໘. ເມຓ຺ຑສິຣຕ຺ເຖຣຄາຖາວຓ຺ຓນາ

ອເນກຊາຕິສໍສາຣນ຺ຕິ ອາຍສ຺ມໂຕ ເມຓ຺ຑສິຣຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ກິຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ກໂຣນ຺ໂຕ ອິໂຕ ເອກນວຸເຕ ກປ຺ເປ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ກາເມ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ມຫຕາ ອິສິຄເຓນ ສທ຺ຘິໍ ຫິມວນ຺ເຕ ວສນ຺ໂຕ ສຕ຺ຖາຣໍ ທິສ຺ວາ ປສນ຺ນມານໂສ ອິສິຄເຓນ ປທຸມານິ ອາຫຣາເປຕ຺ວາ ສຕ຺ຖຸ ປຸປ຺ຜປູຊໍ ກຕ຺ວາ ສາວເກ ອປ຺ປມາທປຏິປຕ຺ຕິຍໍ ໂອວທິຕ຺ວາ ກາລໍ ກຕ຺ວາ ເທວໂລເກ ນິພ຺ພຕ຺ໂຕ ອປຣາປຣໍ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາເກເຕ ຄຫປຕິກຸເລ ນິພ຺ພຕ຺ຕິ, ຕສ຺ສ ເມຓ຺ຑສຣິກ຺ຂສີສຕາຍ ເມຓ຺ຑສິໂຣຕ຺ເວວ ສມຎ຺ຎາ ອໂຫສິ. ໂສ ຠຄວຕິ ສາເກເຕ ອຎ຺ຊນວເນ ວິຫຣນ຺ເຕ ສຕ຺ຖາຣໍ ອຸປສງ຺ກມິຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສມຖວິປສ຺ສນາສຸ ກມ຺ມໍ ກໂຣນ຺ໂຕ ຉຬຠິຎ຺ໂຎ ອໂຫສິ. ເຕວ ວຸຕ຺ຕໍ ອປທາເນ (ອປ. ເຖຣ ໑.໑໓.໙໗-໑໐໕) –

‘‘ຫິມວນ຺ຕສ຺ສາວິທູເຣ, ໂຄຕໂມ ນາມ ປພ຺ພໂຕ;

ນານາຣຸກ຺ເຂຫິ ສຎ຺ຉນ຺ໂນ, ມຫາຠູຕຄຓາລໂຍ.

‘‘ເວມຊ຺ຌມ຺ຫິ ຈ ຕສ຺ສາສິ, ອສ຺ສໂມ ອຠິນິມ຺ມິໂຕ;

ປຸຣກ຺ຂໂຕ ສສິສ຺ເສຫິ, ວສາມິ ອສ຺ສເມ ອຫໍ.

‘‘ອາຍນ຺ຕຸ ເມ ສິສ຺ສຄຓາ, ປທຸມໍ ອາຫຣນ຺ຕຸ ເມ;

ພຸທ຺ຘປູຊໍ ກຣິສ຺ສາມິ, ທ຺ວິປທິນ຺ທສ຺ສ ຕາທິໂນ.

‘‘ເອວນ຺ຕິ ເຕ ປຏິສ຺ສຸຕ຺ວາ, ປທຸມໍ ອາຫຣິໍສຸ ເມ;

ຕຖາ ນິມິຕ຺ຕໍ ກຕ຺ວາຫໍ, ພຸທ຺ຘສ຺ສ ອຠິໂຣປຍິໍ.

‘‘ສິສ຺ເສ ຕທາ ສມາເນຕ຺ວາ, ສາຘຸກໍ ອນຸສາສຫໍ;

ມາ ໂຂ ຕຸມ຺ເຫ ປມຊ຺ຊິຕ຺ຖ, ອປ຺ປມາໂທ ສຸຂາວໂຫ.

‘‘ເອວໍ ສມນຸສາສິຕ຺ວາ, ເຕ ສິສ຺ເສ ວຈນກ຺ຂເມ;

ອປ຺ປມາທຄຸເຓ ຍຸຕ຺ໂຕ, ຕທາ ກາລງ຺ກໂຕ ອຫໍ.

‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ເອກປຎ຺ຎາສກປ຺ປມ຺ຫິ, ຣາຊາ ອາສິໍ ຊລຸຕ຺ຕໂມ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ໂສ ອຕ຺ຕໂນ ປຸພ຺ເພນິວາສໍ ອນຸສ຺ສຣນ຺ໂຕ –

໗໘. ‘‘ອເນກຊາຕິສໍສາຣໍ, ສນ຺ຘາວິສ຺ສໍ ອນິພ຺ພິສໍ;

ຕສ຺ສ ເມ ທຸກ຺ຂຊາຕສ຺ສ, ທຸກ຺ຂກ຺ຂນ຺ໂຘ ອປຣທ຺ໂຘ’’ຕິ. – ຄາຖໍ ອຠາສິ;

ຕຕ຺ຖ ອເນກຊາຕິສໍສາຣນ຺ຕິ ອເນກຊາຕິສຕສຫສ຺ສສງ຺ຂ຺ຍໍ ອິທໍ ສໍສາຣວຏ຺ຏໍ, ອທ຺ຘຸໂນ ອຘິປ຺ເປຕຕ຺ຕາ ອຈ຺ຈນ຺ຕສໍໂຍເຄກວຈນໍ. ສນ຺ຘາວິສ຺ສນ຺ຕິ ສໍສຣິໍ, ອປຣາປຣໍ ຈວນຸປ຺ປຊ຺ຊນວເສນ ປຣິພ຺ຠມິໍ. ອນິພ຺ພິສນ຺ຕິ ຕສ຺ສ ນິວຕ຺ຕກຎາຓໍ ອວິນ຺ທນ຺ໂຕ ອລຠນ຺ໂຕ. ຕສ຺ສ ເມຕິ ເອວໍ ສໍສຣນ຺ຕສ຺ສ ເມ. ທຸກ຺ຂຊາຕສ຺ສາຕິ ຊາຕິອາທິວເສນ ອຸປ຺ປນ຺ນທຸກ຺ຂສ຺ສ, ຕິສ຺ສນ຺ນໍ ວາ ທຸກ຺ຂຕານໍ ວເສນ ທຸກ຺ຂສຠາວສ຺ສ. ທຸກ຺ຂກ຺ຂນ຺ໂຘຕິ ກມ຺ມກິເລສວິປາກວຏ຺ຏປ຺ປກາໂຣ ທຸກ຺ຂຣາສິ. ອປຣທ຺ໂຘຕິ ອຣຫຕ຺ຕມຄ຺ຄປ຺ປຕ຺ຕິໂຕ ປຏ຺ຐາຍ ປຣິພ຺ຠຏ຺ໂຐ ຈຸໂຕ ນ ອຠິນິພ຺ພຕ຺ຕິສ຺ສຕິ. ‘‘ອປຣຏ຺ໂຐ’’ຕິ ວາ ປາໂຐ, ອປຄຕສມິທ຺ຘິໂຕ ສມຸຈ຺ຉິນ຺ນກາຣຓຕ຺ຕາ ອປຄໂຕຕິ ອຕ຺ໂຖ. ອິທເມວ ຈ ເຖຣສ຺ສ ອຎ຺ຎາພ຺ຍາກຣຓໍ ອໂຫສິ.

ເມຓ຺ຑສິຣຕ຺ເຖຣຄາຖາວຓ຺ຓນາ ນິຏ຺ຐິຕາ.