໒. ກສ຺ສປຕ຺ເຖຣຄາຖາວຓ຺ຓນາ

ເຍນ ເຍນ ສຸຠິກ຺ຂານີຕິ ອາຍສ຺ມໂຕ ກສ຺ສປຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍໍ ກິຣ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ຕີສຸ ເວເທສຸ ອຎ຺ເຎສຸ ຈ ພ຺ຣາຫ຺ມຓສິປ຺ເປສຸ ນິປ຺ຜຕ຺ຕິໍ ຄໂຕ, ໂສ ເອກທິວສໍ ຠຄວນ຺ຕໍ ທິສ຺ວາ ປສນ຺ນມານໂສ ສຸມນປຸປ຺ເຜຫິ ປູຊໍ ອກາສິ. ກໂຣນ຺ໂຕ ຈ ສຕ຺ຖຸ ສມນ຺ຕໂຕ ອຸປຣິ ຈ ປຸປ຺ຜມຸຏ຺ຐິໂຍ ຂິປິ. ພຸທ຺ຘານຸຠາເວນ ປຸປ຺ຜານິ ປຸປ຺ຜາສນາກາເຣນ ສຕ຺ຕາຫໍ ອຏ຺ຐໍສຸ. ໂສ ຕໍ ອຈ຺ຉຣິຍໍ ທິສ຺ວາ ຠິຍ຺ໂຍໂສມຕ຺ຕາຍ ປສນ຺ນມານໂສ ອໂຫສິ. ອປຣາປຣໍ ປຸຎ຺ຎານິ ກໂຣນ຺ໂຕ ກປ຺ປສຕສຫສ຺ສໍ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ອຎ຺ຎຕຣສ຺ສ ອຸທິຈ຺ຈພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ກສ຺ສໂປຕິສ຺ສ ນາມໍ ອໂຫສິ. ຕສ຺ສ ທຫຣກາເລເຍວ ປິຕາ ກາລມກາສິ. ມາຕາ ຕໍ ປຏິຊຄ຺ຄຕິ. ໂສ ເອກທິວສໍ ເຊຕວນໍ ຄໂຕ ຠຄວໂຕ ຘມ຺ມເທສນໍ ສຸຕ຺ວາ ເຫຕຸສມ຺ປນ຺ນຕາຍ ຕສ຺ມິໍເຍວ ອາສເນ ໂສຕາປນ຺ໂນ ຫຸຕ຺ວາ ມາຕຸ ສນ຺ຕິກໍ ຄນ຺ຕ຺ວາ ອນຸຊານາເປຕ຺ວາ ປພ຺ພຊິໂຕ ສຕ຺ຖຣິ ວຸຏ຺ຐວສ຺ເສ ປວາເຣຕ຺ວາ ຊນປທຈາຣິກໍ ປກ຺ກນ຺ເຕ ສຍມ຺ປິ ສຕ຺ຖາຣາ ສທ຺ຘິໍ ຄນ຺ຕຸກາໂມ ອາປຸຈ຺ຉິຕຸໍ ມາຕຸ ສນ຺ຕິກໍ ອຄມາສິ. ມາຕາ ວິສ຺ສຊ຺ເຊນ຺ຕີ ໂອວາທວເສນ –

໘໒. ‘‘ເຍນ ເຍນ ສຸຠິກ຺ຂານິ, ສິວານິ ອຠຍານິ ຈ;

ເຕນ ປຸຕ຺ຕກ ຄຈ຺ຉສ຺ສຸ, ມາ ໂສກາປຫໂຕ ຠວາ’’ຕິ. – ຄາຖໍ ອຠາສິ;

