໑໒. ອຸຕ຺ຕຣປາລຕ຺ເຖຣຄາຖາວຓ຺ຓນາ

ປຓ຺ຑິຕໍ ວຕ ມໍ ສນ຺ຕນ຺ຕິ ອາຍສ຺ມໂຕ ອຸຕ຺ຕຣປາລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ຄມນມຄ຺ເຄ ເສຕຸໍ ກາຣາເປສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ອຸຕ຺ຕຣປາໂລຕິ ລທ຺ຘນາໂມ ວຍປ຺ປຕ຺ໂຕ ຍມກປາຏິຫາຣິຍໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສມຓຘມ຺ມໍ ກໂຣຕິ. ຕສ຺ສ ເອກທິວສໍ ອໂຍນິໂສມນສິກາຣວເສນ ອນຸຠູຕາຣມ຺ມຓໍ ອນຸສ຺ສຣນ຺ຕສ຺ສ ກາມຣາໂຄ ອຸປ຺ປຊ຺ຊິ. ໂສ ຕາວເທວ ສໂຫຑ຺ຒໍ ໂຈຣໍ ຄຓ຺ຫນ຺ໂຕ ວິຍ ອຕ຺ຕໂນ ຈິຕ຺ຕໍ ນິຄ຺ຄເຫຕ຺ວາ ສໍເວຄຊາໂຕ ປຏິປກ຺ຂມນສິກາເຣນ ກິເລເສ ວິກ຺ຂມ຺ເຠຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ຠາວນໍ ອຸສ຺ສຸກ຺ກາເປຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໗.໑໖-໒໐) –

‘‘ວິປສ຺ສິໂນ ຠຄວໂຕ, ຈງ຺ກມນ຺ຕສ຺ສ ສມ຺ມຸຂາ;

ປສນ຺ນຈິຕ຺ໂຕ ສຸມໂນ, ເສຕຸໍ ກາຣາປຍິໍ ອຫໍ.

‘‘ເອກນວຸຕິໂຕ ກປ຺ເປ, ຍໍ ເສຕຸໍ ກາຣຍິໍ ອຫໍ;

ທຸຄ຺ຄຕິໍ ນາຠິຊານາມິ, ເສຕຸທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ສີຫນາທໍ ນທນ຺ໂຕ –

໒໕໒. ‘‘ປຓ຺ຑິຕໍ ວຕ ມໍ ສນ຺ຕໍ, ອລມຕ຺ຖວິຈິນ຺ຕກໍ;

ປຎ຺ຈ ກາມຄຸຓາ ໂລເກ, ສມ຺ໂມຫາ ປາຕຍິໍສຸ ມໍ.

໒໕໓. ‘‘ປກ຺ຂນ຺ໂທ ມາຣວິສເຍ, ທຬ຺ຫສລ຺ລສມປ຺ປິໂຕ;

ອສກ຺ຂິໍ ມຈ຺ຈຸຣາຊສ຺ສ, ອຫໍ ປາສາ ປມຸຈ຺ຈິຕຸໍ.

໒໕໔. ‘‘ສພ຺ເພ ກາມາ ປຫີນາ ເມ, ຠວາ ສພ຺ເພ ປທາລິຕາ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ. –

ຕິສ຺ໂສ ຄາຖາ ອຠາສິ.

ຕຕ຺ຖ ປຓ຺ຑິຕໍ ວຕ ມໍ ສນ຺ຕນ຺ຕິ ສຸຕຈິນ຺ຕາມຍາຍ ປຎ຺ຎາຍ ວເສນ ປຎ຺ຎາສມ຺ປນ຺ນມ຺ປິ ນາມ ມໍ ສມານໍ. ອລມຕ຺ຖວິຈິນ຺ຕກນ຺ຕິ ອຕ຺ຕໂນ ຈ ປເຣສຎ຺ຈ ອຕ຺ຖໍ ຫິຕໍ ວິຈິນ຺ເຕຕຸໍ ສມຕ຺ຖໍ, ອລໍ ວາ ປຣິຍຕ຺ຕໍ ອຕ຺ຖສ຺ສ ວິຈິນ຺ຕກໍ, ກິເລສວິທ຺ຘໍສນສມຕ຺ຖໍ ອຕ຺ຖທສ຺ສິນໍ ວາ, ສພ຺ພເມຕໍ ອຕ຺ຕໂນ ອນ຺ຕິມຠວິກຕາຍ ເຖໂຣ ວທຕິ. ປຎ຺ຈ ກາມຄຸຓາຕິ ຣູປາທໂຍ ປຎ຺ຈ ກາມໂກຏ຺ຐາສາ. ໂລເກຕິ ເຕສໍ ປວຕ຺ຕິຏ຺ຐານທສ຺ສນໍ. ສມ຺ໂມຫາຕິ ສມ຺ໂມຫນິມິຕ຺ຕໍ ອໂຍນິໂສມນສິກາຣເຫຕຸ. ສມ຺ໂມຫາຕິ ວາ ສມ຺ໂມຫນາ ສມ຺ໂມຫກຣາ. ປາຕຍິໍສູຕິ ຘີຣຠາວໂຕ ປາເຕສຸໍ, ໂລກໂຕ ວາ ອຸຕ຺ຕຣິຕຸກາມໍ ມໍ ໂລເກ ປາຕຍິໍສູຕິ ອຕ຺ໂຖ.

