໖. ນິຕກຕ຺ເຖຣຄາຖາວຓ຺ຓນາ

ກສ຺ສ ເສລູປມໍ ຈິຕ຺ຕນ຺ຕິ ອາຍສ຺ມໂຕ ນິຕກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ວິປສ຺ສິສ຺ສ ຠຄວໂຕ ກາເລ ພນ຺ຘຸມຕີນຄເຣ ອາຣາມໂຄປໂກ ຫຸຕ຺ວາ ຊີວນ຺ໂຕ ເອກທິວສໍ ຠຄວນ຺ຕໍ ອາກາເສນ ຄຈ຺ຉນ຺ຕໍ ທິສ຺ວາ ປສນ຺ນມານໂສ ນາຬິເກຣຜລໍ ທາຕຸກາໂມ ອໂຫສິ. ສຕ຺ຖາ ຕໍ ອນຸຄ຺ຄຓ຺ຫນ຺ໂຕ ອາກາເສເຍວ ຐຕ຺ວາ ປຏິຄ຺ຄຓ຺ຫິ. ໂສ ຕໍ ທຕ຺ວາ ອຸຬາຣໍ ປີຕິໂສມນສ຺ສໍ ປຏິສໍເວທິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ນິຕໂກຕິ ລທ຺ຘນາໂມ ວິຎ຺ຎຸຕໍ ປຕ຺ໂຕ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ອຣຎ຺ເຎ ວິຫຣນ຺ໂຕ ຆເຏນ຺ໂຕ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໙໑-໙໙) –

‘‘ນຄເຣ ພນ຺ຘຸມຕິຍາ, ອາຣາມິໂກ ອຫໍ ຕທາ;

ອທ຺ທສໍ ວິຣຊໍ ພຸທ຺ຘໍ, ຄຈ຺ຉນ຺ຕໍ ອນິລຎ຺ຊເສ.

‘‘ນາຬິເກຣຜລໍ ຄຍ຺ຫ, ພຸທ຺ຘເສຏ຺ຐສ຺ສທາສຫໍ;

ອາກາເສ ຐິຕໂກ ສນ຺ໂຕ, ປຏິຄ຺ຄຓ຺ຫິ ມຫາຍໂສ.

‘‘ວິຕ຺ຕິສຎ຺ຊນໂນ ມຍ຺ຫໍ, ທິຏ຺ຐຘມ຺ມສຸຂາວໂຫ;

ຜລໍ ພຸທ຺ຘສ຺ສ ທຕ຺ວານ, ວິປ຺ປສນ຺ເນນ ເຈຕສາ.

‘‘ອຘິຄຈ຺ຉິໍ ຕທາ ປີຕິໍ, ວິປຸລຎ຺ຈ ສຸຂຸຕ຺ຕມໍ;

ອຸປ຺ປຊ຺ຊເຕວ ຣຕນໍ, ນິພ຺ພຕ຺ຕສ຺ສ ຕຫິໍ ຕຫິໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ທິພ຺ພຈກ຺ຂຸ ວິສຸທ຺ຘໍ ເມ, ສມາຘິກຸສໂລ ອຫໍ;

ອຠິຎ຺ຎາປາຣມິປ຺ປຕ຺ໂຕ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ເຖເຣ ຜລສຸເຂນ ນິພ຺ພານສຸເຂນ ວິຫຣນ຺ເຕ ປຘານປຣິຄ຺ຄາຫໂກ ເຖໂຣ ຕໍ ອາຣຎ຺ຎາຍຕນໍ ຄນ຺ຕ຺ວາ ຕຕ຺ຖ ວສນ຺ຕານໍ ຠິກ຺ຂູນໍ ປຣິຄ຺ຄຓ຺ຫນຕ຺ຖໍ ‘‘ກສ຺ສ ເສລູປມ’’ນ຺ຕິອາທິນາ ປຐມໍ ຄາຖມາຫ.

