໙. ວິຊິຕເສນຕ຺ເຖຣຄາຖາວຓ຺ຓນາ

ໂອລຄ຺ເຄສ຺ສາມີຕິອາທິກາ ອາຍສ຺ມໂຕ ວິຊິຕເສນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຆຣາວາສໍ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ອຣຎ຺ເຎ ວິຫຣນ຺ໂຕ ອາກາເສນ ຄຈ຺ຉນ຺ຕໍ ຠຄວນ຺ຕໍ ທິສ຺ວາ ປສນ຺ນມານໂສ ປສນ຺ນາກາຣໍ ທສ຺ເສນ຺ໂຕ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ສຕ຺ຖາ ຕສ຺ສ ອຊ຺ຌາສຍໍ ຎຕ຺ວາ ອາກາສໂຕ ໂອຕຣິ. ໂສ ຠຄວໂຕ ມໂນຫຣານິ ມຘຸຣານິ ຜລານິ ອຸປເນສິ, ປຏິຄ຺ຄເຫສິ ຠຄວາ ອນຸກມ຺ປໍ ອຸປາທາຍ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ຫຕ຺ຖາຈຣິຍກຸເລ ນິພ຺ພຕ຺ຕິຕ຺ວາ ວິຊິຕເສໂນຕິ ລທ຺ຘນາໂມ ວິຎ຺ຎຸຕໍ ປາປຸຓິ. ຕສ຺ສ ມາຕຸລາ ເສໂນ ຈ ອຸປເສໂນ ຈາຕິ ທ຺ເວ ຫຕ຺ຖາຈຣິຍາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ຘາ ປພ຺ພຊິຕ຺ວາ ວາສຘຸຣໍ ປູເຣນ຺ຕາ ອຣຫຕ຺ຕໍ ປາປຸຓິໍສຸ. ວິຊິຕເສໂນປິ ຫຕ຺ຖິສິປ຺ເປ ນິປ຺ຜຕ຺ຕິໍ ຄໂຕ ນິສ຺ສຣຓຊ຺ຌາສຍຕາຍ ຆຣາວາເສ ອລຄ຺ຄມານໂສ ສຕ຺ຖຸ ຍມກປາຏິຫາຣິຍໍ ທິສ຺ວາ ປຏິລທ຺ຘສທ຺ໂຘ ມາຕຸລຕ຺ເຖຣານໍ ສນ຺ຕິເກ ປພ຺ພຊິຕ຺ວາ ເຕສໍ ໂອວາທານຸສາສນິຍາ ວິປສ຺ສນາຍ ກມ຺ມໍ ກໂຣນ຺ໂຕ ວິປສ຺ສນາວີຖິໍ ລງ຺ຆິຕ຺ວາ ພຫິທ຺ຘາ ນານາຣມ຺ມເຓ ວິຘາວນ຺ຕໍ ອຕ຺ຕໂນ ຈິຕ຺ຕໍ ໂອວທນ຺ໂຕ –

໓໕໕. ‘‘ໂອລຄ຺ເຄສ຺ສາມິ ເຕ ຈິຕ຺ຕ, ອາຓິທ຺ວາເຣວ ຫຕ຺ຖິນໍ;

ນ ຕໍ ປາເປ ນິໂຍເຊສ຺ສໍ, ກາມຊາລໍ ສຣີຣຊໍ.

໓໕໖. ‘‘ຕ຺ວໍ ໂອລຄ຺ໂຄ ນ ຄຈ຺ຉສິ, ທ຺ວາຣວິວຣໍ ຄໂຊວ ອລຠນ຺ໂຕ;

ນ ຈ ຈິຕ຺ຕກລິ ປຸນປ຺ປຸນໍ, ປສກ຺ກ ປາປຣໂຕ ຈຣິສ຺ສສິ.

໓໕໗. ‘‘ຍຖາ ກຸຎ຺ຊຣໍ ອທນ຺ຕໍ, ນວຄ຺ຄຫມງ຺ກຸສຄ຺ຄໂຫ;

ພລວາ ອາວຕ຺ເຕຕິ ອກາມໍ, ເອວໍ ອາວຕ຺ຕຍິສ຺ສໍ ຕໍ.

໓໕໘. ‘‘ຍຖາ ວຣຫຍທມກຸສໂລ, ສາຣຖິປວໂຣ ທເມຕິ ອາຊຎ຺ຎໍ;

ເອວໍ ທມຍິສ຺ສໍ ຕໍ, ປຕິຏ຺ຐິໂຕ ປຎ຺ຈສຸ ພເລສຸ.

