໗. ສມ຺ຠູຕຕ຺ເຖຣຄາຖາວຓ຺ຓນາ

ໂຍ ທນ຺ຘກາເລຕິອາທິກາ ອາຍສ຺ມໂຕ ສມ຺ຠູຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ພຸທ຺ຘສຸຎ຺ເຎ ໂລເກ ຈນ຺ທຠາຄາຍ ນທິຍາ ຕີເຣ ກິນ຺ນຣໂຍນິຍໍ ນິພ຺ພຕ຺ໂຕ. ເອກທິວສໍ ອຎ຺ຎຕຣໍ ປຈ຺ເຈກພຸທ຺ຘໍ ທິສ຺ວາ ປສນ຺ນມານໂສ ວນ຺ທິຕ຺ວາ ກຕຎ຺ຊລີ ອຊ຺ຊຸນປຸປ຺ເຜຫິ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ຕິຕ຺ວາ ສມ຺ຠູໂຕຕິ ລທ຺ຘນາໂມ ວຍປ຺ປຕ຺ໂຕ ຠຄວໂຕ ປຣິນິພ຺ພານສ຺ສ ປຈ຺ຉາ ຘມ຺ມຠຓ຺ຑາຄາຣິກສ຺ສ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສມຓຘມ຺ມໍ ກໂຣນ຺ໂຕ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໒໘-໓໖) –

‘‘ຈນ຺ທຠາຄານທີຕີເຣ, ອໂຫສິໍ ກິນ຺ນໂຣ ຕທາ;

ອທ຺ທສໍ ວິຣຊໍ ພຸທ຺ຘໍ, ສຍມ຺ຠຸໍ ອປຣາຊິຕໍ.

‘‘ປສນ຺ນຈິຕ຺ໂຕ ສຸມໂນ, ເວທຊາໂຕ ກຕຎ຺ຊລີ;

ຄເຫຕ຺ວາ ອຊ຺ຊຸນໍ ປຸປ຺ຜໍ, ສຍມ຺ຠຸໍ ອຠິປູຊຍິໍ.

‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ກິນ຺ນຣໍ ເທຫໍ, ຕາວຕິໍສມຄຈ຺ຉຫໍ.

‘‘ຉຕ຺ຕິສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ;

ທສກ຺ຂຕ຺ຕຸໍ ຈກ຺ກວຕ຺ຕີ, ມຫາຣຊ຺ຊມກາຣຍິໍ.

‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ສຸເຂຕ຺ເຕ ວປ຺ປິຕໍ ພີຊໍ, ສຍມ຺ຠຸມ຺ຫິ ອໂຫ ມມ.

‘‘ກຸສລໍ ວິຊ຺ຊເຕ ມຍ຺ຫໍ, ປພ຺ພຊິໍ ອນຄາຣິຍໍ;

ປູຊາຣໂຫ ອຫໍ ອຊ຺ຊ, ສກ຺ຍປຸຕ຺ຕສ຺ສ ສາສເນ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ວິມຸຕ຺ຕິສຸເຂນ ວິຫຣນ຺ໂຕ ວສ຺ສສຕປຣິນິພ຺ພຸເຕ ຠຄວຕິ ເວສາລິເກສຸ ວຊ຺ຊິປຸຕ຺ຕເກສຸ ທສ ວຕ຺ຖູນິ ປຄ຺ຄຍ຺ຫ ຐິເຕສຸ ກາກຓ຺ຑກປຸຕ຺ເຕນ ຍສຕ຺ເຖເຣນ ອຸສ຺ສາຫິເຕຫິ ສຕ຺ຕສເຕຫິ ຂີຓາສເວຫິ ຕໍ ທິຏ຺ຐິໍ ຠິນ຺ທິຕ຺ວາ ສທ຺ຘມ຺ມໍ ປຄ຺ຄຓ຺ຫນ຺ເຕຫິ ຘມ຺ມວິນຍສງ຺ຄເຫ ກເຕ ເຕສໍ ວຊ຺ຊິປຸຕ຺ຕການໍ ອຸທ຺ຘມ຺ມອຸພ຺ພິນຍທີປເນ ຘມ຺ມສໍເວເຄນ ເຖໂຣ –

໒໙໑. ‘‘ໂຍ ທນ຺ຘກາເລ ຕຣຕິ, ຕຣຓີເຍ ຈ ທນ຺ຘເຍ;

ອໂຍນິສໍວິຘາເນນ, ພາໂລ ທຸກ຺ຂໍ ນິຄຈ຺ຉຕິ.

