອຕມຕ຺ຖໍ ອາໂຣເຈສິ. ຕໍ ສຸຕ຺ວາ ຠຄວາ ‘‘ໂມຄ຺ຄລ຺ລານ, ຕາ ເທວຕາ ນ ເກວລໍ ຕຍາ ເອວ ປຸຈ຺ຉິຕາ ເອວໍ ພ຺ຍາກຣິໍສຸ, ອຖ ໂຂ ປຸພ຺ເພ ມຍາປິ ປຸຈ຺ຉິຕາ ເອວເມວ ພ຺ຍາກຣິໍສູ’’ຕິ ວຕ຺ວາ ເຖເຣນ ຍາຈິໂຕ ອຕີຕໍ ອຕ຺ຕໂນ ຄຸຕ຺ຕິລາຈຣິຍໍ ກເຖສິ.

ອຕີເຕ ພາຣາຓສິຍໍ ພ຺ຣຫ຺ມທຕ຺ເຕ ຣຊ຺ຊໍ ກາເຣນ຺ເຕ ໂພຘິສຕ຺ໂຕ ຄນ຺ຘພ຺ພກຸເລ ນິພ຺ພຕ຺ຕິຕ຺ວາ ຄນ຺ຘພ຺ພສິປ຺ເປ ປຣິໂຍທາຕສິປ຺ປຕາຍ ຕິມ຺ພຣຸນາຣທສທິໂສ ສພ຺ພທິສາສຸ ປາກໂຏ ປຎ຺ຎາຕາ ອາຈຣິໂຍ ອໂຫສິ ນາເມນ ຄຸຕ຺ຕິໂລ ນາມ. ໂສ ອນ຺ເຘ ຊິຓ຺ເຓ ມາຕາປິຕໂຣ ໂປເສສິ. ຕສ຺ສ ສິປ຺ປນິປ຺ຜຕ຺ຕິໍ ສຸຕ຺ວາ ອຸຊ຺ເຊນິວາສີ ມຸສິໂລ ນາມ ຄນ຺ຘພ຺ໂພ ອຸປຄນ຺ຕ຺ວາ ຕໍ ວນ຺ທິຕ຺ວາ ເອກມນ຺ຕໍ ຐິໂຕ ‘‘ກສ຺ມາ ອາຄໂຕສີ’’ຕິ ຈ ວຸຕ຺ເຕ ‘‘ຕຸມ຺ຫາກໍ ສນ຺ຕິເກ ສິປ຺ປໍ ອຸຄ຺ຄຓ຺ຫິຕຸ’’ນ຺ຕິ ອາຫ. ຄຸຕ຺ຕິລາຈຣິໂຍ ຕໍ ໂອໂລເກຕ຺ວາ ລກ຺ຂຓກຸສລຕາຍ ‘‘ອຍໍ ປຸຣິໂສ ວິສມຊ຺ຌາສໂຍ ກກ຺ຂໂຬ ຜຣຸໂສ ອກຕຎ຺ຎູ ຠວິສ຺ສຕິ, ນ ສງ຺ຄເຫຕພ຺ໂພ’’ຕິ ສິປ຺ປຸຄ຺ຄຫຓຕ຺ຖໍ ໂອກາສໍ ນາກາສິ. ໂສ ຕສ຺ສ ມາຕາປິຕໂຣ ປຍິຣຸປາສິຕ຺ວາ ເຕຫິ ຍາຈາເປສິ. ຄຸຕ຺ຕິລາຈຣິໂຍ ມາຕາປິຕູຫິ ນິປ຺ປີຬິຍມາໂນ ‘‘ຄຣຸວຈນໍ ອລງ຺ຆນີຍ’’ນ຺ຕິ ຕສ຺ສ ສິປ຺ປໍ ປຏ຺ຐເປຕ຺ວາ ວິຄຕມຈ຺ຉຣິຍຕາຍ ກາຣຸຓິກຕາຍ ຈ ອາຈຣິຍມຸຏ຺ຐິໍ ອກຕ຺ວາ ອນວເສສໂຕ ສິປ຺ປໍ ສິກ຺ຂາເປສິ.

