໓. ສີຫຕ຺ເຖຣຄາຖາວຓ຺ຓນາ

ສີຫປ຺ປມຕ຺ໂຕ ວິຫຣາຕິ ອາຍສ຺ມໂຕ ສີຫຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສ ກິຣ ປຸຣິມພຸທ຺ເຘສຸ ກຕາຘິກາໂຣ ອິໂຕ ອຏ຺ຐາຣສກປ຺ປສຕມຕ຺ຖເກ ອຕ຺ຖທສ຺ສິສ຺ສ ຠຄວໂຕ ກາເລ ຈນ຺ທຠາຄາຍ ນທິຍາ ຕີເຣ ກິນ຺ນຣໂຍນິຍໍ ນິພ຺ພຕ຺ຕິຕ຺ວາ ປຸປ຺ຜຠກ຺ໂຂ ປຸປ຺ຜນິວສໂນ ຫຸຕ຺ວາ ວິຫຣນ຺ໂຕ ອາກາເສນ ຄຈ຺ຉນ຺ຕໍ ອຕ຺ຖທສ຺ສິໍ ຠຄວນ຺ຕໍ ທິສ຺ວາ ປສນ຺ນຈິຕ຺ໂຕ ປູເຊຕຸກາໂມ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ຠຄວາ ຕສ຺ສ ອຊ຺ຌາສຍໍ ຎຕ຺ວາ ອາກາສໂຕ ໂອຣຸຍ຺ຫ ອຎ຺ຎຕຣສ຺ມິໍ ຣຸກ຺ຂມູເລ ປລ຺ລງ຺ເກນ ນິສີທິ. ກິນ຺ນໂຣ ຈນ຺ທນສາຣໍ ຆໍສິຕ຺ວາ ຈນ຺ທນຄນ຺ເຘນ ປຸປ຺ເຜຫິ ຈ ປູຊໍ ກຕ຺ວາ ວນ຺ທິຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມລ຺ລຣາຊກຸເລ ນິພ຺ພຕ຺ຕິ, ຕສ຺ສ ສີໂຫຕິ ນາມໍ ອໂຫສິ. ໂສ ຠຄວນ຺ຕໍ ທິສ຺ວາ ປສນ຺ນມານໂສ ວນ຺ທິຕ຺ວາ ເອກມນ຺ຕໍ ນິສີທິ. ສຕ຺ຖາ ຕສ຺ສ ອຊ຺ຌາສຍໍ ໂອໂລເກຕ຺ວາ ຘມ຺ມໍ ກເຖສິ. ໂສ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ອຣຎ຺ເຎ ວິຫຣຕິ. ຕສ຺ສ ຈິຕ຺ຕໍ ນານາຣມ຺ມເຓ ວິຘາວຕິ, ເອກຄ຺ຄໍ ນ ໂຫຕິ, ສກຕ຺ຖໍ ນິປ຺ຜາເທຕຸໍ ນ ສກ຺ໂກຕິ. ສຕ຺ຖາ ຕໍ ທິສ຺ວາ ອາກາເສ ຐຕ຺ວາ –

໘໓. ‘‘ສີຫປ຺ປມຕ຺ໂຕ ວິຫຣ, ຣຕ຺ຕິນ຺ທິວມຕນ຺ທິໂຕ;

ຠາເວຫິ ກຸສລໍ ຘມ຺ມໍ, ຊຫ ສີຆໍ ສມຸສ຺ສຍ’’ນ຺ຕິ. –

ຄາຖາຍ ໂອວທິ. ໂສ ຄາຖາວສາເນ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໔.໑໗-໒໕) –

‘‘ຈນ຺ທຠາຄານທີຕີເຣ, ອໂຫສິໍ ກິນ຺ນໂຣ ຕທາ;

ປຸປ຺ຜຠກ຺ໂຂ ຈຫໍ ອາສິໍ, ປຸປ຺ຜນິວສໂນ ຕຖາ.

‘‘ອຕ຺ຖທສ຺ສີ ຕຸ ຠຄວາ, ໂລກເຊຏ຺ໂຐ ນຣາສໂຠ;

ວິປິນຄ຺ເຄນ ນິຍ຺ຍາສິ, ຫໍສຣາຊາວ ອມ຺ພເຣ.

‘‘ນໂມ ເຕ ປຸຣິສາຊຎ຺ຎ, ຈິຕ຺ຕໍ ເຕ ສຸວິໂສຘິຕໍ;

ປສນ຺ນມຸຂວຓ຺ໂຓສິ, ວິປ຺ປສນ຺ນມຸຂິນ຺ທ຺ຣິໂຍ.

