໓. ວລ຺ລິຍຕ຺ເຖຣຄາຖາວຓ຺ຓນາ

ມກ຺ກໂຏ ປຎ຺ຈທ຺ວາຣາຍນ຺ຕິອາທິກາ ອາຍສ຺ມໂຕ ວລ຺ລິຍຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ເອກຕິໍເສ ກປ຺ເປ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ເກນຈິເທວ ກຣຓີເຍນ ອຣຎ຺ຎໍ ຄໂຕ ຕຕ຺ຖ ນາຣທໍ ນາມ ປຈ຺ເຈກສມ຺ພຸທ຺ຘໍ ຣຸກ຺ຂມູເລ ວສນ຺ຕໍ ທິສ຺ວາ ປສນ຺ນມານໂສ ນເຬຫິ ສາລໍ ກຕ຺ວາ ຕິເຓຫິ ຉາເທຕ຺ວາ ອທາສິ. ຈງ຺ກມນຏ຺ຐານຎ຺ຈສ຺ສ ໂສເຘຕ຺ວາ ວາລຸກາ ໂອກິຣິຕ຺ວາ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓມຫາສາລສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ວລ຺ລິໂຍຕິສ຺ສ ນາມໍ ອໂຫສິ. ໂສ ວຍປ຺ປຕ຺ໂຕ ໂຍພ຺ພນມນຸປ຺ປຕ຺ໂຕ ອິນ຺ທ຺ຣິຍວສິໂກ ຫຸຕ຺ວາ ວິຈຣນ຺ໂຕ ກລ຺ຍາຓມິຕ຺ຕສໍສຄ຺ເຄນ ຠຄວນ຺ຕໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໐.໙໓-໑໐໓) –

‘‘ຫິມວນ຺ຕສ຺ສາວິທູເຣ, ຫາຣິໂຕ ນາມ ປພ຺ພໂຕ;

ສຍມ຺ຠູ ນາຣໂທ ນາມ, ຣຸກ຺ຂມູເລ ວສີ ຕທາ.

‘‘ນຬາຄາຣໍ ກຣິຕ຺ວານ, ຕິເຓນ ຉາທຍິໍ ອຫໍ;

ຈງ຺ກມໍ ໂສຘຍິຕ຺ວານ, ສຍມ຺ຠຸສ຺ສ ອທາສຫໍ.

‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ນຬກຸຏິກນິມ຺ມິຕໍ;

ສຏ຺ຐິໂຍຊນມຸພ຺ເພຘໍ, ຕິໍສໂຍຊນວິຕ຺ຖຕໍ.

‘‘ຈຕຸທ຺ທເສສຸ ກປ຺ເປສຸ, ເທວໂລເກ ຣມິໍ ອຫໍ;

ເອກສຕ຺ຕຕິກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ.

‘‘ຈຕຸຕ຺ຕິໍສຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

‘‘ຘມ຺ມປາສາທມາຣຸຍ຺ຫ, ສພ຺ພາກາຣວຣູປມໍ;

ຍທິຈ຺ຉກາຫໍ ວິຫເຣ, ສກ຺ຍປຸຕ຺ຕສ຺ສ ສາສເນ.

‘‘ເອກຕິໍເສ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ນຬກຸຏິຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ປຸຖຸຊ຺ຊນກາເລ ອຕ຺ຕໂນ ຈິຕ຺ຕສ຺ສ ຣູປາທິອາຣມ຺ມເຓສຸ ຍຖາກາມປ຺ປວຕ຺ຕິຍາ, ອິທານິ ອຣິຍມຄ຺ເຄນ ນິຄ຺ຄຫິຕຠາວສ຺ສ ຈ ວິຠາວເນນ ອຎ຺ຎໍ ພ຺ຍາກໂຣນ຺ໂຕ –

໑໒໕. ‘‘ມກ຺ກໂຏ ປຎ຺ຈທ຺ວາຣາຍໍ, ກຸຏິກາຍໍ ປສກ຺ກິຍ;

ທ຺ວາເຣນ ອນຸປຣິເຍຕິ, ຆຏ຺ຏຍນ຺ໂຕ ມຸຫຸໍ ມຸຫຸໍ.

