໗. ກາຕິຍານຕ຺ເຖຣຄາຖາວຓ຺ຓນາ

ອຸຏ຺ເຐຫີຕິອາທິກາ ອາຍສ຺ມໂຕ ກາຕິຍານຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ອຎ຺ຎຕຣສ຺ສ ໂກສິຍໂຄຕ຺ຕສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ໂຕ, ມາຕຸໂຄຕ຺ຕວເສນ ປນ ກາຕິຍາໂນຕິ ລທ຺ຘນາໂມ ວຍປ຺ປຕ຺ໂຕ ສາມຎ຺ຎການິຕ຺ເຖຣສ຺ສ ຄິຫິສຫາໂຍ ເຖຣໍ ທິສ຺ວາ ປພ຺ພຊິໂຕ ສມຓຘມ຺ມໍ ກໂຣນ຺ໂຕ ຣຕ຺ຕິໍ ‘‘ນິທ຺ທາຠິຠວໍ ວິໂນເທສ຺ສາມີ’’ຕິ ຈງ຺ກມໍ ອາຣຸຫິ. ໂສ ຈງ຺ກມນ຺ໂຕ ນິທ຺ທາຍ ອຠິຠູໂຕ ປຈລາຍມາໂນ ປຣິປຕິຕ຺ວາ ຕຕ຺ເຖວ ອນນ຺ຕຣຫິຕາຍ ຠູມິຍາ ນິປຊ຺ຊິ, ສຕ຺ຖາ ຕສ຺ສ ຕໍ ປວຕ຺ຕິໍ ທິສ຺ວາ ສຍໍ ຕຕ຺ຖ ຄນ຺ຕ຺ວາ ອາກາເສ ຐຕ຺ວາ ‘‘ກາຕິຍານາ’’ຕິ ສຎ຺ຎໍ ອທາສິ. ໂສ ສຕ຺ຖາຣໍ ທິສ຺ວາ ອຸຏ຺ຐຫິຕ຺ວາ ວນ຺ທິຕ຺ວາ ສໍເວຄຊາໂຕ ອຏ຺ຐາສິ. ອຖສ຺ສ ສຕ຺ຖາ ຘມ຺ມໍ ເທເສນ຺ໂຕ –

໔໑໑. ‘‘ອຸຏ຺ເຐຫິ ນິສີທ ກາຕິຍານ, ມາ ນິທ຺ທາພຫຸໂລ ອຫຸ ຊາຄຣສ຺ສຸ;

ມາ ຕໍ ອລສໍ ປມຕ຺ຕພນ຺ຘຸ, ກູເຏເນວ ຊິນາຕຸ ມຈ຺ຈຸຣາຊາ.

໔໑໒. ‘‘ເສຍ຺ຍຖາປິ ມຫາສມຸທ຺ທເວໂຄ, ເອວໍ ຊາຕິຊຣາຕິ ວຕ຺ຕເຕ ຕໍ;

ໂສ ກໂຣຫິ ສຸທີປມຕ຺ຕໂນ ຕ຺ວໍ, ນ ຫິ ຕາຓໍ ຕວ ວິຊ຺ຊເຕວ ອຎ຺ຎໍ.

໔໑໓. ‘‘ສຕ຺ຖາ ຫິ ວິເຊສິ ມຄ຺ຄເມຕໍ, ສງ຺ຄາ ຊາຕິຊຣາຠຍາ ອຕີຕໍ;

ປຸພ຺ພາປຣຣຕ຺ຕມປ຺ປມຕ຺ໂຕ, ອນຸຍຸຎ຺ຊສ຺ສຸ ທຬ຺ຫໍ ກໂຣຫິ ໂຍຄໍ.

໔໑໔. ‘‘ປຸຣິມານິ ປມຸຎ຺ຈ ພນ຺ຘນານິ, ສງ຺ຆາຏິຂຸຣມຸຓ຺ຑຠິກ຺ຂໂຠຊີ;

ມາ ຂິຑ຺ຑາຣຕິຎ຺ຈ ມາ ນິທ຺ທໍ, ອນຸຍຸຎ຺ຊິຕ຺ຖ ຌາຍ ກາຕິຍານ.

໔໑໕. ‘‘ຌາຍາຫິ ຊິນາຫິ ກາຕິຍານ, ໂຍຄກ຺ເຂມປເຖສຸ ໂກວິໂທສິ;

ປປ຺ປຸຍ຺ຍ ອນຸຕ຺ຕຣໍ ວິສຸທ຺ຘິໍ, ປຣິນິພ຺ພາຫິສິ ວາຣິນາວ ໂຊຕິ.

