໓. ພາກຸລຕ຺ເຖຣຄາຖາວຓ຺ຓນາ

ໂຍ ປຸພ຺ເພ ກຣຓີຍານີຕິ ອາຍສ຺ມໂຕ ພາກຸລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ກິຣ ອຕີເຕ ອິໂຕ ກປ຺ປສຕສຫສ຺ສາຘິກສ຺ສ ອສງ຺ຂ຺ເຍຍ຺ຍສ຺ສ ມຕ຺ຖເກ ອໂນມທສ຺ສິສ຺ສ ຠຄວໂຕ ອຸປ຺ປຕ຺ຕິໂຕ ປຸເຣຕຣເມວ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ຕໂຍ ເວເທ ອຸຄ຺ຄເຫຕ຺ວາ ຕຕ຺ຖ ສາຣໍ ອປສ຺ສນ຺ໂຕ ‘‘ສມ຺ປຣາຍິກຕ຺ຖໍ ຄເວສິສ຺ສາມີ’’ຕິ ອິສິປພ຺ພຊ຺ຊໍ ປພ຺ພຊິຕ຺ວາ ປພ຺ພຕປາເທ ວິຫຣນ຺ໂຕ ປຎ຺ຈາຠິຎ຺ຎາອຏ຺ຐສມາປຕ຺ຕິລາຠີ ຫຸຕ຺ວາ ວິຫຣນ຺ໂຕ ພຸທ຺ຘຸປ຺ປາທໍ ສຸຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ສຣເຓສຸ ປຕິຏ຺ຐິໂຕ ສຕ຺ຖຸ ອຸທຣາພາເຘ ອຸປ຺ປນ຺ເນ ອຣຎ຺ຎໂຕ ເຠສຊ຺ຊານິ ອາຫຣິຕ຺ວາ ຕໍ ວູປສເມຕ຺ວາ ຕຕ຺ຖ ປຸຎ຺ຎໍ ອາໂຣຄ຺ຍຕ຺ຖາຍ ປຣິຓາເມຕ຺ວາ ຕໂຕ ຈຸໂຕ ພ຺ຣຫ຺ມໂລເກ ນິພ຺ພຕ຺ຕິຕ຺ວາ ເອກໍ ອສງ຺ຂ຺ເຍຍ຺ຍໍ ເທວມນຸສ຺ເສສຸ ສໍສຣນ຺ໂຕ ປທຸມຸຕ຺ຕຣພຸທ຺ຘກາເລ ຫໍສວຕີນຄເຣ ກຸລເຄເຫ ນິພ຺ພຕ຺ໂຕ ສຕ຺ຖາຣໍ ເອກໍ ຠິກ຺ຂຸໍ ອປ຺ປາພາຘານໍ ອຄ຺ຄຏ຺ຐາເນ ຐເປນ຺ຕໍ ທິສ຺ວາ ສຍໍ ຕໍ ຐານນ຺ຕຣໍ ອາກງ຺ຂນ຺ໂຕ ປຓິຘານໍ ກຕ຺ວາ ຍາວຊີວໍ ກຸສລໍ ອຸປຈິນິຕ຺ວາ ສຸຄຕີສຸເຍວ ສໍສຣນ຺ໂຕ ວິປສ຺ສິສ຺ສ ຠຄວໂຕ ນິພ຺ພຕ຺ຕິໂຕ ປຸເຣຕຣເມວ ພນ຺ຘຸມຕີນຄເຣ ພ຺ຣາຫ຺ມຓກຸເລ ນິພ຺ພຕ຺ໂຕ ປຸຣິມນເຍເນວ ອິສິປພ຺ພຊ຺ຊໍ ປພ຺ພຊິຕ຺ວາ ຌານາຠິຎ຺ຎາລາຠີ ຫຸຕ຺ວາ ປພ຺ພຕປາເທ ວສນ຺ໂຕ ພຸທ຺ຘຸປ຺ປາທໍ ສຸຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ສຣເຓສຸ ປຕິຏ຺ຐິໂຕ ຠິກ຺ຂູນໍ ຕິຓປຸປ຺ຜກໂຣເຄ ອຸປ຺ປນ຺ເນ ຕໍ ວູປສເມຕ຺ວາ ຕຕ຺ຖ ຍາວຕາຍຸກໍ ຐຕ຺ວາ ຕໂຕ ຈຸໂຕ ພ຺ຣຫ຺ມໂລເກ ນິພ຺ພຕ຺ຕິຕ຺ວາ ເອກນວຸຕິກປ຺ເປ ເທວມນຸສ຺ເສສຸ ສໍສຣນ຺ໂຕ ກສ຺ສປສ຺ສ ຠຄວໂຕ ກາເລ ພາຣາຓສິຍໍ ກຸລເຄເຫ ນິພ຺ພຕ຺ຕິຕ຺ວາ ຆຣາວາສໍ ວສນ຺ໂຕ ເອກໍ ຊິຓ຺ຓໍ ວິນສ຺ສມານໍ ມຫາວິຫາຣໍ ທິສ຺ວາ ຕຕ຺ຖ ອຸໂປສຖາຄາຣາທິກໍ ສພ຺ພໍ ອາວສຖໍ ກາເຣຕ຺ວາ ຕຕ຺ຖ ຠິກ຺ຂຸສງ຺ຆສ຺ສ ສພ຺ພໍ ເຠສຊ຺ຊໍ ປຏິຍາເທຕ຺ວາ ຍາວຊີວໍ ກຸສລໍ ກຕ຺ວາ ເອກໍ ພຸທ຺ຘນ຺ຕຣໍ ເທວມນຸສ຺ເສສຸ ສໍສຣນ຺ໂຕ ອມ຺ຫາກໍ ຠຄວໂຕ ອຸປ຺ປຕ຺ຕິໂຕ ປຸເຣຕຣເມວ ໂກສມ຺ພິຍໍ ເສຏ຺ຐິເຄເຫ ນິພ຺ພຕ຺ຕິ. ໂສ ອໂຣຄຠາວາຍ ມຫາຍມຸນາຍ ນ຺ຫາປິຍມາໂນ ຘາຕິຍາ ຫຕ຺ຖໂຕ ມຈ຺ເຉນ ຄິລິໂຕ ມຈ຺ເຉ ເກວຏ຺ຏຫຕ຺ຖຄເຕ ພາຣາຓສິເສຏ຺ຐິຠຣິຍາຍ ວິກ຺ກິຓິຕ຺ວາ ຄຫິເຕ ຜາລິຍມາເນປິ ປຸຎ຺ຎພເລນ ອໂຣໂຄເຍວ ຫຸຕ຺ວາ ຕາຍ ປຸຕ຺ໂຕຕິ ຄເຫຕ຺ວາ ໂປສິຍມາໂນ ຕໍ ປວຕ຺ຕິໍ ສຸຕ຺ວາ ຊນເກຫິ ມາຕາປິຕູຫິ ‘‘ອຍໍ ອມ຺ຫາກໍ ປຸຕ຺ໂຕ, ເທຖ ໂນ ປຸຕ຺ຕ’’ນ຺ຕິ ອນຸໂຍເຄ ກເຕ ຣຎ຺ຎາ ‘‘ອຸຠເຍສມ຺ປິ ສາຘາຣໂຓ ໂຫຕູ’’ຕິ ທ຺ວິນ຺ນໍ ກຸລານໍ ທາຍາທຠາເວນ ວິນິຈ຺ຉຍໍ ກຕ຺ວາ ຐປິຕຕ຺ຕາ ພາກຸໂລຕິ ລທ຺ຘນາໂມ ວຍປ຺ປຕ຺ໂຕ ຫຸຕ຺ວາ ມຫຕິໍ ສມ຺ປຕ຺ຕິໍ ອນຸຠວນ຺ໂຕ ອາສີຕິໂກ ຫຸຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສຕ຺ຕາຫເມວ ປຸຖຸຊ຺ຊໂນ ອໂຫສິ, ອຏ຺ຐເມ ອຣຸເຓ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໔໐.໓໘໖-໔໑໑) –

