໑໐. ຍສທຕ຺ຕຕ຺ເຖຣຄາຖາວຓ຺ຓນາ

ອຸປາຣມ຺ຠຈິຕ຺ໂຕຕິອາທິກາ ອາຍສ຺ມໂຕ ຍສທຕ຺ຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິ. ຕຖາ ເຫສ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ພ຺ຣາຫ຺ມຓານໍ ວິຊ຺ຊາສິປ຺ເປສຸ ນິປ຺ຜຕ຺ຕິໍ ຄໂຕ ກາເມ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ອຣຎ຺ເຎ ວິຫຣນ຺ໂຕ ເອກທິວສໍ ສຕ຺ຖາຣໍ ທິສ຺ວາ ປສນ຺ນມານໂສ ອຎ຺ຊລິໍ ປຄ຺ຄຍ຺ຫ ອຠິຕ຺ຖວິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມລ຺ລຣຏ຺ເຐ ມລ຺ລຣາຊກຸເລ ນິພ຺ພຕ຺ຕິຕ຺ວາ ຍສທຕ຺ໂຕຕິ ລທ຺ຘນາໂມ, ວຍປ຺ປຕ຺ໂຕ ຕກ຺ກສິລໍ ຄນ຺ຕ຺ວາ ສພ຺ພສິປ຺ປານິ ສິກ຺ຂິຕ຺ວາ ສຠິເຍນ ປຣິພ຺ພາຊເກນ ສທ຺ຘິໍເຍວ ຈາຣິກໍ ຈຣມາໂນ, ອນຸປຸພ຺ເພນ ສາວຕ຺ຖິຍໍ ຠຄວນ຺ຕໍ ອຸປສງ຺ກມິຕ຺ວາ ສຠິເຍນ ປຸຏ຺ຐປຎ຺ເຫສຸ ວິສ຺ສຊ຺ຊິຍມາເນສຸ ສຍໍ ໂອຕາຣາເປກ຺ໂຂ ສຸຓນ຺ໂຕ ນິສີທິ ‘‘ສມຓສ຺ສ ໂຄຕມສ຺ສ ວາເທ ໂທສໍ ທສ຺ສາມີ’’ຕິ. ອຖສ຺ສ ຠຄວາ ຈິຕ຺ຕາຈາຣໍ ຎຕ຺ວາ ສຠິຍສຸຕ຺ຕເທສນາວສາເນ (ສຸ. ນິ. ສຠິຍສຸຕ຺ຕ) ໂອວາທໍ ເທນ຺ໂຕ –

໓໖໐. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ອາຣກາ ໂຫຕິ ສທ຺ຘມ຺ມາ, ນຠໂສ ປຖວີ ຍຖາ.

໓໖໑. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ປຣິຫາຍຕິ ສທ຺ຘມ຺ມາ, ກາຬປກ຺ເຂວ ຈນ຺ທິມາ.

໓໖໒. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ປຣິສຸສ຺ສຕິ ສທ຺ຘມ຺ເມ, ມຈ຺ໂຉ ອປ຺ໂປທເກ ຍຖາ.

໓໖໓. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ນ ວິຣູຫຕິ ສທ຺ຘມ຺ເມ, ເຂຕ຺ເຕ ພີຊໍວ ປູຕິກໍ.

໓໖໔. ‘‘ໂຍ ຈ ຕຸຏ຺ເຐນ ຈິຕ຺ເຕນ, ສຸຓາຕິ ຊິນສາສນໍ;

ເຂເປຕ຺ວາ ອາສເວ ສພ຺ເພ, ສຈ຺ຉິກຕ຺ວາ ອກຸປ຺ປຕໍ;

ປປ຺ປຸຍ຺ຍ ປຣມໍ ສນ຺ຕິໍ, ປຣິນິພ຺ພາຕິນາສໂວ’’ຕິ. –

ອິມາ ປຎ຺ຈ ຄາຖາ ອຠາສິ.

ຕຕ຺ຖ ອຸປາຣມ຺ຠຈິຕ຺ໂຕຕິ ສາຣມ຺ຠຈິຕ຺ໂຕ, ໂທສາໂຣປນາຘິປ຺ປາໂຍຕິ ອຕ຺ໂຖ. ທຸມ຺ເມໂຘຕິ ນິປ຺ປຎ຺ໂຎ. ອາຣກາ ໂຫຕິ ສທ຺ຘມ຺ມາຕິ ໂສ ຕາທິໂສ ປຸຄ຺ຄໂລ ນຠໂສ ວິຍ ປຖວີ ປຏິປຕ຺ຕິສທ຺ຘມ຺ມໂຕປິ ທູເຣ ໂຫຕິ, ປເຄວ ປຏິເວຘສທ຺ຘມ຺ມໂຕ. ‘‘ນ ຕ຺ວໍ ອິມໍ ຘມ຺ມວິນຍໍ ອາຊານາສີ’’ຕິອາທິນາ (ທີ. ນິ. ໑.໑໘) ວິຄ຺ຄາຫິກກຖໍ ອນຸຍຸຕ຺ຕສ຺ສ ກຸໂຕ ສນ຺ຕນິປຸໂຓ ປຏິປຕ຺ຕິສທ຺ຘມ຺ໂມ.