໔໑໖. ‘‘ປຊ຺ໂຊຕກໂຣ ປຣິຕ຺ຕຣໍໂສ, ວາເຕນ ວິນມ຺ຍເຕ ລຕາວ;

ເອວມ຺ປິ ຕຸວໍ ອນາທິຍາໂນ, ມາຣໍ ອິນ຺ທສໂຄຕ຺ຕ ນິທ຺ຘຸນາຫິ;

ໂສ ເວທຍິຕາສຸ ວີຕຣາໂຄ, ກາລໍ ກງ຺ຂ ອິເຘວ ສີຕິຠູໂຕ’’ຕິ. –

ອິມາ ຄາຖາ ອຠາສິ.

ຕຕ຺ຖ ອຸຏ຺ເຐຫີຕິ ນິທ຺ທູປຄມນໂຕ ອຸຏ຺ຐຫນ຺ໂຕ ອຸຏ຺ຐານວີຣິຍໍ ກໂຣຫິ. ຍສ຺ມາ ນິປຊ຺ຊາ ນາມ ໂກສຊ຺ຊປກ຺ຂິຍາ, ຕສ຺ມາ ມາ ສຍິ. ນິສີທາຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ ນິສີທ. ກາຕິຍານາຕິ ຕໍ ນາເມນ ອາລປຕິ. ມາ ນິທ຺ທາພຫຸໂລ ອຫູຕິ ນິທ຺ທາພຫຸໂລ ນິທ຺ທາຠິຠູໂຕ ມາ ອຫຸ. ຊາຄຣສ຺ສູຕິ ຊາຄຣ, ຊາຄຣິຍມນຸຍຸຕ຺ໂຕ ໂຫຫິ. ມາ ຕໍ ອລສນ຺ຕິ ຊາຄຣິຍໍ ອນນຸຍຸຎ຺ຊນ຺ຕໍ ຕໍ ອລສໍ ກຸສີຕໍ ປມຕ຺ຕພນ຺ຘຸ ມຈ຺ຈຸຣາຊາ ກູເຏເນວ ອທ຺ທຸຫເນນ ວິຍ ເນສາໂທ ມິຄໍ ວາ ປກ຺ຂິໍ ວາ ຊຣາໂຣເຄຫິ ມາ ຊິນາຕຸ ມາ ອຠິຠວຕຸ, ມາ ອຊ຺ໂຌຕ຺ຖຣຕູຕິ ອຕ຺ໂຖ.

ເສຍ຺ຍຖາປີຕິ ເສຍ຺ຍຖາ ອປິ. ມຫາສມຸທ຺ທເວໂຄຕິ ມຫາສມຸທ຺ທສ຺ສ ອູມິເວໂຄ. ເອວນ຺ຕິ ຍຖາ ນາມ ມຫາສມຸທ຺ທອູມິເວໂຄ ອຸປຣູປຣິ ອຸຏ຺ຐຫນ຺ໂຕ ຕໍ ອຠິກ຺ກມິຕຸໍ ອສກ຺ໂກນ຺ຕໍ ປຸຣິສໍ ອຠິຠວຕິ, ເອວໍ ຊາຕິ ຊຣາ ຈ ໂກສຊ຺ຊາຠິຠູຕໍ ຕໍ ອຕິວຕ຺ຕເຕ ອຸປຣູປຣິ ອຊ຺ໂຌຕ຺ຖຣຕິ. ໂສ ກໂຣຫີຕິ ໂສ ຕ຺ວໍ, ກາຕິຍານ, ຈຕູຫິ ໂອເຆຫິ ອນຊ຺ໂຌຕ຺ຖຣຓີຍໍ ອຣຫຕ຺ຕຜລສງ຺ຂາຕໍ ສຸທີປໍ ອຕ຺ຕໂນ ກໂຣຫິ ອຕ຺ຕໂນ ສນ຺ຕາເນ ອຸປ຺ປາເທຫິ. ນ ຫິ ຕາຓໍ ຕວ ວິຊ຺ຊເຕວ ອຎ຺ຎນ຺ຕິ ຫີຕິ ເຫຕຸອຕ຺ເຖ ນິປາໂຕ. ຍສ຺ມາ ຕໂຕ ອຄ຺ຄຜລໂຕ ອຎ຺ຎໍ ຕວ ຕາຓໍ ນາມ ອິຘ ວາ ຫຸຣໍ ວາ ນ ອຸປລພ຺ຠຕິ, ຕສ຺ມາ ຕໍ ອຣຫຕ຺ຕສງ຺ຂາຕໍ ສຸທີປໍ ກໂຣຫີຕິ.

