໑໕. ຫາຣິຕຕ຺ເຖຣຄາຖາວຓ຺ຓນາ

ໂຍ ປຸພ຺ເພ ກຣຓີຍານີຕິ ອາຍສ຺ມໂຕ ຫາຣິຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ສຕ຺ຖຣິ ປຣິນິພ຺ພຸເຕ ຕສ຺ສ ຈິຕກປູຊາຍ ກຍິຣມານາຍ ຄນ຺ເຘນ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ຫາຣິໂຕຕິ ລທ຺ຘນາໂມ ວຍປ຺ປຕ຺ໂຕ ຊາຕິມານໍ ນິສ຺ສາຍ ອຎ຺ເຎ ວສລວາເທນ ສມຸທາຈຣຕິ. ໂສ ຠິກ຺ຂູນໍ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິໂຕປິ ຈິຣປຣິຈິຕຕ຺ຕາ ວສລສມຸທາຈາຣໍ ນ ວິສ຺ສຊ຺ຊິ. ອເຖກທິວສໍ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ສຎ຺ຊາຕສໍເວໂຄ ວິປສ຺ສນໍ ປຏ຺ຐເປຕ຺ວາ ອຕ຺ຕໂນ ຈິຕ຺ຕປ຺ປວຕ຺ຕິໍ ອຸປປຣິກ຺ຂນ຺ໂຕ ມານຸທ຺ຘຈ຺ຈວິຄ຺ຄຫິຕຕໍ ທິສ຺ວາ ຕໍ ປຫາຍ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໖.໖໓-໖໗) –

‘‘ຈິຕາສຸ ກຸຣຸມານາສຸ, ນານາຄນ຺ເຘ ສມາຫເຏ;

ປສນ຺ນຈິຕ຺ໂຕ ສຸມໂນ, ຄນ຺ຘມຸຏ຺ຐິມປູຊຍິໍ.

‘‘ສຕສຫສ຺ສິໂຕ ກປ຺ເປ, ຈິຕກໍ ຍມປູຊຍິໍ;

ທຸຄ຺ຄຕິໍ ນາຠິຊານາມິ, ຈິຕປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫາ ປນ ຫຸຕ຺ວາ ວິມຸຕ຺ຕິສຸຂໍ ອນຸຠວນ຺ໂຕ ‘‘ໂຍ ປຸພ຺ເພ ກຣຓີຍານີ’’ຕິອາທິນາ ຕີຫິ ຄາຖາຫິ ຠິກ຺ຂູນໍ ໂອວາທທານມຸເຂນ ອຎ຺ຎໍ ພ຺ຍາກາສິ. ຕາສໍ ອຕ຺ໂຖ ເຫຏ຺ຐາ ວຸຕ຺ໂຕເຍວ.

ຫາຣິຕຕ຺ເຖຣຄາຖາວຓ຺ຓນາ ນິຏ຺ຐິຕາ.