໕. ວຑ຺ຒຕ຺ເຖຣຄາຖາວຓ຺ຓນາ

ສາຘູ ຫີຕິອາທິກາ ອາຍສ຺ມໂຕ ວຑ຺ຒຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອິມສ຺ມິໍ ພຸທ຺ຘຸປ຺ປາເທ ຠາຣຸກຈ຺ຉນຄເຣ ຄຫປຕິກຸເລ ນິພ຺ພຕ຺ຕິຕ຺ວາ ວຑ຺ໂຒຕິ ລທ຺ຘນາໂມ ອນຸປຸພ຺ເພນ ວຑ຺ຒຕິ. ອຖສ຺ສ ມາຕາ ສໍສາເຣ ສຎ຺ຊາຕສໍເວຄາ ປຸຕ຺ຕໍ ຎາຕີນໍ ນິຍ຺ຍາເທຕ຺ວາ ຠິກ຺ຂຸນີນໍ ສນ຺ຕິເກ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ຕີ ອຣຫຕ຺ຕໍ ປາປຸຓິຕ຺ວາ ອປເຣນ ສມເຍນ ປຸຕ຺ຕມ຺ປິ ວິຎ຺ຎຸຕໍ ປຕ຺ຕໍ ເວຬຸທນ຺ຕຕ຺ເຖຣສ຺ສ ສນ຺ຕິເກ ປພ຺ພາເຊສິ. ໂສ ປພ຺ພຊິໂຕ ພຸທ຺ຘວຈນໍ ອຸຄ຺ຄເຫຕ຺ວາ ພຫຸສ຺ສຸໂຕ ຘມ຺ມກຖິໂກ ຫຸຕ຺ວາ ຄນ຺ຖຘຸຣໍ ວຫນ຺ໂຕ ເອກທິວສໍ ‘‘ເອກໂກ ສນ຺ຕຣຸຕ຺ຕໂຣວ ມາຕຣໍ ປສ຺ສິສ຺ສາມີ’’ຕິ ຠິກ຺ຂຸນຸປສ຺ສຍໍ ອຄມາສິ. ຕໍ ທິສ຺ວາ ມາຕາ ‘‘ກສ຺ມາ ຕ຺ວໍ ເອກໂກ ສນ຺ຕຣຸຕ຺ຕໂຣວ ອິຘາຄໂຕ’’ຕິ ໂຈເທສິ. ໂສ ມາຕຣາ ໂຈທິຍມາໂນ ‘‘ອຍຸຕ຺ຕໍ ມຍາ ກຕ’’ນ຺ຕິ ອຸປ຺ປນ຺ນສໍເວໂຄ ວິຫາຣໍ ຄນ຺ຕ຺ວາ ທິວາຏ຺ຐາເນ ນິສິນ຺ໂນ ວິປສ຺ສິຕ຺ວາ ອຣຫຕ຺ຕໍ ປຕ຺ວາ ມາຕຸ ໂອວາທສມ຺ປຕ຺ຕິປກາສນມຸເຂນ ອຎ຺ຎໍ ພ຺ຍາກໂຣນ຺ໂຕ –

໓໓໕. ‘‘ສາຘູ ຫິ ກິຣ ເມ ມາຕາ, ປໂຕທໍ ອຸປທໍສຍິ;

ຍສ຺ສາຫໍ ວຈນໍ ສຸຕ຺ວາ, ອນຸສິຏ຺ໂຐ ຊເນຕ຺ຕິຍາ;

ອາຣທ຺ຘວີຣິໂຍ ປຫິຕຕ຺ໂຕ, ປຕ຺ໂຕ ສມ຺ໂພຘິມຸຕ຺ຕມໍ.

໓໓໖. ‘‘ອຣຫາ ທກ຺ຂິເຓຍ຺ໂຍມ຺ຫິ, ເຕວິຊ຺ໂຊ ອມຕທ຺ທໂສ;

ເຊຕ຺ວາ ນມຸຈິໂນ ເສນໍ, ວິຫຣາມິ ອນາສໂວ.