໓໕໙. ‘‘ສຕິຍາ ຕໍ ນິພນ຺ຘິສ຺ສໍ, ປຍຸຕ຺ໂຕ ເຕ ທເມສ຺ສາມິ;

ວີຣິຍຘຸຣນິຄ຺ຄຫິໂຕ, ນ ຍິໂຕ ທູຣໍ ຄມິສ຺ສເສ ຈິຕ຺ຕາ’’ຕິ. –

ຄາຖາ ອຠາສິ.

ຕຕ຺ຖ ໂອລຄ຺ເຄສ຺ສາມີຕິ ສໍວຣິສ຺ສາມິ ນິວາເຣສ຺ສາມິ. ເຕຕິ ຕໍ. ອຸປໂຍຄຕ຺ເຖ ຫິ ອິທໍ ສາມິວຈນໍ. ເຕ ຄມນນ຺ຕິ ວາ ວຈນເສໂສ. ຫຕ຺ຖິນນ຺ຕິ ຈ ຫຕ຺ຖິນ຺ຕິ ອຕ຺ໂຖ. ຈິຕ຺ຕາຕິ ອຕ຺ຕໂນ ຈິຕ຺ຕໍ ອາລປຕິ. ຍຖາ ຕໍ ວາເຣຕຸກາໂມ, ຕໍ ທສ຺ເສນ຺ໂຕ ‘‘ອາຓິທ຺ວາເຣວ ຫຕ຺ຖິນ’’ນ຺ຕິ ອາຫ. ອາຓິທ຺ວາຣໍ ນາມ ປາກາຣພທ຺ຘສ຺ສ ນຄຣສ຺ສ ຂຸທ຺ທກທ຺ວາຣໍ, ຍໍ ຆຏິກາຉິທ຺ເທ ອາຓິມ຺ຫິ ປກ຺ຂິຕ຺ເຕ ຍນ຺ເຕນ ວິນາ ອພ຺ຠນ຺ຕເຣ ຐິເຕຫິປິ ວິວຣິຕຸໍ ນ ສກ຺ກາ. ເຍນ ມນຸສ຺ສຄວສ຺ສມຫິໍສາທໂຍ ນ ນິຄ຺ຄນ຺ຕຸໍ ສກ຺ກາ. ນຄຣໂຕ ພຫິ ນິຄ຺ຄນ຺ຕຸກາມມ຺ປິ ຫຕ຺ຖິໍ ຍໂຕ ປໂລເຠຕ຺ວາ ຫຕ຺ຖາຈຣິໂຍ ຄມນໍ ນິວາເຣສິ. ອຖ ວາ ອາຓິທ຺ວາຣໍ ນາມ ປລິຆທ຺ວາຣໍ. ຕຕ຺ຖ ຫິ ຕິຣິຍໍ ປລິຆໍ ຐເປຕ຺ວາ ຣຸກ຺ຂສູຈິສງ຺ຂາຕໍ ອາຓິໍ ປລິຆສີເສ ອາວຸຓນ຺ຕິ. ປາເປຕິ ຣູປາທີສຸ ອຸປ຺ປຊ຺ຊນກອຠິຊ຺ຌາທິປາປຘມ຺ເມ ຕໍ ນ ນິໂຍເຊສ຺ສໍ ນ ນິໂຍຊິສ຺ສາມິ. ກາມຊາລາຕິ ກາມສ຺ສ ຊາລຠູຕໍ. ຍຖາ ຫິ ມຈ຺ຉພນ຺ຘມິຄລຸທ຺ທານໍ ຊາລໍ ນາມ ມຈ຺ຉາທີນໍ ເຕສໍ ຍຖາກາມກາຣສາຘນໍ, ເອວໍ ອໂຍນິໂສມນສິກາຣານຸປາຕິຕໍ ຈິຕ຺ຕໍ ມາຣສ຺ສ ກາມກາຣສາຘນໍ. ເຕນ ຫິ ໂສ ສຕ຺ເຕ ອນຕ຺ເຖສຸ ປາເຕຕິ. ສຣີຣຊາຕິ ສຣີເຣສຸ ອຸປ຺ປຊ຺ຊນກ. ປຎ຺ຈໂວກາຣຠເວ ຫິ ຈິຕ຺ຕໍ ຣູປປຏິພທ຺ຘວຸຕ຺ຕິຕາຍ ‘‘ສຣີຣຊ’’ນ຺ຕິ ວຸຈ຺ຈຕິ.