ຕຕ຺ຖ ເຍນ ເຍນາຕິ ຍຕ຺ຖ ຍຕ຺ຖ. ຠຸມ຺ມຕ຺ເຖ ຫິ ເອຕໍ ກຣຓວຈນໍ, ຍສ຺ມິໍ ຍສ຺ມິໍ ທິສາຠາເຄຕິ ອຕ຺ໂຖ. ສຸຠິກ຺ຂານີຕິ ສຸລຠປິຓ຺ຑານິ, ຣຏ຺ຐານີຕິ ອຘິປ຺ປາໂຍ. ສິວານີຕິ ເຂມານິ ອໂຣຄານິ. ອຠຍານີຕິ ໂຈຣຠຍາທີຫິ ນິພ຺ຠຍານິ, ໂຣຄທຸພ຺ຠິກ຺ຂຠຍານິ ປນ ‘‘ສຸຠິກ຺ຂານິ, ສິວານີ’’ຕິ ປທທ຺ວເຍເນວ ຄຫິຕານິ. ເຕນາຕິ ຕຕ຺ຖ, ຕສ຺ມິໍ ຕສ຺ມິໍ ທິສາຠາເຄຕິ ອຕ຺ໂຖ. ປຸຕ຺ຕກາຕິ ອນຸກມ຺ປນ຺ຕີ ຕໍ ອາລປຕິ. ມາຕິ ປຏິເສຘຕ຺ເຖ ນິປາໂຕ ໂສກາປຫໂຕຕິ ວຸຕ຺ຕຄຸຓຣຫິຕານິ ຣຏ຺ຐານິ ຄນ຺ຕ຺ວາ ທຸພ຺ຠິກ຺ຂຠຍາທິຊນິເຕນ ໂສເກນ ອຸປຫໂຕ ມາ ຠວ ມາໂຫສີຕິ ອຕ຺ໂຖ. ຕໍ ສຸຕ຺ວາ ເຖໂຣ, ‘‘ມມ ມາຕາ ມຍ຺ຫໍ ໂສກຣຫິຕຏ຺ຐານຄມນໍ ອາສີສຕິ, ຫນ຺ທ ມຍໍ ສພ຺ພໂສ ອຈ຺ຈນ຺ຕເມວ ໂສກຣຫິຕໍ ຐານໍ ປຕ຺ຕຸໍ ຍຸຕ຺ຕ’’ນ຺ຕິ ອຸສ຺ສາຫຊາໂຕ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໓.໑-໙) –

‘‘ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ;

ອພ຺ໂຠກາເສ ຐິໂຕ ສນ຺ໂຕ, ອທ຺ທສໍ ໂລກນາຍກໍ.

‘‘ສີຫໍ ຍຖາ ວນຈຣໍ, ພ຺ຍຄ຺ຆຣາຊໍວ ນິຕ຺ຕສໍ;

ຕິຘາປຠິນ຺ນມາຕງ຺ຄໍ, ກຸຎ຺ຊຣໍວ ມເຫສິນໍ.

‘‘ເສເຣຍກໍ ຄເຫຕ຺ວານ, ອາກາເສ ອຸກ຺ຂິປິໍ ອຫໍ;

ພຸທ຺ຘສ຺ສ ອານຸຠາເວນ, ປຣິວາເຣນ຺ຕິ ສພ຺ພໂສ.

‘‘ອຘິຏ຺ຐຫິ ມຫາວີໂຣ, ສພ຺ພຎ຺ຎູ ໂລກນາຍໂກ;

ສມນ຺ຕາ ປຸປ຺ຜຈ຺ຉທນາ, ໂອກິຣິໍສຸ ນຣາສຠໍ.

‘‘ຕໂຕ ສາ ປຸປ຺ຜກຎ຺ຈຸກາ, ອນ຺ໂຕວຓ຺ຏາ ພຫິມຸຂາ;

ສຕ຺ຕາຫໍ ຉທນໍ ກຕ຺ວາ, ຕໂຕ ອນ຺ຕຣຘາຍຖ.

‘‘ຕຎ຺ຈ ອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ພຸທ຺ເຘ ຈິຕ຺ຕໍ ປສາເທສິໍ, ສຸຄເຕ ໂລກນາຍເກ.

‘‘ເຕນ ຈິຕ຺ຕປ຺ປສາເທນ, ສຸກ຺ກມູເລນ ໂຈທິໂຕ;

ກປ຺ປານໍ ສຕສຫສ຺ສໍ, ທຸຄ຺ຄຕິໍ ນຸປປຊ຺ຊຫໍ.

‘‘ປນ຺ນຣສສຫສ຺ສມ຺ຫິ, ກປ຺ປານໍ ປຎ຺ຈວີສຕິ;

ວີຕມລາສນາມາ ຈ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ‘‘ອິທເມວ ມາຕຸ ວຈນໍ ອຣຫຕ຺ຕປ຺ປຕ຺ຕິຍາ ອງ຺ກຸສໍ ຊາຕ’’ນ຺ຕິ ຕເມວ ຄາຖໍ ປຈ຺ຈຸທາຫາສິ.

ກສ຺ສປຕ຺ເຖຣຄາຖາວຓ຺ຓນາ ນິຏ຺ຐິຕາ.