‘‘ຫິມວນ຺ຕສ຺ສາວິທູເຣ, ໂສຠິໂຕ ນາມ ປພ຺ພໂຕ;

ອສ຺ສໂມ ສຸກໂຕ ມຍ຺ຫໍ, ສກສິສ຺ເສຫິ ມາປິໂຕ.

‘‘ມຓ຺ຑປາ ຈ ພຫູ ຕຕ຺ຖ, ປຸປ຺ຜິຕາ ສິນ຺ຘຸວາຣກາ;

ກປິຕ຺ຖາ ຈ ພຫູ ຕຕ຺ຖ, ປຸປ຺ຜິຕາ ຊີວຊີວກາ.

‘‘ນິຄ຺ຄຸຓ຺ຑິໂຍ ພຫູ ຕຕ຺ຖ, ພທຣາມລການິ ຈ;

ຜາຣຸສກາ ອລາພູ ຈ, ປຸຓ຺ຑຣີກາ ຈ ປຸປ຺ຜິຕາ.

‘‘ອາຬກາ ເພລຸວາ ຕຕ຺ຖ, ກທລີ ມາຕຸລຸງ຺ຄກາ;

ມຫານາມາ ພຫູ ຕຕ຺ຖ, ອຊ຺ຊຸນາ ຈ ປິຍງ຺ຄຸກາ.

‘‘ໂກສມ຺ພາ ສຬລາ ນິມ຺ພາ, ນິຄ຺ໂຣຘາ ຈ ກປິຕ຺ຖນາ;

ເອທິໂສ ອສ຺ສໂມ ມຍ຺ຫໍ, ສສິສ຺ໂສຫໍ ຕຫິໍ ວສິໍ.

‘‘ອໂນມທສ຺ສີ ຠຄວາ, ສຍມ຺ຠູ ໂລກນາຍໂກ;

ຄເວສໍ ປຏິສລ຺ລານໍ, ມມສ຺ສມມຸປາຄມິ.

‘‘ອຸເປຕມ຺ຫິ ມຫາວີເຣ, ອໂນມທສ຺ສິມຫາຍເສ;

ຂເຓນ ໂລກນາຖສ຺ສ, ວາຕາພາໂຘ ສມຸຏ຺ຐຫິ.

‘‘ວິຈຣນ຺ໂຕ ອຣຎ຺ຎມ຺ຫິ, ອທ຺ທສໍ ໂລກນາຍກໍ;

ອຸປຄນ຺ຕ຺ວານ ສມ຺ພຸທ຺ຘໍ, ຈກ຺ຂຸມນ຺ຕໍ ມຫາຍສໍ.

‘‘ອິຣິຍຎ຺ຈາປິ ທິສ຺ວານ, ອຸປລກ຺ເຂສຫໍ ຕທາ;

ອສໍສຍຎ຺ຫິ ພຸທ຺ຘສ຺ສ, ພ຺ຍາຘິ ໂນ ອຸທປຊ຺ຊຖ.

‘‘ຂິປ຺ປໍ ອສ຺ສມມາຄຎ຺ຉິໍ, ມມ ສິສ຺ສານ ສນ຺ຕິເກ;

ເຠສຊ຺ຊໍ ກຕ຺ຕຸກາໂມຫໍ, ສິສ຺ເສ ອາມນ຺ຕຍິໍ ຕທາ.

‘‘ປຏິສ຺ສຸຓິຕ຺ວານ ເມ ວາກ຺ຍໍ, ສິສ຺ສາ ສພ຺ເພ ສຄາຣວາ;

ເອກຊ຺ຌໍ ສນ຺ນິປຕິໍສຸ, ສຕ຺ຖຸຄາຣວຕາ ມມ.

