໘. ອຊ຺ຊຸນຕ຺ເຖຣຄາຖາວຓ຺ຓນາ

ອສກ຺ຂິໍ ວຕ ອຕ຺ຕານນ຺ຕິ ອາຍສ຺ມໂຕ ອຊ຺ຊຸນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ສີຫໂຍນິຍໍ ນິພ຺ພຕ຺ໂຕ ເອກທິວສໍ ອຣຎ຺ເຎ ອຎ຺ຎຕຣສ຺ມິໍ ຣຸກ຺ຂມູເລ ນິສິນ຺ນໍ ສຕ຺ຖາຣໍ ທິສ຺ວາ ‘‘ອຍໍ ໂຂ ອິມສ຺ມິໍ ກາເລ ສພ຺ພເສຏ຺ໂຐ ປຸຣິສສີໂຫ’’ຕິ ປສນ຺ນມານໂສ ສຸປຸປ຺ຜິຕສາລສາຂໍ ຠຎ຺ຊິຕ຺ວາ ສຕ຺ຖາຣໍ ປູເຊສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ເສຏ຺ຐິກຸເລ ນິພ຺ພຕ຺ຕິ. ອຊ຺ຊຸໂນຕິສ຺ສ ນາມໍ ອໂຫສິ. ໂສ ວິຎ຺ຎຸຕໍ ປຕ຺ໂຕ ນິຄຓ຺ເຐຫິ ກຕປຣິຈໂຍ ຫຸຕ຺ວາ ‘‘ເອວາຫໍ ອມຕໍ ອຘິຄມິສ຺ສາມີ’’ຕິ ວິວຏ຺ຏຊ຺ຌາສຍຕາຍ ທຫຣກາເລເຍວ ນິຄຓ຺ເຐສຸ ປພ຺ພຊິຕ຺ວາ ຕຕ຺ຖ ສາຣໍ ອລຠນ຺ໂຕ ສຕ຺ຖຸ ຍມກປາຏິຫາຣິຍໍ ທິສ຺ວາ ປຏິລທ຺ຘສທ຺ໂຘ ສາສເນ ປພ຺ພຊິຕ຺ວາ ວິປສ຺ສນໍ ອາຣຠິຕ຺ວາ ນຈິຣສ຺ເສວ ອຣຫາ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໔.໖໐-໖໕) –

‘‘ມິຄຣາຊາ ຕທາ ອາສິໍ, ອຠິຊາໂຕ ສຸເກສຣີ;

ຄິຣິທຸຄ຺ຄໍ ຄເວສນ຺ໂຕ, ອທ຺ທສໍ ໂລກນາຍກໍ.

‘‘ອຍໍ ນຸ ໂຂ ມຫາວີໂຣ, ນິພ຺ພາເປຕິ ມຫາຊນໍ;

ຍໍນູນາຫໍ ອຸປາເສຍ຺ຍໍ, ເທວເທວໍ ນຣາສຠໍ.

‘‘ສາຂໍ ສາລສ຺ສ ຠຎ຺ຊິຕ຺ວາ, ສໂກສໍ ປຸປ຺ຜມາຫຣິໍ;

ອຸປຄນ຺ຕ຺ວານ ສມ຺ພຸທ຺ຘໍ, ອທາສິໍ ປຸປ຺ຜມຸຕ຺ຕມໍ.

‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ປຸປ຺ຜທານສ຺ສິທໍ ຜລໍ.

‘‘ອິໂຕ ຈ ນວເມ ກປ຺ເປ, ວິໂຣຈນສນາມກາ;

ຕໂຍ ອາສິໍສຸ ຣາຊາໂນ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອນຸຕ຺ຕຣສຸຂາຘິຄມສມ຺ຠູເຕນ ປີຕິເວເຄນ ອຸທານໍ ອຸທາເນນ຺ໂຕ –

໘໘. ‘‘ອສກ຺ຂິໍ ວຕ ອຕ຺ຕານໍ, ອຸທ຺ຘາຕຸໍ ອຸທກາ ຖລໍ;

ວຸຍ຺ຫມາໂນ ມໂຫເຆວ, ສຈ຺ຈານິ ປຏິວິຊ຺ຌຫ’’ນ຺ຕິ. – ຄາຖໍ ອຠາສິ;