໒໙໒. ‘‘ຕສ຺ສຕ຺ຖາ ປຣິຫາຍນ຺ຕິ, ກາຬປກ຺ເຂວ ຈນ຺ທິມາ;

ອາຍສກ຺ຍຎ຺ຈ ປປ຺ໂປຕິ, ມິຕ຺ເຕຫິ ຈ ວິຣຸຊ຺ຌຕິ.

໒໙໓. ‘‘ໂຍ ທນ຺ຘກາເລ ທນ຺ເຘຕິ, ຕຣຓີເຍ ຈ ຕາຣເຍ;

ໂຍນິໂສ ສໍວິຘາເນນ, ສຸຂໍ ປປ຺ໂປຕິ ປຓ຺ຑິໂຕ.

໒໙໔. ‘‘ຕສ຺ສຕ຺ຖາ ປຣິປູເຣນ຺ຕິ, ສຸກ຺ກປກ຺ເຂວ ຈນ຺ທິມາ;

ຍໂສ ກິຕ຺ຕິຎ຺ຈ ປປ຺ໂປຕິ, ມິຕ຺ເຕຫິ ນ ວິຣຸຊ຺ຌຕີ’’ຕິ. –

ອິມາ ຄາຖາ ຠຓນ຺ໂຕ ອຎ຺ຎໍ ພ຺ຍາກາສິ.

ຕຕ຺ຖ ໂຍ ທນ຺ຘກາເລ ຕຣຕີຕິ ກິສ຺ມິຎ຺ຈິ ກຕ຺ຕພ຺ພວຕ຺ຖຸສ຺ມິໍ – ‘‘ກປ຺ປຕິ ນຸ ໂຂ, ນ ນຸ ໂຂ ກປ຺ປຕີ’’ຕິ ວິນຍກຸກ຺ກຸຈ຺ເຈ ອຸປ຺ປນ຺ເນ ຍາວ ວິຍຕ຺ຕໍ ວິນຍຘຣໍ ປຸຈ຺ຉິຕ຺ວາ ຕໍ ກຸກ຺ກຸຈ຺ຈໍ ນ ວິໂນເທຕິ, ຕາວ ທນ຺ຘກາເລ ຕສ຺ສ ກິຈ຺ຈສ຺ສ ທນ຺ຘາຍິຕພ຺ພສມເຍ ຕຣຕິ ມທ຺ທິຕ຺ວາ ວີຕິກ຺ກມໍ ກໂຣຕິ. ຕຣຓີເຍ ຈ ທນ຺ຘເຍຕິ ຄຫຏ຺ຐສ຺ສ ຕາວ ສຣຓຄມນສີລສມາທານາທິເກ, ປພ຺ພຊິຕສ຺ສ ວຕ຺ຕປຏິວຕ຺ຕກຣຓາທິເກ ສມຖວິປສ຺ສນານຸໂຍເຄ ຈ ຕຣິຕພ຺ເພ ສມ຺ປຕ຺ເຕ ສີຆໍ ຕໍ ກິຈ຺ຈໍ ອນນຸຍຸຎ຺ຊິຕ຺ວາ – ‘‘ອາຄມນມາເສ ປກ຺ເຂ ວາ ກຣິສ຺ສາມີ’’ຕິ ທນ຺ຘາເຍຍ຺ຍ, ຕໍ ກິຈ຺ຈໍ ອກໂຣນ຺ໂຕວ ກາລໍ ວີຕິນາເມຍ຺ຍ. ອໂຍນິສໍວິຘາເນນາຕິ ເອວໍ ທນ຺ຘາຍິຕພ຺ເພ ຕຣນ຺ໂຕ ຕຣິຕພ຺ເພ ຈ ທນ຺ຘາຍນ຺ໂຕ ອນຸປາຍສໍວິຘາເນນ ອຸປາຍສໍວິຘານາຠາເວນ ພາໂລ, ມນ຺ທພຸທ຺ຘິໂກ ປຸຄ຺ຄໂລ, ສມ຺ປຕິ ອາຍຕິຎ຺ຈ ທຸກ຺ຂໍ ອນຕ຺ຖໍ ປາປຸຓາຕິ.