ໂສປິ ເມຘາວິຕາຍ ປຸພ຺ເພກຕປຣິຈຍຕາຍ ອກຸສີຕຕາຍ ຈ ນ ຈິຣສ຺ເສວ ປຣິໂຍທາຕສິປ຺ໂປ ຫຸຕ຺ວາ ຈິນ຺ເຕສິ ‘‘ອຍໍ ພາຣາຓສີ ຊມ຺ພຸທີເປ ອຄ຺ຄນຄຣໍ, ຍໍນູນາຫໍ ອິຘ ສຣາຊິກາຍ ປຣິສາຍ ສິປ຺ປໍ ທສ຺ເສຍ຺ຍໍ, ເອວາຫໍ ອາຈຣິຍໂຕປິ ຊມ຺ພຸທີເປ ປາກໂຏ ປຎ຺ຎາໂຕ ຠວິສ຺ສາມີ’’ຕິ. ໂສ ອາຈຣິຍສ຺ສ ອາໂຣເຈສິ ‘‘ອຫໍ ຣຎ຺ໂຎ ປຸຣໂຕ ສິປ຺ປໍ ທສ຺ເສຕຸກາໂມ, ຣາຊານໍ ມໍ ທສ຺ເສຖາ’’ຕິ. ມຫາສຕ຺ໂຕ ‘‘ອຍໍ ມມ ສນ຺ຕິເກ ອຸຄ຺ຄຫິຕສິປ຺ໂປ ປຕິຏ຺ຐໍ ລຠຕູ’’ຕິ ກຣຸຓາຍມາໂນ ຕໍ ຣຎ຺ໂຎ ສນ຺ຕິກໍ ເນຕ຺ວາ ‘‘ມຫາຣາຊ ອິມສ຺ສ ເມ ອນ຺ເຕວາສິກສ຺ສ ວີຓາຍ ປຄຸຓຕໍ ປສ຺ສຖາ’’ຕິ ອາຫ. ຣາຊາ ‘‘ສາຘູ’’ຕິ ປຏິສ຺ສຸຓິຕ຺ວາ ຕສ຺ສ ວີຓາວາທນໍ ສຸຕ຺ວາ ປຣິຕຸຏ຺ໂຐ ຕໍ ຄນ຺ຕຸກາມໍ ນິວາເຣຕ຺ວາ ‘‘ມເມວ ສນ຺ຕິເກ ວສ, ອາຈຣິຍສ຺ສ ທິນ຺ນໂກຏ຺ຐາສໂຕ ອຸປຑ຺ຒໍ ທສ຺ສາມີ’’ຕິ ອາຫ. ມຸສິໂລ ‘‘ນາຫໍ ອາຈຣິຍໂຕ ຫາຍາມິ, ສມເມວ ເທຖາ’’ຕິ ວຕ຺ວາ ຣຎ຺ຎາ ‘‘ມາ ເອວໍ ຠຓິ, ອາຈຣິໂຍ ນາມ ມຫນ຺ໂຕ, ອຸປຑ຺ຒເມວ ຕຸຍ຺ຫໍ ທສ຺ສາມີ’’ຕິ ວຸຕ຺ເຕ ‘‘ມມ ຈ ອາຈຣິຍສ຺ສ ຈ ສິປ຺ປໍ ປສ຺ສຖາ’’ຕິ ວຕ຺ວາ ຣາຊເຄຫໂຕ ນິກ຺ຂມິຕ຺ວາ ‘‘ອິໂຕ ສຕ຺ຕເມ ທິວເສ ມມ ຈ ຄຸຕ຺ຕິລາຈຣິຍສ຺ສ ຈ ຣາຊງ຺ຄເຓ ສິປ຺ປທສ຺ສນໍ ຠວິສ຺ສຕິ, ຕໍ ປສ຺ສິຕຸກາມາ ປສ຺ສນ຺ຕູ’’ຕິ ຕຕ຺ຖ ຕຕ຺ຖ ອາຫິຓ຺ຑນ຺ໂຕ ອຸຄ຺ໂຆເສສິ.

ມຫາສຕ຺ໂຕ ຕໍ ສຸຕ຺ວາ ‘‘ອຍໍ ຕຣຸໂຓ ຖາມວາ, ອຫໍ ປນ ຊິຓ຺ໂຓ ທຸພ຺ພໂລ, ຍທິ ປນ ເມ ປຣາຊໂຍ ຠເວຍ຺ຍ, ມຕໍ ເມ ຊີວິຕາ ເສຍ຺ຍໍ, ຕສ຺ມາ ອຣຎ຺ຎໍ ປວິສິຕ຺ວາ ອຸພ຺ພນ຺ຘິຕ຺ວາ ມຣິສ຺ສາມີ’’ຕິ ອຣຎ຺ຎໍ ຄໂຕ ມຣຓຠຍຕຊ຺ຊິໂຕ ປຏິນິວຕ຺ຕິ. ປຸນ ມຣິຕຸກາໂມ ຫຸຕ຺ວາ ຄນ຺ຕ຺ວາ ປຸນປິ ມຣຓຠເຍນ ປຏິນິວຕ຺ຕິ. ເອວໍ ຄມນາຄມນໍ ກໂຣນ຺ຕສ຺ສ ຕໍ ຐານໍ ວິຄຕຕິຓໍ ອໂຫສິ. ອຖ ເທວຣາຊາ ມຫາສຕ຺ຕໍ ອຸປສງ຺ກມິຕ຺ວາ ທິສ຺ສມານຣູໂປ ອາກາເສ ຐຕ຺ວາ ເອວມາຫ ‘‘ອາຈຣິຍ, ກິໍ ກໂຣສີ’’ຕິ. ມຫາສຕ຺ໂຕ –

໓໒໗. ‘‘ສຕ຺ຕຕນ຺ຕິໍ ສຸມຘຸຣໍ, ຣາມເຓຍ຺ຍໍ ອວາຈຍິໍ;

ໂສ ມໍ ຣງ຺ຄມ຺ຫິ ອວ຺ເຫຕິ, ສຣຓໍ ເມ ໂຫຫິ ໂກສິຍາ’’ຕິ. –

ອຕ຺ຕໂນ ຈິຕ຺ຕທຸກ຺ຂໍ ປເວເທສິ.

ຕສ຺ສຕ຺ໂຖ – ອຫໍ ເທວຣາຊ ມຸສິລໍ ນາມ ອນ຺ເຕວາສິກໍ ສຕ຺ຕນ຺ນໍ ຕນ຺ຕີນໍ ອຕ຺ຖິຕາຍ ຉຊ຺ຊາທິສຕ຺ຕວິຘສຣທີປນໂຕ ຈ ສຕ຺ຕຕນ຺ຕິໍ, ຕໍ ວິສຍໍ ກຕ຺ວາ ຍຖາຣຫໍ ທ຺ວາວີສຕິຍາ ສຸຕິເຠທານໍ ອຫາປນໂຕ ສຸຏ຺ຐຸ ມຘຸຣນ຺ຕິ ສຸມຘຸຣໍ, ຍຖາຘິຄຕານໍ ສມປຎ຺ຎາສາຍ ມຸຈ຺ຉນານໍ ປຣິພ຺ຍຕ຺ຕຕາຍ ສຣສ຺ສ ຈ ວີຓາຍ ຈ ອຎ຺ຎມຎ຺ຎສໍສນ຺ທເນນ ສຸຓນ຺ຕານໍ ອຕິວິຍ ມໂນຣມຠາວໂຕ ຣາມເຓຍ຺ຍໍ, ສຣຄຕາທິວິຠາຄໂຕ ຉຊ຺ຊາທິຈຕຸພ຺ພິຘໍ ຄນ຺ຘພ຺ພໍ ອຫາເປຕ຺ວາ ຄນ຺ຘພ຺ພສິປ຺ປໍ ອວາຈຍິນ຺ຕິ ວາເຈສິໍ ອຸຄ຺ຄຓ຺ຫາເປສິໍ ສິກ຺ຂາເປສິໍ. ໂສ ມຸສິໂລ ອນ຺ເຕວາສີ ສມາໂນ ມໍ ອຕ຺ຕໂນ ອາຈຣິຍໍ ຣງ຺ຄມ຺ຫິ ຣງ຺ຄມຓ຺ຑເລ ອວ຺ເຫຕິ ສາຣມ຺ຠວເສນ ອຕ຺ຕໂນ ວິເສສໍ ທສ຺ເສຕຸໍ ສງ຺ຆຏ຺ຏິຍຕິ, ‘‘ເອຫິ ສິປ຺ປໍ ທສ຺ເສຫີ’’ຕິ ມໍ ອາຈິກ຺ຂິ, ຕສ຺ສ ເມ ຕ຺ວໍ ໂກສິຍ ເທວຣາຊ ສຣຓໍ ອວສ຺ສໂຍ ໂຫຫີຕິ.