໑໒໖. ‘‘ຕິຏ຺ຐ ມກ຺ກຏ ມາ ຘາວິ, ນ ຫິ ເຕ ຕໍ ຍຖາ ປຸເຣ;

ນິຄ຺ຄຫີໂຕສິ ປຎ຺ຎາຍ, ເນວ ທູຣໍ ຄມິສ຺ສສີ’’ຕິ. – ຄາຖາທ຺ວຍໍ ອຠາສິ;

ຕຕ຺ຖ ຆຏ຺ຏຍນ຺ໂຕຕິ ອຕ຺ຕໂນ ໂລລຠາເວນ ຣຸກ຺ຂສ຺ສ ອຎ຺ຎໍ ສາຂໍ ມຸຎ຺ຈິຕ຺ວາ ອຎ຺ຎສ຺ສ ຄຫເຓນ ອເນກວາຣໍ ຕຕ຺ຖ ຣຸກ຺ຂໍ ຈາເລນ຺ໂຕ ຜລູປໂຠຄມກ຺ກໂຏ ວິຍ ເຕນ ເຕນ ຈກ຺ຂາທິທ຺ວາເຣນ ຣູປາທິອາຣມ຺ມເຓສຸ ອຎ຺ຎໍ ມຸຎ຺ຈິຕ຺ວາ ອຎ຺ຎໍ ຄຓ຺ຫນ຺ໂຕ ຈິຕ຺ຕສນ຺ຕານສ຺ສ ສມາທານວເສນ ນິຈ຺ຈລໍ ຐາຕຸໍ ອປ຺ປທາເນນ ອຠິກ຺ຂຓໍ ຆຏ຺ຏຍນ຺ໂຕ ຈາເລນ຺ໂຕ ຕສ຺ມິໍເຍວ ຣູປາທິອາຣມ຺ມເຓ ອນຸປຣິວຕ຺ຕຕິ ຍຖາກາມໍ ວິຈຣຕິ. ວຕ຺ຕມານສມີປຕາຍ ເຈຕ຺ຖ ວຕ຺ຕມານວຈນໍ. ເອວໍ ອນຸປຣິຍນ຺ໂຕ ຈ ຕິຏ຺ຐ, ມກ຺ກຏ, ມາ ຘາວິ ຕ຺ວໍ, ຈິຕ຺ຕມກ຺ກຏ, ອິທານິ ຕິຏ຺ຐ ມາ ຘາວິ, ອິໂຕ ປຏ຺ຐາຍ ເຕ ຘາວິຕຸໍ ນ ສກ຺ກາ, ຕສ຺ມາ ນ ຫິ ເຕ ຕໍ ຍຖາ ປູເຣ ຍສ຺ມາ ຕໍ ອຕ຺ຕຠາວເຄຫໍ ປຸພ຺ເພ ວິຍ ນ ເຕ ເສວິຕໍ ປິຫິຕທ຺ວາຣຠາວໂຕ, ກິຎ຺ຈ ນິຄ຺ຄຫີໂຕສິ ປຎ຺ຎາຍ ສຍຎ຺ຈ ອິທານິ ມຄ຺ຄປຎ຺ຎາຍ ກິເລສາຠິສງ຺ຂາຣສງ຺ຂາຕານໍ ປາທານໍ ເຉທເນນ ອຈ຺ຈນ຺ຕິກໍ ນິຄ຺ຄຫໍ ປຕ຺ໂຕສິ, ຕສ຺ມາ ເນວ ທູຣໍ ຄມິສ຺ສສິ ອິໂຕ ອຕ຺ຕຠາວໂຕ ທູຣໍ ທຸຕິຍາທິອຕ຺ຕຠາວໍ ເນວ ຄມິສ຺ສສິ ຍາວຈຣິມກຈິຕ຺ຕໍ ເອວ ເຕ ຄມນນ຺ຕິ ທສ຺ເສຕິ. ‘‘ເນໂຕ ທູຣ’’ນ຺ຕິປິ ປາໂຐ, ໂສ ເອວຕ຺ໂຖ.

ວລ຺ລິຍຕ຺ເຖຣຄາຖາວຓ຺ຓນາ ນິຏ຺ຐິຕາ.