໘. ສຸຣາຘຕ຺ເຖຣຄາຖາວຓ຺ຓນາ

ຂີຓາ ຫິ ມຍ຺ຫໍ ຊາຕີຕິອາທິກາ ອາຍສ຺ມໂຕ ສຸຣາຘຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ທິສ຺ວາ ປສນ຺ນມານໂສ ມາຕຸລຸງ຺ຄຜລໍ ອທາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ອນນ຺ຕຣໍ ວຸຕ຺ຕສ຺ສ ຣາຘຕ຺ເຖຣສ຺ສ ກນິຏ຺ໂຐ ຫຸຕ຺ວາ ນິພ຺ພຕ຺ຕິ, ສຸຣາໂຘຕິສ຺ສ ນາມໍ ອໂຫສິ. ໂສ ເຊຏ຺ຐຠາຕຣິ ຣາເຘ ປພ຺ພຊິເຕ ສຍມ຺ປິ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໖໘-໗໒) –

‘‘ກຓິກາຣໍວ ຊລິຕໍ, ປຸຓ຺ຓມາເຍວ ຈນ຺ທິມໍ;

ຊລນ຺ຕໍ ທີປຣຸກ຺ຂໍວ, ອທ຺ທສໍ ໂລກນາຍກໍ.

‘‘ມາຕຸລຸງ຺ຄຜລໍ ຄຍ຺ຫ, ອທາສິໍ ສຕ຺ຖຸໂນ ອຫໍ;

ທກ຺ຂິເຓຍ຺ຍສ຺ສ ວີຣສ຺ສ, ປສນ຺ໂນ ເສຫິ ປາຓິຠິ.

‘‘ເອກຕິໍເສ ອິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ສາສນສ຺ສ ນິຍ຺ຍານິກຠາວທສ຺ສນຕ຺ຖໍ ອຎ຺ຎໍ ພ຺ຍາກໂຣນ຺ໂຕ ‘‘ຂີຓາ ຫີ ມຍ຺ຫ’’ນ຺ຕິອາທິນາ ຄາຖາທ຺ວຍມາຫ.

໑໓໕-໖. ຕຕ຺ຖ ຂີຓາຕິ ຂຍໍ ປຣິໂຍສານໍ ຄຕາ. ຊາຕີຕິ ຠໂວ ຠວນິພ຺ພຕ຺ຕິ ວາ. ວຸສິຕໍ ຊິນສາສນນ຺ຕິ ຊິນສ຺ສ ສມ຺ມາສມ຺ພຸທ຺ຘສ຺ສ ສາສນໍ ມຄ຺ຄພ຺ຣຫ຺ມຈຣິຍໍ ວຸຏ຺ຐໍ ປຣິວຸຏ຺ຐໍ. ປຫີໂນ ຊາລສງ຺ຂາໂຕຕິ ສຕ຺ຕສນ຺ຕານສ຺ສ ໂອຕ຺ຖຣຓໂຕ ນິສ຺ສຣິຕຸໍ ອປ຺ປທານໂຕ ຈ ‘‘ຊາລສງ຺ຂາໂຕ’’ຕິ ຈ ລທ຺ຘນາມາ ທິຏ຺ຐິ ອວິຊ຺ຊາ ຈ ປຫີນາ ມຄ຺ເຄນ ສມຸຈ຺ຉິນ຺ນາ. ຠວເນຕ຺ຕິ ສມູຫຕາຕິ ກາມຠວາທິກສ຺ສ ຠວສ຺ສ ນຍນໂຕ ປວຕ຺ຕນໂຕ ຠວເນຕ຺ຕິສຎ຺ຎິຕາ ຕຓ຺ຫາ ສມຸຄ຺ຆາຏິຕາ. ຍສ຺ສຕ຺ຖາຍ ປພ຺ພຊິໂຕຕິ ຍສ຺ສ ອຕ຺ຖາຍ ຍທຕ຺ຖໍ ອຫໍ ອຄາຣສ຺ມາ ເຄຫໂຕ ອນຄາຣິຍໍ ປພ຺ພຊ຺ຊໍ ປພ຺ພຊິໂຕ ອຸປຄໂຕ. ໂສ ສພ຺ເພສໍ ໂອຣມ຺ຠາຄິຍຸທ຺ຘມ຺ຠາຄິຍປ຺ປເຠທານໍ ສໍໂຍຊນານໍ ພນ຺ຘນານໍ ຂຍຠູໂຕ ອຕ຺ໂຖ ນິພ຺ພານສງ຺ຂາໂຕ ປຣມຕ຺ໂຖ ອຣຫຕ຺ຕສງ຺ຂາໂຕ ສທຕ຺ໂຖ ຈ ມຍາ ອນຸປ຺ປຕ຺ໂຕ ອຘິຄໂຕຕິ ອຕ຺ໂຖ.

ສຸຣາຘຕ຺ເຖຣຄາຖາວຓ຺ຓນາ ນິຏ຺ຐິຕາ.