໑໑. ສປ຺ປກຕ຺ເຖຣຄາຖາວຓ຺ຓນາ

ຍທາ ພລາກາຕິອາທິກາ ອາຍສ຺ມໂຕ ສປ຺ປກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ເອກຕິໍເສ ກປ຺ເປ ມຫານຸຠາໂວ ນາຄຣາຊາ ຫຸຕ຺ວາ ນິພ຺ພຕ຺ໂຕ ສມ຺ຠວສ຺ສ ນາມ ປຈ຺ເຈກພຸທ຺ຘສ຺ສ ອພ຺ໂຠກາເສ ສມາປຕ຺ຕິຍາ ນິສິນ຺ນສ຺ສ ມຫນ຺ຕໍ ປທຸມໍ ຄເຫຕ຺ວາ ອຸປຣິມຸທ຺ຘນິ ຘາເຣນ຺ໂຕ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ສປ຺ປໂກຕິ ລທ຺ຘນາໂມ ວິຎ຺ຎຸຕໍ ປຕ຺ໂຕ ຠຄວໂຕ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ອຊກຣຓິຍາ ນາມ ນທິຍາ ຕີເຣ ເລຓຄິຣິວິຫາເຣ ວສນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໗໘-໘໓) –

‘‘ຫິມວນ຺ຕສ຺ສາວິທູເຣ, ໂຣມໂສ ນາມ ປພ຺ພໂຕ;

ພຸທ຺ໂຘປິ ສມ຺ຠໂວ ນາມ, ອພ຺ໂຠກາເສ ວສີ ຕທາ.

‘‘ຠວນາ ນິກ຺ຂມິຕ຺ວານ, ປທຸມໍ ຘາຣຍິໍ ອຫໍ;

ເອກາຫໍ ຘາຣຍິຕ຺ວານ, ຠວນໍ ປຸນຣາຄມິໍ.

‘‘ເອກຕິໍເສ ອິໂຕ ກປ຺ເປ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ໂສ ອຣຫຕ຺ຕໍ ປຕ຺ວາ ສຕ຺ຖາຣໍ ວນ຺ທິຕຸໍ ສາວຕ຺ຖິໍ ອາຄໂຕ ຎາຕີຫິ ອຸປຏ຺ຐີຍມາໂນ ຕຕ຺ຖ ກຕິປາຫໍ ວສິຕ຺ວາ ຘມ຺ມໍ ເທເສຕ຺ວາ ຎາຕເກ ສຣເຓສຸ ຈ ສີເລສຸ ຈ ປຕິຏ຺ຐາເປຕ຺ວາ ຍຖາວຸຕ຺ຕຏ຺ຐານເມວ ຄນ຺ຕຸກາໂມ ອໂຫສິ. ຕໍ ຎາຕກາ ‘‘ອິເຘວ, ຠນ຺ເຕ, ວສຖ, ມຍໍ ປຏິຊຄ຺ຄິສ຺ສາມາ’’ຕິ ຍາຈິໍສຸ. ໂສ ຄມນາກາຣໍ ທສ຺ເສຕ຺ວາ ຐິໂຕ ອຕ຺ຕນາ ວສິຕຏ຺ຐານກິຕ຺ຕນາປເທເສນ ວິເວກາຠິຣຕິໍ ປກາເສນ຺ໂຕ –

໓໐໗. ‘‘ຍທາ ພລາກາ ສຸຈິປຓ຺ຑຣຈ຺ຉທາ, ກາຬສ຺ສ ເມຆສ຺ສ ຠເຍນ ຕຊ຺ຊິຕາ;

ປເລຫິຕິ ອາລຍມາລເຍສິນີ, ຕທາ ນທີ ອຊກຣຓີ ຣເມຕິ ມໍ.

