໙. ຈນ຺ທນຕ຺ເຖຣຄາຖາວຓ຺ຓນາ

ຊາຕຣູເປນາຕິອາທິກາ ອາຍສ຺ມໂຕ ຈນ຺ທນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ເອກຕິໍເສ ກປ຺ເປ ພຸທ຺ຘສຸຎ຺ເຎ ໂລເກ ຣຸກ຺ຂເທວຕາ ຫຸຕ຺ວາ ນິພ຺ພຕ຺ໂຕ ສຸທສ຺ສນໍ ນາມ ປຈ຺ເຈກພຸທ຺ຘໍ ປພ຺ພຕນ຺ຕເຣ ວສນ຺ຕໍ ທິສ຺ວາ ປສນ຺ນມານໂສ ກຸຏຊປຸປ຺ເຜຫິ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ວິຠວສມ຺ປນ຺ເນ ກຸເລ ນິພ຺ພຕ຺ຕິຕ຺ວາ ຈນ຺ທໂນຕິ ລທ຺ຘນາໂມ ວຍປ຺ປຕ຺ໂຕ ຆຣາວາສໍ ວສນ຺ໂຕ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ໂສຕາປນ຺ໂນ ອໂຫສິ. ໂສ ເອກໍ ປຸຕ຺ຕໍ ລຠິຕ຺ວາ ຆຣາວາສໍ ປຫາຍ ປພ຺ພຊິຕ຺ວາ ວິປສ຺ສນາຍ ກມ຺ມຏ຺ຐານໍ ຄເຫຕ຺ວາ ອຣຎ຺ເຎ ວິຫຣນ຺ໂຕ ສຕ຺ຖາຣໍ ວນ຺ທິຕຸໍ ສາວຕ຺ຖິໍ ອາຄໂຕ ສຸສາເນ ວສຕິ. ຕສ຺ສ ອາຄຕຠາວໍ ສຸຕ຺ວາ ປຸຣາຓທຸຕິຍິກາ ອລງ຺ກຕປຏິຍຕ຺ຕາ ທາຣກໍ ອາທາຍ ມຫຕາ ປຣິວາເຣນ ເຖຣສ຺ສ ສນ຺ຕິກໍ ຄຈ຺ຉຕິ – ‘‘ອິຕ຺ຖິກຸຕ຺ຕາທີຫິ ນໍ ປໂລເຠຕ຺ວາ ອຸປ຺ປພ຺ພາເຊສ຺ສາມີ’’ຕິ. ເຖໂຣ ຕໍ ອາຄຈ຺ຉນ຺ຕິໍ ທູຣໂຕວ ທິສ຺ວາ ‘‘ອິທານິສ຺ສາ ອວິສໂຍ ຠວິສ຺ສາມີ’’ຕິ ຍຖາຣທ຺ຘໍ ວິປສ຺ສນໍ ອຸສ຺ສຸກ຺ກາເປຕ຺ວາ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໓໗-໔໓) –

‘‘ຫິມວນ຺ຕສ຺ສາວິທູເຣ, ວສໂລ ນາມ ປພ຺ພໂຕ;

ພຸທ຺ໂຘ ສຸທສ຺ສໂນ ນາມ, ວສເຕ ປພ຺ພຕນ຺ຕເຣ.

‘‘ປຸປ຺ຜໍ ເຫມວນ຺ຕໍ ມຍ຺ຫ, ເວຫາສໍ ອຄມາສຫໍ;

ຕຕ຺ຖທ຺ທສາສິໍ ສມ຺ພຸທ຺ຘໍ, ໂອຆຕິຓ຺ຓມນາສວໍ.

‘‘ປຸປ຺ຜໍ ກຸຏຊມາທາຍ, ສິເຣ ກຕ຺ວານ ອຎ຺ຊລິໍ;

ພຸທ຺ຘສ຺ສ ອຠິໂຣເປສິໍ, ສຍມ຺ຠຸສ຺ສ ມເຫສິໂນ.