‘‘ຂິປ຺ປໍ ປພ຺ພຕມາຣຸຍ຺ຫ, ສພ຺ໂພສຘມຫາສຫໍ;

ປານີຍໂຍຄໍ ກຕ຺ວານ, ພຸທ຺ຘເສຏ຺ຐສ຺ສທາສຫໍ.

‘‘ປຣິຠຸຕ຺ເຕ ມຫາວີເຣ, ສພ຺ພຎ຺ຎຸໂລກນາຍເກ;

ຂິປ຺ປໍ ວາໂຕ ວູປສມິ, ສຸຄຕສ຺ສ ມເຫສິໂນ.

‘‘ປສ຺ສທ຺ຘໍ ທຣຖໍ ທິສ຺ວາ, ອໂນມທສ຺ສີ ມຫາຍໂສ;

ສກາສເນ ນິສີທິຕ຺ວາ, ອິມາ ຄາຖາ ອຠາສຖ.

‘‘ໂຍ ເມ ປາທາສິ ເຠສຊ຺ຊໍ, ພ຺ຍາຘິຎ຺ຈ ສມຍີ ມມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

‘‘ກປ຺ປສຕສຫສ຺ສານິ, ເທວໂລເກ ຣມິສ຺ສຕິ;

ວາທິເຕ ຕູຣິເຍ ຕຕ຺ຖ, ໂມທິສ຺ສຕິ ສທາ ອຍໍ.

‘‘ມນຸສ຺ສໂລກມາຄນ຺ຕ຺ວາ, ສຸກ຺ກມູເລນ ໂຈທິໂຕ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

‘‘ປຎ຺ຈປຎ຺ຎາສກປ຺ປມ຺ຫິ, ອໂນໂມ ນາມ ຂຕ຺ຕິໂຍ;

ຈາຕຸຣນ຺ໂຕ ວິຊິຕາວີ, ຊມ຺ພຸມຓ຺ຑສ຺ສ ອິສ຺ສໂຣ.

‘‘ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ;

ຕາວຕິໍເສປິ ໂຂເຠຕ຺ວາ, ອິສ຺ສຣໍ ກາຣຍິສ຺ສຕິ.

‘‘ເທວຠູໂຕ ມນຸສ຺ໂສ ວາ, ອປ຺ປາພາໂຘ ຠວິສ຺ສຕິ;

ປຣິຄ຺ຄຫໍ ວິວຊ຺ເຊຕ຺ວາ, ພ຺ຍາຘິໍ ໂລເກ ຕຣິສ຺ສຕິ.

‘‘ອປຣິເມຍ຺ເຍ ອິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

‘‘ກິເລເສ ຌາປຍິຕ຺ວານ, ຕຓ຺ຫາໂສຕໍ ຕຣິສ຺ສຕິ;

ພາກຸໂລ ນາມ ນາເມນ, ເຫສ຺ສຕິ ສຕ຺ຖຸ ສາວໂກ.

‘‘ອິທໍ ສພ຺ພໍ ອຠິຎ຺ຎາຍ, ໂຄຕໂມ ສກ຺ຍປຸງ຺ຄໂວ;

ຠິກ຺ຂຸສງ຺ເຆ ນິສີທິຕ຺ວາ, ເອຕທຄ຺ເຄ ຐເປສ຺ສຕິ.

‘‘ອໂນມທສ຺ສີ ຠຄວາ, ສຍມ຺ຠູ ໂລກນາຍໂກ;

ວິເວການຸວິໂລເກນ຺ໂຕ, ມມສ຺ສມມຸປາຄມິ.

‘‘ອຸປາຄຕໍ ມຫາວີຣໍ, ສພ຺ພຎ຺ຎຸໍ ໂລກນາຍກໍ;

ສພ຺ໂພສເຘນ ຕປ຺ເປສິໍ, ປສນ຺ໂນ ເສຫິ ປາຓິຠິ.