ຕໍ ສຸຕ຺ວາ ສກ຺ໂກ ເທວຣາຊາ ‘‘ມາ ຠາຍິ ອາຈຣິຍ, ອຫໍ ເຕ ສຣຓໍ ປຣາຍຓ’’ນ຺ຕິ ທສ຺ເສນ຺ໂຕ –

໓໒໘. ‘‘ອຫໍ ເຕ ສຣຓໍ ໂຫມິ, ອຫມາຈຣິຍປູຊໂກ;

ນ ຕໍ ຊຍິສ຺ສຕິ ສິສ຺ໂສ, ສິສ຺ສມາຈຣິຍ ເຊສ຺ສສີ’’ຕິ. –

ອາຫ. ສກ຺ກສ຺ສ ກິຣ ເທວຣຎ຺ໂຎ ປຸຣິມຕ຺ຕຠາເວ ມຫາສຕ຺ໂຕ ອາຈຣິໂຍ ອໂຫສິ. ເຕນາຫ ‘‘ອຫມາຈຣິຍປູຊໂກ’’ຕິ. ອຫໍ ອາຈຣິຍານໍ ປູຊໂກ, ນ ມຸສິໂລ ວິຍ ຍຸຄຄ຺ຄາຫີ, ມາທິເສສຸ ອນ຺ເຕວາສິເກສຸ ຐິເຕສຸ ຕາທິສສ຺ສ ອາຈຣິຍສ຺ສ ກຖໍ ປຣາຊໂຍ, ຕສ຺ມາ ນ ຕໍ ຊຍິສ຺ສຕິ ສິສ຺ໂສ, ອຎ຺ຎທຕ຺ຖຸ ສິສ຺ສໍ ມຸສິລໍ ອາຈຣິຍ ຕ຺ວເມວ ຊຍິສ຺ສສິ, ໂສ ປນ ປຣາຊິໂຕ ວິນາສໍ ປາປຸຓິສ຺ສຕີຕິ ອຘິປ຺ປາໂຍ. ເອວຎ຺ຈ ປນ ວຕ຺ວາ ‘‘ອຫໍ ສຕ຺ຕເມ ທິວເສ ສາກຈ຺ຉາມຓ຺ຑລໍ ອາຄມິສ຺ສາມິ, ຕຸມ຺ເຫ ວິສ຺ສຕ຺ຖາ ວາເທຖາ’’ຕິ ສມສ຺ສາເສຕ຺ວາ ຄໂຕ.

ສຕ຺ຕເມ ປນ ທິວເສ ຣາຊາ ສປຣິວາໂຣ ຣາຊສຠາຍໍ ນິສີທິ. ຄຸຕ຺ຕິລາຈຣິໂຍ ຈ ມຸສິໂລ ຈ ສິປ຺ປທສ຺ສນຕ຺ຖໍ ສຊ຺ຊາ ຫຸຕ຺ວາ ອຸປສງ຺ກມິຕ຺ວາ ຣາຊານໍ ວນ຺ທິຕ຺ວາ ອຕ຺ຕໂນ ອຕ຺ຕໂນ ລທ຺ຘາສເນ ນິສີທິຕ຺ວາ ວີຓາ ວາທຍິໍສຸ. ສກ຺ໂກ ອາຄນ຺ຕ຺ວາ ອນ຺ຕລິກ຺ເຂ ອຏ຺ຐາສິ. ຕໍ ມຫາສຕ຺ໂຕວ ປສ຺ສຕິ, ອິຕເຣ ປນ ນ ປສ຺ສນ຺ຕິ. ປຣິສາ ທ຺ວິນ຺ນມ຺ປິ ວາທເນ ສມຈິຕ຺ຕາ ອໂຫສິ. ສກ຺ໂກ ຄຸຕ຺ຕິລໍ ‘‘ເອກໍ ຕນ຺ຕິໍ ຉິນ຺ທາ’’ຕິ ອາຫ. ຉິນ຺ນາຍປິ ຕນ຺ຕິຍາ ວີຓາ ຕເຖວ ມຘຸຣນິຄ຺ໂຆສາ ອໂຫສິ. ເອວໍ ‘‘ທຸຕິຍໍ, ຕຕິຍໍ, ຈຕຸຕ຺ຖໍ, ປຎ຺ຈມໍ, ຉຏ຺ຐໍ, ສຕ຺ຕມໍ ຉິນ຺ທາ’’ຕິ ອາຫ, ຕາສຸ ຉິນ຺ນາສຸປິ ວີຓາ ມຘຸຣນິຄ຺ໂຆສາວ ອໂຫສິ. ຕໍ ທິສ຺ວາ ມຸສິໂລ ປຣາຊິຕຠູຕຣູໂປ ປຕ຺ຕກ຺ຂນ຺ໂຘ ອໂຫສິ, ປຣິສາ ຫຏ຺ຐຕຸຏ຺ຐາ ເຈລຸກ຺ເຂເປ ກໂຣນ຺ຕີ ຄຸຕ຺ຕິລສ຺ສ ສາຘຸກາຣມທາສິ. ຣາຊາ ມຸສິລໍ ສຠາຍ ນີຫຣາເປສິ, ມຫາຊໂນ ເລຑ຺ຑຸທຓ຺ຑາທີຫິ ປຫຣນ຺ໂຕ ມຸສິລໍ ຕຕ຺ເຖວ ຊີວິຕກ຺ຂຍໍ ປາເປສິ.

