໖. ເມຬຊິນຕ຺ເຖຣຄາຖາວຓ຺ຓນາ

ຍທາຫໍ ຘມ຺ມມສ຺ໂສສິນ຺ຕິອາທິກາ ອາຍສ຺ມໂຕ ເມຬຊິນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ຠຄວນ຺ຕໍ ປິຓ຺ຑາຍ ຄຈ຺ຉນ຺ຕໍ ທິສ຺ວາ ປສນ຺ນມານໂສ ມຘຸຣໍ ອາໂມທຜລໍ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ພາຣາຓສິຍໍ ຂຕ຺ຕິຍກຸເລ ນິພ຺ພຕ຺ຕິຕ຺ວາ ເມຬຊິໂນຕິ ລທ຺ຘນາໂມ ວິຊ຺ຊາສິປ຺ເປສຸ ນິປ຺ຜຕ຺ຕິໍ ຄໂຕ ປຓ຺ຑິໂຕ ພ຺ຍຕ຺ໂຕ ທິສາສຸ ປາກໂຏ ອໂຫສິ. ໂສ ຠຄວຕິ ພາຣາຓສິຍໍ ອິສິປຕເນ ວິຫຣນ຺ເຕ ວິຫາຣໍ ຄນ຺ຕ຺ວາ ສຕ຺ຖາຣໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ຕທເຫວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໕໗-໖໒) –

‘‘ສຫສ຺ສຣໍສີ ຠຄວາ, ສຍມ຺ຠູ ອປຣາຊິໂຕ;

ວິເວກາ ວຸຏ຺ຐຫິຕ຺ວານ, ໂຄຈຣາຍາຠິນິກ຺ຂມິ.

‘‘ຜລຫຕ຺ໂຖ ອຫໍ ທິສ຺ວາ, ອຸປຄຈ຺ຉິໍ ນຣາສຠໍ;

ປສນ຺ນຈິຕ຺ໂຕ ສຸມໂນ, ອວຏໍ ອທທິໍ ຜລໍ.

‘‘ຈຕຸນ຺ນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອປຣຠາເຄ ຠິກ຺ຂູຫິ, ‘‘ອາວຸໂສ, ກິໍ ຕຍາ ອຸຕ຺ຕຣິມນຸສ຺ສຘມ຺ໂມ ອຘິຄໂຕ’’ຕິ ປຸຏ຺ໂຐ ສີຫນາທໍ ນທນ຺ໂຕ –

໑໓໑. ‘‘ຍທາຫໍ ຘມ຺ມມສ຺ໂສສິໍ, ຠາສມານສ຺ສ ສຕ຺ຖຸໂນ;

ນ ກງ຺ຂມຠິຊານາມິ, ສພ຺ພຎ຺ຎູ ອປຣາຊິເຕ.

໑໓໒. ‘‘ສຕ຺ຖວາເຫ ມຫາວີເຣ, ສາຣຖີນໍ ວຣຸຕ຺ຕເມ;

ມຄ຺ເຄ ປຏິປທາຍໍ ວາ, ກງ຺ຂາ ມຍ຺ຫໍ ນ ວິຊ຺ຊຕີ’’ຕິ. – ຄາຖາທ຺ວຍໍ ອຠາສິ;