‘‘ຕສ຺ສ ເມ ສຸກຕໍ ກມ຺ມໍ, ສຸເຂຕ຺ເຕ ພີຊສມ຺ປທາ;

ເຂເປຕຸໍ ເນວ ສກ຺ໂກມິ, ຕທາ ຫິ ສຸກຕໍ ມມ.

‘‘ລາຠາ ມມ ສຸລທ຺ຘໍ ເມ, ໂຍຫໍ ອທ຺ທກ຺ຂິ ນາຍກໍ;

ເຕນ ກມ຺ມາວເສເສນ, ປຕ຺ໂຕມ຺ຫິ ອຈລໍ ປທໍ.

‘‘ສພ຺ພເມຕໍ ອຠິຎ຺ຎາຍ, ໂຄຕໂມ ສກ຺ຍປຸງ຺ຄໂວ;

ຠິກ຺ຂຸສງ຺ເຆ ນິສີທິຕ຺ວາ, ເອຕທຄ຺ເຄ ຐເປສິ ມໍ.

‘‘ອປຣິເມຍ຺ເຍ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ເຠສຊ຺ຊສ຺ສ ອິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ເອກທິວສໍ ສຕ຺ຖາຣາ ອຕ຺ຕໂນ ສາວເກ ປຏິປາຏິຍາ ຐານນ຺ຕເຣ ຐເປນ຺ເຕນ ອປ຺ປາພາຘານໍ ອຄ຺ຄຏ຺ຐາເນ ຐປິໂຕ ໂສ ປຣິນິພ຺ພານສມເຍ ສງ຺ຆມຊ຺ເຌ ຠິກ຺ຂູນໍ ໂອວາທມຸເຂນ ອຎ຺ຎໍ ພ຺ຍາກໂຣນ຺ໂຕ –

໒໒໕. ‘‘ໂຍ ປຸພ຺ເພ ກຣຓີຍານິ, ປຈ຺ຉາ ໂສ ກາຕຸມິຈ຺ຉຕິ;

ສຸຂາ ໂສ ຘໍສເຕ ຐານາ, ປຈ຺ຉາ ຈ ມນຸຕປ຺ປຕິ.

໒໒໖. ‘‘ຍຎ຺ຫິ ກຍິຣາ ຕຎ຺ຫິ ວເທ, ຍໍ ນ ກຍິຣາ ນ ຕໍ ວເທ;

ອກໂຣນ຺ຕໍ ຠາສມານໍ, ປຣິຊານນ຺ຕິ ປຓ຺ຑິຕາ.

໒໒໗. ‘‘ສຸສຸຂໍ ວຕ ນິພ຺ພານໍ, ສມ຺ມາສມ຺ພຸທ຺ຘເທສິຕໍ;

ອໂສກໍ ວິຣຊໍ ເຂມໍ, ຍຕ຺ຖ ທຸກ຺ຂໍ ນິຣຸຊ຺ຌຕີ’’ຕິ. – ຄາຖາຕ຺ຕຍມຠາສິ;