ປຣິຫາຍຕິ ສທ຺ຘມ຺ມາຕິ ນວວິຘໂລກຸຕ຺ຕຣຘມ຺ມໂຕ ປຸພ຺ພຠາຄິຍສທ຺ຘາທິສທ຺ຘມ຺ມໂຕປິ ນິຫີຍຕິ. ປຣິສຸສ຺ສຕີຕິ ວິສຸສ຺ສຕິ ກາຍຈິຕ຺ຕານໍ ປີຓນຣສສ຺ສ ປີຕິປາໂມຊ຺ຊາທິກຸສລຘມ຺ມສ຺ສາຠາວໂຕ. ນ ວິຣູຫຕີຕິ ວິຣູຬ຺ຫິໍ ວຸທ຺ຘິໍ ນ ປາປຸຓາຕິ. ປູຕິກນ຺ຕິ ໂຄມຍເລປທານາທິອຠາເວນ ປູຕິຠາວໍ ປຕ຺ຕໍ.

ຕຸຏ຺ເຐນ ຈິຕ຺ເຕນາຕິ ອິຕ຺ຖມ຺ຠູຕລກ຺ຂເຓ ກຣຓວຈນໍ, ອຕ຺ຕມໂນ ປມຸທິໂຕ ຫຸຕ຺ວາຕິ ອຕ຺ໂຖ. ເຂເປຕ຺ວາຕິ ສມຸຈ຺ຉິນ຺ທິຕ຺ວາ. ອກຸປ຺ປຕນ຺ຕິ ອຣຫຕ຺ຕໍ. ປປ຺ປຸຍ຺ຍາຕິ ປາປຸຓິຕ຺ວາ. ປຣມໍ ສນ຺ຕິນ຺ຕິ ອນຸປາທິເສສໍ ນິພ຺ພານໍ. ຕທຘິຄໂມ ຈສ຺ສ ເກວລໍ ກາລາຄມນເມວ, ນ ໂກຈິວິໂຘຕິ ຕໍ ທສ຺ເສຕຸໍ ວຸຕ຺ຕໍ ‘‘ປຣິນິພ຺ພາຕິນາສໂວ’’ຕິ.

ເອວໍ ສຕ຺ຖາຣາ ໂອວທິໂຕ ສໍເວຄຊາໂຕ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໔.໓໕-໔໓) –

‘‘ກຓິກາຣໍວ ຊລິຕໍ, ທີປຣຸກ຺ຂໍວ ໂຊຕິຕໍ;

ກຎ຺ຈນໍວ ວິໂຣຈນ຺ຕໍ, ອທ຺ທສໍ ທ຺ວິປທຸຕ຺ຕມໍ.

‘‘ກມຓ຺ຑລຸໍ ຐເປຕ຺ວານ, ວາກຈີຣຎ຺ຈ ກຸຓ຺ຑິກໍ;

ເອກໍສໍ ອຊິນໍ ກຕ຺ວາ, ພຸທ຺ຘເສຏ຺ຐໍ ຖວິໍ ອຫໍ.

‘‘ຕມນ຺ຘກາຣໍ ວິຘມໍ, ໂມຫຊາລສມາກຸລໍ;

ຎາຓາໂລກໍ ທສ຺ເສຕ຺ວານ, ນິຕ຺ຕິຓ຺ໂຓສິ ມຫາມຸນິ.

‘‘ສມຸທ຺ຘຣສິມໍ ໂລກໍ, ສພ຺ພາວນ຺ຕມນຸຕ຺ຕຣໍ;

ຎາເຓ ເຕ ອຸປມາ ນຕ຺ຖິ, ຍາວຕາ ຊຄໂຕ ຄຕິ.

‘‘ເຕນ ຎາເຓນ ສພ຺ພຎ຺ຎູ, ອິຕິ ພຸທ຺ໂຘ ປວຸຈ຺ຈຕິ;

ວນ຺ທາມິ ຕໍ ມຫາວີຣໍ, ສພ຺ພຎ຺ຎຸຕມນາວຣໍ.

‘‘ສຕສຫສ຺ສິໂຕ ກປ຺ເປ, ພຸທ຺ຘເສຏ຺ຐໍ ຖວິໍ ອຫໍ;

ທຸຄ຺ຄຕິໍ ນາຠິຊານາມິ, ຎາຓຕ຺ຖວາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຎ຺ຎໍ ພ຺ຍາກໂຣນ຺ໂຕປິ ເຖໂຣ ອິມາ ເອວ ຄາຖາ ອຠາສິ.

ຍສທຕ຺ຕຕ຺ເຖຣຄາຖາວຓ຺ຓນາ ນິຏ຺ຐິຕາ.