ສກ຺ໂກ ເທວານມິນ຺ໂທ ມຫາປຸຣິເສນ ສທ຺ຘິໍ ສມ຺ໂມທນີຍໍ ກຕ຺ວາ ເທວໂລກເມວ ຄໂຕ. ຕໍ ເທວຕາ ‘‘ມຫາຣາຊ, ກຸຫິໍ ຄຕຕ຺ຖາ’’ຕິ ປຸຈ຺ຉິຕ຺ວາ ຕໍ ປວຕ຺ຕິໍ ສຸຕ຺ວາ ‘‘ມຫາຣາຊ, ມຍໍ ຄຸຕ຺ຕິລາຈຣິຍໍ ປສ຺ສິສ຺ສາມ, ສາຘຸ ໂນ ຕໍ ອິຘາເນຕ຺ວາ ທສ຺ເສຫີ’’ຕິ ອາຫໍສຸ. ສກ຺ໂກ ເທວານໍ ວຈນໍ ສຸຕ຺ວາ ມາຕລິໍ ອາຓາເປສິ ‘‘ຄຈ຺ຉ ເວຊຍນ຺ຕຣເຖນ ອມ຺ຫາກໍ ຄຸຕ຺ຕິລາຈຣິຍໍ ອາເນຫິ, ເທວຕາ ຕໍ ທສ຺ສນກາມາ’’ຕິ, ໂສ ຕຖາ ອກາສິ. ສກ຺ໂກ ມຫາສຕ຺ເຕນ ສທ຺ຘິໍ ສມ຺ໂມທນີຍໍ ກຕ຺ວາ ເອວມາຫ ‘‘ອາຈຣິຍ, ວີຓໍ ວາທຍ, ເທວຕາ ໂສຕຸກາມາ’’ຕິ. ‘‘ມຍໍ ສິປ຺ປູປຊີວິໂນ, ເວຕເນນ ວິນາ ສິປ຺ປໍ ນ ທສ຺ເສມາ’’ຕິ. ‘‘ກີທິສໍ ປນ ເວຕນໍ ອິຈ຺ຉສີ’’ຕິ. ‘‘ນາຎ຺ເຎນ ເມ ເວຕເນນ ກິຈ຺ຈໍ ອຕ຺ຖິ, ອິມາສໍ ປນ ເທວຕານໍ ອຕ຺ຕນາ ອຕ຺ຕນາ ປຸພ຺ເພກຕກຸສລກຖນເມວ ເມ ເວຕນໍ ໂຫຕູ’’ຕິ ອາຫ. ຕາ ‘‘ສາຘູ’’ຕິ ສມ຺ປຏິຈ຺ຉິໍສຸ. ອຖ ມຫາສຕ຺ໂຕ ປາເຏກ຺ກໍ ຕາຫິ ຕທາ ປຏິລທ຺ຘສມ຺ປຕ຺ຕິກິຕ຺ຕນມຸເຂນ ຕສ຺ສາ ເຫຕຸຠູຕໍ ປຸຣິມຕ຺ຕຠາເວ ກຕໍ ສຸຈຣິຕໍ ອາຍສ຺ມາ ມຫາໂມຄ຺ຄລ຺ລາໂນ ວິຍ ປຸຈ຺ຉນ຺ໂຕ ‘‘ອຠິກ຺ກນ຺ເຕນ ວຓ຺ເຓນາ’’ຕິອາທິຄາຖາຫິ ປຸຈ຺ຉິ. ຕາປິ ‘‘ວຕ຺ຖຸຕ຺ຕມທາຍິກາ ນາຣີ’’ຕິອາທິນາ ຍຖາ ເອຕຣຫິ ເຖຣສ຺ສ, ເອວເມວ ຕສ຺ສ ພ຺ຍາກຣິໍສຸ. ເຕນ ວຸຕ຺ຕໍ ‘‘ໂມຄ຺ຄລ຺ລານ ຕາ ເທວຕາ ນ ເກວລໍ ຕຍາ ເອວ ປຸຈ຺ຉິຕາ ເອວໍ ພ຺ຍາກຣິໍສຸ, ອຖ ໂຂ ປຸພ຺ເພ ມຍາປິ ປຸຈ຺ຉິຕາ ເອວເມວ ພ຺ຍາກຣິໍສູ’’ຕິ.