໓໓໗. ‘‘ອຊ຺ຌຕ຺ຕຎ຺ຈ ພຫິທ຺ຘາ ຈ, ເຍ ເມ ວິຊ຺ຊິໍສຸ ອາສວາ;

ສພ຺ເພ ອເສສາ ອຸຈ຺ຉິນ຺ນາ, ນ ຈ ອຸປ຺ປຊ຺ຊເຣ ປຸນ.

໓໓໘. ‘‘ວິສາຣທາ ໂຂ ຠຄິນີ, ເອວມຕ຺ຖໍ ອຠາສຍິ;

ອປິຫາ ນູນ ມຍິປິ, ວນໂຖ ເຕ ນ ວິຊ຺ຊຕິ.

໓໓໙. ‘‘ປຣິຍນ຺ຕກຕໍ ທຸກ຺ຂໍ, ອນ຺ຕິໂມຍໍ ສມຸສ຺ສໂຍ;

ຊາຕິມຣຓສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ. – ອິມາ ຄາຖາ ອຠາສິ;

ຕຕ຺ຖ ສາຘູ ຫິ ກິຣ ເມ ມາຕາ, ປໂຕທໍ ອຸປທໍສຍີຕິ ສາຘຸ ວຕ ມາຕາ ມຍ຺ຫໍ ໂອວາທສງ຺ຂາຕໍ ປໂຕທໍ ທສ຺ເສຕິ, ເຕນ ເມ ວີຣິຍໍ ອຸຕ຺ເຕເຊນ຺ຕີ ອຸຕ຺ຕມງ຺ເຄ ປຎ຺ຎາສີເສ ວິຊ຺ຌິ. ຍສ຺ສາຕິ ຍສ຺ສາ ເມ ມາຕຸຍາ. ສມ຺ໂພຘິນ຺ຕິ ອຣຫຕ຺ຕໍ. ອຍຎ຺ເຫຕ຺ຖ ໂຍຊນາ – ຊເນຕ຺ຕິຍາ ເມ ອນຸສິຏ຺ໂຐ ຍສ຺ສາ ອນຸສາສນີຠູຕໍ ວຈນໍ ສຸຕ຺ວາ ອຫໍ ອາຣທ຺ຘວີຣິໂຍ ປຫິຕຕ຺ໂຕ ວິຫຣນ຺ໂຕ ອຸຕ຺ຕມໍ ອຄ຺ຄຜລໍ ສມ຺ໂພຘິໍ ອຣຫຕ຺ຕໍ ປຕ຺ໂຕ.

ຕໂຕ ເອວ ອາຣກຕ຺ຕາ ກິເລເສຫິ ອຣຫາ ປຸຎ຺ຎກ຺ເຂຕ຺ຕຕາຍ ທກ຺ຂິເຓຍ຺ໂຍ ທກ຺ຂິຓາຣໂຫ ອມ຺ຫິ. ປຸພ຺ເພນິວາສຎາຓາທິວິຊ຺ຊາຕ຺ຕຍສ຺ສ ອຘິຄຕຕ຺ຕາ ເຕວິຊ຺ໂຊ ນິພ຺ພານສ຺ສ ສຈ຺ຉິກຕຕ຺ຕາ ອມຕທ຺ທໂສ ນມຸຈິໂນ ມາຣສ຺ສ ເສນໍ ກິເລສວາຫິນິໍ ໂພຘິປກ຺ຂິຍເສນາຍ ຊິນິຕ຺ວາ ຕສ຺ສ ຊິຕຕ຺ຕາເຍວ ອນາສໂວ ສຸຂໍ ວິຫຣາມີຕິ.