ຕຕ຺ຖ ໂຍ ປຸພ຺ເພ ກຣຓີຍານິ, ປຈ຺ຉາ ໂສ ກາຕຸມິຈ຺ຉຕີຕິ ໂຍ ປຸຄ຺ຄໂລ ປຸພ຺ເພ ປຸເຣຕຣໍ ຊຣາໂຣຄາທີຫິ ອນຠິຠູຕກາເລເຍວ ກາຕພ຺ພານິ ອຕ຺ຕໂນ ຫິຕສຸຂາວຫານິ ກມ຺ມານິ ປມາທວເສນ ອກຕ຺ວາ ປຈ຺ຉາ ໂສ ກາຕພ຺ພກາລໍ ອຕິກ຺ກມິຕ຺ວາ ກາຕຸໍ ອິຈ຺ຉຕິ. ໂສຕິ ຈ ນິປາຕມຕ຺ຕໍ. ຕທາ ປນ ຊຣາໂຣຄາທີຫິ ອຠິຠູຕຕ຺ຕາ ກາຕຸໍ ນ ສກ຺ໂກຕິ, ອສກ຺ໂກນ຺ໂຕ ຈ ສຸຂາ ໂສ ຘໍສເຕ ຐານາ, ປຈ຺ຉາ ຈ ມນຸຕປ຺ປຕີຕິ ໂສ ປຸຄ຺ຄໂລ ສຸຂາ ຐານາ ສຄ຺ຄໂຕ ນິພ຺ພານໂຕ ຈ ຕທຸປາຍສ຺ສ ອນຸປ຺ປາທິຕຕ຺ຕາ ປຣິຫາຍນ຺ໂຕ ‘‘ອກຕໍ ເມ ກລ຺ຍາຓ’’ນ຺ຕິອາທິນາ (ມ. ນິ. ໓.໒໔໘; ເນຕ຺ຕິ. ໑໒໐) ປຈ຺ຉາ ຈ ອນຸຕປ຺ປຕິ ວິປ຺ປຏິສາຣໍ ອາປຊ຺ຊຕິ. ມ-ກາໂຣ ປທສນ຺ຘິກໂຣ. ອຫໍ ປນ ກຣຓີຍໍ ກຕ຺ວາ ເອວ ຕຸມ຺ເຫ ເອວໍ ວທາມີຕິ ທສ຺ເສນ຺ໂຕ ‘‘ຍຎ຺ຫິ ກຍິຣາ’’ຕິ ທຸຕິຍໍ ຄາຖມາຫ.

ຕຕ຺ຖ ປຣິຊານນ຺ຕີຕິ ‘‘ເອຕ຺ຕໂກ ອຍ’’ນ຺ຕິ ປຣິຈ຺ຉິຊ຺ຊ ຊານນ຺ຕິ ນ ພຫຸໍ ມຎ຺ຎນ຺ຕີຕິ ອຕ຺ໂຖ. ສມ຺ມາປຏິປຕ຺ຕິວເສນ ຫິ ຍຖາວາທີ ຕຖາກາຣີ ເອວ ໂສຠຕິ, ນ ຕໂຕ ອຎ຺ຎຖາ. ກຣຓີຍປຣິຍາເຍນ ສາຘາຣຓໂຕ ວຸຕ຺ຕມຕ຺ຖໍ ອິທານິ ສຣູປໂຕ ທສ຺ເສຕຸໍ ‘‘ສຸສຸຂໍ ວຕາ’’ຕິອາທິນາ ຕຕິຍໍ ຄາຖມາຫ. ຕສ຺ສຕ຺ໂຖ – ສມ຺ມາ ສາມໍ ສພ຺ພຘມ຺ມານໍ ພຸທ຺ຘຕ຺ຕາ ສມ຺ມາສມ຺ພຸທ຺ເຘນ ຠຄວຕາ ເທສິຕໍ ສພ຺ພໂສ ໂສກເຫຕູນໍ ອຠາວໂຕ ອໂສກໍ ວິຄຕຣາຄາທິຣຊຕ຺ຕາ ວິຣຊໍ ຈຕູຫິ ໂຍເຄຫິ ອນຸປທ຺ທຸຕຕ຺ຕາ ເຂມໍ ນິພ຺ພານໍ ສຸຏ຺ຐຸ ສຸຂໍ ວຕ, ກສ຺ມາ? ຍຕ຺ຖ ຍສ຺ມິໍ ນິພ຺ພາເນ ສກລໍ ວຏ຺ຏທຸກ຺ຂໍ ນິຣຸຊ຺ຌຕິ ອຈ຺ຈນ຺ຕເມວ ວູປສມຕີຕິ.

ພາກຸລຕ຺ເຖຣຄາຖາວຓ຺ຓນາ ນິຏ຺ຐິຕາ.