ຕ຺ວໍ ໂອລຄ຺ໂຄ ນ ຄຈ຺ຉສີຕິ ຕ຺ວໍ, ຈິຕ຺ຕກລິ, ມຍາ ສຕິປຎ຺ຎາປໂຕທອງ຺ກຸເສຫິ ວາຣິໂຕ ນ ທານິ ຍຖາຣຸຈິໍ ຄມິສ຺ສສິ, ອໂຍນິໂສມນສິກາຣວເສນ ຍຖາກາມໍ ວຕ຺ຕິຕຸໍ ນ ລຠິສ຺ສສິ. ຍຖາ ກິໍ? ທ຺ວາຣວິວຣໍ ຄໂຊວ ອລຠນ຺ໂຕ ນຄຣໂຕ ຄຊນິໂຣຘໂຕ ວາ ນິຄ຺ຄມນາຍ ທ຺ວາຣວິວຣກໍ ອລຠມາໂນ ຫຕ຺ຖີ ວິຍ. ຈິຕ຺ຕກລີຕິ ຈິຕ຺ຕກາຬກຓ຺ຓິ. ປຸນປ຺ປຸນນ຺ຕິ ອປຣາປຣໍ. ປສກ຺ກາຕິ ສຣຓສມ຺ປສ຺ສາສວເສນ. ປາປຣໂຕຕິ ປາປກມ຺ມນິຣໂຕ ປຸພ຺ເພ ວິຍ ອິທານິ ນ ຈຣິສ຺ສສິ ຕຖາ ຈຣິຕຸໍ ນ ທສ຺ສາມີຕິ ອຕ຺ໂຖ.

ອທນ຺ຕນ຺ຕິ ອທມິຕໍ ຫຕ຺ຖິສິກ຺ຂໍ ອສິກ຺ຂິຕໍ. ນວຄ຺ຄຫນ຺ຕິ ອຈິຣຄຫິຕໍ. ອງ຺ກຸສຄ຺ຄໂຫຕິ ຫຕ຺ຖາຈຣິໂຍ. ພລວາຕິ ກາຍພເລນ ຎາຓພເລນ ຈ ພລວາ. ອາວຕ຺ເຕຕິ ອກາມນ຺ຕິ ອນິຈ຺ຉນ຺ຕເມວ ນິເສຘນໂຕ ນິວຕ຺ເຕຕິ. ເອວໍ ອາວຕ຺ຕຍິສ຺ສນ຺ຕິ ຍຖາ ຍຖາວຸຕ຺ຕໍ ຫຕ຺ຖິໍ ຫຕ຺ຖາຈຣິໂຍ, ເອວໍ ຕໍ ຈິຕ຺ຕໍ ຈິຕ຺ຕກລິໍ ທຸຈ຺ຈຣິຕນິເສຘນໂຕ ນິວຕ຺ຕຍິສ຺ສາມິ.

ວຣຫຍທມກຸສໂລຕິ ອຸຕ຺ຕມານໍ ອສ຺ສທມ຺ມານໍ ທມເນ ກຸສໂລ. ຕໂຕ ເອວ ສາຣຖິປວໂຣ ອສ຺ສທມ຺ມສາຣຖີສຸ ວິສິຏ຺ໂຐ ທເມຕິ ອາຊຎ຺ຎໍ ອາຊານີຍໍ ອສ຺ສທມ຺ມໍ ເທສກາລານຸຣູປໍ ສຓ຺ຫຜຣຸເສຫິ ທເມຕິ ວິເນຕິ ນິພ຺ພິເສວນໍ ກໂຣຕິ. ປຕິຏ຺ຐິໂຕ ປຎ຺ຈສຸ ພເລສູຕິ ສທ຺ຘາທີສຸ ປຎ຺ຈສຸ ພເລສຸ ປຕິຏ຺ຐິໂຕ ຫຸຕ຺ວາ ອສ຺ສທ຺ຘິຍາທິນິເສຘນໂຕ ຕໍ ທມຍິສ຺ສໍ ທເມສ຺ສາມີຕິ ອຕ຺ໂຖ.