ອິທານິ ‘‘ອນາສໂວ’’ຕິ ວຸຕ຺ຕມຕ຺ຖໍ ປາກຏຕຣໍ ກາຕຸໍ ‘‘ອຊ຺ຌຕ຺ຕຎ຺ຈາ’’ ຕິ ຄາຖມາຫ. ຕສ຺ສຕ຺ໂຖ – ອຊ຺ຌຕ຺ຕໍ ອຊ຺ຌຕ຺ຕວຕ຺ຖຸກາ ຈ ພຫິທ຺ຘາ ພຫິທ຺ຘວຕ຺ຖຸກາ ຈ ອາສວາ ເຍ ມຍ຺ຫໍ ອຣິຍມຄ຺ຄາຘິຄມໂຕ ປຸພ຺ເພ ວິຊ຺ຊິໍສຸ ອຸປລພ຺ຠິໍສຸ, ເຕ ສພ຺ເພ ອນວເສສາ ອຸຈ຺ຉິນ຺ນາ ອຣິຍມຄ຺ເຄນ ສມຸຈ຺ຉິນ຺ນາ ປຫີນາ ປຸນ ທານິ ກທາຈິປິ ນ ຈ ອຸປ຺ປຊ຺ເຊຍ຺ຍຸໍ ນ ອຸປ຺ປຊ຺ຊິສ຺ສນ຺ຕິເຍວາຕິ.

ອິທານິ ມາຕຸ ວຈນໍ ອງ຺ກຸສໍ ກຕ຺ວາ ອຕ຺ຕນາ ອຣຫຕ຺ຕສ຺ສ ອຘິຄຕຕ຺ຕາ ມາຕຣໍ ໂຖເມນ຺ໂຕ ‘‘ວິສາຣທາ’’ຕິ ຄາຖມາຫ. ຕຕ຺ຖ ວິສາຣທາ ໂຂຕິ ເອກໍເສນ ວິຄຕສາຣຊ຺ຊາ. ເອວໍ ມາຕຸ ອຕ຺ຕໂນ ຈ ອຣຫຕ຺ຕາຘິຄເມນ ສຕ຺ຖຸ ໂອຣສປຸຕ຺ຕຠາວໍ ອຸລ຺ລເປນ຺ໂຕ ມາຕຣໍ ‘‘ຠຄິນີ’’ຕິ ອາຫ. ເອຕມຕ຺ຖໍ ອຠາສຍີຕິ ເອຕໍ ມມ ໂອວາທຠູຕໍ ອຕ຺ຖໍ ອຠຓິ. ເອວໍ ປນ ມໍ ໂອວທນ຺ຕີ ນ ເກວລໍ ວິສາຣທາ ເອວ, ອຖ ໂຂ ອປິຫາ ນູນ ມຍິປິ ຕວ ປຸຕ຺ຕເກປິ ອປິຫາ ອສນ຺ຖວາ ມຎ຺ເຎ, ກິໍ ວາ ເອເຕນ ປຣິກປ຺ປເນນ? ວນໂຖ ເຕ ນ ວິຊ຺ຊຕິ ອວິຊ຺ຊາທິໂກ ວນໂຖ ຕວ ສນ຺ຕາເນ ນຕ຺ເຖວ, ຍາ ມໍ ຠວກ຺ຂເຍ ນິໂຍເຊສີຕິ ອຘິປ຺ປາໂຍ.

ອິທານິ ‘‘ຕຍາ ນິໂຍຊິຕາກາເຣເນວ ມຍາ ປຏິປນ຺ນ’’ນ຺ຕິ ທສ຺ເສນ຺ໂຕ ‘‘ປຣິຍນ຺ຕກຕ’’ນ຺ຕິ ໂອສານຄາຖມາຫ, ຕສ຺ສຕ຺ໂຖ ສຸວິຎ຺ເຎຍ຺ໂຍວ.

ວຑ຺ຒຕ຺ເຖຣຄາຖາວຓ຺ຓນາ ນິຏ຺ຐິຕາ.