໒. ປຈ຺ຈຍຕ຺ເຖຣຄາຖາວຓ຺ຓນາ

ປຎ຺ຈາຫາຫໍ ປພ຺ພຊິໂຕຕິ ອາຍສ຺ມໂຕ ປຈ຺ຈຍຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ເອກນວຸເຕ ກປ຺ເປ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ວິນຕາຍ ນາມ ນທິຍາ ຕີເຣ ຄຈ຺ຉນ຺ຕໍ ທິສ຺ວາ ປສນ຺ນມານໂສ ມນຸຎ຺ຎທສ຺ສນານິ ມຫນ຺ຕານິ ອຸທຸມ຺ພຣຜລານິ ໂອຈິນິຕ຺ວາ ອຸປນາເມສິ. ໂສ ເຕນ ປຸຎ຺ຎກມ຺ເມນ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ຠທ຺ທກປ຺ເປ ກສ຺ສເປ ຠຄວຕິ ໂລເກ ອຸປ຺ປຊ຺ຊິຕ຺ວາ ປວຕ຺ຕວຣຘມ຺ມຈກ຺ເກ ເວເນຍ຺ຍຊນານຸຄ຺ຄຫໍ ກໂຣນ຺ເຕ ຕສ຺ສ ສາສເນ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ຠາວນມນຸຍຸຎ຺ຊນ຺ໂຕ ເອກທິວສໍ ສໍສາຣທຸກ຺ຂໍ ຈິນ຺ເຕຕ຺ວາ

ອຕິວິຍ ສຎ຺ຊາຕສໍເວໂຄ ວິຫາເຣ ນິສິນ຺ໂນ ‘‘ອຣຫຕ຺ຕໍ ອປ຺ປຕ຺ວາ ອິໂຕ ນ ນິກ຺ຂມິສ຺ສາມີ’’ຕິ ຈິຕ຺ຕໍ ອຘິຏ຺ຐາຍ ວາຍມນ຺ໂຕ ຎາຓສ຺ສ ອປຣິປກ຺ກຕ຺ຕາ ວິປສ຺ສນໍ ອຸສ຺ສຸກ຺ກາເປຕຸໍ ນາສກ຺ຂິ. ໂສ ກາລງ຺ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂຣຫິຕນຄເຣ ຂຕ຺ຕິຍກຸເລ ນິພ຺ພຕ຺ຕິຕ຺ວາ ປຈ຺ຈໂຍຕິ ລທ຺ຘນາໂມ ວຍປ຺ປຕ຺ໂຕ ປິຕຸ ອຈ຺ຈເຍນ ຣຊ຺ເຊ ປຕິຏ຺ຐິໂຕ ເອກທິວສໍ ມຫາຣາຊພລິໍ ກາຕຸໍ ອາຣຠິ. ຕຕ຺ຖ ມຫາຊໂນ ສນ຺ນິປຕິ. ຕສ຺ມິໍ ສມາຄເມ ຕສ຺ສ ປສາທຎ຺ຊນນຕ຺ຖໍ ສຕ຺ຖາ ມຫາຊນສ຺ສ ເປກ຺ຂນ຺ຕສ຺ເສວ ອາກາເສ ເວສ຺ສວເຓນ ນິມ຺ມິເຕ ຣຕນມຍກູຏາຄາເຣ ຣຕນມຍສີຫາສເນ ນິສີທິຕ຺ວາ ຘມ຺ມໍ ເທເສສິ. ມຫໂຕ ຊນກາຍສ຺ສ ຘມ຺ມາຠິສມໂຍ ອໂຫສິ. ຕໍ ຘມ຺ມໍ ສຸຕ຺ວາ ປຈ຺ຈຍຣາຊາປິ ຣຊ຺ຊໍ ປຫາຍ ປຸຣິມເຫຕຸສຎ຺ໂຈທິໂຕ ປພ຺ພຊິ. ໂສ ຍຖາ ກສ຺ສປສ຺ສ ຠຄວໂຕ ກາເລ ປຏິຎ຺ຎໍ ອກາສິ, ເອວໍ ປຏິຎ຺ຎໍ ກຕ຺ວາ ວິຫາຣໍ ປວິສິຕ຺ວາ ວິປສ຺ສນໍ ວຑ຺ເຒນ຺ໂຕ ຎາຓສ຺ສ ປຣິປາກໍ ຄຕຕ຺ຕາ ຕາວເທວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໓໙.໑໕-໒໐) –

