໕. ມາລຸກ຺ຍປຸຕ຺ຕຕ຺ເຖຣຄາຖາວຓ຺ຓນາ

ຣູປໍ ທິສ຺ວາ ສຕິ ມຸຏ຺ຐາຕິອາທິກາ ອາຍສ຺ມໂຕ ມາລຸກ຺ຍປຸຕ຺ຕສ຺ສ ຄາຖາ. ອິມສ຺ສ ອາຍສ຺ມໂຕ ວຕ຺ຖຸ ເຫຏ຺ຐາ ຉກ຺ກນິປາເຕ (ເຖຣຄາ. ໓໙໙ ອາທໂຍ) ວຸຕ຺ຕເມວ. ຕາ ປນ ຄາຖາ ເຖເຣນ ອຣຫຕ຺ເຕ ປຕິຏ຺ຐິເຕນ ຎາຕີນໍ ຘມ຺ມເທສນາວເສນ ຠາສິຕາ. ອິຘ ປນ ປຸຖຸຊ຺ຊນກາເລ ‘‘ສາຘຸ ເມ, ຠນ຺ເຕ, ຠຄວາ ສໍຂິຕ຺ເຕນ ຘມ຺ມໍ ເທເສຕູ’’ຕິ ຍາຈິເຕນ ສຕ຺ຖາຣາ ‘‘ຕໍ ກິໍ ມຎ຺ຎສິ, ມາລຸກ຺ຍປຸຕ຺ຕ, ເຍ ເຕ ຈກ຺ຂຸວິຎ຺ເຎຍ຺ຍາ ຣູປາ ອທິຏ຺ຐາ ອທິຏ຺ຐປຸພ຺ພາ, ນ ຈ ປສ຺ສສິ, ນ ຈ ເຕ ໂຫຕິ ປສ຺ເສຍ຺ຍນ຺ຕິ, ອຕ຺ຖິ ເຕ ຕຕ຺ຖ ຉນ຺ໂທ ວາ ຣາໂຄ ວາ ເປມໍ ວາ’’ຕິ? ‘‘ໂນ ເຫຕໍ, ຠນ຺ເຕ’’. ‘‘ເຍ ເຕ ໂສຕວິຎ຺ເຎຍ຺ຍາ ສທ຺ທາ…ເປ… ຆານ…ຊິວ຺ຫາ…ກາຍ…ມໂນວິຎ຺ເຎຍ຺ຍາ ຘມ຺ມາ ອວິຎ຺ຎາຕາ ອວິຎ຺ຎາຕປຸພ຺ພາ, ນ ຈ ວິຊານາສິ, ນ ຈ ເຕ ໂຫຕິ ວິຊາເນຍ຺ຍນ຺ຕິ, ອຕ຺ຖິ ເຕ ຕຕ຺ຖ ຉນ຺ໂທ ວາ ຣາໂຄ ວາ ເປມໍ ວາ’’ຕິ? ‘‘ໂນ ເຫຕໍ, ຠນ຺ເຕ’’. ‘‘ເອຕ຺ຖ ຈ ເຕ, ມາລຸກ຺ຍປຸຕ຺ຕ, ທິຏ຺ຐສຸຕມຸຕວິຎ຺ຎາຕພ຺ເພສຸ ຘມ຺ເມສຸ ທິຏ຺ເຐ ທິຏ຺ຐມຕ຺ຕໍ ຠວິສ຺ສຕິ, ສຸເຕ ສຸຕມຕ຺ຕໍ, ມຸເຕ ມຸຕມຕ຺ຕໍ, ວິຎ຺ຎາເຕ ວິຎ຺ຎາຕມຕ຺ຕໍ ຠວິສ຺ສຕິ. ຍໂຕ ໂຂ ເຕ, ມາລຸກ຺ຍປຸຕ຺ຕ, ທິຏ຺ຐສຸຕມຸຕວິຎ຺ຎາຕພ຺ເພສຸ ຘມ຺ເມສຸ ທິຏ຺ເຐ ທິຏ຺ຐມຕ຺ຕໍ, ສຸເຕ ສຸຕມຕ຺ຕໍ, ມຸເຕ ມຸຕມຕ຺ຕໍ, ວິຎ຺ຎາເຕ ວິຎ຺ຎາຕມຕ຺ຕໍ ຠວິສ຺ສຕິ, ຕໂຕ ຕ຺ວໍ, ມາລຸກ຺ຍປຸຕ຺ຕ, ນ ເຕນ. ຍໂຕ ຕ຺ວໍ, ມາລຸກ຺ຍປຸຕ຺ຕ, ນ ເຕນ, ຕໂຕ ຕ຺ວໍ, ມາລຸກ຺ຍປຸຕ຺ຕ, ນ ຕຕ຺ຖ. ຍໂຕ ຕ຺ວໍ, ມາລຸກ຺ຍປຸຕ຺ຕ, ນ ຕຕ຺ຖ, ຕໂຕ ຕ຺ວໍ, ມາລຸກ຺ຍປຸຕ຺ຕ, ເນວິຘ ນ ຫຸຣໍ ນ ອຸຠຍມນ຺ຕເຣນ, ເອເສວນ຺ໂຕ ທຸກ຺ຂສ຺ສາ’’ຕິ (ສໍ. ນິ. ໔.໙໕). ສໍຂິຕ຺ເຕນ ຘມ຺ເມ ເທສິເຕ ຕສ຺ສ ຘມ຺ມສ຺ສ ສາຘຸກໍ ອຸຄ຺ຄຫິຕຠາວໍ ປກາເສນ຺ເຕນ –

໗໙໔. ‘‘ຣູປໍ ທິສ຺ວາ ສຕິ ມຸຏ຺ຐາ, ປິຍໍ ນິມິຕ຺ຕໍ ມນສິ ກໂຣໂຕ;

ສາຣຕ຺ຕຈິຕ຺ໂຕ ເວເທຕິ, ຕຎ຺ຈ ອຊ຺ໂຌສ ຕິຏ຺ຐຕິ.

໗໙໕. ‘‘ຕສ຺ສ ວຑ຺ຒນ຺ຕິ ເວທນາ, ອເນກາ ຣູປສມ຺ຠວາ;

ອຠິຊ຺ຌາ ຈ ວິເຫສາ ຈ, ຈິຕ຺ຕມສ຺ສູປຫຎ຺ຎຕິ;