໑໖. ວິມລຕ຺ເຖຣຄາຖາວຓ຺ຓນາ

ປາປມິຕ຺ເຕຕິ ອາຍສ຺ມໂຕ ວິມລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ສຕ຺ຖຣິ ປຣິນິພ຺ພຸເຕ ສາຘຸກີຬນທິວເສສຸ ວີຕິວຕ຺ເຕສຸ ສຕ຺ຖຸ ສຣີຣໍ ຄເຫຕ຺ວາ ອຸປາສເກສຸ ຌາປນຏ຺ຐານໍ ຄຈ຺ຉນ຺ເຕສຸ ສຕ຺ຖຸ ຄຸເຓ ອາວຊ຺ຊິຕ຺ວາ ປສນ຺ນມານໂສ ສຸມນປຸປ຺ເຜຫິ ປູຊມກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ພາຣາຓສິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວິມໂລຕິ ລທ຺ຘນາໂມ ວຍປ຺ປຕ຺ໂຕ ໂສມມິຕ຺ຕຕ຺ເຖຣໍ ນິສ຺ສາຍ ສາສເນ ປພ຺ພຊິຕ຺ວາ ເຕເນວ ອຸສ຺ສາຫິໂຕ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໖.໕໘-໖໒) –

‘‘ນີຫຣນ຺ເຕ ສຣີຣມ຺ຫິ, ວຊ຺ຊມານາສຸ ເຠຣິສຸ;

ປສນ຺ນຈິຕ຺ໂຕ ສຸມໂນ, ປຏ຺ຏິປຸປ຺ຜມປູຊຍິໍ.

‘‘ສຕສຫສ຺ສິໂຕ ກປ຺ເປ, ຍໍ ປຸປ຺ຜມຠິປູຊຍິໍ;

ທຸຄ຺ຄຕິໍ ນາຠິຊານາມິ, ເທຫປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ສຫາຍສ຺ສ ຠິກ຺ຂຸສ຺ສ ໂອວາທໍ ເທນ຺ໂຕ –

໒໖໔. ‘‘ປາປມິຕ຺ເຕ ວິວຊ຺ເຊຕ຺ວາ, ຠເຊຍ຺ຍຸຕ຺ຕມປຸຄ຺ຄລໍ;

ໂອວາເທ ຈສ຺ສ ຕິຏ຺ເຐຍ຺ຍ, ປຕ຺ເຖນ຺ໂຕ ອຈລໍ ສຸຂໍ.

໒໖໕. ‘‘ປຣິຕ຺ຕໍ ທາຣຸມາຣຸຍ຺ຫ, ຍຖາ ສີເທ ມຫຓ຺ຓເວ;

ເອວໍ ກຸສີຕມາຄມ຺ມ, ສາຘຸຊີວີປິ ສີທຕິ;

ຕສ຺ມາ ຕໍ ປຣິວຊ຺ເຊຍ຺ຍ, ກຸສີຕໍ ຫີນວີຣິຍໍ.

໒໖໖. ‘‘ປວິວິຕ຺ເຕຫິ ອຣິເຍຫິ, ປຫິຕຕ຺ເຕຫິ ຌາຍິຠິ;

ນິຈ຺ຈໍ ອາຣທ຺ຘວີຣິເຍຫິ, ປຓ຺ຑິເຕຫິ ສຫາວເສ’’ຕິ. –

ຕິສ຺ໂສ ຄາຖາ ອຠາສິ.

ຕຕ຺ຖ ປາປມິຕ຺ເຕຕິ ອກລ຺ຍາຓມິຕ຺ເຕ ອສປ຺ປຸຣິເສ ຫີນວີຣິເຍ. ວິວຊ຺ເຊຕ຺ວາຕິ ຕໍ ອຠຊນວເສນ ທູຣໂຕ ວຊ຺ເຊຕ຺ວາ. ຠເຊຍ຺ຍຸຕ຺ຕມປຸຄ຺ຄລນ຺ຕິ ສປ຺ປຸຣິສໍ ປຓ຺ຑິຕໍ ກລ຺ຍາຓມິຕ຺ຕໍ ໂອວາທານຸສາສນີຄຫຓວເສນ ເສເວຍ຺ຍ. ໂອວາເທ ຈສ຺ສ ຕິຏ຺ເຐຍ຺ຍາຕິ ອສ຺ສ ກລ຺ຍາຓມິຕ຺ຕສ຺ສ ໂອວາເທ ອນຸສິຏ຺ຐິຍໍ ຍຖານຸສິຏ຺ຐໍ ປຏິປຊ຺ຊນວເສນ ຕິຏ຺ເຐຍ຺ຍ. ປຕ຺ເຖນ຺ໂຕຕິ ອາກງ຺ຂນ຺ໂຕ. ອຈລໍ ສຸຂນ຺ຕິ ນິພ຺ພານສຸຂໍ ຜລສຸຂຎ຺ຈ. ຕມ຺ປິ ຫິ ອກຸປ຺ປຠາວໂຕ ‘‘ອຈລ’’ນ຺ຕິ ວຸຈ຺ຈຕິ. ເສສໍ ວຸຕ຺ຕຕ຺ຖເມວ.

ວິມລຕ຺ເຖຣຄາຖາວຓ຺ຓນາ ນິຏ຺ຐິຕາ.

ຕິກນິປາຕວຓ຺ຓນາ ນິຏ຺ຐິຕາ.

ປຐໂມ ຠາໂຄ ນິຏ຺ຐິໂຕ.