ສຕ຺ຖາ ຫິ ວິເຊສິ ມຄ຺ຄເມຕນ຺ຕິ ຍໍ ສາເຘຕຸໍ ອວິສຫນ຺ຕາ ຍໂຕ ປຣາຊິຕາ ປຸຖູ ອຎ຺ຎຕິຕ຺ຖິຍາ, ຕເທຕໍ ຕສ຺ສ ສຸທີປສ຺ສ ກາຣຓຠູຕໍ ປຎ຺ຈວິຘສງ຺ຄໂຕ ຊາຕິອາທິຠຍໂຕ ຈ ອຕີຕໍ ອຣິຍມຄ຺ຄໍ ເທວປຸຕ຺ຕມາຣາທິເກ ອຠິຠວິຕ຺ວາ ຕຸຍ຺ຫໍ ສຕ຺ຖາ ວິເຊສິ ສາເຘສິ. ຍສ຺ມາ ສຕ຺ຖຸ ສນ຺ຕກໍ ນາມ ສາວເກນ ອຘິຄນ຺ຕພ຺ພໍ ນ ວິສ຺ສຊ຺ເຊຕພ຺ພໍ, ຕສ຺ມາ ຕສ຺ສ ອຘິຄມາຍ ປຸພ຺ພຣຕ຺ຕາປຣຣຕ຺ຕໍ ປຸຣິມຍາມໍ ປຈ຺ຉິມຍາມຎ຺ຈ, ອປ຺ປມຕ຺ໂຕ ສໂຕ ສມ຺ປຊາໂນ ຫຸຕ຺ວາ ອນຸຍຸຎ຺ຊ ໂຍຄໍ ຠາວນໍ ທຬ຺ຫຎ຺ຈ ກໂຣຫິ.

ປຸຣິມານິ ປມຸຎ຺ຈ ພນ຺ຘນານີຕິ ປຸຣິມການິ ຄິຫິກາເລ ອາພທ຺ຘານິ ຄິຫິພນ຺ຘນານິ ກາມຄຸຓພນ຺ຘນານິ ປມຸຎ຺ຈ ວິສ຺ສຊ຺ເຊຫິ, ຕຕ຺ຖ ອນເປກ຺ໂຂ ໂຫຫິ. ສງ຺ຆາຏິຂຸຣມຸຓ຺ຑຠິກ຺ຂໂຠຊີຕິ ສງ຺ຆາຏິຘາຣີ ຂຸເຣນ ກຕສິຣມຸຓ຺ໂຑ ຠິກ຺ຂາຫາຣໂຠຊີ, ຕິວິຘມ຺ເປຕໍ ປຸຣິມພນ຺ຘນປໂມກ຺ຂສ຺ສ ຂິຑ຺ຑາຣຕິນິທ຺ທານນຸໂຍຄສ຺ສ ຈ ກາຣຓວຈນໍ. ຍສ຺ມາ ຕ຺ວໍ ສງ຺ຆາຏິປາຣຸໂຕ ມຸຓ຺ໂຑ ຠິກ຺ຂາຫາໂຣ ຊີວຕິ, ຕສ຺ມາ ເຕ ກາມສຸຂານຸໂຍໂຄ ຂິຑ຺ຑາຣຕິນິທ຺ທານຸໂຍໂຄ ຈ ນ ຍຸຕ຺ໂຕຕິ ຕໂຕ ປຸຣິມານິ ປມຸຎ຺ຈ ພນ຺ຘນານິ ຂິຑ຺ຑາຣຕິໍ ນິທ຺ທຎ຺ຈ ມານຸຍຸຎ຺ຊິຕ຺ຖາຕິ ໂຍຊນາ. ຌາຍາຕິ ຌາຍສ຺ສຸ ອາຣມ຺ມຓູປນິຊ຺ຌານໍ ອນຸຍຸຎ຺ຊ.