ສຕິຍາ ຕໍ ນິພນ຺ຘິສ຺ສນ຺ຕິ ໂຄຈຣຊ຺ຌຕ຺ຕໂຕ ພຫິ ຄນ຺ຕຸໍ ອເທນ຺ໂຕ ສຕິໂຍຕ຺ເຕນ ກມ຺ມຏ຺ຐານຖມ຺ເຠ, ຈິຕ຺ຕກລິ, ຕໍ ນິພນ຺ຘິສ຺ສາມິ ນິຍເມສ຺ສາມິ. ປຍຸຕ຺ໂຕ ເຕ ທເມສ຺ສາມີຕິ ຕຕ຺ຖ ນິພນ຺ຘນ຺ໂຕ ເອວ ຍຸຕ຺ຕປ຺ປຍຸຕ຺ໂຕ ຫຸຕ຺ວາ ເຕ ທເມສ຺ສາມິ, ສໍກິເລສມລໂຕ ຕໍ ວິໂສເຘສ຺ສາມິ. ວີຣິຍຘຸຣນິຄ຺ຄຫິໂຕຕິ ຍຖາວຸຕ຺ໂຕ ເຉເກນ ສຸສາຣຖິນາ ຍຸເຄ ໂຍຊິໂຕ ຍຸຄນິຄ຺ຄຫິໂຕ ຍຸຄນ຺ຕຣຄໂຕ ຕໍ ນາຕິກ຺ກມຕິ, ເອວໍ ຕ຺ວມ຺ປິ ຈິຕ຺ຕ, ມມ ວີຣິຍຘຸເຣ ນິຄ຺ຄຫິໂຕ ສກ຺ກຈ຺ຈກາຣິຕາຍ ສາຕຈ຺ຈກາຣິຕາຍ ອຎ຺ຎຖາ ວຕ຺ຕິຕຸໍ ອລຠນ຺ໂຕ ອິໂຕ ໂຄຈຣຊ຺ຌຕ຺ຕໂຕ ທູຣໍ ພຫິ ນ ຄມິສ຺ສສິ. ຠາວນານຸຍຸຕ຺ຕສ຺ສ ຫິ ກມ຺ມຏ຺ຐານໂຕ ອຎ຺ຎໍ ອາສນ຺ນມ຺ປິ ລກ຺ຂຓໂຕ ທູຣເມວາຕິ ເອວໍ ເຖໂຣ ອິມາຫິ ຄາຖາຫິ ອຕ຺ຕໂນ ຈິຕ຺ຕໍ ນິຄ຺ຄຓ຺ຫນ຺ໂຕວ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໕.໒໒-໓໐) –

‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ທ຺ວຕ຺ຕິໍສວຣລກ຺ຂຓໍ;

ວິປິນຄ຺ເຄນ ຄຈ຺ຉນ຺ຕໍ, ສາລຣາຊໍວ ຜຸລ຺ລິຕໍ.

‘‘ຕິຓຕ຺ຖຣໍ ປຎ຺ຎາເປຕ຺ວາ, ພຸທ຺ຘເສຏ຺ຐໍ ອຍາຈຫໍ;

ອນຸກມ຺ປຕຸ ມໍ ພຸທ຺ໂຘ, ຠິກ຺ຂໍ ອິຈ຺ຉາມິ ທາຕເວ.

‘‘ອນຸກມ຺ປໂກ ກາຣຸຓິໂກ, ອຕ຺ຖທສ຺ສີ ມຫາຍໂສ;

ມມ ສງ຺ກປ຺ປມຎ຺ຎາຍ, ໂອຣູຫິ ມມ ອສ຺ສເມ.

‘‘ໂອໂຣຫິຕ຺ວານ ສມ຺ພຸທ຺ໂຘ, ນິສີທິ ປຓ຺ຓສນ຺ຖເຣ;

ຠລ຺ລາຕກໍ ຄເຫຕ຺ວານ, ພຸທ຺ຘເສຏ຺ຐສ຺ສທາສຫໍ.

‘‘ມມ ນິຊ຺ຌາຍມານສ຺ສ, ປຣິຠຸຎ຺ຊິ ຕທາ ຊິໂນ;

ຕຕ຺ຖ ຈິຕ຺ຕໍ ປສາເທຕ຺ວາ, ອຠິວນ຺ທິໍ ຕທາ ຊິນໍ.

‘‘ອຏ຺ຐາຣເສ ກປ຺ປສເຕ, ຍໍ ຜລມທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຎ຺ຎໍ ພ຺ຍາກໂຣນ຺ໂຕປິ ອິມາ ຄາຖາ ອຠາສິ.

ວິຊິຕເສນຕ຺ເຖຣຄາຖາວຓ຺ຓນາ ນິຏ຺ຐິຕາ.