໙. ໂຄຕມຕ຺ເຖຣຄາຖາວຓ຺ຓນາ

ສຸຂໍ ສຸປນ຺ຕີຕິ ອາຍສ຺ມໂຕ ໂຄຕມຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ຠຄວນ຺ຕໍ ທິສ຺ວາ ປສນ຺ນມານໂສ ອາໂມທຜລມທາສິ. ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ໂຄຕໂມຕິ ລທ຺ຘນາໂມ ສຕ຺ຕວສ຺ສິກກາເລ ອຸປນຍນໍ ກຕ຺ວາ ຣຕນຠິກ຺ຂໍ ຈຣິຕ຺ວາ ສຫສ຺ສໍ ລຠິຕ຺ວາ ຕໍ ຕາທິເສ ຐາເນ ຐເປຕ຺ວາ ວຕໍ ຈຣນ຺ໂຕ ໂສຬສສຕ຺ຕຣສວສ຺ສຸທ຺ເທສິກກາເລ ອກລ຺ຍາຓມິຕ຺ເຕຫິ ກາເມສຸ ປຣິນີຍມາໂນ ເອກິສ຺ສາ ຣູປູປຊີວິນິຍາ ຕໍ ສຫສ຺ສຠຓ຺ຑິກໍ ທຕ຺ວາ ພ຺ຣຫ຺ມຈຣິຍວິນາສໍ ປຕ຺ວາ ຕາຍ ຈສ຺ສ ພ຺ຣຫ຺ມຈາຣິຣູປໍ ທິສ຺ວາ ວິຣຕ຺ຕາກາເຣ ທສ຺ສິເຕ ເອກຣຕ຺ຕິວາເສເນວ ນິພ຺ພິນ຺ນຣູໂປ ອຕ຺ຕໂນ ພ຺ຣຫ຺ມຈຣິຍນິວາສໍ ຘນຊານິຎ຺ຈ ສຣິຕ຺ວາ ‘‘ອຍຸຕ຺ຕໍ ມຍາ ກຕ’’ນ຺ຕິ ວິປ຺ປຏິສາຣີ ອໂຫສິ. ສຕ຺ຖາ ຕສ຺ສ ເຫຕຸສມ຺ປຕ຺ຕິໍ ຈິຕ຺ຕາຈາຣຎ຺ຈ ຎຕ຺ວາ ຕສ຺ສ ອາສນ຺ນຏ຺ຐາເນ ອຕ຺ຕານໍ ທສ຺ເສສິ. ໂສ ສຕ຺ຖາຣໍ ທິສ຺ວາ ປສນ຺ນມານໂສ ອຸປສງ຺ກມິ, ຕສ຺ສ ຠຄວາ ຘມ຺ມໍ ເທເສສິ. ໂສ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊນ຺ໂຕ ຂຸຣຄ຺ເຄເຍວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໘໐-໘໔) –

‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ຣຖິຍໍ ປຏິປຊ຺ຊນ຺ຕໍ, ອາໂມທມທທິໍ ຜລໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ຌານສຸເຂນ ຜລສຸເຂນ ວີຕິນາເມນ຺ຕໍ ເອໂກ ຄິຫິສຫາໂຍ ອຸປຄນ຺ຕ຺ວາ, ‘‘ອາວຸໂສ, ຕຍາ ຣຕນຠິກ຺ຂາຍ ລທ຺ຘໍ ປພ຺ພຊນ຺ໂຕ ກິໍ ອກາສີ’’ຕິ ປຸຈ຺ຉິ. ຕໍ ສຸຕ຺ວາ ເຖໂຣ ‘‘ອິທໍ ນາມ ກຕ’’ນ຺ຕິ ອນາຈິກ຺ຂິຕ຺ວາ ມາຕຸຄາເມ ໂທສໍ ປກາເສຕ຺ວາ ອຕ຺ຕໂນ ວີຕຣາຄຠາເວນ ອຎ຺ຎໍ ພ຺ຍາກໂຣນ຺ໂຕ ‘‘ສຸຂໍ ສຸປນ຺ຕີ’’ຕິອາທິນາ ຄາຖາທ຺ວຍມາຫ.