ຕໍ ປນ ອນຸຍຸຎ຺ຊນ຺ໂຕ ເຍນ ຌາເນນ ຌາຍໂຕ ກິເລສາ ສພ຺ພໂສ ຊິຕາ ໂຫນ຺ຕິ, ຕໍ ລກ຺ຂຓູປນິຊ຺ຌານໍ ອນຸຍຸຎ຺ຊາຕິ ທສ຺ເສນ຺ໂຕ ‘‘ຌາຍາຫິ ຊິນາຫີ’’ຕິ ອາຫ. ໂຍຄກ຺ເຂມປເຖສຸ ໂກວິໂທສີຕິ ຈຕູຫິ ໂຍເຄຫິ ເຂມສ຺ສ ນິພ຺ພານສ຺ສ ປຖຠູເຕສຸ ໂພຘິປກ຺ຂິຍຘມ຺ເມສຸ ກຸສໂລ ເຉໂກ ອສິ, ຕສ຺ມາ ຠາວນໍ ອຸສ຺ສຸກ຺ກາເປນ຺ໂຕ ອນຸຕ຺ຕຣໍ ອຸຕ຺ຕຣຣຫິຕໍ, ວິສຸທ຺ຘິໍ ນິພ຺ພານໍ ອຣຫຕ຺ຕຎ຺ຈ ປປ຺ປຸຍ຺ຍ ປາປຸຓິຕ຺ວາ ປນ ຕ຺ວໍ ປຣິນິພ຺ພາຫິສິ. ວາຣິນາວ ໂຊຕີຕິ ມຫຕາ ສລິລວຸຏ຺ຐິນິປາເຕນ ອຄ຺ຄິຂນ຺ໂຘ ວິຍ ອຣິຍມຄ຺ຄວຸຏ຺ຐິນິປາເຕນ ປຣິນິພ຺ພາຍິສ຺ສຕິ.

ປຊ຺ໂຊຕກໂຣຕິ ປຊ຺ໂຊຕິໍ ກໂຣ ປທີໂປ. ປຣິຕ຺ຕຣໍໂສຕິ ຂຸທ຺ທກຈ຺ຈິໂກ. ວິນມ຺ຍເຕຕິ ວິນມີຍຕິ ອປນິຍ຺ຍຕິ. ລຕາວາຕິ ວລ຺ລິ ວິຍ. ອິທໍ ວຸຕ຺ຕໍ ໂຫຕິ – ຍຖາ ວຏ຺ຏິອາທິປຈ຺ຈຍເວກລ຺ເລນ ປຣິຕ຺ຕຣໍໂສ ມນ຺ທປໂຠ ປທີໂປ ອປ຺ປິກາ ລຕາ ວາ ວາເຕນ ວິຘມິຍ຺ຍຕິ ວິທ຺ຘໍສິຍ຺ຍຕິ, ເອວໍ ຕຸວມ຺ປິ. ໂກສິຍໂຄຕ຺ຕຕາຍ, ອິນ຺ທສໂຄຕ຺ຕ, ອິນ຺ທສມານໂຄຕ຺ຕໍ. ມາຣໍ ຕສ຺ສ ວເສ ອນາວຕ຺ຕນາ ອນຸປາທານໂຕ ຈ ອນາທິຍາໂນ, ນິທ຺ຘຸນາຫິ ວິຘເມຫິ ວິທ຺ຘໍເສຫິ. ເອວໍ ປນ ວິທ຺ຘໍສມາໂນ ໂສ ຕ຺ວໍ ເວທຍິຕາສຸ ສພ຺ພາສຸ ເວທນາສຸ ວິຄຕຈ຺ຉນ຺ທຣາໂຄ ອິເຘວ ອິມສ຺ມິໍເຍວ ອຕ຺ຕຠາເວ ສພ຺ພກິເລສທຣຖປຣິຬາຫາຠາເວນ ສີຕິຠູໂຕ ນິພ຺ພຸໂຕ ອຕ຺ຕໂນ ປຣິນິພ຺ພານກາລໍ ກງ຺ຂ ອາຄເມຫີຕິ. ເອວໍ ສຕ຺ຖາຣາ ອນຸປາທິເສສໍ ນິພ຺ພານໍ ປາເປຕ຺ວາ ເທສນາຍ ກຕາຍ ເຖໂຣ ເທສນາວສາເນ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ອຣຫຕ຺ຕໍ ປນ ປຕ຺ວາ ສຕ຺ຖາຣາ ເທສິຕນິຍາເມເນວ ອິມາ ຄາຖາ ອຠາສິ. ຕາ ເອວ ອິມາ ຄາຖາ ເຖຣສ຺ສ ອຎ຺ຎາພ຺ຍາກຣຓຎ຺ຈ ຊາຕາ.

ກາຕິຍານຕ຺ເຖຣຄາຖາວຓ຺ຓນາ ນິຏ຺ຐິຕາ.