໗. ປວິຏ຺ຐຕ຺ເຖຣຄາຖາວຓ຺ຓນາ

ຂນ຺ຘາ ທິຏ຺ຐາ ຍຖາຠູຕນ຺ຕິ ອາຍສ຺ມໂຕ ປວິຏ຺ຐຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ກໂຣນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ເກສໂວ ນາມ ຕາປໂສ ຫຸຕ຺ວາ ເອກທິວສໍ ສຕ຺ຖາຣໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປສນ຺ນມານໂສ ອຠິວາເທຕ຺ວາ ອຎ຺ຊລິໍ ປຄ຺ຄຍ຺ຫ ປທກ຺ຂິຓໍ ກຕ຺ວາ ປກ຺ກາມິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມຄຘຣຏ຺ເຐ ພ຺ຣາຫ຺ມຓກຸເລ ອຸປ຺ປຊ຺ຊິຕ຺ວາ ອນຸກ຺ກເມນ ວິຎ຺ຎຸຕໍ ປຕ຺ໂຕ ເນກ຺ຂມ຺ມນິນ຺ນຊ຺ຌາສຍຕາຍ ປຣິພ຺ພາຊກປພ຺ພຊ຺ຊໍ ປພ຺ພຊິຕ຺ວາ ຕຕ຺ຖ ສິກ຺ຂິຕພ຺ພໍ ສິກ຺ຂິຕ຺ວາ ວິຈຣນ຺ໂຕ ອຸປຕິສ຺ສໂກລິຕານໍ ພຸທ຺ຘສາສເນ ປພ຺ພຊິຕຠາວໍ ສຸຕ຺ວາ ‘‘ເຕປິ ນາມ ມຫາປຎ຺ຎາ ຕຕ຺ຖ ປພ຺ພຊິຕາ, ຕເທວ ມຎ຺ເຎ ເສຍ຺ໂຍ’’ຕິ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິ. ຕສ຺ສ ສຕ຺ຖາ ວິປສ຺ສນໍ ອາຈິກ຺ຂິ. ໂສ ວິປສ຺ສນໍ ອາຣຠິຕ຺ວາ ນຈິຣສ຺ເສວ ອຣຫຕ຺ຕໍ ສຈ຺ຉາກາສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໔.໕໕-໕໙) –

‘‘ນາຣໂທ ອິຕິ ເມ ນາມໍ, ເກສໂວ ອິຕິ ມໍ ວິທູ;

ກຸສລາກຸສລໍ ເອສໍ, ອຄມໍ ພຸທ຺ຘສນ຺ຕິກໍ.

‘‘ເມຕ຺ຕຈິຕ຺ໂຕ ກາຣຸຓິໂກ, ອຕ຺ຖທສ຺ສີ ມຫາມຸນິ;

ອສ຺ສາສຍນ຺ໂຕ ສຕ຺ເຕ ໂສ, ຘມ຺ມໍ ເທເສຕິ ຈກ຺ຂຸມາ.

‘‘ສກໍ ຈິຕ຺ຕໍ ປສາເທຕ຺ວາ, ສິເຣ ກຕ຺ວານ ອຎ຺ຊລິໍ;

ສຕ຺ຖາຣໍ ອຠິວາເທຕ຺ວາ, ປກ຺ກາມິໍ ປາຈິນາມຸໂຂ.

‘‘ສຕ຺ຕຣເສ ກປ຺ປສເຕ, ຣາຊາ ອາສິ ມຫີປຕິ;

ອມິຕ຺ຕຕາປໂນ ນາມ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຎ຺ຎໍ ພ຺ຍາກໂຣນ຺ໂຕ –

໘໗. ‘‘ຂນ຺ຘາ ທິຏ຺ຐາ ຍຖາຠູຕໍ, ຠວາ ສພ຺ເພ ປທາລິຕາ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ. – ຄາຖໍ ອຠາສິ;

ຕຕ຺ຖ ຂນ຺ຘາຕິ ປຎ຺ຈຸປາທານກ຺ຂນ຺ຘາ, ເຕ ຫິ ວິປສ຺ສນຸປລກ຺ຂຓໂຕ ສາມຎ຺ຎລກ຺ຂຓໂຕ ຈ ຎາຕປຣິຎ຺ຎາທີຫິ ປຣິຊານນວເສນ ວິປສ຺ສິຕພ຺ພາ. ທິຏ຺ຐາ ຍຖາຠູຕນ຺ຕິ ວິປສ຺ສນາປຎ຺ຎາສຫິຕາຍ ມຄ຺ຄປຎ຺ຎາຍ ‘‘ອິທໍ ທຸກ຺ຂ’’ນ຺ຕິອາທິນາ ອວິປຣີຕໂຕ ທິຏ຺ຐາ. ຠວາ ສພ຺ເພ ປທາລິຕາຕິ ກາມຠວາທໂຍ ສພ຺ເພ ກມ຺ມຠວາ ອຸປປຕ຺ຕິຠວາ ຈ ມຄ຺ຄຎາຓສຕ຺ເຖນ ຠິນ຺ນາ ວິທ຺ຘໍສິຕາ. ກິເລສປທາລເນເນວ ຫິ ກມ຺ໂມປປຕ຺ຕິຠວາ ປທາລິຕາ ນາມ ໂຫນ຺ຕິ. ເຕນາຫ ‘‘ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕເຍວ.

ປວິຏ຺ຐຕ຺ເຖຣຄາຖາວຓ຺ຓນາ ນິຏ຺ຐິຕາ.