໙. (ປຐມ) ເທວສຠຕ຺ເຖຣຄາຖາວຓ຺ຓນາ

ອຸຕ຺ຕິຓ຺ຓາ ປງ຺ກປລິປາຕິ ອາຍສ຺ມໂຕ ເທວສຠຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ປາຣາວຕໂຍນິຍໍ ນິພ຺ພຕ຺ໂຕ ເອກທິວສໍ ສຕ຺ຖາຣໍ ທິສ຺ວາ ປສນ຺ນມານໂສ ປິຍາລຜລໍ ອຸປເນສິ. ສຕ຺ຖາ ຕສ຺ສ ປສາທສໍວຑ຺ຒນຕ຺ຖໍ ຕໍ ປຣິຠຸຎ຺ຊິ. ໂສ ເຕນ ອຕິວິຍ ປສນ຺ນຈິຕ຺ໂຕ ຫຸຕ຺ວາ ກາເລນ ກາລໍ ອຸປສງ຺ກມິຕ຺ວາ ວນ຺ທິຕ຺ວາ ຈິຕ຺ຕໍ ປສາເທຕິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ໂຕ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ອຎ຺ຎຕຣສ຺ສ ມຓ຺ຑລິກຣຎ຺ໂຎ ປຸຕ຺ໂຕ ຫຸຕ຺ວາ ນິພ຺ພຕ຺ໂຕ ຕຣຸຓກາເລເຍວ ຣຊ຺ເຊ ປຕິຏ຺ຐິໂຕ ຣຊ຺ຊສຸຂມນຸຠວນ຺ໂຕ ວຸທ຺ໂຘ ສຕ຺ຖາຣໍ ອຸປສງ຺ກມິ, ຕສ຺ສ ສຕ຺ຖາ ຘມ຺ມໍ ເທເສສິ. ໂສ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ສໍເວຄຊາໂຕ ຣຊ຺ຊໍ ປຫາຍ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໔.໖໖-໗໒) –

‘‘ປາຣາວໂຕ ຕທາ ອາສິໍ, ປຣໍ ອນຸປໂຣຘໂກ;

ປພ຺ຠາເຣ ເສຍ຺ຍໍ ກປ຺ເປມິ, ອວິທູເຣ ສິຂິສຕ຺ຖຸໂນ.

‘‘ສາຍໍ ປາຕຎ຺ຈ ປສ຺ສາມິ, ພຸທ຺ຘໍ ໂລກຄ຺ຄນາຍກໍ;

ເທຍ຺ຍຘມ຺ໂມ ຈ ເມ ນຕ຺ຖິ, ທ຺ວິປທິນ຺ທສ຺ສ ຕາທິໂນ.

‘‘ປິຍາລຜລມາທາຍ, ອຄມໍ ພຸທ຺ຘສນ຺ຕິກໍ;

ປຏິຄ຺ຄເຫສິ ຠຄວາ, ໂລກເຊຏ຺ໂຐ ນຣາສໂຠ.

‘‘ຕໂຕ ປຣໍ ອຸປາທາຍ, ປຣິຈາຣິໍ ວິນາຍກໍ;

ເຕນ ຈິຕ຺ຕປ຺ປສາເທນ, ຕຕ຺ຖ ກາລງ຺ກໂຕ ອຫໍ.

‘‘ເອກຕ຺ຕິໍເສ ອິໂຕ ກປ຺ເປ, ຍໍ ຜລໍ ອທທິໍ ອຫໍ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ອິໂຕ ປນ຺ນຣເສ ກປ຺ເປ, ຕໂຍ ອາສຸໍ ປິຍາລິໂນ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ປຫີນກິເລສປຈ຺ຈເວກ຺ຂຓວເສນ ອຸປ຺ປນ຺ນໂສມນສ຺ໂສ ອຸທານໍ ອຸທາເນນ຺ໂຕ –

໘໙. ‘‘ອຸຕ຺ຕິຓ຺ຓາ ປງ຺ກປລິປາ, ປາຕາລາ ປຣິວຊ຺ຊິຕາ;

ມຸຕ຺ໂຕ ໂອຆາ ຈ ຄນ຺ຖາ ຈ, ສພ຺ເພ ມານາ ວິສໍຫຕາ’’ຕິ. – ຄາຖໍ ອຠາສິ;

