໑໐. ອຸຄ຺ຄຕ຺ເຖຣຄາຖາວຓ຺ຓນາ

ຍໍ ມຍາ ປກຕໍ ກມ຺ມນ຺ຕິ ອາຍສ຺ມໂຕ ອຸຄ຺ຄຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ອິໂຕ ເອກຕິໍເສ ກປ຺ເປ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສິຂິໍ ຠຄວນ຺ຕໍ ປສ຺ສິຕ຺ວາ ປສນ຺ນມານໂສ ເກຕກປຸປ຺ເຜຫິ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ອຸຄ຺ຄນິຄເມ ເສຏ຺ຐິປຸຕ຺ໂຕ ຫຸຕ຺ວາ ນິພ຺ພຕ຺ຕິ, ອຸຄ຺ໂຄຕ຺ເວວສ຺ສ ນາມໍ ອໂຫສິ. ໂສ ວິຎ຺ຎຸຕໍ ປຕ຺ໂຕ ຠຄວຕິ ຕສ຺ມິໍ ນິຄເມ ຠທ຺ທາຣາເມ ວິຫຣນ຺ເຕ ວິຫາຣໍ ຄນ຺ຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໔.໑໐-໑໖) –

‘‘ວິນຕານທິຍາ ຕີເຣ, ປິລກ຺ຂຸ ຜລິໂຕ ອຫຸ;

ຕາຫໍ ຣຸກ຺ຂໍ ຄເວສນ຺ໂຕ, ອທ຺ທສໍ ໂລກນາຍກໍ.

‘‘ເກຕກໍ ປຸປ຺ຜິຕໍ ທິສ຺ວາ, ວຓ຺ເຏ ເຉຕ຺ວານຫໍ ຕທາ;

ພຸທ຺ຘສ຺ສ ອຠິໂຣເປສິໍ, ສິຂິໂນ ໂລກພນ຺ຘຸໂນ.

‘‘ເຍນ ຎາເຓນ ປຕ຺ໂຕສິ, ອຈ຺ຈຸຕໍ ອມຕໍ ປທໍ;

ຕໍ ຎາຓໍ ອຠິປູເຊມິ, ພຸທ຺ຘເສຏ຺ຐ ມຫາມຸນິ.

‘‘ຎາຓມ຺ຫິ ປູຊໍ ກຕ຺ວານ, ປິລກ຺ຂຸມທ຺ທສໍ ອຫໍ;

ປຏິລທ຺ໂຘມ຺ຫິ ຕໍ ປຎ຺ຎໍ, ຎາຓປູຊາຍິທໍ ຜລໍ.

‘‘ເອກຕິໍເສ ອິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ຎາຓປູຊາຍິທໍ ຜລໍ.

‘‘ອິໂຕ ເຕຣສກປ຺ປມ຺ຫິ, ທ຺ວາທສາສຸໍ ຜລຸຄ຺ຄຕາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ວຏ຺ຏູປຈ຺ເຉທທີປເນນ ອຎ຺ຎໍ ພ຺ຍາກໂຣນ຺ໂຕ –

໘໐. ‘‘ຍໍ ມຍາ ປກຕໍ ກມ຺ມໍ, ອປ຺ປໍ ວາ ຍທິ ວາ ພຫຸໍ;

ສພ຺ພເມຕໍ ປຣິກ຺ຂີຓໍ, ນຕ຺ຖິ ທານິ ປຸນພ຺ຠໂວ’’ຕິ. – ຄາຖໍ ອຠາສິ;

ຕຕ຺ຖ ຍໍ ມຍາ ປກຕໍ ກມ຺ມນ຺ຕິ ຍໍ ກມ຺ມໍ ຕີຫິ ກມ຺ມທ຺ວາເຣຫິ, ຉຫິ ອຸປ຺ປຕ຺ຕິທ຺ວາເຣຫິ, ອຏ຺ຐຫິ ອສໍວຣທ຺ວາເຣຫິ, ອຏ຺ຐຫິ ຈ ສໍວຣທ຺ວາເຣຫິ ປາປາທິວເສນ ທານາທິວເສນ ຈາຕິ ອເນເກຫິ ປກາເຣຫິ ອນາທິມຕິ ສໍສາເຣ ຍໍ ມຍາ ກຕໍ ອຸປຈິຕໍ ອຠິນິພ຺ພຕ຺ຕິຕໍ ວິປາກກມ຺ມໍ. ອປ຺ປໍ ວາ ຍທິ ວາ ພຫຸນ຺ຕິ ຕຎ຺ຈ ວຕ຺ຖຸເຈຕນາປໂຍຄກິເລສາທີນໍ ທຸພ຺ພລຠາເວນ ອປ຺ປໍ ວາ, ເຕສໍ ພລວຠາເວນ ອຠິຓ຺ຫປວຕ຺ຕິຍາ ຈ ພຫຸໍ ວາ. ສພ຺ພເມຕໍ ປຣິກ຺ຂີຓນ຺ຕິ ສພ຺ພເມວ ເຈຕໍ ກມ຺ມໍ ກມ຺ມກ຺ຂຍກຣສ຺ສ ອຄ຺ຄມຄ຺ຄສ຺ສ ອຘິຄຕຕ຺ຕາ ປຣິກ຺ຂຍໍ ຄຕໍ, ກິເລສວຏ຺ຏປ຺ປຫາເນນ ຫິ ກມ຺ມວຏ຺ຏໍ ປຫີນເມວ ໂຫຕິ ວິປາກວຏ຺ຏສ຺ສ ອນຸປ຺ປາທນໂຕ. ເຕນາຫ ‘‘ນຕ຺ຖິ ທານິ ປຸນພ຺ຠໂວ’’ຕິ. ອາຍຕິໍ ປຸນພ຺ຠວາຠິນິພ຺ພຕ຺ຕິ ມຍ຺ຫໍ ນຕ຺ຖີຕິ ອຕ຺ໂຖ. ‘‘ສພ຺ພມ຺ເປຕ’’ນ຺ຕິປິ ປາໂຐ, ສພ຺ພມ຺ປິ ເອຕນ຺ຕິ ປທວິຠາໂຄ.

ອຸຄ຺ຄຕ຺ເຖຣຄາຖາວຓ຺ຓນາ ນິຏ຺ຐິຕາ.

ອຏ຺ຐມວຄ຺ຄວຓ຺ຓນາ ນິຏ຺ຐິຕາ.