ຕາ ກິຣ ອິຕ຺ຖິໂຍ ກສ຺ສປສມ຺ມາສມ຺ພຸທ຺ຘກາເລ ມນຸສ຺ສຕ຺ຕຠາເວ ຐິຕາ ຕໍ ຕໍ ປຸຎ຺ຎໍ ອກໍສຸ. ຕຕ຺ຖ ເອກາ ອິຕ຺ຖີ ວຕ຺ຖໍ ອທາສິ, ເອກາ ສຸມນມາລໍ, ເອກາ ຄນ຺ຘໍ, ເອກາ ອຸຬາຣານິ ຜລານິ, ເອກາ ອຸຈ຺ຉຸຣສໍ, ເອກາ ຠຄວໂຕ ເຈຕິເຍ ຄນ຺ຘປຎ຺ຈງ຺ຄຸລິກໍ ອທາສິ, ເອກາ ອຸໂປສຖໍ ອຸປວສິ, ເອກາ ອຸປກຏ຺ຐາຍ ເວລາຍ ນາວາຍ ຠຸຎ຺ຊນ຺ຕສ຺ສ ຠິກ຺ຂຸໂນ ອຸທກໍ ອທາສິ, ເອກາ ໂກຘນານໍ ສສ຺ສຸສສຸຣານໍ ອກ຺ໂກຘນາ ອຸປຏ຺ຐານໍ ອກາສິ, ເອກາ ທາສີ ຫຸຕ຺ວາ ອຕນ຺ທິຕາຈາຣາ ອໂຫສິ, ເອໂກ ປິຓ຺ຑຈາຣິກສ຺ສ ຠິກ຺ຂຸໂນ ຂີຣຠຕ຺ຕໍ ອທາສິ, ເອກາ ຜາຓິຕໍ ອທາສິ, ເອກາ ອຸຈ຺ຉຸຂຓ຺ຑໍ ອທາສິ, ເອກາ ຕິມ຺ພຣຸສກໍ ອທາສິ, ເອກາ ກກ຺ກາຣິກໍ ອທາສິ, ເອກາ ເອຬາລຸກໍ ອທາສິ, ເອກາ ວລ຺ລິຜລໍ ອທາສິ, ເອກາ ຜາຣຸສກໍ ອທາສິ, ເອກາ ອງ຺ຄາຣກປລ຺ລໍ ອທາສິ, ເອກາ ສາກມຸຏ຺ຐິໍ ອທາສິ, ເອກາ ປຸປ຺ຜກມຸຏ຺ຐິໍ ອທາສິ, ເອກາ ມູລກລາປໍ ອທາສິ, ເອກາ ນິມ຺ພມຸຏ຺ຐິໍ ອທາສິ, ເອກາ ກຎ຺ຊິກໍ ອທາສິ, ເອກາ ຕິລປິຎ຺ຎາກໍ ອທາສິ, ເອກາ ກາຍພນ຺ຘນໍ ອທາສິ, ເອກາ ອໍສພທ຺ຘກໍ ອທາສິ, ເອກາ ອາໂຍຄປຏ຺ຏໍ ອທາສິ, ເອກາ ວິຘູປນໍ, ເອກາ ຕາລວຓ຺ຏໍ, ເອກາ ໂມຣຫຕ຺ຖໍ, ເອກາ ຉຕ຺ຕໍ, ເອກາ ອຸປາຫນໍ, ເອກາ ປູວໍ, ເອກາ ໂມທກໍ, ເອກາ ສກ຺ຂລິກໍ ອທາສິ. ຕາ ເອເກກາ ອຈ຺ຉຣາສຫສ຺ສປຣິວາຣາ ປຫຕິຍາ ເທວິທ຺ຘິຍາ ວິຣາຊມານາ ຕາວຕິໍສຠວເນ ສກ຺ກສ຺ສ ເທວຣາຊສ຺ສ ປຣິຈາຣິກາ ຫຸຕ຺ວາ ນິພ຺ພຕ຺ຕາ ຄຸຕ຺ຕິລາຈຣິເຍນ ປຸຈ຺ຉິຕາ ‘‘ວຕ຺ຖຸຕ຺ຕມທາຍິກາ ນາຣີ’’ຕິອາທິນາ ອຕ຺ຕນາ ອຕ຺ຕນາ ກຕກຸສລໍ ປຏິປາຏິຍາ ພ຺ຍາກຣິໍສຸ.

໓໒໙. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໓໓໐. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໓໓໑. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໓໓໒. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໓໓໓. ‘‘ວຕ຺ຖຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ;

ເອວໍ ປິຍຣູປທາຍິກາ ມນາປໍ, ທິພ຺ພໍ ສາ ລຠເຕ ອຸເປຈ຺ຈ ຐານໍ.

໓໓໔. ‘‘ຕສ຺ສາ ເມ ປສ຺ສ ວິມານໍ, ອຈ຺ຉຣາ ກາມວຓ຺ຓິນີຫມສ຺ມິ;

ອຈ຺ຉຣາສຫສ຺ສສ຺ສາຫໍ, ປວຣາ ປສ຺ສ ປຸຎ຺ຎານໍ ວິປາກໍ.

໓໓໕. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໓໓໖. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

(ຍຖາ ຈ ເອຕ຺ຖ, ເອວໍ ອຸປຣິ ສພ຺ພວິມາເນສຸ ວິຕ຺ຖາເຣຕພ຺ພໍ.)

໓໔໑. ‘‘ປຸປ຺ຜຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ…ເປ….

໓໔໙. ‘‘ຄນ຺ຘຸຕ຺ຕມທາຍິກາ ນາຣີ, ປວຣາ ໂຫຕິ ນເຣສຸ ນາຣີສຸ…ເປ….

໓໕໗. ‘‘ຜລຸຕ຺ຕມທາຍິກາ ນາຣີ…ເປ….

໓໖໕. ‘‘ຣສຸຕ຺ຕມທາຍິກາ ນາຣີ…ເປ….

໓໗໓. ‘‘ຄນ຺ຘປຎ຺ຈງ຺ຄຸລິກໍ ອຫມທາສິໍ,ກສ຺ສປສ຺ສ ຠຄວໂຕ ຖູປມ຺ຫິ…ເປ….

໓໘໑. ‘‘ຠິກ຺ຂູ ຈ ອຫໍ ຠິກ຺ຂຸນິໂຍ ຈ, ອທ຺ທສາສິໍ ປນ຺ຖປຏິປນ຺ເນ;

ເຕສາຫໍ ຘມ຺ມໍ ສຸຕ຺ວານ, ເອກູໂປສຖໍ ອຸປວສິສ຺ສໍ.

໓໘໒. ‘‘ຕສ຺ສາ ເມ ປສ຺ສ ວິມານໍ…ເປ….

໓໘໙. ‘‘ອຸທເກ ຐິຕາ ອຸທກມທາສິໍ, ຠິກ຺ຂຸໂນ ຈິຕ຺ເຕນ ວິປ຺ປສນ຺ເນນ…ເປ….