‘‘ວິນຕານທິຍາ ຕີເຣ, ວິຫາສິ ປຸຣິສຸຕ຺ຕໂມ;

ອທ຺ທສໍ ວິຣຊໍ ພຸທ຺ຘໍ, ເອກຄ຺ຄໍ ສຸສມາຫິຕໍ.

‘‘ຕສ຺ມິໍ ປສນ຺ນມານໂສ, ກິເລສມລໂຘວເນ;

ອຸທຸມ຺ພຣຜລໍ ຄຍ຺ຫ, ພຸທ຺ຘເສຏ຺ຐສ຺ສທາສຫໍ.

‘‘ເອກນວຸຕິໂຕ ກປ຺ເປ, ຍໍ ຜລມທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ອິມມ຺ຫິ ຠທ຺ທເກ ກປ຺ເປ, ສໍວິຄ຺ຄມານມານໂສ;

ກສ຺ສປສ຺ສ ຠຄວໂຕ, ສາສເນ ປພ຺ພຊິໍ ອຫໍ.

‘‘ຕຖາ ປພ຺ພຊິໂຕ ສນ຺ໂຕ, ຠາວນໍ ອນຸຍຸຎ຺ຊິສໍ;

ນ ວິຫາຣາ ນິກ຺ຂມິສ຺ສໍ, ອິຕິ ກຕ຺ວານ ມານສໍ.

‘‘ອຸຕ຺ຕມຕ຺ຖໍ ອສມ຺ປຕ຺ໂຕ, ນ ຈ ປຕ຺ໂຕມ຺ຫິ ຕາວເທ;

ອິທານິ ປນ ຎາຓສ຺ສ, ປຣິປາເກນ ນິພ຺ພຸໂຕ;

ປຕ຺ໂຕມ຺ຫິ ອຈລໍ ຐານໍ, ຜຸສິຕ຺ວາ ອຈ຺ຈຸຕໍ ປທໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິກິຕ຺ຕນມຸເຂນ ອຎ຺ຎໍ ພ຺ຍາກໂຣນ຺ໂຕ –

໒໒໒. ‘‘ປຎ຺ຈາຫາຫໍ ປພ຺ພຊິໂຕ, ເສໂຂ ອປ຺ປຕ຺ຕມານໂສ;

ວິຫາຣໍ ເມ ປວິຏ຺ຐສ຺ສ, ເຈຕໂສ ປຓິຘີ ອຫຸ.

໒໒໓. ‘‘ນາສິສ຺ສໍ ນ ປິວິສ຺ສາມິ, ວິຫາຣໂຕ ນ ນິກ຺ຂເມ;

ນປິ ປສ຺ສໍ ນິປາເຕສ຺ສໍ, ຕຓ຺ຫາສລ຺ເລ ອນູຫເຕ.

໒໒໔. ‘‘ຕສ຺ສ ເມວໍ ວິຫຣໂຕ, ປສ຺ສ ວີຣິຍປຣກ຺ກມໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ. –

ອິມາ ຕິສ຺ໂສ ຄາຖາ ອຠາສິ.