໑໓໗. ຕຕ຺ຖ ສຸຂໍ ສຸປນ຺ຕິ ມຸນໂຍ, ເຍ ອິຕ຺ຖີສຸ ນ ພຊ຺ຌເຣຕິ ເຍ ອິຕ຺ຖີສຸ ວິສຍຠູຕາສຸ ນິມິຕ຺ຕຠູຕາສຸ ວາ ຣາຄພນ຺ຘເນນ ນ ພຊ຺ຌນ຺ຕິ, ເຕ ມຸນໂຍ ຕປສ຺ສິໂນ ສໍຍຕິນ຺ທ຺ຣິຍາ ສຸຂໍ ສຸປນ຺ຕິ ສຸຂໍ ວິຫຣນ຺ຕິ, ນຕ຺ຖິ ເຕສໍ ທຸກ຺ຂນ຺ຕິ ອຘິປ຺ປາໂຍ. ‘‘ສຸປນ຺ຕີ’’ຕິ ຫິ ນິທສ຺ສນມຕ຺ຕເມຕໍ. ສທາ ເວ ຣກ຺ຂິຕພ຺ພາສູຕິ ເອກໍເສນ ສພ຺ພກາລໍ ຣກ຺ຂິຕພ຺ພາສຸ. ອິຕ຺ຖິໂຍ ຫິ ສຕ຺ຕຠູມິເກ ນິປ຺ປຸຣິເສ ປາສາເທ ອຸປຣິຠູມິຍໍ ວສາເປຕ຺ວາປິ, ກຸຈ຺ຉິຍໍ ປກ຺ຂິປິຕ຺ວາປິ ນ ສກ຺ກາ ຣກ຺ຂິຕຸໍ, ຕສ຺ມາ ຕາ ກິຏ຺ຐາທິຄາວິໂຍ ວິຍ ສພ຺ພກາລໍ ຣກ຺ຂຓີຍາ ໂຫນ຺ຕິ. ພຫຸຈິຕ຺ຕຕາຍ ວາ ສາມິເກນ ວຕ຺ຖາລງ຺ກາຣານຸປ຺ປທານາທິນາ ຈິຕ຺ຕຎ຺ຎຖຕ຺ຕໂຕ ສພ຺ພກາລໍ ຣກ຺ຂິຕພ຺ພາ. ສຣີຣສຠາວໍ ວາ ມາລາຄນ຺ຘາທີຫິ ປຏິຈ຺ຉາທນວເສນ ຣກ຺ຂິຕພ຺ພຈິຕ຺ຕຕາຍ ຣກ຺ຂິຕພ຺ພາຕິ. ຍາສຸ ສຈ຺ຈໍ ສຸທຸລ຺ລຠນ຺ຕິ ຍາສຸ ສຈ຺ຈວຈນໍ ລທ຺ຘຸໍ ນ ສກ຺ກາ, ອິຕ຺ຖິໂຍ ຫິ ອຄ຺ຄິມ຺ປິ ປວິສນ຺ຕິ, ວິສມ຺ປິ ຂາທນ຺ຕິ, ສຕ຺ຖມ຺ປິ ອາຫຣນ຺ຕິ, ອຸພ຺ພນ຺ຘິຕ຺ວາປິ ກາລໍ ກໂຣນ຺ຕິ, ນ ປນ ສຈ຺ເຈ ຐາຕຸໍ ສກ຺ໂກນ຺ຕິ. ຕສ຺ມາ ເອວຣູປາ ອິຕ຺ຖິໂຍ ວຊ຺ເຊຕ຺ວາ ຐິຕາ ມຸນໂຍ ສຸຂິຕາ ວຕາຕິ ທສ຺ເສຕິ.

໑໓໘. ອິທານິ ຍສ຺ສ ອປ຺ປຫີນຕ຺ຕາ ເອວຣູປາສຸ ອິຕ຺ຖີສຸປິ ພຊ຺ຌນ຺ຕິ, ຕສ຺ສ ກາມສ຺ສ ອຕ຺ຕໂນ ສຸປ຺ປຫີນຕໍ ອຈ຺ຈນ຺ຕນິຏ຺ຐິຕຕຎ຺ຈ ທສ຺ເສນ຺ໂຕ ທຸຕິຍໍ ຄາຖມາຫ. ວຘໍ ຈຣິມ຺ຫ ເຕ ກາມາຕິ ອມ຺ໂຠ ກາມ, ຕວ ວຘໍ ອຈ຺ຈນ຺ຕສມຸຈ຺ເຉທໍ ອຣິຍມຄ຺ເຄນ ຈຣິມ຺ຫ, ‘‘ວຘໍ ຈຣິມ຺ຫເສ’’ຕິປິ ປາໂຐ, ວຘາຍ ປຫານາຍ ມຄ຺ຄພ຺ຣຫ຺ມຈຣິຍໍ ອຈຣິມ຺ຫາຕິ ອຕ຺ໂຖ. ອນຓາ ທານິ ເຕ ມຍນ຺ຕິ ອິທານິ ອຄ຺ຄມຄ຺ຄປຕ຺ຕິໂຕ ປຏ຺ຐາຍ ອິຓຠາວກຣາຍ ປຫີນຕ຺ຕາ ກາມ ເຕ ອນຓາ ມຍໍ, ນ ຕຸຍ຺ຫໍ ອິຓໍ ຘາເຣມ. ອວີຕຣາໂຄ ຫິ ຣາຄສ຺ສ ວເສ ວຕ຺ຕນໂຕ ຕສ຺ສ ອິຓໍ ຘາເຣນ຺ໂຕ ວິຍ ໂຫຕິ, ວີຕຣາໂຄ ປນ ຕໍ ອຕິກ຺ກມິຕ຺ວາ ປຣເມນ ຈິຕ຺ຕິສ຺ສຣິເຍນ ສມນ຺ນາຄໂຕ. ອນຓຕ຺ຕາ ເອວ ຄຈ຺ຉາມ ທານິ ນິພ຺ພານໍ, ຍຕ຺ຖ ຄນ຺ຕ຺ວາ ນ ໂສຈຕິ ຍສ຺ມິໍ ນິພ຺ພາເນ ຄມນເຫຕຸ ສພ຺ພໂສ ໂສກເຫຕູນໍ ອຠາວໂຕ ນ ໂສຈຕິ, ຕໍ ອນຸປາທິເສສນິພ຺ພານເມວ ອິທານິ ຄຈ຺ຉາມ ອນຸປາປຸຓາມາຕິ ອຕ຺ໂຖ.

ໂຄຕມຕ຺ເຖຣຄາຖາວຓ຺ຓນາ ນິຏ຺ຐິຕາ.