໓໙໗. ‘‘ສສ຺ສຸຎ຺ຈາຫໍ ສສຸຣຎ຺ຈ, ຈຓ຺ຑິເກ ໂກຘເນ ຈ ຜຣຸເສ ຈ;

ອນຸສູຍິກາ ອຸປຏ຺ຐາສິໍ, ອປ຺ປມຕ຺ຕາ ສເກນ ສີເລນ…ເປ….

໔໐໕. ‘‘ປຣກມ຺ມກຣີ ອາສິໍ, ອຕ຺ເຖນາຕນ຺ທິຕາ ທາສີ;

ອກ຺ໂກຘນານຕິມານິນີ, ສໍວິຠາຄິນີ ກກສ຺ສ ຠາຄສ຺ສ…ເປ….

໔໑໓. ‘‘ຂີໂຣທນໍ ອຫມທາສິໍ, ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ;

ເອວໍ ກຣິຕ຺ວາ ກມ຺ມໍ, ສຸຄຕິໍ ອຸປປຊ຺ຊ ໂມທາມິ…ເປ….

໔໒໑. ‘‘ຜາຓິຕໍ ອຫມທາສິໍ…ເປ….

໔໒໙. ‘‘ອຸຈ຺ຉຸຂຓ຺ຑິກໍ ອຫມທາສິໍ…ເປ….

໔໓໗. ‘‘ຕິມ຺ພຣຸສກໍ ອຫມທາສິໍ…ເປ….

໔໔໕. ‘‘ກກ຺ກາຣິກໍ ອຫມທາສິໍ…ເປ….

໔໕໓. ‘‘ເອຬາລຸກໍ ອຫມທາສິໍ…ເປ….

໔໖໑. ‘‘ວລ຺ລິຜລໍ ອຫມທາສິໍ…ເປ….

໔໖໙. ‘‘ຜາຣຸສກໍ ອຫມທາສິໍ…ເປ….

໔໗໗. ‘‘ຫຕ຺ຖປ຺ປຕາປກໍ ອຫມທາສິໍ…ເປ….

໔໘໕. ‘‘ສາກມຸຏ຺ຐິໍ ອຫມທາສິໍ…ເປ….

໔໙໓. ‘‘ປຸປ຺ຜກມຸຏ຺ຐິໍ ອຫມທາສິໍ…ເປ….

໕໐໑. ‘‘ມູລກໍ ອຫມທາສິໍ…ເປ….

໕໐໙. ‘‘ນິມ຺ພມຸຏ຺ຐິໍ ອຫມທາສິໍ…ເປ….

໕໑໗. ‘‘ອມ຺ພກຎ຺ຊິກໍ ອຫມທາສິໍ…ເປ….

໕໒໕. ‘‘ໂທຓິນິມ຺ມຊ຺ຊນິໍ ອຫມທາສິໍ…ເປ….

໕໓໓. ‘‘ກາຍພນ຺ຘນໍ ອຫມທາສິໍ…ເປ….

໕໔໑. ‘‘ອໍສພທ຺ຘກໍ ອຫມທາສິໍ…ເປ….

໕໔໙. ‘‘ອາໂຍຄປຏ຺ຏໍ ອຫມທາສິໍ…ເປ….

໕໕໗. ‘‘ວິຘູປນໍ ອຫມທາສິໍ…ເປ….

໕໖໕. ‘‘ຕາລວຓ຺ຏໍ ອຫມທາສິໍ…ເປ….

໕໗໓. ‘‘ໂມຣຫຕ຺ຖໍ ອຫມທາສິໍ…ເປ….

໕໘໑. ‘‘ຉຕ຺ຕໍ ອຫມທາສິໍ…ເປ….

໕໘໙. ‘‘ອຸປາຫນໍ ອຫມທາສິໍ…ເປ….

໕໙໗. ‘‘ປູວໍ ອຫມທາສິໍ…ເປ….

໖໐໕. ‘‘ໂມທກໍ ອຫມທາສິໍ…ເປ….

໖໑໓. ‘‘ສກ຺ຂລິກໍ ອຫມທາສິໍ, ຠິກ຺ຂຸໂນ ປິຓ຺ຑາຍ ຈຣນ຺ຕສ຺ສ…ເປ….

໖໑໔. ‘‘ຕສ຺ສາ ເມ ປສ຺ສ ວິມານໍ, ອຈ຺ຉຣາ ກາມວຓ຺ຓິນີຫມສ຺ມິໍ;

ອຈ຺ຉຣາສຫສ຺ສສ຺ສາຫໍ, ປວຣາ ປສ຺ສ ປຸຎ຺ຎານໍ ວິປາກໍ.

໖໑໕. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ເອວໍ ມຫາສຕ຺ໂຕ ຕາຫິ ເທວຕາຫິ ກຕສຸຈຣິເຕ ພ຺ຍາກເຕ ຕຸຏ຺ຐມານໂສ ສມ຺ໂມທນໍ ກໂຣນ຺ໂຕ ອຕ຺ຕໂນ ຈ ສຸຈຣິຕຈຣເຓ ຍຸຕ຺ຕປຍຸຕ຺ຕຕໍ ວິວຏ຺ຏຊ຺ຌາສຍຕຎ຺ຈ ປເວເທນ຺ໂຕ ອາຫ –

໖໑໗. ‘‘ສ຺ວາຄຕໍ ວຕ ເມ ອຊ຺ຊ, ສຸປ຺ປຠາຕໍ ສຸຫຸຏ຺ຐິຕໍ;

ຍໍ ອທ຺ທສາມິ ເທວຕາໂຍ, ອຈ຺ຉຣາ ກາມວຓ຺ຓິນິໂຍ.

