໖. ປິຍຎ຺ຊຫຕ຺ເຖຣຄາຖາວຓ຺ຓນາ

ອຸປ຺ປຕນ຺ເຕສຸ ນິປເຕຕິ ອາຍສ຺ມໂຕ ປິຍຎ຺ຊຫຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ອິໂຕ ເອກນວຸເຕ ກປ຺ເປ ວິປສ຺ສິສ຺ສ ຠຄວໂຕ ກາເລ ຫິມວນ຺ເຕ ຣຸກ຺ຂເທວຕາ ຫຸຕ຺ວາ ປພ຺ພຕນ຺ຕເຣ ວສນ຺ໂຕ ເທວຕາສມາຄເມສຸ ອປ຺ປານຸຠາວຕາຍ ປຣິສປຣິຍນ຺ເຕ ຐຕ຺ວາ ຘມ຺ມໍ ສຸຕ຺ວາ ສຕ຺ຖຣິ ປຏິລທ຺ຘສທ຺ໂຘ ເອກທິວສໍ ສຸວິສຸທ຺ຘໍ ຣມຓີຍໍ ຄງ຺ຄາຍໍ ປຸລິນປ຺ປເທສໍ ທິສ຺ວາ ສຕ຺ຖຸ ຄຸເຓ ອນຸສ຺ສຣິ – ‘‘ອິໂຕປິ ສຸວິສຸທ຺ຘາ ສຕ຺ຖຸ ຄຸຓາ ອນນ຺ຕາ ອປຣິເມຍ຺ຍາ ຈາ’’ຕິ, ເອວໍ ໂສ ສຕ຺ຖຸ ຄຸເຓ ອາຣພ຺ຠ ຈິຕ຺ຕໍ ປສາເທຕ຺ວາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເວສາລິຍໍ ລິຈ຺ຉວິຣາຊກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ຍຸທ຺ຘໂສຓ຺ໂຑ ອປຣາຊິຕສງ຺ຄາໂມ ອມິຕ຺ຕານໍ ປິຍຫານິກຣເຓນ ປິຍຎ຺ຊໂຫຕິ ປຎ຺ຎາຍິຕ຺ຖ. ໂສ ສຕ຺ຖຸ ເວສາລິຄມເນ ປຏິລທ຺ຘສທ຺ໂຘ ປພ຺ພຊິຕ຺ວາ ອຣຎ຺ເຎ ວສມາໂນ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໓.໘໔-໙໐) –

‘‘ປພ຺ພເຕ ຫິມວນ຺ຕມ຺ຫິ, ວສາມິ ປພ຺ພຕນ຺ຕເຣ;

ປຸລິນໍ ໂສຠນໍ ທິສ຺ວາ, ພຸທ຺ຘເສຏ຺ຐໍ ອນຸສ຺ສຣິໍ.

‘‘ຎາເຓ ອຸປນິຘາ ນຕ຺ຖິ, ສງ຺ຂາຣໍ ນຕ຺ຖິ ສຕ຺ຖຸໂນ;

ສພ຺ພຘມ຺ມໍ ອຠິຎ຺ຎາຍ, ຎາເຓນ ອຘິມຸຈ຺ຈຕິ.

‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ຎາເຓນ ເຕ ສໂມ ນຕ຺ຖິ, ຍາວຕາ ຎາຓມຸຕ຺ຕມໍ.

‘‘ຎາເຓ ຈິຕ຺ຕໍ ປສາເທຕ຺ວາ, ກປ຺ປໍ ສຄ຺ຄມ຺ຫິ ໂມທຫໍ;

ອວເສເສສຸ ກປ຺ເປສຸ, ກຸສລໍ ຈຣິຕໍ ມຍາ.

‘‘ເອກນວຸຕິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ຎາຓສຎ຺ຎາຍິທໍ ຜລໍ.

‘‘ອິໂຕ ສຕ຺ຕຕິກປ຺ປມ຺ຫິ, ເອໂກ ປຸລິນປຸປ຺ຜິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ‘‘ອນ຺ຘປຸຖຸຊ຺ຊນານໍ ປຏິປຕ຺ຕິໂຕ ວິຘຸຣາ ອຣິຍານໍ ປຏິປຕ຺ຕີ’’ຕິ ອິມສ຺ສ ອຕ຺ຖສ຺ສ ທສ຺ສນວເສນ ອຎ຺ຎໍ ພ຺ຍາກໂຣນ຺ໂຕ –

໗໖. ‘‘ອຸປ຺ປຕນ຺ເຕສຸ ນິປເຕ, ນິປຕນ຺ເຕສຸ ອຸປ຺ປເຕ;