ຕຕ຺ຖ ອຸຕ຺ຕິຓ຺ຓາຕິ ອຸຕ຺ຕຣິຕາ ອຕິກ຺ກນ຺ຕາ. ປງ຺ກປລິປາຕິ ປງ຺ກາ ຈ ປລິປາ ຈ. ປງ຺ໂກ ວຸຈ຺ຈຕິ ປກຕິກທ຺ທໂມ. ‘‘ປລິໂປ’’ຕິ ຄມ຺ຠີຣປຸຖຸໂລ ມຫາກທ຺ທໂມ. ອິຘ ປນ ປງ຺ໂກ ວິຍາຕິ ປງ຺ໂກ, ກາມຣາໂຄ ອສຸຈິຠາວາປາທເນນ ຈິຕ຺ຕສ຺ສ ມກ຺ຂນໂຕ. ປລິໂປ ວິຍາຕິ ປລິໂປ, ປຸຕ຺ຕທາຣາທິວິສໂຍ ພຫໂລ ຉນ຺ທຣາໂຄ ວຸຕ຺ຕນເຍນ ສມ຺ມກ຺ຂນໂຕ ທຸຣຸຕ຺ຕຣຓໂຕ ຈ. ເຕ ມຍາ ອນາຄາມິມຄ຺ເຄນ ສພ຺ພໂສ ອຕິກ຺ກນ຺ຕາຕິ ອາຫ ‘‘ອຸຕ຺ຕິຓ຺ຓາ ປງ຺ກປລິປາ’’ຕິ. ປາຕາລາຕິ ປາຕາຍາລນ຺ຕິ ປາຕາລາ, ມຫາສມຸທ຺ເທ ນິນ຺ນຕຣປເທສາ. ເກຈິ ປນ ນາຄຠວນໍ ‘‘ປາຕາລ’’ນ຺ຕິ ວທນ຺ຕິ. ອິຘ ປນ ອຄາຫທຸຣວຄ຺ຄາຫທຸຣຸຕ຺ຕຣຓຏ຺ເຐນ ປາຕາລາ ວິຍາຕິ ປາຕາລາ, ທິຏ຺ຐິໂຍ. ເຕ ຈ ມຍາ ປຐມມຄ຺ຄາຘິຄເມເນວ ສພ຺ພຖາ ວຊ຺ຊິຕາ ສມຸຈ຺ຉິນ຺ນາຕິ ອາຫ ‘‘ປາຕາລາ ປຣິວຊ຺ຊິຕາ’’ຕິ ມຸຕ຺ໂຕ ໂອຆາ ຈ ຄນ຺ຖາ ຈາຕິ ກາໂມຆາທິໂອຆໂຕ ອຠິຊ຺ຌາກາຍຄນ຺ຖາທິຄນ຺ຖໂຕ ຈ ເຕນ ເຕນ ມຄ຺ເຄນ ມຸຕ຺ໂຕ ປຣິມຸຕ຺ໂຕ, ປຸນ ອນຠິກິຣຓອຄນ຺ຖນວເສນ ອຕິກ຺ກນ຺ໂຕຕິ ອຕ຺ໂຖ. ສພ຺ເພ ມານາ ວິສໍຫຕາຕິ ນວວິຘາປິ ມານາ ອຄ຺ຄມຄ຺ຄາຘິຄເມນ ວິເສສໂຕ ສງ຺ຆາຕໍ ວິນາສໍ ອາປາທິຕາ ສມຸຈ຺ຉິນ຺ນາ ‘‘ມານວິຘາ ຫຕາ’’ຕິ ເກຈິ ປຐນ຺ຕິ, ມານໂກຏ຺ຐາສາຕິ ອຕ຺ໂຖ. ‘‘ມານວິສາ’’ຕິ ອປເຣ, ເຕສໍ ປນ ມານວິສສ຺ສ ທຸກ຺ຂສ຺ສ ຜລໂຕ ມານວິສາຕິ ອຕ຺ໂຖ ທຏ຺ຐພ຺ໂພ.

(ປຐມ) ເທວສຠຕ຺ເຖຣຄາຖາວຓ຺ຓນາ ນິຏ຺ຐິຕາ.