໓໐໘. ‘‘ຍທາ ພລາກາ ສຸວິສຸທ຺ຘປຓ຺ຑຣາ, ກາຬສ຺ສ ເມຆສ຺ສ ຠເຍນ ຕຊ຺ຊິຕາ;

ປຣິເຍສຕິ ເລຓມເລຓທສ຺ສິນີ, ຕທາ ນທີ ອຊກຣຓີ ຣເມຕິ ມໍ.

໓໐໙. ‘‘ກໍ ນຸ ຕຕ຺ຖ ນ ຣເມນ຺ຕິ, ຊມ຺ພຸໂຍ ອຸຠໂຕ ຕຫິໍ;

ໂສເຠນ຺ຕີ ອາປຄາກູລໍ, ມມ ເລຓສ຺ສ ປຈ຺ຉໂຕ.

໓໑໐. ‘‘ຕາມຕມທສງ຺ຆສຸປ຺ປຫີນາ, ເຠກາ ມນ຺ທວຕີ ປນາທຍນ຺ຕິ;

ນາຊ຺ຊ ຄິຣິນທີຫິ ວິປ຺ປວາສສມໂຍ,

ເຂມາ ອຊກຣຓີ ສິວາ ສຸຣມ຺ມາ’’ຕິ. – ຈຕສ຺ໂສ ຄາຖາ ອຠາສິ;

ຕຕ຺ຖ ຍທາຕິ ຍສ຺ມິໍ ກາເລ. ພລາກາຕິ ພລາກາສກຸຓິກາ. ສຸຈິປຓ຺ຑຣຈ຺ຉທາຕິ ສຸຈິສຸທ຺ຘຘວລປກ຺ຂາ. ກາຬສ຺ສ ເມຆສ຺ສ ຠເຍນ ຕຊ຺ຊິຕາຕິ ຊລຠາຣຠຣິຕຕາຍ ກາຬສ຺ສ ອຎ຺ຊນຄິຣິສນ຺ນິກາສສ຺ສ ປາວຸສ຺ສກເມຆສ຺ສ ຄຊ຺ຊໂຕ ວຸຏ຺ຐິຠເຍນ ນິພ຺ພິຊ຺ຊິຕາ ຠິໍສາປິຕາ. ປເລຫິຕີຕິ ໂຄຈຣຠູມິໂຕ ອຸປ຺ປຕິຕ຺ວາ ຄມິສ຺ສຕິ. ອາລຍນ຺ຕິ ນິລຍໍ ອຕ຺ຕໂນ ກຸລາວກໍ. ອາລເຍສິນີຕິ ຕຕ຺ຖ ອາລຍນໍ ນິລີຍນເມວ ອິຈ຺ຉນ຺ຕີ. ຕທາ ນທີ ອຊກຣຓີ ຣເມຕິ ມນ຺ຕິ ຕສ຺ມິໍ ປາວຸສ຺ສກກາເລ ອຊກຣຓີນາມິກາ ນທີ ນໂວທກສ຺ສ ປູຣາ ຫາຣຫາຣິນີ ກຸລງ຺ກສາ ມໍ ຣເມຕິ ມມ ຈິຕ຺ຕໍ ອາຣາເຘຕີຕິ ອຸຕຸປເທສວິເສສກິຕ຺ຕນາປເທເສນ ວິເວກາຠິຣຕິໍ ປກາເສສິ.

ສຸວິສຸທ຺ຘປຓ຺ຑຣາຕິ ສຸຏ຺ຐຸ ວິສຸທ຺ຘປຓ຺ຑຣວຓ຺ຓາ, ອສມ຺ມິສ຺ສວຓ຺ຓາ ສພ຺ພເສຕາຕິ ອຕ຺ໂຖ. ປຣິເຍສຕີຕິ ມຄ຺ຄຕິ. ເລຓນ຺ຕິ ວສນຏ຺ຐານໍ. ອເລຓທສ຺ສິນີຕິ ວສນຏ຺ຐານໍ ອປສ຺ສນ຺ຕີ. ປຸພ຺ເພ ນິພທ຺ຘວສນຏ຺ຐານສ຺ສ ອຠາເວນ ອເລຓທສ຺ສິນີ, ອິທານິ ປາວຸສ຺ສກກາເລ ເມຆຄຊ຺ຊິເຕນ ອາຫິຕຄພ຺ຠາ ປຣິເຍສຕິ ເລຓນ຺ຕິ ນິພທ຺ຘວສນຏ຺ຐານໍ ກຸລາວກໍ ກໂຣຕີຕິ ອຕ຺ໂຖ.

