໕. ສຸນາຄຕ຺ເຖຣຄາຖາວຓ຺ຓນາ

ຈິຕ຺ຕນິມິຕ຺ຕສ຺ສ ໂກວິໂທຕິ ອາຍສ຺ມໂຕ ສຸນາຄຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ອິໂຕ ເອກຕ຺ຕິໍເສ ກປ຺ເປ ສິຂິສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ຕິຓ຺ຓໍ ເວທານໍ ປາຣຄູ ຫຸຕ຺ວາ ອຣຎ຺ຎາຍຕເນ ອສ຺ສເມ ວສນ຺ໂຕ ຕີຓິ ພ຺ຣາຫ຺ມຓສຫສ຺ສານິ ມນ຺ເຕ ວາເຈສິ. ອເຖກທິວສໍ ຕສ຺ສ ສຕ຺ຖາຣໍ ທິສ຺ວາ ລກ຺ຂຓານິ ອຸປຘາເຣຕ຺ວາ ລກ຺ຂຓມນ຺ເຕ ປຣິວຕ຺ເຕນ຺ຕສ຺ສ, ‘‘ອີທິເສຫິ ລກ຺ຂເຓຫິ ສມນ຺ນາຄໂຕ ອນນ຺ຕຊິໂນ ອນນ຺ຕຎາໂຓ ພຸທ຺ໂຘ ຠວິສ຺ສຕີ’’ຕິ ພຸທ຺ຘຎາຓໍ ອາຣພ຺ຠ ອຸຬາໂຣ ປສາໂທ ອຸປ຺ປຊ຺ຊິ. ໂສ ເຕນ ຈິຕ຺ຕປ຺ປສາເທນ ເທວໂລເກ ນິພ຺ພຕ຺ໂຕ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ນາລກຄາເມ ອຎ຺ຎຕຣສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ສຸນາໂຄຕິສ຺ສ ນາມໍ ອໂຫສິ. ໂສ ຘມ຺ມເສນາປຕິສ຺ສ ຄິຫິສຫາໂຍ ເຖຣສ຺ສ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ທສ຺ສນຠູມິຍໍ ປຕິຏ຺ຐິໂຕ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໔.໓໔-໔໐) –

‘‘ຫິມວນ຺ຕສ຺ສາວິທູເຣ, ວສໂຠ ນາມ ປພ຺ພໂຕ;

ຕສ຺ມິໍ ປພ຺ພຕປາທມ຺ຫິ, ອສ຺ສໂມ ອາສິ ມາປິໂຕ.

‘‘ຕີຓິ ສິສ຺ສສຫສ຺ສານິ, ວາເຈສິໍ ພ຺ຣາຫ຺ມໂຓ ຕທາ;

ສໍຫຣິຕ຺ວານ ເຕ ສິສ຺ເສ, ເອກມນ຺ຕໍ ອຸປາວິສິໍ.

‘‘ເອກມນ຺ຕໍ ນິສີທິຕ຺ວາ, ພ຺ຣາຫ຺ມໂຓ ມນ຺ຕປາຣຄູ;

ພຸທ຺ຘເວທໍ ຄເວສນ຺ໂຕ, ຎາເຓ ຈິຕ຺ຕໍ ປສາທຍິໍ.

‘‘ຕຕ຺ຖ ຈິຕ຺ຕໍ ປສາເທຕ຺ວາ, ນິສີທິໍ ປຓ຺ຓສນ຺ຖເຣ;

ປລ຺ລງ຺ກໍ ອາຠຸຊິຕ຺ວານ, ຕຕ຺ຖ ກາລງ຺ກໂຕ ອຫໍ.

‘‘ເອກຕິໍເສ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ຎາຓສຎ຺ຎາຍິທໍ ຜລໍ.