໖໑໘. ‘‘ອິມາສາຫໍ ຘມ຺ມໍ ສຸຕ຺ວາ, ກາຫາມິ ກຸສລໍ ພຫຸໍ;

ທາເນນ ສມຈຣິຍາຍ, ສຎ຺ຎເມນ ທເມນ ຈ;

ສ຺ວາຫໍ ຕຕ຺ຖ ຄມິສ຺ສາມິ, ຍຕ຺ຖ ຄນ຺ຕ຺ວາ ນ ໂສຈເຣ’’ຕິ.

໓໓໓. ຕຕ຺ຖ ວຕ຺ຖຸຕ຺ຕມທາຍິກາຕິ ວຕ຺ຖານໍ ອຸຕ຺ຕມໍ ເສຏ຺ຐໍ, ວຕ຺ເຖສຸ ວາ ພຫູສຸ ອຸຈ຺ຈິນິຕ຺ວາ ຄຫິຕໍ ອຸກ຺ກໍສຄຕໍ ປວຣໍ ໂກຏິຠູຕໍ ວຕ຺ຖໍ ວຕ຺ຖຸຕ຺ຕມໍ, ຕສ຺ສ ທາຍິກາ. ‘‘ປຸປ຺ຜຸຕ຺ຕມທາຍິກາ’’ຕິອາທີສຸປິ ເອເສວ ນໂຍ. ປິຍຣູປທາຍິກາຕິ ປິຍສຠາວສ຺ສ ປິຍຊາຕິກສ຺ສ ຈ ວຕ຺ຖຸໂນ ທາຍິກາ. ມນາປນ຺ຕິ ມນວຑ຺ຒນກໍ. ທິພ຺ພນ຺ຕິ ທິວິ ຠວຕ຺ຕາ ທິພ຺ພໍ. ອຸເປຈ຺ຈາຕິ ອຸປຄນ຺ຕ຺ວາ ເຈເຕຕ຺ວາ, ‘‘ເອທິສໍ ລເຠຍ຺ຍ’’ນ຺ຕິ ປກປ຺ເປຕ຺ວາຕິ ອຕ຺ໂຖ. ຐານນ຺ຕິ ວິມານາທິກໍ ຐານໍ, ອິສ຺ສຣິຍໍ ວາ. ‘‘ມນາປາ’’ຕິປິ ປາໂຐ, ອຎ຺ເຎສໍ ມນວຑ຺ຒນກາ ຫຸຕ຺ວາຕິ ອຕ຺ໂຖ.

໓໓໔. ປສ຺ສ ປຸຎ຺ຎານໍ ວິປາກນ຺ຕິ ວຕ຺ຖຸຕ຺ຕມທານສ຺ສ ນາມ ອິທມີທິສໍ ຜລໍ ປສ຺ສາຕິ ອຕ຺ຕນາ ລທ຺ຘສມ຺ປຕ຺ຕິໍ ສມ຺ຠາເວນ຺ຕີ ວທຕິ.

໓໔໑. ປຸປ຺ຜຸຕ຺ຕມທາຍິກາຕິ ຣຕນຕ຺ຕຍປູຊາວເສນ ປຸປ຺ຜຸຕ຺ຕມທາຍິກາ, ຕຖາ ຄນ຺ຘຸຕ຺ຕມທາຍິກາຕິ ທຏ຺ຐພ຺ພາ. ຕຕ຺ຖ ປຸປ຺ຜຸຕ຺ຕມໍ ສຸມນປຸປ຺ຜາທິ, ຄນ຺ຘຸຕ຺ຕມໍ ຈນ຺ທນຄນ຺ຘາທິ, ຜລຸຕ຺ຕມໍ ປນສຜລາທິ, ຣສຸຕ຺ຕມໍ ໂຄຣສສປ຺ປິອາທິ ເວທິຕພ຺ພໍ.

໓໗໓. ຄນ຺ຘປຎ຺ຈງ຺ຄຸລິກນ຺ຕິ ຄນ຺ເຘນ ປຎ຺ຈງ຺ຄຸລິກທານໍ. ກສ຺ສປສ຺ສ ຠຄວໂຕ ຖູປມ຺ຫີຕິ ກສ຺ສປສມ຺ມາສມ຺ພຸທ຺ຘສ຺ສ ໂຍຊນິເກ ກນກຖູເປ.

໓໘໑. ປນ຺ຖປຏິປນ຺ເນຕິ ມຄ຺ຄໍ ຄຈ຺ຉນ຺ເຕ. ເອກູໂປສຖນ຺ຕິ ເອກທິວສໍ ອຸໂປສຖວາສໍ.

໓໘໙. ອຸທກມທາສິນ຺ຕິ ມຸຂວິກ຺ຂາລນຕ຺ຖໍ ປິວນຕ຺ຖຎ຺ຈ ອຸທກໍ ປານີຍໍ ອທາສິໍ.

໓໙໗. ຈຓ຺ຑິເກຕິ ຈຓ຺ເຑ. ອນຸສູຍິກາຕິ ອຸສູຍາ ຣຫິຕາ.

໔໐໕. ປຣກມ຺ມກຣີຕິ ປເຣສໍ ເວຍ຺ຍາວຈ຺ຈກາຣິນີ. ອຕ຺ເຖນາຕິ ອຕ຺ຖກິຈ຺ເຈນ. ສໍວິຠາຄິນີ ສກສ຺ສ ຠາຄສ຺ສາຕິ ອຕ຺ຖິການໍ ອຕ຺ຕນາ ປຏິລທ຺ຘຠາຄສ຺ສ ສໍວິຠຊນສີລາ.

໔໑໓. ຂີໂຣທນນ຺ຕິ ຂີຣສມ຺ມິສ຺ສໍ ໂອທນໍ, ຂີເຣນ ສທ຺ຘິໍ ໂອທນໍ ວາ.

໔໓໗. ຕິມ຺ພຣຸສກນ຺ຕິ ຕິຓ຺ຑຸກຜລໍ. ຕິປຸສສທິສາ ເອກາ ວລ຺ລິຊາຕິ ຕິມ຺ພຣຸສໍ, ຕສ຺ສ ຜລໍ ຕິມ຺ພຣຸສກນ຺ຕິ ວທນ຺ຕິ.