ຕຕ຺ຖ ຍທາຕິ ຍສ຺ມິໍ ກາເລ. ອຫນ຺ຕິ ອຕ຺ຕານໍ ນິທ຺ທິສຕິ. ຘມ຺ມນ຺ຕິ ຈຕຸສຈ຺ຈຘມ຺ມໍ. ອສ຺ໂສສິນ຺ຕິ ສຸຓິໍ. ສຕ຺ຖຸໂນຕິ ທິຏ຺ຐຘມ຺ມິກາທິອຕ຺ເຖຫິ ເວເນຍ຺ຍານໍ ສາສນຏ຺ເຐນ ສຕ຺ຖຸໂນ. ກງ຺ຂນ຺ຕິ ສໍສຍໍ. ສງ຺ຂຕມສງ຺ຂຕຎ຺ຈ ອນວເສສໂຕ ຊານນຏ຺ເຐນ ສພ຺ພຎ຺ຎູ. ກຸໂຕຈິປິ ປຣາຊິຕາ ຠາເວນ ອປຣາຊິເຕ. ເວເນຍ຺ຍສຕ຺ຕານໍ ສໍສາຣກນ຺ຕາຣໂຕ ນິພ຺ພານໍ ປຏິວາຫນຏ຺ເຐນ ສຕ຺ຖວາເຫ. ອິທໍ ວຸຕ຺ຕໍ ໂຫຕິ – ຍໂຕ ປຠຸຕິ ອຫໍ ສຕ຺ຖຸໂນ ຘມ຺ມໍ ເທເສນ຺ຕສ຺ສ ຈຕຸສຈ຺ຈຘມ຺ມໍ ອສ຺ໂສສິໍ ໂສຕທ຺ວາຣານຸສາເຣນ ອຸປຘາເຣສິໍ ອຸປລຠິໍ, ຕໂຕ ປຏ຺ຐາຍ ອນວເສສສງ຺ຂຕາສງ຺ຂຕສມ຺ມຸຕິຘມ຺ມານໍ ສຍມ຺ຠູຎາເຓນ ຊານນໂຕ ສພ຺ພຎ຺ຎູ ອນາວຣຓທສ຺ສາວິມ຺ຫິ, ປຎ຺ຈນ຺ນມ຺ປິ ມາຣານໍ ອຠິຠວນໂຕ ເຕຫິ ອປຣາຊິຕຕ຺ຕາ ສເທວເກ ໂລເກ ອປ຺ປຏິຫຕຘມ຺ມຈກ຺ກຕ຺ຕາ ຈ ອປຣາຊິເຕ, ເວເນຍ຺ຍສຕ຺ຕານໍ ໂລຠກນ຺ຕາຣາທິໂຕ ວາຫນຏ຺ເຐນ ສຕ຺ຖວາເຫ, ມຫາວິກ຺ກນ຺ຕຕາຍ ມຫາວີເຣ, ອຎ຺ເຎຫິ ທຸທ຺ທມານໍ ປຸຣິສທມ຺ມານໍ ສຣຓໂຕ ອຈ຺ຈນ຺ຕິເກນ ທມເຖນ ທມນໂຕ ສາຣຖີນໍ ປວຣຠູເຕ ອຸຕ຺ຕເມ ສມ຺ມາສມ຺ພຸທ຺ເຘ, ‘‘ພຸທ຺ໂຘ ນຸ ໂຂ ໂນ ນຸ ໂຂ’’ຕິ ກງ຺ຂໍ ນາຠິຊານາມິ ອປຣປ຺ປຈ຺ຈຍຠາວໂຕ. ຕຖາຣູເປ ເທສິເຕ ອຣິຍມຄ຺ເຄ ຕທຸປາທາຍຠູຕາຍ ຈ ສີລາທິປຏິປທາຍ ‘‘ນິຍ຺ຍານິໂກ ນຸ ໂຂ ນ ນຸ ໂຂ’’ຕິ ກງ຺ຂາ ວິຈິກິຈ຺ຉາ ນ ວິຊ຺ຊຕິ ນຕ຺ຖີຕິ. ເອຕ຺ຖ ຈ ອຣິຍຘມ຺ເມ ສໍສຍາຠາວກຖເນນ ອຣິຍສງ຺ເຆປິ ສໍສຍາຠາໂວ ກຖິໂຕເຍວາຕິ ທຏ຺ຐພ຺ພໍ ຕຕ຺ຖ ປຕິຏ຺ຐິຕສ຺ສ ອນຎ຺ຎຖາຠາວໂຕຕິ.

ເມຬຊິນຕ຺ເຖຣຄາຖາວຓ຺ຓນາ ນິຏ຺ຐິຕາ.