໗. ຫຕ຺ຖາໂຣຫປຸຕ຺ຕຕ຺ເຖຣຄາຖາວຓ຺ຓນາ

ອິທໍ ປຸເຣ ຈິຕ຺ຕມຈາຣິ ຈາຣິກນ຺ຕິ ອາຍສ຺ມໂຕ ຫຕ຺ຖາໂຣຫປຸຕ຺ຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສ ກິຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ຠິກ຺ຂຸສງ຺ຆປຣິວຸຕໍ ວິຫາຣໂຕ ນິກ຺ຂນ຺ຕໍ ທິສ຺ວາ ປສນ຺ນຈິຕ຺ໂຕ ປຸປ຺ເຜຫິ ປູຊໍ ກຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ຫຕ຺ຖາໂຣຫກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຫຕ຺ຖິສິປ຺ເປ ນິປ຺ຜຕ຺ຕິໍ ອຄມາສິ. ໂສ ເອກທິວສໍ ຫຕ຺ຖິໍ ສິກ຺ຂາເປນ຺ໂຕ ນທີຕີຣໍ ຄນ຺ຕ຺ວາ ເຫຕຸສມ຺ປຕ຺ຕິຍາ ໂຈທິຍມາໂນ ‘‘ກິໍ ມຍ຺ຫໍ ອິມິນາ ຫຕ຺ຖິທມເນນ, ອຕ຺ຕານໍ ທມນເມວ ວຣ’’ນ຺ຕິ ຈິນ຺ເຕຕ຺ວາ ຠຄວນ຺ຕໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາວ ຈຣິຍານຸກູລໍ ກມ຺ມຏ຺ຐານໍ ຄເຫຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ຈິຣປຣິຈເຍນ ກມ຺ມຏ຺ຐານໂຕ ພຫິທ຺ຘາ ວິຘາວນ຺ຕໍ ຈິຕ຺ຕໍ ເຉໂກ ຫຕ຺ຖາຈຣິໂຍ ວິຍ ອງ຺ກຸເສນ ຈຓ຺ຑມຕ຺ຕວຣວາຣຓໍ ປຏິສງ຺ຂານອງ຺ກຸເສນ ນິຄ຺ຄຓ຺ຫນ຺ໂຕ ‘‘ອິທໍ ປຸເຣ ຈິຕ຺ຕມຈາຣິ ຈາຣິກ’’ນ຺ຕິ ຄາຖໍ ອຠາສິ.

໗໗. ຕຕ຺ຖ ອິທນ຺ຕິ ວຸຈ຺ຈມານສ຺ສ ຈິຕ຺ຕສ຺ສ ອຕ຺ຕປຈ຺ຈກ຺ຂຕາຍ ວຸຕ຺ຕໍ. ປຸເຣຕິ ນິຄ຺ຄຫກາລໂຕ ປຸພ຺ເພ. ອຈາຣີຕິ ວິຈຣິ, ອນວຏ຺ຐິຕຕາຍ ນານາຣມ຺ມເຓສຸ ປຣິພ຺ຠມິ. ຈາຣິກນ຺ຕິ ຍຖາກາມຈຣິຍໍ. ເຕນາຫ ‘‘ເຍນິຈ຺ຉກໍ ຍຕ຺ຖກາມໍ ຍຖາສຸຂ’’ນ຺ຕິ. ຕນ຺ຕິ ຕໍ ຈິຕ຺ຕໍ. ອຊ຺ຊາຕິ ເອຕຣຫິ. ນິຄ຺ຄເຫສ຺ສາມີຕິ ນິຄ຺ຄຓ຺ຫິສ຺ສາມິ, ນິພ຺ພິເສວນໍ ກຣິສ຺ສາມິ. ໂຍນິໂສຕິ ອຸປາເຍນ. ຍຖາ ກິໍ? ຫຕ຺ຖິປ຺ປຠິນ຺ນໍ ວິຍ ອງ຺ກຸສຄ຺ຄໂຫ. ອິທໍ ວຸຕ຺ຕໍ ໂຫຕິ – ອິທໍ ມມ ຈິຕ຺ຕໍ ນາມ ອິໂຕ ປຸພ຺ເພ ຣູປາທີສຸ ອາຣມ຺ມເຓສຸ ເຍນ ເຍນ ຣມິຕຸໍ ອິຈ຺ຉຕິ, ຕສ຺ສ ຕສ຺ສ ວເສນ ເຍນິຈ຺ຉກໍ, ຍຕ຺ຖ ຍຕ຺ຖ ຈສ຺ສ ກາໂມ, ຕສ຺ສ ຕສ຺ສ ວເສນ ຍຕ຺ຖກາມໍ, ຍຖາ ຍຖາ ວິຈຣນ຺ຕສ຺ສ ສຸຂໍ ໂຫຕິ, ຕເຖວ ຈຣຓໂຕ ຍຖາສຸຂໍ ທີຆຣຕ຺ຕໍ ຈາຣິກໍ ອຈຣິ, ຕໍ ອຊ຺ຊປາຫໍ ຠິນ຺ນມທມຕ຺ຕຫຕ຺ຖິໍ ຫຕ຺ຖາຈຣິຍສງ຺ຂາໂຕ ເຉໂກ ອງ຺ກຸສຄ຺ຄໂຫ ອງ຺ກຸເສນ ວິຍ ໂຍນິໂສມນສິກາເຣນ ນິຄ຺ຄເຫສ຺ສາມິ, ນາສ຺ສ ວີຕິກ຺ກມິຕຸໍ ທສ຺ສາມີຕິ. ເອວໍ ວທນ຺ໂຕ ເອວ ຈ ເຖໂຣ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ສຈ຺ຉາກາສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໓.໙໑-໙໖) –

‘‘ສຸວຓ຺ຓວຓ຺ໂຓ ສມ຺ພຸທ຺ໂຘ, ວິປສ຺ສີ ທກ຺ຂິຓາຣໂຫ;

ປຸຣກ຺ຂໂຕ ສາວເກຫິ, ອາຣາມາ ອຠິນິກ຺ຂມິ.

‘‘ທິສ຺ວານຫໍ ພຸທ຺ຘເສຏ຺ຐໍ, ສພ຺ພຎ຺ຎຸໍ ຕມນາສກໍ;

ປສນ຺ນຈິຕ຺ໂຕ ສຸມໂນ, ຄຓ຺ຐິປຸປ຺ຜໍ ອປູຊຍິໍ.

‘‘ເຕນ ຈິຕ຺ຕປ຺ປສາເທນ, ທ຺ວິປທິນ຺ທສ຺ສ ຕາທິໂນ;

ຫຏ຺ໂຐ ຫຏ຺ເຐນ ຈິຕ຺ເຕນ, ປຸນ ວນ຺ທິໍ ຕຖາຄຕໍ.

‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ເອກຕາລີສິໂຕ ກປ຺ເປ, ຈຣໂຓ ນາມ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຍເມວ ຈ ເຖຣສ຺ສ ອຎ຺ຎາພ຺ຍາກຣຓຄາຖາ ອໂຫສີຕິ.

ຫຕ຺ຖາໂຣຫປຸຕ຺ຕຕ຺ເຖຣຄາຖາວຓ຺ຓນາ ນິຏ຺ຐິຕາ.