ປກ຺ຂນ຺ໂທຕິ ອນຸປວິຏ຺ໂຐ. ມາຣວິສເຍຕິ ກິເລສວິສເຍ ກິເລສມາຣສ຺ສ ປວຕ຺ຕິຏ຺ຐາເນ, ຕສ຺ສ ວສໍ ຄໂຕຕິ ອຘິປ຺ປາໂຍ. ເທວປຸຕ຺ຕມາຣສ຺ສ ວາ ອິສ຺ສຣິຍຏ຺ຐາເນ ຕໍ ອນຸປວິສິຕ຺ວາ ຐິໂຕ. ທຬ຺ຫສລ຺ລສມປ຺ປິໂຕຕິ ທຬ຺ຫໍ ຖິຣໍ, ທຬ຺ເຫນ ວາ ສລ຺ເລນ ສມປ຺ປິໂຕ, ຣາຄສລ຺ເລນ ຫທຍໍ ອາຫຈ຺ຈ ວິທ຺ໂຘ. ອສກ຺ຂິໍ ມຈ຺ຈຸຣາຊສ຺ສ, ອຫໍ ປາສາ ປມຸຈ຺ຈິຕຸນ຺ຕິ ອຄ຺ຄມຄ຺ຄສຓ຺ຑາເສນ ຣາຄາທິສລ຺ລໍ ອນວເສສໂຕ ອຸທ຺ຘຣນ຺ໂຕເຍວ ຣາຄພນ຺ຘນສງ຺ຂາຕາ ມຈ຺ຈຸຣາຊສ຺ສ ປາສາ ອຫໍ ປຣິມຸຈ຺ຈິຕຸໍ ອສກ຺ຂິໍ, ຕໂຕ ອຕ຺ຕານໍ ປໂມເຈສິໍ.

ຕໂຕ ເອວ ຈ ສພ຺ເພ ກາມາ ປຫີນາ ເມ, ຠວາ ສພ຺ເພ ປທາລິຕາຕິ ວຕ຺ຖາຣມ຺ມຓາທິເຠເທນ ອເນກເຠທຠິນ຺ນາ ສພ຺ເພ ກິເລສກາມາ ອຣິຍມຄ຺ເຄນ ສມຸຈ຺ເຉທວເສນ ມຍາ ປຫີນາ. ກິເລສກາເມສຸ ຫິ ປຫີເນສຸ ວຕ຺ຖຸກາມາປິ ປຫີນາ ເອວ ໂຫນ຺ຕິ. ຕຖາ ກາມຠວກມ຺ມຠວາທໂຍ ຠວາ ສພ຺ເພ ມຄ຺ຄຎາຓາສິນາ ປທາລິຕາ ວິທ຺ຘໍສິຕາ. ກມ຺ມຠເວສຸ ຫິ ປທາລິເຕສຸ ອຸປປຕ຺ຕິຠວາ ປທາລິຕາ ເອວ ໂຫນ຺ຕິ. ເອວໍ ກມ຺ມຠວານໍ ປທາລິຕຕ຺ຕາ ເອວ ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວຕິ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕເຍວ. ອິທເມວ ຈ ເຖຣສ຺ສ ອຎ຺ຎາພ຺ຍາກຣຓໍ ອໂຫສິ.

ອຸຕ຺ຕຣປາລຕ຺ເຖຣຄາຖາວຓ຺ຓນາ ນິຏ຺ຐິຕາ.