໑໙໑. ຕຕ຺ຖ ກສ຺ສ ເສລູປມໍ ຈິຕ຺ຕໍ, ຐິຕໍ ນານຸປກມ຺ປຕີຕິ ອິມສ຺ມິໍ ອຣຎ຺ຎາຍຕເນ ວສນ຺ເຕສຸ ກສ຺ສ ຠິກ຺ຂຸໂນ ຈິຕ຺ຕໍ ອຄ຺ຄຜລາຘິຄເມນ ເອກຆນສິລາມຍປພ຺ພຕູປມໍ ສພ຺ເພສໍ ອິຎ຺ຊນານໍ ອຠາວໂຕ ວສີຠາວປ຺ປຕ຺ຕິຍາ ຈ ຐິຕໍ ສພ຺ເພຫິປິ ໂລກຘມ຺ເມຫິ ນານຸກມ຺ປຕິ ນ ເວຘຕິ. ອິທານິສ຺ສ ອກມ຺ປນາກາຣໍ ສທ຺ຘິໍ ກາຣເຓນ ທສ຺ເສຕຸໍ ‘‘ວິຣຕ຺ຕ’’ນ຺ຕິອາທິ ວຸຕ຺ຕໍ. ຕຕ຺ຖ ວິຣຕ຺ຕໍ ຣຊນີເຍສູຕິ ວິຣາຄສງ຺ຂາເຕນ ອຣິຍມຄ຺ເຄນ ຣຊນີເຍສຸ ຣາຄຸປ຺ປຕ຺ຕິເຫຕຸຠູເຕສຸ ເຕຠູມກຘມ຺ເມສຸ ວິຣຕ຺ຕໍ, ຕຕ຺ຖ ສພ຺ພໂສ ສມຸຈ຺ຉິນ຺ນຣາຄນ຺ຕິ ອຕ຺ໂຖ. ກຸປ຺ປນີເຍຕິ ປຏິຆຏ຺ຐານີເຍ, ສພ຺ພສ຺ມິມ຺ປິ ອາຆາຕວຕ຺ຖຸສ຺ມິໍ. ນ ກຸປ຺ປຕີຕິ ນ ທຸສ຺ສຕິ ນ ວິກາຣໍ ອາປຊ຺ຊຕິ. ຍສ຺ເສວໍ ຠາວິຕໍ ຈິຕ຺ຕນ຺ຕິ ຍສ຺ສ ອຣິຍປຸຄ຺ຄລສ຺ສ ຈິຕ຺ຕໍ ມໂນ ເອວໍ ວຸຕ຺ຕນເຍນ ຕາທິຠາເວນ ຠາວິຕໍ, ກຸໂຕ ຕໍ ທຸກ຺ຂເມສ຺ສຕີຕິ ຕໍ ປຸຄ຺ຄລໍ ກຸໂຕ ສຕ຺ຕໂຕ ສງ຺ຂາຣໂຕ ວາ ທຸກ຺ຂໍ ອຸປຄມິສ຺ສຕິ, ນ ຕາທິສສ຺ສ ທຸກ຺ຂໍ ອຕ຺ຖີຕິ ອຕ຺ໂຖ.

໑໙໒. ເອວໍ ອນິຍມວເສນ ປຸຈ຺ຉິຕມຕ຺ຖໍ ນິຕກຕ຺ເຖໂຣ ອຕ຺ຕູປນາຍິກໍ ກຕ຺ວາ ວິສ຺ສຊ຺ເຊນ຺ໂຕ ‘‘ມມ ເສລູປມໍ ຈິຕ຺ຕ’’ນ຺ຕິອາທິນາ ທຸຕິຍຄາຖາຍ ອຎ຺ຎໍ ພ຺ຍາກາສິ. ຕໍ ວຸຕ຺ຕຕ຺ຖເມວ.

ນິຕກຕ຺ເຖຣຄາຖາວຓ຺ຓນາ ນິຏ຺ຐິຕາ.