‘‘ເອກຕິໍເສ ອິໂຕ ກປ຺ເປ, ຍໍ ປຸປ຺ຜມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ອາກາເສ ຐຕ຺ວາ ຕສ຺ສາ ຘມ຺ມໍ ເທເສຕ຺ວາ ສຣເຓສຸ ຈ ສີເລສຸ ຈ ປຕິຏ຺ຐາເປຕ຺ວາ ສຍໍ ອຕ຺ຕນາ ປຸພ຺ເພ ວສິຕຏ຺ຐານເມວ ຄໂຕ. ສຫາຍຠິກ຺ຂູຫິ – ‘‘ວິປ຺ປສນ຺ນານິ ໂຂ ເຕ, ອາວຸໂສ, ອິນ຺ທ຺ຣິຍານິ, ກຈ຺ຈິ ຕຍາ ສຈ຺ຈານິ ປຏິວິທ຺ຘານີ’’ຕິ ປຸຏ຺ໂຐ –

໒໙໙. ‘‘ຊາຕຣູເປນ ສຎ຺ຉນ຺ນາ, ທາສີຄຓປຸຣກ຺ຂຕາ;

ອງ຺ເກນ ປຸຕ຺ຕມາທາຍ, ຠຣິຍາ ມໍ ອຸປາຄມິ.

໓໐໐. ‘‘ຕຎ຺ຈ ທິສ຺ວານ ອາຍນ຺ຕິໍ, ສກປຸຕ຺ຕສ຺ສ ມາຕຣໍ;

ອລງ຺ກຕໍ ສຸວສນໍ, ມຈ຺ຈຸປາສໍວ ໂອຑ຺ຑິຕໍ.

໓໐໑. ‘‘ຕໂຕ ເມ ມນສີກາໂຣ, ໂຍນິໂສ ອຸທປຊ຺ຊຖ;

ອາທີນໂວ ປາຕຸຣຫຸ, ນິພ຺ພິທາ ສມຕິຏ຺ຐຖ.

໓໐໒. ‘‘ຕໂຕ ຈິຕ຺ຕໍ ວິມຸຈ຺ຈິ ເມ, ປສ຺ສ ຘມ຺ມສຸຘມ຺ມຕໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ. –

ອິມາຫິ ຄາຖາຫິ ອຕ຺ຕໂນ ປຏິປຕ຺ຕິໍ ກເຖນ຺ໂຕ ອຎ຺ຎໍ ພ຺ຍາກາສິ.

ຕຕ຺ຖ ຊາຕຣູເປນ ສຎ຺ຉນ຺ນາຕິ ຊາຕຣູປມເຍນ ສີສູປຄາທິອລງ຺ກາເຣນ ອລງ຺ກຣຓວເສນ ປຏິຈ຺ຉາທິຕສຣີຣາ, ສພ຺ພາຠຣຓຠູສິຕາຕິ ອຕ຺ໂຖ. ທາສີຄຓປຸຣກ຺ຂຕາຕິ ຍຖາຣຫໍ ອລງ຺ກຕປຏິຍຕ຺ເຕນ ອຕ຺ຕໂນ ທາສິຄເຓນ ປຸຣໂຕ ກຕາ ປຣິວາຣິຕາຕິ ອຕ຺ໂຖ. ອງ຺ເກນ ປຸຕ຺ຕມາທາຍາຕິ ‘‘ອປິ ນາມ ປຸຕ຺ຕມ຺ປິ ທິສ຺ວາ ເຄຫສ຺ສິຕສາໂຕ ຠເວຍ຺ຍາ’’ຕິ ປຸຕ຺ຕໍ ອຕ຺ຕໂນ ອງ຺ເກນ ຄເຫຕ຺ວາ.

ອາຍນ຺ຕິນ຺ຕິ ອາຄຈ຺ຉນ຺ຕິໍ. ສກປຸຕ຺ຕສ຺ສ ມາຕຣນ຺ຕິ ມມ ໂອຣສປຸຕ຺ຕສ຺ສ ຊນນິໍ, ມຍ຺ຫໍ ປຸຣາຓທຸຕິຍິກນ຺ຕິ ອຕ຺ໂຖ. ສພ຺ພມິທໍ ເຖໂຣ ອຕ຺ຕໂນ ກາມຣາຄສມຸຈ຺ເຉທໍ ພຫຸມຎ຺ຎນ຺ໂຕ ວທຕິ. ໂຍນິໂສ ອຸທປຊ຺ຊຖາຕິ ‘‘ເອວຣູປາປິ ນາມ ສມ຺ປຕ຺ຕິ ຊຣາພ຺ຍາຘິມຣເຓຫິ ອຠິຠຸຍ຺ຍຕິ, ອໂຫ ສງ຺ຂາຣາ ອນິຈ຺ຈາ ອຘຸວາ ອນສ຺ສາສິກາ’’ຕິ ເອວໍ ໂຍນິໂສມນສິກາໂຣ ອຸປ຺ປຊ຺ຊິ. ເສສໍ ເຫຏ຺ຐາ ວຸຕ຺ຕນຍເມວ.

ຈນ຺ທນຕ຺ເຖຣຄາຖາວຓ຺ຓນາ ນິຏ຺ຐິຕາ.