ວເສ ອວສມາເນສຸ, ຣມມາເນສຸ ໂນ ຣເມ’’ຕິ. – ຄາຖໍ ອຠາສິ;

ຕຕ຺ຖ ອຸປ຺ປຕນ຺ເຕສູຕິ ອຸຓ຺ຓມນ຺ເຕສຸ, ສຕ຺ເຕສຸ ມານຸທ຺ຘຈ຺ຈຖມ຺ຠສາຣມ຺ຠາທີຫິ ອຕ຺ຕຸກ຺ກໍສເນນ ອນຸປສນ຺ເຕສຸ. ນິປເຕຕິ ນເມຍ຺ຍ, ເຕສຎ຺ເຎວ ປາປຘມ຺ມານໍ ປຣິວຊ຺ຊເນນ ນິວາຕວຸຕ຺ຕິ ຠເວຍ຺ຍ. ນິປຕນ຺ເຕສູຕິ ໂອຓມນ຺ເຕສຸ, ຫີນາຘິມຸຕ຺ຕິກຕາຍ ໂກສຊ຺ເຊນ ຈ ຄຸຓໂຕ ນິຫີຍມາເນສຸ. ອຸປ຺ປເຕຕິ ອຸຓ຺ຓເມຍ຺ຍ, ປຓີຕາຘິມຸຕ຺ຕິກຕາຍ ວີຣິຍາຣມ຺ເຠນ ຈ ຄຸຓໂຕ ອຸສ຺ສຸກ຺ເກຍ຺ຍ. ອຖ ວາ ອຸປ຺ປຕນ຺ເຕສູຕິ ອຸຏ຺ຐຫນ຺ເຕສຸ, ກິເລເສສຸ ປຣິຍຸຏ຺ຐານວເສນ ສີສໍ ອຸກ຺ຂິປນ຺ເຕສຸ. ນິປເຕຕິ ປຏິສງ຺ຂານພເລນ ຍຖາ ເຕ ນ ອຸປ຺ປຊ຺ຊນ຺ຕິ, ຕຖາ ອນຸຣູປປຈ຺ຈເວກ຺ຂຓາຍ ນິປເຕຍ຺ຍ, ວິກ຺ຂມ຺ເຠຍ຺ຍ ເຈວ ສມຸຈ຺ຉິນ຺ເທຍ຺ຍ ຈ. ນິປຕນ຺ເຕສູຕິ ປຣິປຕນ຺ເຕສຸ, ອໂຍນິໂສມນສິກາເຣສຸ ວີຣິຍປໂຍຄມນ຺ທຕາຍ ວາ ຍຖາຣທ຺ເຘສຸ ສມຖວິປສ຺ສນາຘມ຺ເມສຸ ຫາຍ ມາເນສຸ. ອຸປ຺ປເຕຕິ ໂຍນິໂສມນສິກາເຣນ ວີຣິຍາຣມ຺ຠສມ຺ປທາຍ ຈ ເຕ ອຸປຏ຺ຐາເປຍ຺ຍ ອຸປ຺ປາເທຍ຺ຍ ວຑ຺ເຒຍ຺ຍ ຈ. ວເສ ອວສມາເນສູຕິ ສຕ຺ເຕສຸ ມຄ຺ຄພ຺ຣຫ຺ມຈຣິຍວາສໍ ອຣິຍວາສຎ຺ຈ ອວສນ຺ເຕສຸ ສຍໍ ຕໍ ວາສໍ ວເສຍ຺ຍາຕິ, ອຣິເຍສຸ ວາ ກິເລສວາສໍ ທຸຕິຍກວາສໍ ອວສນ຺ເຕສຸ ເຍນ ວາເສນ ເຕ ອວສມານາ ນາມ ໂຫນ຺ຕິ, ສຍໍ ຕຖາ ວເສ. ຣມມາເນສຸ ໂນ ຣເມຕິ ສຕ຺ເຕສຸ ກາມຄຸຓຣຕິຍາ ກິເລສຣຕິຍາ ຣມນ຺ເຕສຸ ສຍໍ ຕຖາ ໂນ ຣເມ ນໍ ຣເມຍ຺ຍ, ອຣິເຍສຸ ວາ ນິຣາມິສາຍ ຌານາທິຣຕິຍາ ຣມມາເນສຸ ສຍມ຺ປິ ຕຖາ ຣເມ, ຕໂຕ ອຎ຺ຎຖາ ປນ ກທາຈິປິ ໂນ ຣເມ ນາຠິຣເມຍ຺ຍ ວາຕິ ອຕ຺ໂຖ.

ປິຍຎ຺ຊຫຕ຺ເຖຣຄາຖາວຓ຺ຓນາ ນິຏ຺ຐິຕາ.