ຕຕ຺ຖ ອສກ຺ຂິນ຺ຕິ ສກ຺ໂກສິໍ. ວຕາຕິ ວິມ຺ຫເຍ ນິປາໂຕ. ອຕິວິມ຺ຫຍນີຍຎ຺ເຫຕໍ ຍທິທໍ ສຈ຺ຈປຏິເວໂຘ. ເຕນາຫ –

‘‘ຕໍ ກິໍມຎ຺ຎຖ, ຠິກ຺ຂເວ, ກຕມໍ ນຸ ໂຂ ທຸກ຺ກຣຕຣໍ ວາ ທຸຣຠິສມ຺ຠວຕຣໍ ວາ, ຍໍ ສຕ຺ຕຘາ ຠິນ຺ນສ຺ສ ວາລສ຺ສ ໂກຏິຍາ ໂກຏິໍ ປຏິວິຊ຺ເຌຍ຺ຍາ’’ຕິອາທິ (ສໍ. ນິ. ໕.໑໑໑໕)?

ອຕ຺ຕານນ຺ຕິ ນິຍກຊ຺ຌຕ຺ຕໍ ສນ຺ຘາຍ ວທຕິ. ໂຍ ຫິ ປໂຣ ນ ໂຫຕິ ໂສ ອຕ຺ຕາຕິ. ອຸທ຺ຘາຕຸນ຺ຕິ ອຸທ຺ຘຣິຕຸໍ, ‘‘ອຸທ຺ຘຏ’’ນ຺ຕິປິ ປາໂຐ. ອຸທກາຕິ ສໍສາຣມໂຫຆສງ຺ຂາຕາ ອຸທກາ. ຖລນ຺ຕິ ນິພ຺ພານຖລໍ. ວຸຍ຺ຫມາໂນ ມໂຫເຆວາຕິ ມຫຓ຺ຓເວ ວຸຍ຺ຫມາໂນ ວິຍ. ອິທໍ ວຸຕ຺ຕໍ ໂຫຕິ – ຍຖາ ນາມ ຄມ຺ຠີຣວິຕ຺ຖເຕ ອປ຺ປຕິຏ຺ເຐ ມຫຕິ ອຸທໂກເຆ ເວຄສາ ວຸຍ຺ຫມາໂນ ປຸຣິໂສ ເກນຈິ ອຕ຺ຖກາເມນ ອຸປນີຕໍ ຜິຍາຣິຕ຺ຕສມ຺ປນ຺ນໍ ທຬ຺ຫນາວໍ ລຠິຕ຺ວາ ສຸເຂເນວ ຕໂຕ ອຕ຺ຕານໍ ອຸທ຺ຘຣິຕຸໍ ສກ຺ກຸເຓຍ຺ຍ ປາຣໍ ປາປຸເຓຍ຺ຍ, ເອວເມວາຫໍ ສໍສາຣມໂຫເຆ ກິເລສາຠິສງ຺ຂາຣເວເຄນ ວຸຍ຺ຫມາໂນ ສຕ຺ຖາຣາ ອຸປນີຕໍ ສມຖວິປສ຺ສນຸເປຕໍ ອຣິຍມຄ຺ຄນາວໍ ລຠິຕ຺ວາ ຕໂຕ ອຕ຺ຕານໍ ອຸທ຺ຘຣິຕຸໍ ນິພ຺ພານຖລໍ ປຕ຺ຕຸໍ ອໂຫ ອສກ຺ຂິນ຺ຕິ. ຍຖາ ປນ ອສກ຺ຂິ, ຕໍ ທສ຺ເສຕຸໍ ‘‘ສຈ຺ຈານິ ປຏິວິຊ຺ຌຫ’’ນ຺ຕິ ອາຫ. ຍສ຺ມາ ອຫໍ ທຸກ຺ຂາທີນິ ຈຕ຺ຕາຣິ ອຣິຍສຈ຺ຈານິ ປຣິຎ຺ຎາປຫານສຈ຺ຉິກິຣິຍາຠາວນາປຏິເວເຘນ ປຏິວິຊ຺ຌິໍ ອຣິຍມຄ຺ຄຎາເຓນ ອຎ຺ຎາສິໍ, ຕສ຺ມາ ອສກ຺ຂິໍ ວຕ ອຕ຺ຕານໍ ອຸທ຺ຘາຕຸໍ ອຸທກາ ຖລນ຺ຕິ ໂຍຊນາ.

ອຊ຺ຊຸນຕ຺ເຖຣຄາຖາວຓ຺ຓນາ ນິຏ຺ຐິຕາ.