‘‘ສຕ຺ຕວີສຕິ ກປ຺ປມ຺ຫິ, ຣາຊາ ສິຣິຘໂຣ ອຫຸ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ຠິກ຺ຂູນໍ ຘມ຺ມເທສນາປເທເສນ ອຎ຺ຎໍ ພ຺ຍາກໂຣນ຺ໂຕ –

໘໕. ‘‘ຈິຕ຺ຕນິມິຕ຺ຕສ຺ສ ໂກວິໂທ, ປວິເວກຣສໍ ວິຊານິຍ;

ຌາຍໍ ນິປໂກ ປຕິສ຺ສໂຕ, ອຘິຄຈ຺ເຉຍ຺ຍ ສຸຂໍ ນິຣາມິສ’’ນ຺ຕິ. –

ຄາຖໍ ອຠາສິ.

ຕຕ຺ຖ ຈິຕ຺ຕນິມິຕ຺ຕສ຺ສ ໂກວິໂທຕິ ຠາວນາຈິຕ຺ຕສ຺ສ ນິມິຕ຺ຕຄ຺ຄຫເຓ ກຸສໂລ, ‘‘ອິມສ຺ມິໍ ສມເຍ ຈິຕ຺ຕໍ ປຄ຺ຄເຫຕພ຺ພໍ, ອິມສ຺ມິໍ ສມ຺ປຫໍສິຕພ຺ພໍ, ອິມສ຺ມິໍ ອຊ຺ຌຸເປກ຺ຂິຕພ຺ພ’’ນ຺ຕິ ເອວໍ ປຄ຺ຄຫຓາທິໂຍຄ຺ຍສ຺ສ ຈິຕ຺ຕນິມິຕ຺ຕສ຺ສ ຄຫເຓ ເຉໂກ. ປວິເວກຣສໍ ວິຊານິຍາຕິ ກາຍວິເວກສໍວຑ຺ຒິຕສ຺ສ ຈິຕ຺ຕວິເວກສ຺ສ ຣສໍ ສຎ຺ຊານິຕ຺ວາ, ວິເວກສຸຂໍ ອນຸຠວິຕ຺ວາຕິ ອຕ຺ໂຖ. ‘‘ປວິເວກຣສໍ ປິຕ຺ວາ’’ຕິ (ຘ. ປ. ໒໐໕) ຫິ ວຸຕ຺ຕໍ. ຌາຍນ຺ຕິ ປຐມໍ ອາຣມ຺ມຓູປນິຊ຺ຌາເນນ ປຈ຺ຉາ ລກ຺ຂຓູປນິຊ຺ຌາເນນ ຈ ຌາຍນ຺ໂຕ. ນິປໂກຕິ ກມ຺ມຏ຺ຐານປຣິຫຣເຓ ກຸສໂລ. ປຕິສ຺ສໂຕຕິ ອຸປຏ຺ຐິຕສ຺ສຕິ. ອຘິຄຈ຺ເຉຍ຺ຍ ສຸຂໍ ນິຣາມິສນ຺ຕິ ເອວໍ ສມຖນິມິຕ຺ຕາທິໂກສລ຺ເລນ ລພ຺ເຠ ຈິຕ຺ຕວິເວກສຸເຂ ປຕິຏ຺ຐາຍ ສໂຕ ສມ຺ປຊາໂນ ຫຸຕ຺ວາ ວິປສ຺ສນາຌາເນເນວ ຌາຍນ຺ໂຕ ກາມາມິສວຏ຺ຏາມິເສຫິ ອສມ຺ມິສ຺ສຕາຍ ນິຣາມິສໍ ນິພ຺ພານສຸຂໍ ຜລສຸຂຎ຺ຈ ອຘິຄຈ຺ເຉຍ຺ຍ ສມຸປຄຈ຺ເຉຍ຺ຍາຕິ ອຕ຺ໂຖ.

ສຸນາຄຕ຺ເຖຣຄາຖາວຓ຺ຓນາ ນິຏ຺ຐິຕາ.