໔໔໕. ກກ຺ກາຣິກນ຺ຕິ ຂຸທ຺ທເກຬາລຸກໍ, ຕິປຸສນ຺ຕິ ຈ ວທນ຺ຕິ.

໔໗໗. ຫຕ຺ຖປ຺ປຕາປກນ຺ຕິ ມນ຺ທາມຸຂິໍ.

໕໑໗. ອມ຺ພກຎ຺ຊິກນ຺ຕິ ອມ຺ພິລກຎ຺ຊິກໍ.

໕໒໕. ໂທຓິນິມ຺ມຊ຺ຊນິນ຺ຕິ ສເຕລໍ ຕິລປິຎ຺ຎາກໍ.

໕໕໗. ວິຘູປນນ຺ຕິ ຈຕຸຣສ຺ສພີຊນິໍ.

໕໖໕. ຕາລວຓ຺ຏນ຺ຕິ ຕາລປຕ຺ເຕຫິ ກຕມຓ຺ຑລພີຊນິໍ.

໕໗໓. ໂມຣຫຕ຺ຖນ຺ຕິ ມຍູຣປິຎ຺ເຉ ຫິ ກຕໍ ມກສພີຊນິໍ.

໖໑໗. ສ຺ວາຄຕໍ ວຕ ເມຕິ ມຍ຺ຫໍ ອິຘາຄມນໍ ໂສຠນໍ ວຕ ອໂຫ ສຸນ຺ທຣໍ. ອຊ຺ຊ ສຸປ຺ປຠາຕໍ ສຸຫຸຏ຺ຐິຕນ຺ຕິ ອຊ຺ຊ ມຍ຺ຫໍ ຣຕ຺ຕິຍາ ສຸຏ຺ຐຸ ປຠາຕໍ ສມ຺ມເທວ ວິຠາຍນໍ ຊາຕໍ, ສຍນໂຕ ອຸຏ຺ຐານມ຺ປິ ສຸຫຸຏ຺ຐິຕໍ ສຸຏ຺ຐຸ ອຸຏ຺ຐິຕໍ. ກິໍ ກາຣຓາຕິ ອາຫ ‘‘ຍໍ ອທ຺ທສາມິ ເທວຕາໂຍ’’ຕິອາທິ.

໖໑໘. ຘມ຺ມໍ ສຸຕ຺ວາຕິ ກມ຺ມຜລສ຺ສ ປຈ຺ຈກ຺ຂກຣຓວເສນ ຕຸມ຺ເຫຫິ ກຕໍ ກຸສລໍ ຘມ຺ມໍ ສຸຕ຺ວາ. ກາຫາມີຕິ ກຣິສ຺ສາມິ. ສມຈຣິຍາຍາຕິ ກາຍສມາຈາຣິກສ຺ສ ສຸຈຣິຕສ຺ສ ຈຣເຓນ. ສຎ຺ຎເມນາຕິ ສີລສໍວເຣນ. ທເມນາຕິ ມນຈ຺ຉຏ຺ຐານໍ ອິນ຺ທ຺ຣິຍານໍ ທເມນ. ອິທານິ ຕສ຺ສ ກຸສລສ຺ສ ອຕ຺ຕໂນ ໂລກສ຺ສ ຈ ວິວຏ຺ຏູປນິສ຺ສຍຕໍ ທສ຺ເສຕຸໍ ‘‘ສ຺ວາຫໍ ຕຕ຺ຖ ຄມິສ຺ສາມິ, ຍຕ຺ຖ ຄນ຺ຕ຺ວາ ນ ໂສຈເຣ’’ຕິ ວຸຕ຺ຕໍ.

ເອວມຍໍ ຍທິປິ ວຕ຺ຖຸຕ຺ຕມທາຍິກາວິມານາທິວເສນ ຉຕ຺ຕິໍສວິມານສງ຺ຄຫາ ເທສນາ ອາຍສ຺ມໂຕ ມຫາໂມຄ຺ຄລ຺ລານສ຺ສ ວິຍ ຄຸຕ຺ຕິລາຈຣິຍສ຺ສາປິ ວິຠາວນວເສນ ປວຕ຺ຕາຕິ ‘‘ຄຸຕ຺ຕິລວິມານ’’ນ຺ຕ຺ເວວ ສງ຺ຄຫໍ ອາຣຸຬ຺ຫາ, ວິມານານິ ປນ ອິຕ຺ຖິປຏິພທ຺ຘານີຕິ ອິຕ຺ຖິວິມາເນເຍວ ສງ຺ຄຫິຕານິ. ຕາ ປນ ອິຕ຺ຖິໂຍ ກສ຺ສປສ຺ສ ທສພລສ຺ສ ກາເລ ຍຖາວຸຕ຺ຕຘມ຺ມຈຣເຓ ອປຣາປຣຸປ຺ປນ຺ນເຈຕນາວເສນ ທຸຕິຍຕ຺ຕຠາວໂຕ ປຏ຺ຐາຍ ເອກໍ ພຸທ຺ຘນ຺ຕຣໍ ເທວໂລເກ ເອວ ສໍສຣນ຺ຕິໂຍ ອມ຺ຫາກມ຺ປິ ຠຄວໂຕ ກາເລ ຕາວຕິໍສຠວເນເຍວ ນິພ຺ພຕ຺ຕາ, ອາຍສ຺ມຕາ ມຫາໂມຄ຺ຄລ຺ລາເນນ ປຸຈ຺ຉິຕາ ກມ຺ມສຣິກ຺ຂຕາຍ ຄຸຕ຺ຕິລາຈຣິເຍນ ປຸຈ຺ຉິຕກາເລ ວິຍ ພ຺ຍາກຣິໍສູຕິ ທຏ຺ຐພ຺ພາ.

ຄຸຕ຺ຕິລວິມານວຓ຺ຓນາ ນິຏ຺ຐິຕາ.