ຕສ຺ສຕ຺ຖາ ປຣິຫາຍນ຺ຕີຕິ ຕສ຺ສ ຕຖາຣູປສ຺ສ ປຸຄ຺ຄລສ຺ສ ທິຏ຺ຐຘມ຺ມິກາທິເຠທາ ອຕ຺ຖາ ກາຬປກ຺ເຂ ຈນ຺ທິມາ ວິຍ, ປຣິຫາຍນ຺ຕິ ທິວເສ ທິວເສ ປຣິກ຺ຂຍໍ ປຣິຍາທານໍ ຄຈ຺ຉນ຺ຕິ. ‘‘ອສຸໂກ ປຸຄ຺ຄໂລ ອສ຺ສທ຺ໂຘ ອປ຺ປສນ຺ໂນ ກຸສີໂຕ ຫີນວີຣິໂຍ’’ຕິອາທິນາ. ອາຍສກ຺ຍໍ ວິຎ຺ຎູຫິ ຄຣຫິຕພ຺ພຕໍ ປປ຺ໂປຕິ ປາປຸຓາຕິ. ມິຕ຺ເຕຫິ ຈ ວິຣຸຊ຺ຌຕີຕິ ‘‘ເອວໍ ປຏິປຊ຺ຊ, ມາ ເອວໍ ປຏິປຊ຺ຊາ’’ຕິ ໂອວາທທາຍເກຫິ ກລ຺ຍາຓມິຕ຺ເຕຫິ ‘‘ອວຈນີຍາ ມຍ’’ນ຺ຕິ ໂອວາທສ຺ສ ອນາທາເນເນວ ວິຣຸທ຺ໂຘ ນາມ ໂຫຕິ.

ເສສຄາຖາທ຺ວຍສ຺ສ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ. ເກຈິ ປເນຕ຺ຖ – ‘‘ຕຣຕິ ທນ຺ຘເຍ’’ຕິປທານໍ ອຕ຺ຖຠາເວນ ຠາວນາຈິຕ຺ຕສ຺ສ ປຄ຺ຄຫນິຄ຺ຄເຫ ອຸທ຺ຘຣນ຺ຕິ. ຕໍ ປຈ຺ຉິມຄາຖາສຸ ຍຸຊ຺ຊຕິ. ປຸຣິມາ ຫິ ທ຺ເວ ຄາຖາ ປພ຺ພຊິຕກາລໂຕ ປຏ຺ຐາຍ ຈຣິຕພ຺ພໍ ສມຓຘມ຺ມໍ ອກຕ຺ວາ ກຸກ຺ກຸຈ຺ຈປກຕຕາຍ ທສ ວຕ຺ຖູນິ ທີເປຕ຺ວາ ສງ຺ເຆນ ນິກ຺ກຑ຺ຒິເຕ ວຊ຺ຊິປຸຕ຺ຕເກ ສນ຺ຘາຍ ເຖເຣນ ວຸຕ຺ຕາ. ປຈ຺ຉິມາ ປນ ອຕ຺ຕສທິເສ ສມ຺ມາ ປຏິປນ຺ເນ ສກຕ຺ຖໍ ນິປ຺ຜາເທຕ຺ວາ ຐິເຕຕິ.

ສມ຺ຠູຕຕ຺ເຖຣຄາຖາວຓ຺ຓນາ ນິຏ຺ຐິຕາ.