໘. ວສ຺ສິກຕ຺ເຖຣຄາຖາວຓ຺ຓນາ

ເອໂກປິ ສທ຺ໂຘ ເມຘາວີຕິ ອາຍສ຺ມໂຕ ວສ຺ສິກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ທິສ຺ວາ ປສນ຺ນຈິຕ຺ໂຕ ປິລກ຺ຂຜລານິ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວສ຺ສິໂກຕິ ລທ຺ຘນາໂມ ວຍປ຺ປຕ຺ໂຕ ສຕ຺ຖຸ ຍມກປາຏິຫາຣິຍໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສມຓຘມ຺ມໍ ກໂຣນ຺ໂຕ ອາພາຘິໂກ ອໂຫສິ. ອຖ ນໍ ຎາຕກາ ເວຊ຺ຊປຣິທິຏ຺ເຐນ ເຠສຊ຺ຊວິຘິນາ ອຸປຏ຺ຐຫິຕ຺ວາ ອໂຣຄມກໍສຸ. ໂສ ຕມ຺ຫາ ອາພາຘາ ວຸຏ຺ຐິໂຕ ສໍເວຄຊາໂຕ ຠາວນໍ ອຸສ຺ສຸກ຺ກາເປຕ຺ວາ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໗.໔໐-໔໔) –

‘‘ວນນ຺ຕເຣ ພຸທ຺ຘໍ ທິສ຺ວາ, ອຕ຺ຖທສ຺ສິໍ ມຫາຍສໍ;

ປສນ຺ນຈິຕ຺ໂຕ ສຸມໂນ, ປິລກ຺ຂສ຺ສ ຜລໍ ອທາ.

‘‘ອຏ຺ຐາຣເສ ກປ຺ປສເຕ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ອາກາເສນ ຎາຕການໍ ສນ຺ຕິເກ ຄນ຺ຕ຺ວາ ອາກາເສ ຐິໂຕ ຘມ຺ມໍ ເທເສຕ຺ວາ ເຕ ສຣເຓສຸ ສີເລສຸ ຈ ປຕິຏ຺ຐາເປສິ. ເຕສຸ ເກຈິ ກາລງ຺ກຕາ ສຣເຓສຸ ສີເລສຸ ຈ ປຕິຏ຺ຐິຕຕ຺ຕາ ສຄ຺ເຄ ນິພ຺ພຕ຺ຕິໍສຸ. ອຖ ນໍ ສຕ຺ຖາ ພຸທ຺ຘຸປຏ຺ຐານໍ ອຸປຄຕໍ ‘‘ກິໍ ເຕ, ວສ຺ສິກ, ຎາຕີນໍ ອາໂຣຄ຺ຍ’’ນ຺ຕິ ປຸຈ຺ຉິ. ໂສ ຎາຕີນໍ ອຕ຺ຕນາ ກຕໍ ອຸປກາຣໍ ສຕ຺ຖຸ ກເຖນ຺ໂຕ –

໒໔໐. ‘‘ເອໂກປິ ສທ຺ໂຘ ເມຘາວີ, ອສ຺ສທ຺ຘານີຘ ຎາຕິນໍ;

ຘມ຺ມຏ຺ໂຐ ສີລສມ຺ປນ຺ໂນ, ໂຫຕິ ອຕ຺ຖາຍ ພນ຺ຘຸນໍ.

໒໔໑. ‘‘ນິຄ຺ຄຍ຺ຫ ອນຸກມ຺ປາຍ, ໂຈທິຕາ ຎາຕໂຍ ມຍາ;

ຎາຕິພນ຺ຘວເປເມນ, ກາຣໍ ກຕ຺ວານ ຠິກ຺ຂຸສຸ.

໒໔໒. ‘‘ເຕ ອພ຺ຠຕີຕາ ກາລງ຺ກຕາ, ປຕ຺ຕາ ເຕ ຕິທິວໍ ສຸຂໍ;

ຠາຕໂຣ ມຍ຺ຫໍ ມາຕາ ຈ, ໂມທນ຺ຕິ ກາມກາມິໂນ’’ຕິ. –

ຕິສ຺ໂສ ຄາຖາ ອຠາສິ.