‘‘ໂອໂຣຫິຕ຺ວານ ອາກາສາ, ຠູຣິປຎ຺ໂຎ ສຸເມຘໂສ;

ສງ຺ຆາຏິໍ ປຕ຺ຖຣິຕ຺ວານ, ປລ຺ລງ຺ເກນ ອຸປາວິສິ.

‘‘ວິລີນໍ ຈນ຺ທນາທາຍ, ອຄມາສິໍ ຊິນນ຺ຕິກໍ;

ປສນ຺ນຈິຕ຺ໂຕ ສຸມໂນ, ພຸທ຺ຘສ຺ສ ອຠິໂຣປຍິໍ.

‘‘ອຠິວາເທຕ຺ວານ ສມ຺ພຸທ຺ຘໍ, ໂລກເຊຏ຺ຐໍ ນຣາສຠໍ;

ປາໂມຊ຺ຊໍ ຊນຍິຕ຺ວານ, ປກ຺ກາມິໍ ອຸຕ຺ຕຣາມຸໂຂ.

‘‘ອຏ຺ຐາຣເສ ກປ຺ປສເຕ, ຈນ຺ທນໍ ຍໍ ອປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ຈຕຸທ຺ທເສ ກປ຺ປສເຕ, ອິໂຕ ອາສິໍສຸ ເຕ ຕໂຍ;

ໂຣຫຓີ ນາມ ນາເມນ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຍາ ປນ ຠຄວຕາ ໂອວາທວເສນ ວຸຕ຺ຕາ ‘‘ສີຫປ຺ປມຕ຺ໂຕ’’ຕິ ຄາຖາ, ຕຕ຺ຖ ສີຫາຕິ ຕສ຺ສ ເຖຣສ຺ສ ອາລປນໍ. ອປ຺ປມຕ຺ໂຕ ວິຫຣາຕິ ສຕິຍາ ອວິປ຺ປວາເສນ ປມາທວິຣຫິໂຕ ສພ຺ພິຣິຍາປເຖສຸ ສຕິສມ຺ປຊຎ຺ຎຍຸຕ຺ໂຕ ຫຸຕ຺ວາ ວິຫຣາຫິ. ອິທານິ ຕໍ ອປ຺ປມາທວິຫາຣໍ ສຫ ຜເລນ ສງ຺ເຂປໂຕ ທສ຺ເສຕຸໍ ‘‘ຣຕ຺ຕິນ຺ທິວ’’ນ຺ຕິອາທິ ວຸຕ຺ຕໍ. ຕສ຺ສຕ຺ໂຖ – ຣຕ຺ຕິຠາຄໍ ທິວສຠາຄຎ຺ຈ ‘‘ຈງ຺ກເມນ ນິສຊ຺ຊາຍ ອາວຣຓີເຍຫິ ຘມ຺ເມຫິ ຈິຕ຺ຕໍ ປຣິໂສເຘຕີ’’ຕິ (ສໍ. ນິ. ໔.໒໓໙; ອ. ນິ. ໓.໑໖; ວິຠ. ໕໑໙) ວຸຕ຺ຕນເຍນ ຈຕຸສມ຺ມປ຺ປຘານວເສນ ອຕນ຺ທິໂຕ ອກຸສີໂຕ ອາຣທ຺ຘວີຣິໂຍ ກຸສລໍ ສມຖວິປສ຺ສນາຘມ຺ມຎ຺ຈ ໂລກຸຕ຺ຕຣຘມ຺ມຎ຺ຈ ຠາເວຫິ ອຸປ຺ປາເທຫິ ວຑ຺ເຒຫິ ຈ, ເອວໍ ຠາເວຕ຺ວາ ຈ ຊຫ ສີຆໍ ສມຸສ຺ສຍນ຺ຕິ ຕວ ສມຸສ຺ສຍໍ ອຕ຺ຕຠາວໍ ປຐມໍ ຕາວ ຕປ຺ປຏິພທ຺ຘຉນ຺ທຣາຄປ຺ປຫາເນນ ສີຆໍ ນຈິຣສ຺ເສວ ປຊຫ, ເອວໍຠູໂຕ ຈ ປຈ຺ຉາ ຈຣິມກຈິຕ຺ຕນິໂຣເຘນ ອນວເສສໂຕ ຈ ປຊຫິສ຺ສຕີຕິ. ອຣຫຕ຺ຕໍ ປນ ປຕ຺ວາ ເຖໂຣ ອຎ຺ຎໍ ພ຺ຍາກໂຣນ຺ໂຕ ຕເມວ ຄາຖໍ ປຈ຺ຈຸທາຫາສີຕິ.

ສີຫຕ຺ເຖຣຄາຖາວຓ຺ຓນາ ນິຏ຺ຐິຕາ.