ຕຕ຺ຖ ປຎ຺ຈາຫາຫໍ ປພ຺ພຊິໂຕຕິ ປຎ຺ຈາໂຫ ອຫໍ, ປພ຺ພຊິໂຕ ຫຸຕ຺ວາ ປຎ຺ຈາໂຫ, ປພ຺ພຊິຕທິວສໂຕ ປຎ຺ຈໂມ ອໂຫ ນິຏ຺ຐິໂຕຕິ ອຕ຺ໂຖ. ເສໂຂ ອປ຺ປຕ຺ຕມານໂສຕິ ອຘິສີລສິກ຺ຂາທີນໍ ສິກ຺ຂນໂຕ ເສໂຂ. ອນວເສສໂຕ ມານໍ ສິຍຕິ ສມຸຈ຺ຉິນ຺ທຕີຕິ ມານໂສ, ອຄ຺ຄມຄ຺ໂຄ, ຕໍນິພ຺ພຕ຺ຕິໂຕ ມານສໂຕ ອາຄຕໍ ມານສໍ, ອຣຫຕ຺ຕໍ, ຕໍ, ໂສ ວາ ອປ຺ປຕ຺ໂຕ ເອເຕນາຕິ ອປ຺ປຕ຺ຕມານໂສ. ວິຫາຣໍ ເມ ປວິຏ຺ຐສ຺ສ, ເຈຕໂສ ປຓິຘີ ອຫູຕິ ເອວໍ ເສຂສ຺ສ ເມ ວສນກວິຫາຣໍ ໂອວຣກໍ ປວິຏ຺ຐສ຺ສ ສໂຕ ເອວຣູໂປ ອິທານິ ວຸຈ຺ຈມານາກາໂຣ ເຈໂຕປຓິຘິ ອໂຫສິ, ເອວໍ ມຍາ ຈິຕ຺ຕໍ ປຓິຫິຕນ຺ຕິ ອຕ຺ໂຖ.

ນາສິສ຺ສນ຺ຕິອາທິນາ ຈິຕ຺ຕປຓິຘິໍ ທສ຺ເສຕິ. ຕຕ຺ຖ ນາສິສ຺ສນ຺ຕິ ຍໍກິຎ຺ຈິ ໂຠຊນໍ ນ ຠຸຎ຺ຊິສ຺ສໍ ນ ຠຸຎ຺ຊິສ຺ສາມິ ຕຓ຺ຫາສລ຺ເລ ມມ ຫທຍຄເຕ ອນູຫເຕ ອນຸທ຺ຘເຕຕິ ເອວໍ ສພ຺ພປເທສຸ ໂຍເຊຕພ຺ພໍ. ນ ປິວິສ຺ສາມີຕິ ຍໍກິຎ຺ຈິ ປາຕພ຺ພໍ ນ ປິວິສ຺ສາມິ. ວິຫາຣໂຕ ນ ນິກ຺ຂເມຕິ ອິມສ຺ມາ ອິທານິ ມຍາ ນິສິນ຺ນຄພ຺ຠໂຕ ນ ນິກ຺ຂເມຍ຺ຍໍ. ນປິ ປສ຺ສໍ ນິປາເຕສ຺ສນ຺ຕິ ມມ ສຣີຣສ຺ສ ທ຺ວີສຸ ປສ຺ເສສຸ ເອກມ຺ປິ ປສ຺ສໍ ກາຍກິລມຖວິໂນທນຕ຺ຖໍ ນ ນິປາເຕສ຺ສໍ, ເອກປສ຺ເສນປິ ນ ນິປຊ຺ຊິສ຺ສາມີຕິ ອຕ຺ໂຖ.

ຕສ຺ສ ເມວໍ ວິຫຣໂຕຕິ ຕສ຺ສ ເມ ເອວໍ ຈິຕ຺ຕໍ ປຓິຘາຍ ທຬ຺ຫວີຣິຍາຘິຏ຺ຐານໍ ກຕ຺ວາ ວິປສ຺ສນານຸໂຍຄວເສນ ວິຫຣໂຕ. ປສ຺ສ ວີຣິຍປຣກ຺ກມນ຺ຕິ ວິຘິນາ ອີຣຍິຕພ຺ພໂຕ ‘‘ວີຣິຍໍ’’ ປຣໍ ຐານໍ ອກ຺ກມນໂຕ ‘‘ປຣກ຺ກໂມ’’ຕິ ຈ ລທ຺ຘນາມໍ ອຸສ຺ໂສຬ຺ຫີຠູຕໍ ວາຍາມໍ ປສ຺ສ ຊານາຫິ. ຍສ຺ສ ປນານຸຠາເວນ ມຍາ ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນນ຺ຕິ ວຸຕ຺ຕຕ຺ຖເມວ.

ປຈ຺ຈຍຕ຺ເຖຣຄາຖາວຓ຺ຓນາ ນິຏ຺ຐິຕາ.