ຕຕ຺ຖາຍໍ ປຐມຄາຖາຍ ອຕ຺ໂຖ – ໂຍ ກມ຺ມຜລສທ຺ຘາຍ ຈ ຣຕນຕ຺ຕຍສທ຺ຘາຍ ຈ ວເສນ ສທ຺ໂຘ, ຕໂຕ ເອວ ກມ຺ມສ຺ສກຕຎາຓາທິໂຍຄໂຕ ເມຘາວີ, ສຕ຺ຖຸ ໂອວາທຘມ຺ເມ ນວໂລກຸຕ຺ຕຣຘມ຺ເມ ຈ ຐິຕຕ຺ຕາ ຘມ຺ມຏ຺ໂຐ, ອາຈາຣສີລສ຺ສ ມຄ຺ຄສີລສ຺ສ ຜລສີລສ຺ສ ຈ ວເສນ ສີລສມ຺ປນ຺ໂນ, ໂສ ເອໂກປິ ຍຖາວຸຕ຺ຕາຍ ສທ຺ຘາຍ ອຠາເວນ ອສ຺ສທ຺ຘານໍ ອິຘ ອິມສ຺ມິໍ ໂລເກ ‘‘ອມ຺ຫາກໍ ອິເມ’’ຕິ ຎາຕພ຺ພຏ຺ເຐນ ຎາຕີນໍ, ຕຖາ ເປມພນ຺ຘເນນ ພນ຺ຘນຏ຺ເຐນ ‘‘ພນ຺ຘູ’’ຕິ ຈ ລທ຺ຘນາມານໍ ພນ຺ຘວານໍ ອຕ຺ຖາຍ ຫິຕາຍ ໂຫຕີຕິ.

ເອວໍ ສາຘາຣຓໂຕ ວຸຕ຺ຕມຕ຺ຖໍ ອຕ຺ຕູປນາຍິກໍ ກຕ຺ວາ ທສ຺ເສຕຸໍ ‘‘ນິຄ຺ຄຍ຺ຫາ’’ຕິອາທິນາ ອິຕຣຄາຖາ ວຸຕ຺ຕາ. ຕຕ຺ຖ ນິຄ຺ຄຍ຺ຫ ອນຸກມ຺ປາຍ, ໂຈທິຕາ ຎາຕໂຍ ມຍາຕິ ອິທານິປິ ທຸຄ຺ຄຕາ ກຸສລໍ ອກຕ຺ວາ ອາຍຕິໍ ປຣິກ຺ກິເລສໍ ປຸນ ມານຸຠວິຕ຺ຖາຕິ ນິຄ຺ຄເຫຕ຺ວາ ຎາຕໂຍ ມຍາ ໂອວທິຕາ. ຎາຕິພນ຺ຘວເປເມນ ‘‘ອມ຺ຫາກໍ ອຍໍ ພນ຺ຘໂວ’’ຕິ ເອວໍ ປວຕ຺ເຕນ ເປເມນ ມມ ໂອວາທໍ ອຕິກ຺ກມິຕຸໍ ອສກ຺ໂກນ຺ຕາ ກາຣໍ ກຕ຺ວານ ຠິກ຺ຂູສຸ ປສນ຺ນຈິຕ຺ຕາ ຫຸຕ຺ວາ ຈີວຣາທິປຈ຺ຈຍທາເນນ ເຈວ ອຸປຏ຺ຐາເນນ ຈ ຠິກ຺ຂູສຸ ສກ຺ກາຣສມ຺ມານໍ ກຕ຺ວາ ເຕ ອພ຺ຠຕີຕາ ກາລງ຺ກຕາ ຫຸຕ຺ວາ ອິມໍ ໂລກໍ ອຕິກ຺ກນ຺ຕາ. ປຸນ ເຕຕິ ນິປາຕມຕ຺ຕໍ. ຕິທິວໍ ສຸຂນ຺ຕິ ເທວໂລກປຣິຍາປນ຺ນສຸຂໍ, ສຸຂໍ ວາ ອິຏ຺ຐໍ ຕິທິວໍ ອຘິຄຕາ. ‘‘ເກ ປນ ເຕ’’ຕິ ອາຫ. ‘‘ຠາຕໂຣ ມຍ຺ຫໍ ມາຕາ ຈ, ໂມທນ຺ຕິ ກາມກາມິໂນ’’ຕິ. ອຕ຺ຕນາ ຍຖາກາມິຕວຕ຺ຖຸກາມສມງ຺ຄິໂນ ຫຸຕ຺ວາ ອຠິຣມນ຺ຕີຕິ ອຕ຺ໂຖ.

ວສ຺ສິກຕ຺ເຖຣຄາຖາວຓ຺ຓນາ ນິຏ຺ຐິຕາ.