ກໍ ນຸ ຕຕ຺ຖ…ເປ… ປຈ຺ຉໂຕຕິ ມມ ວສນກມຫາເລຓສ຺ສ ປຈ຺ຉໂຕ ປຈ຺ຉາຠາເຄ ອາປຄາກູລໍ ອຊກຣຓີນທິຍາ ອຸຠໂຕຕີຣໍ ຕຫິໍ ຕຫິໍ ອິໂຕ ຈິໂຕ ຈ ໂສເຠນ຺ຕິໂຍ ນິຈ຺ຈກາລໍ ຜລຠາຣນມິຕສາຂາ ສິນິທ຺ຘປຓ຺ຓຈ຺ຉາຍາ ຊມ຺ພຸໂຍ ຕຕ຺ຖ ຕສ຺ມິໍ ຐາເນ ກໍ ນາມ ສຕ຺ຕໍ ນ ຣເມນ຺ຕິ ນຸ, ສພ຺ພໍ ຣເມນ຺ຕິເຍວ.

ຕາມຕມທສງ຺ຆສຸປ຺ປຫີນາຕິ ອມຕໍ ວຸຈ຺ຈຕິ ອຄທໍ, ເຕນ ມຊ຺ຊນ຺ຕີຕິ ອມຕມທາ, ສປ຺ປາ, ເຕສໍ ສງ຺ໂຆ ອມຕມທສງ຺ໂຆ, ຕໂຕ ສຸຏ຺ຐຸ ປຫີນາ ອປຄຕາ. ເຠກາ ມຓ຺ຑູກິໂຍ, ມນ຺ທວຕີ ສຣວຕິໂຍ, ປນາທຍນ຺ຕິ ຕໍ ຐານໍ ມຘຸເຣນ ວສ຺ສິເຕນ ນິນ຺ນາທຍນ຺ຕິ. ນາຊ຺ຊ ຄິຣິນທີຫິ ວິປ຺ປວາສສມໂຍຕິ ອຊ຺ຊ ເອຕຣຫິ ອຎ຺ຎາຫິປິ ປພ຺ພເຕຍ຺ຍາຫິ ນທີຫິ ວິປ຺ປວາສສມໂຍ ນ ໂຫຕິ, ວິເສສໂຕ ປນ ວາຬມຈ຺ຉສຸສຸມາຣາທິວິຣຫິຕໂຕ ເຂມາ ອຊກຣຓີ ນທີ. ສຸນ຺ທຣຕລຕິຕ຺ຖປຸລິນສມ຺ປຕ຺ຕິຍາ ສິວາ. ສຸຏ຺ຐຸ ຣມ຺ມາ ຣມຓີຍາ, ຕສ຺ມາ ຕຕ຺ເຖວ ເມ ມໂນ ຣມຕີຕິ ອຘິປ຺ປາໂຍ.

ເອວໍ ປນ ວຕ຺ວາ ຎາຕເກ ວິສ຺ສຊ຺ເຊຕ຺ວາ ອຕ຺ຕໂນ ວສນຏ຺ຐານເມວ ຄໂຕ. ສຸຎ຺ຎາຄາຣາຠິຣຕິທີປເນນ ອິທເມວ ຈ ເຖຣສ຺ສ ອຎ຺ຎາພ຺ຍາກຣຓໍ ອໂຫສີຕິ.

ສປ຺ປກຕ຺ເຖຣຄາຖາວຓ຺ຓນາ ນິຏ຺ຐິຕາ.